Boky Voalohan'ny Makabeo

Toko faha-5

¹ Nisafoaka mafy ireo firenena manodidina, nony nandre fa hoe voavoatra indray ny otely ary vita nody amin'ny toetrany taloha indray ny fitoerana masina.

² Koa nanapa-kevitra izy ireo fa handringana ny taranak'i Jakoba nitoetra teo aminy, ary niantombohany namonoana maro izy sy nenjehiny. ³ Ny taranak'i Esao tao Idomea amin'ny tanin'ny Akrabatana aloha, no niadin'i Jodasa fa namely ny zanak'Israely; nataony resy dia resy tokoa ireo, ka naetriny sy nangalany babo.

⁴ Tsaroany koa ny haratsiam-pon'ny taranak'i Beana, izay nitsangan-ko fandrika aman-doza ho an'ny vahoaka, nanao otrika hahavoa azy teny an-dàlana; ⁵ ka notemerany tao anatin'ny tilikambony ireo, dia nataony fahirano sy nataony anatema ary nodorany ny tilikambony mbamin'izay rehetra tao anatiny. ⁶ Rahefa izany, nankany amin'ny Amonita indray izy, ka sehatra tafika iray lehibe sy vahoaka maro, fehin'i Timoteo. ⁷ Niadiany imbetsaka ireo, ka montsana teo anatrehany ary resy mihitsy. ⁸ Nalainy ny tanàna Jazera mbamin'ny vohitra momba azy; dia niverina nankany Jodea izy. ⁹ Nitambatra ireo firenena any Galaada hamely ny Israelita monina eo amin'ny faritaniny, handringanany azy, fa lasa nialoka tao amin'ny mandan' i Datemana kosa ireo.

¹⁰ Nampitondra taratasy tany amin'i Jodasa mbamin'ireo rahalahiny izy nanao hoe: Nitambatra hamely anay ho levona ireo firenena manodidina anay. ¹¹ Efa miomana ho avy haka ny manda ialofanay izy ireo izao ary Timoteo no filohan'ny tafiny. ¹² Ka avia hanafaka anay amin'ny tànan'izy ireo, fa efa nahafatesana maro be sahady izahay. ¹³ Ireo rahalahinay nonina teo amin'ny tanin'i Toba dia voavono avokoa; nentin'ny fahavalo ho babo ny vady aman-janany, lasany ny fananany, efa ho arivo lahy no matiny tao. ¹⁴ Mbola vakina eo ny taratasin'izy ireo, no nisy iraka hafa, rovi-pitafiana koa, tonga avy any Galilea, nitondra izao vaovao izao: ¹⁵ Nitambatra handringana anay ny olona avy any Ptolemaisa, Tira, Sidona, ary avy any Galilean'ny hafa firenena manontolo. ¹⁶ Nony nandre izany teny izany Jodasa sy ny vahoaka, dia nisy fivoriana lehibe, handinihana izay tokony hataony ho an'ireo rahalahiny tra-pahoriana sy asian'izany fahavalo izany.

¹⁷ Hoy Jodasa tamin'i Simona rahalahiny: Mifidiana miaramila ka mandehana manafaka ny rahalahinao any Galilea, fa izaho sy Jonatasa rahalahiko kosa, ho any Galaada. ¹⁸ Dia Josefa zanak'i Zakariasa sy Azariasa samy mpifehy vahoaka no navelany teo Jodea miaraka amin'ny miaramila sisa hiambina, ¹⁹ sy nomeny didy hoe: Entonareo ity vahoaka ity, nefa aza mandrafitra ady amin'ny firenena mandra-piverinay. ²⁰ Telo arivo lahy no notendrena hiaraka amin'i Simona ho any Galilea, ary arivo kosa no hiaraka amin'i Jodasa ho any Galaada. ²¹ Koa nankany Galilea Simona dia niady imbetsaka tamin'ny firenena, resy teo anoloany ny firenena,

²² ka nenjehiny hatrany amin'ny vavahadin'i Ptolemaisa. Sahabo ho telo arivo lahy no maty tamin'ny firenena, sady nentiny ny babo tamin'ireo. ²³ Nangoniny avokoa ny Jody tany Galilea sy Arbata, mbamin'ny vady aman-janany sy izay rehetra nananany dia nentiny ho any Jodea tamin-kafaliana lehibe. ²⁴ Ry Jodasa Makabeo sy Jonatasa rahalahiny kosa nita an'i Jordany dia nandroso làlan-kateloana tany anaty efitra.

²⁵ Nifanojo tamin'ny Nabateana izy ireo, ka noraisin'ireo tamim-pihavanana sy nitantaràny ny manjo an'ireo rahalahiny any Galaada hoe: ²⁶ Maro amin'izy ireo no voatana mihiboka ao Bosorà, Bos rà, Alima, Kasfora, Makeda ary Karnaima, tanàna lehibe samy mimanda; ²⁷ misy koa mihiboka amin'ny tanàna hafa any Galaada. Ny fahavalony dia efa mioman-kananika ireo manda ireo rahampitso sy hahazo azy ary handringana azy rehetra ireo amin'ny indray andro monja. ²⁸ Dia niova làlana Jodasa; ny làlana mankany anaty efitra no nomban'izy sy ny tafiny; ka niseho tampoka teo anoloan'i Bosora izy: nalainy ny tanàna, novonoiny tamin'ny lelan-tsabatra avokoa ny lahy tamin'ny mponina, nentiny daholo ny babo avy aminy, ary nodorany tamin'ny afo ny tanàna. ²⁹ Niala teo tamin'ny alina izy, ka nandroso hatrany amin'ny mandan'i Datemana.

³⁰ Nony maraina, nanopy ny masony izy ireo, ka nahatazana vahoaka tsy tambo isaina nitondra tohatra sy fitaovana ho enti-manafaka ny manda, ary niady tamin'ny Jody. ³¹ Rahefa hitan'i Jodasa fa efa rafitra ny ady, ary efa niakatra hatrany an-danitra ny akoran'ny mponina niaraka tamin'ny feon-trompetra, mbamin'ny horakoraka be, ³² dia hoy izy tamin'ny miaramilan'ny tafiny: Miadia anio ho an'ny rahalahinareo! ³³ Dia nandroso, nizara telo toko, teo ivohon'ny fahavalo izy, dia nampaneno ny trompetra, sady nivavaka nanao antso mafy. ³⁴ Vantany vao fantatry ny tafik'i Timoteo fa Makabeo izay, dia rifatra nandositra teo anoloany izy ireo, ka nataony nisy ra mandriaka sy resy mihitsy; sahabo ho valo arivo no lehilahy maty tamin'izy ireo androtr'izay. ³⁵ Avy ao Jodasa, dia nihodina nankany Masfa; nasiany io, dia azony, ka novonoiny ny lahy rehetra tamin'ny mponina; nentiny ny babo taminy, ary nodorany tamin'ny afo ny tanàna. ³⁶ Nandroso nandroso ihany izy, ka azony avokoa Kasfona, Makeda, Bosora, mbamin'ny tanàna hafa any Galaaditida. ³⁷ Taorian'izany, namory tafika hafa indray Timoteo, dia lasa nitoby teo an-tandrifin'i Rafona, an-dafin'iny mason-driaka.

³⁸ Naniraka hizaha io tafika io Jodasa ka izao no filazana natao taminy: Nitambatra tamin'ny miaramilan'i Timoteo avokoa ny firenena manodidina antsika, ka tonga tafika iray lehibe dia lehibe izy. ³⁹ Nosisihiny vola hanampy azy koa ny Arabo sasany, naoriny ery an-dafin'ny riaka ny tobiny, ary efa vonona ny hiady aminao izy izao. Dia nandroso hitsena azy ireo, Jodasa. ⁴⁰ Ary hoy Timoteo tamin'ireo lehiben'ny tafiny: Rahefa tonga eo amin'ny rano mandeha Jodasa mbamin'ny miaramilany, raha mita izy handroso voalohany ho ety amintsika, tsy hahatohitra azy hianareo, fa ho resiny mihitsy isika. ⁴¹ Fa raha matahotra ny hita kosa izy, ka miorin-toby eny an-dafin'ny ony, mita ho eny aminy, fa handresy azy isika. ⁴² Nony mby teo amin'ny rano mandeha Jodasa, nasainy niato teo amoron-drano ny mpanoratry ny tafika, ka nomeny didy hoe: Aza avela hisy mijanona, fa aoka handroso ho eny amin'ny ady avokoa ny olona. ⁴³ Dia nandroso nanatona ny fahavalo izy ka nita voalohany, narahin'ny vahoaka rehetra. Torotoro teo anoloany avokoa ny Jentily; narian'izy ireo ny fiadiany rehetra, dia nandositra tao amin'ny tempoly ao Karnaima izy. ⁴⁴ Fa azon'ny Jody ny tanàna, ka nodorany ny tempoly mbamin'izay rehetra tao aminy, dia voaetry Karnaima, ary tsy nahaleo an'i Jodasa intsony ny fahavalo. ⁴⁵ Nangonin'i Jodasa tamin'izay ny Israelita rehetra tany Galaada, hatramin'ny kely indrindra, ka hatramin'ny lehibe indrindra, mbamin'ny vady aman-janany sy ny ananany, izay zavon-tany, hoentiny ho any amin'ny tanin'i Jodà. ⁴⁶ Dia tonga tao Efraona, tanàna lehibe manapaka ny vavalàlana ho amin'ny tany, sy voamanda mafy; ary tsy nisy azo hiviliana na ho amin'ny an-kavanana, na ho amin'ny an-kavia, fa tsy maintsy mamaky eo afovoany.

⁴⁷ Nihiboka tao ny mponina, sady notampenany vato ny vavahady. Nandefa tenim-pihavanana tamin'izy ireo Jodasa nanao hoe: ⁴⁸ Aoka mba hahazo mamaky ny taninareo izahay hankanesanay any amin'ny taninay; tsy hisy olona hahatonga faty antoka ho anareo; fa tsy misy angatahinay afa-tsy ny handalo fotsiny ihany. Tsy nety namoha azy anefa izy ireo. ⁴⁹ Ka nasain'i Jodasa nilazana ny miaramila, mba samy haka toerana amin'izay nisy azy avy. ⁵⁰ Dia samy naka toerana ny lehilahy mpiantafika; ka nananika ny tanàna mandritra ny andro sy mandritra ny alina, dia natolotra teo an-tanany ny tanàna.