Bokin'i Daniely

Toko faha-3

⁵¹ Koa indray nidera sy nankalaza ary nisaotra an'Andriamanitra toy ny vava iray ihany izy telo lahy tao anatin'ny memy nanao hoe: ⁵² Isaorana hianao, ry Tompo, Andriamanitry ny razanay mendrika hoderaina sy homem-boninahitra ary hankalazaina mandrakizay. Isaorana ny anaranao masina sy be voninahitra, mendrika ny fiderana ambony indrindra sy ny fankalazana mandrakizay.

⁵³ Isaorana hianao ao amin'ny tempolin'ny voninahitrao masina mendrika ny dera amam-boninahitra ambony indrindra mandrakizay.

⁵⁴ Isaorana hianao, ao amin'ny seza fiandrianan'ny fanjakanao mendrika ny dera amam-pankalazana ambony indrindra mandrakizay.

⁵⁵ Isaorana hianao, izay maninteraka ny hantsana ny fijerinao mipetraka eo ambonin'ny Kerobima, mendrika ny dera amam-pankalazana ambony indrindra mandrakizay.

⁵⁶ Isaorana hianao, eo amin'ny habakabaky ny lanitra, mendrika ny dera amam-boninahitra mandrakizay.

⁵⁷ Isaorinareo rehetra ny Tompo, ry asan'ny Tompo, derao izy, ary ankalazao mandrakizay.

⁵⁸ Isaory ny Tompo, ry anjelin'ny Tompo, derao izy, ary ankalazao mandrakizay.

⁵⁹ Isaory ny Tompo, ry lanitra, derao izy, ary ankalazao mandrakizay.

⁶⁰ Isaory ny Tompo, ry rano, mbamin'izay rehetra eny ambonin'ny lanitra; derao izy ary ankalazao mandrakizay.

⁶¹ Isaory ny Tompo, ry fahefan'ny Tompo, derao izy ary, ankalazao mandrakizay.

⁶² Isaory ny Tompo, ry masoandro amam-bolana, derao izy ary, ankalazao mandrakizay.

⁶³ Isaory ny Tompo, ry kintan'ny lanitra; derao izy, ary ankalazao mandrakizay.

⁶⁴ Isaory ny Tompo, ry orana aman'ando; derao izy, ary ankalazao mandrakizay.

⁶⁵ Isaory ny Tompo, ry rivotra alefan'Andriamanitra; derao izy, ary ankalazao mandrakizay.

⁶⁶ Isaory ny Tompo, ry afo aman-kafanana; derao izy, ary ankalazao mandrakizay.

⁶⁷ Isaory ny Tompo, ry hatsiaka aman-kafanana; derao izy, ary ankalazao mandrakizay.

⁶⁸ Isaory ny Tompo, ry ando amam-panala, derao izy, ary ankalazao mandrakizay.

⁶⁹ Isaory ny Tompo, ry erika mangatsiaka amam-panala; derao izy, ary ankalazao mandrakizay.

⁷⁰ Isaory ny Tompo, ry ranomandry aman'oram-panala; derao izy, ary ankalazao mandrakizay.

⁷¹ Isaory ny Tompo, ry andro aman'alina; derao izy, ary ankalazao mandrakizay.

⁷² Isaory ny Tompo, mazava sy maizina; derao izy ary, ankalazao mandrakizay.

⁷³ Isaory ny Tompo, ry helatra aman-drahona maizina; derao izy, ary ankalazao mandrakizay.

⁷⁴ Aoka ny tany hisaotra ny Tompo, aoka izy hidera sy hankalaza azy mandrakizay.

⁷⁵ Isaory ny Tompo, ry tendrombohitra sy havoana; derao izy, ary ankalazao mandrakizay.

⁷⁶ Isaorinareo rehetra ny Tompo, ry zava-maniry amin'ny tany, derao izy, ary ankalazao mandrakizay.

⁷⁷ Isaory ny Tompo, ry loharano; derao izy, ary ankalazao mandrakizay.

⁷⁸ Isaory ny Tompo, ry ony aman-dranomasina; derao izy, ary ankalazao mandrakizay.

⁷⁹ Isaory ny Tompo, ry biby ngeza mbamin'izay mihetsiketsika rehetra ao anaty rano, derao izy ary ankalazao mandrakizay.

⁸⁰ Isaorinareo rehetra ny Tompo, ry voromanidina; derao izy, ary ankalazao mandrakizay.

⁸¹ Isaorinareo rehetra ny Tompo, ry bibidia amam-biby fiompy; derao izy, ary ankalazao mandrakizay.

⁸² Isaory ny Tompo, ry zanak'olombelona; derao izy, ary ankalazao mandrakizay.

⁸³ Aoka Israely hidera ny Tompo, aoka izy hidera sy hankalaza azy mandrakizay.

⁸⁴ Isaory ny Tompo, ry mpisoron'ny Tompo; derao izy, ary ankalazao mandrakizay.

⁸⁵ Isaory ny Tompo, ry mpanompon'ny Tompo; derao izy, ary ankalazao mandrakizay.

⁸⁶ Isaory ny Tompo, ry fanahy amam-panahin'ny marina; derao izy, ary ankalazao mandrakizay.

⁸⁷ Isaory ny Tompo, ry olo-masina sy hianareo manetry tena ao am-po; derao izy, ary ankalazao mandrakizay.

⁸⁸ Isaory ny Tompo, ry Ananiasa sy Azariasa sy Misaely; derao izy, ary ankalazao mandrakizay. Fa nanesotra antsika tamin'ny seoly izy, ary nanafaka antsika tamin'ny herin'ny fahafatesana; namonjy antsika tamin'ny memin'ny afo mivaivay izy; ary nanesotra antsika teo afovoan'ny afo.

⁸⁹ Ankalazao ny Tompo, fa tsara fo izy; fa maharitra mandrakaizay ny famindram-pony.

⁹⁰ Hianareo rehetra, olona tia vavaka; misaora ny Tompo, Andriamanitry ny andriamanitra; derao izy ary ankalazao, fa maharitra mandrakizay ny famindram-pony. (Teny tsy hita tamin'ny hebrio ireo tapitra eto ireo, fa ny dikany nataonay teto dia avy amin'ny boky navoakan'i Teodotiona)

⁹¹ Talanjona loatra tamin'izay Nabokodonozora mpanjaka, ka nitsangana faingana. Niteny izy ka nanao amin'ireo mpanolo-tsainy hoe: Tsy olona telo lahy nifatotra va no natsipitsika tao anatin'ny memy? Dia hoy ny navalin'ireo ny mpanjaka: Izany tokoa, ry mpanjaka. Ary hoy izy niteny indray: Izaho anefa, indreo, mahita efa-dahy tsy mifatotra,

⁹² mandehandeha ao afovoan'ny afo, tsy misy manino-maninona akory, ary ny fijery an'ilay fahefatra hoatra ny zanak'andriamanitra. ⁹³ Dia nanatona ny varavaran'ny memy mirehitra mivaivay Nabokodonozora, ka dia niteny izy nanao hoe: Ry Sidraka sy Misaka sy Adbenegao, mpanompon'Andriamanitra avo indrindra, mivoaha ary avia. Dia nivoaka avy ao afovoan'ny afo, Sidraka sy Misaka ary Abdenegao. ⁹⁴ Ary nivory ny solom-panjaka, ny masoivoho, ny governora mbamin'ny mpanolo-tsain'ny mpanjaka, nijery ireto olona, ka tsy nahefa na inona na inona tamin'ny vatany ny afo, tsy nisy may ny volon-dohany, tsy niova akory ny akanjony, na nisy fofon'afo akory. ⁹⁵ Niteny Nabokodonozora ka nanao hoe: Isaorana anie ny Andriamanitr'i Sidraka sy Misaka sy Adbenegao, fa naniraka ny anjeliny hamonjy ny mpanompony izay natoky azy sy nandika ny didin'ny mpanjaka, ary nanolo-tena mba tsy hanompo na hitsaoka andriamani-kafa hafa-tsy ny Andriamaniny ihany.

⁹⁶ Ka izao no lalàna avoaka amin'ny anarako: Ny olona rehetra na inona fokony, na inona fireneny amam-piteniny, izay miteny ratsy ny Andriamanitr'i Sidraka sy Misaka sy Abdenegao, dia hotetehina madinika, sady hatao fanarian-java maloto ny tranony, satria tsy misy andriamani-kafa mahay mamonjy hoatra izany. ⁹⁷ Tamin'izay ny mpanjaka, nanambina an'i Sidraka sy Misaka ary Abdenegao, teo amin'ny faritanin'i Babilona.

⁹⁸ Ho an'ny foko sy firenena amam-piteny samihafa rehetra Nabokodonozora mpanjaka. Homena fiadanam-be anie hianareo.

⁹⁹ Noheveriko ho mety ny manambara ny famantarana amam-pahagagana nataon'Andriamanitra avo indrindra tamiko. ¹⁰⁰ Akory ny halehiben'ny famantarany; akory ny herin'ny fahagagany! Fanjakana mandrakizay ny fanjakany: ary maharitra amin'ny taona mifandimby ny fanapahany.