Eksaody

Toko faha-34

⁶ Ary nandalo teo anatrehany Iaveh sady niantso hoe: Iaveh! Iaveh! Andriamanitra mamindra fo sy miantra, mahari-po sy be hatsaram-po amam-pahamarinana; ⁷ mitahiry ny fitiany hatramin'ny taranaka faharivo, mamela heloka amam-pikomiana sy fahotana, nefa tsy avelany ho afa-maina ireny, fa ny heloky ny ray valiany amin'ny zanaka sy ny zafy, hatramin'ny taranaka fahatelo sy ny taranaka fahefatra. ⁸ Niondrika tamin'ny tany niaraka tamin'izay Moizy, dia niankohoka, ⁹ nanao hoe: Raha nahita fitia teo imasonao aho, ry Tompo, aoka re mba hiaraka aminay ny Tompo, fa vahoaka mafy hatoka izy. Avelao ny heloka amam-pahotanay, ary raiso ho lovanao izahay. ¹⁰ Dia hoy Iaveh: Indro manao fanekem-pihavanana aho: Hanao zava-mahagaga eo anatrehan'ny vahoakanao rehetra aho; ka tsy mbola nisy nanaovana toy izany, na tany aiza na tany aiza, na firenena aiza na firenena aiza; ka ny vahoaka manodidina anao hahita ny asan'ny Tompo; fa mahatsiravina tokoa ny zavatra hataoko miaraka aminao. ¹¹ Tandremo izao andidiako anao anio izao: Indro horoahiko eo anoloanao ny Amoreana, ny Kananeana, ny Heteana, ny Ferezeana, ny Heveana ary ny Jeboseana.

¹² Tandremo fandrao manao fanekem-pihavanana amin'ny mponina amin'ny tany izay ndeha hiadianao, sao ho zary fandrika eo afovoanao ireny. ¹³ Fa horavanareo ny oteliny; hazeranareo ny tsangam-batony; hokapainareo ny aserimany. ¹⁴ Aza mivavaka amin'andriamani-kafa, fa Iaveh dia saro-piaro no anarany; satria Andriamanitra saro-piaro izy. ¹⁵ Koa aza manao fanekena amin'ny mponina amin'ny tany, fandrao, rahefa mitolo-tena amin'ny andriamaniny ireny sy manolo-tsorona aminy, dia asainy koa hianao sy hihinana amin'ny sorony; ¹⁶ fandrao koa maka ny zanany vavy ho an'ny zanakao lahy hianao, ka nony mitolo-tena amin'ny andriamaniny ireny zanany vavy ireny, dia ho voatariny mbamin'ny zanakao lahy hitolo-tena amin'ny andriamaniny koa. ¹⁷ Aza manao andriamanitra anidina ho anao.

¹⁸ Tandremo ny fetin'ny Azima. Hafitoana no hihinananao mofo tsy misy lalivay, araka ny nandidiako anao, amin'ny fotoana voafetra amin'ny volana abiba, satria tamin'ny volana abiba no nivoahanao tany Ejipta.

¹⁹ Ahy ny lahy voalohan-teraka rehetra; toy izany koa, ny lahy voalohan-teraky ny biby ompiana rehetra, na omby na ondry.

²⁰ Zanak'ondry no hanavotanao ny voalohan-teraky ny ampondra; na hofolahinao ny hatony raha tsy havotanao izy. Havotanao ny lahimatoa rehetra amin'ny zanakao; ary aza miseho eo anatrehako tsy mitondra fanatitra hianao. ²¹ Ny andro enina no hiasanao; fa ny andro fahafito kosa hitsaharanao, na dia amin'ny taom-piasana tany amam-pamorim-bokatra aza.

²² Hankalazainao ny fetin'ny Herinandro, ny voaloham-bokatra amin'ny fijinjam-bary, ary ny fetin'ny fampakaram-bokatra amin'ny faran'ny taona.

²³ Intelo isan-taona no hisehoan'ny lehilahy rehetra eo anatrehan'ny Tompo Tompo, Andriamanitr'Israely.

²⁴ Fa handroaka ny firenena eo anoloanao aho, ary hanitatra ny faritry ny taninao. Tsy hisy olona handrembona ny taninao, mandritra ny hiakaranao hiseho eo anatrehan'ny Tompo Andriamanitrao, intelo isan-taona. ²⁵ Tsy hiara-katolotra amin'ny mofo misy lalivay ny ran'ny sorona atao amiko; ary tsy hotehirizina mandritra ny alina ho tra-maraina ny sorona amin'ny fetin'ny Paka.

²⁶ Atero ao an-tranon'ny Tompo Andriamanitrao ny santatry ny voaloham-bokatry ny taninao. Aza mahandro zanak'osy amin'ny rononon-dreniny.

²⁷ Dia hoy Iaveh tamin'i Moizy: Soratinao ireo teny ireo, fa araka ireo teny ireo no anaovako fanekena aminao sy amin'Israely.

²⁸ Efapolo andro sy efapolo alina Moizy no tao amin'ny Tompo tao; tsy nihina-mofo na nisotro rano akory. Ary nosoratan'ny Tompo tamin'ireo takelaka ny tenin'ny fanekem-pihavanana dia ny teny folo. ²⁹ Nidina avy any an-tendrombohitra Sinaia Moizy, ary Moizy nitondra ny takelaka roan'ny vavolombelona teny an-tànany nony nidina avy any an-tendrombohitra; ary tsy fantatr'i Moizy fa tonga mpandefa tsirim-pahazavana ny hodi-tavany, nandritra ny niresahany tamin'ny Tompo.

³⁰ Aarona sy ny zanak'Israely rehetra nahita an'i Moizy ka indro nandefa tsirim-pahazavana ny hodi-tavany dia natahotra ny hanatona azy izy ireo. ³¹ Nantsoin'i Moizy ireo, ka nanatona azy Aarona sy ny loholona rehetra amin'ny fiangonana ka niresaka tamin'ireo izy. ³² Vao izay vao nanatona koa ny zanak'Israely rehetra, ka nomeny azy ny didy rehetra noraisiny tamin'ny Tompo tany an-tendrombohitra Sinaia. ³³ Nony avy niteny Moizy dia nosaronany voaly ny tarehiny. ³⁴ Raha niditra eo anatrehan'ny Tompo Moizy hiresaka aminy dia nesoriny ny voaly, mandra-pivoakany. Rahefa izany dia nivoaka izy ary nanambara tamin'ny zanak'Israely ny didy azony.

³⁵ Hitan'ny zanak'Israely ny tarehin'i Moizy, fa nandefa tsirim-pahazavana ny hodi-tavan'i Moizy, ka dia saronan'i Moizy voaly indray ny tarehiny mandra-pidiny hiresaka amin'ny Tompo.

Toko faha-35

¹ Ary novorin'i Moizy ny fiangonan'Israely rehetra ka nilazany hoe: Izao no zavatra nodidian'ny Tompo hatao:

² Ny andro enina no hiasanareo fa ny andro fahafito dia ho andro voatokana eo aminareo, andro fitsaharana amin'ny asa rehetra hankalazana an'ny Tompo. Izay manao taozavatra amin'io andro io dia hohelohin-ko faty. ³ Tsy hisy hampirehetana afo ny tranonareo amin'ny sabata. ⁴ Niteny tamin'ny fiangonan'ny zanak'Israely rehetra Moizy ka nanao hoe: Izao no nodidian'ny Tompo hatao:

⁵ Manokàna zavatra hatolotra ho an'ny Tompo amin'ny fanananareo. Na iza na iza mazoto fo dia hitondra zavatra haterina amin'ny Tompo, dia volamena, volafotsy, varahina, ⁶ jaky volomparasy, jaky mangatrakatraka, lamba mena antitra; rongony madinika, volon'osy, ⁷ hoditr'ondralahy voasoka mena, hodi-dogaona, hazo akasià, ⁸ diloilo hatao amin'ny fanaovan-jiro, zava-manitra hatao amin'ny diloilo fanosorana, sy ny zava-manitra fanembohana; ⁹ vato berila, sy vato fandatsaka an-tranontranony hatao amin'ny efoda sy ny saron-tratra. ¹⁰ Aoka hanatona izay rehetra manam-pahaizana aminareo hanao izay rehetra nasain'ny Tompo hatao: ¹¹ ny Fonenana, ny lainy amam-pirakony, ny masom-bolany, ny hazo-fisany, ny barany, ny andriny, ny faladiany; ¹² ny fiara mbamin'ny baony; ny fanaovam-panavotana, ny efitra lamba, ¹³ ny latabatra mbamin'ny baony amam-panaka rehetra momba azy, ny mofo alahatra, ¹⁴ ny fanaovan-jiro mbamin'ny fanaka aman-dalampy momba azy, ny diloilo hatao amin'ny fanaovan-jiro; ¹⁵ ny otely fandoroan-java-manitra mbamin'ny baony, ny diloilo fanosorana, ny zava-manitra fanembohana, ny varavarana lamba amin'ny fidirana ho ao amin'ny Fonenana, ¹⁶ ny otely fanaovan-tsorona dorana mbamin'ny harato varahina aminy, ny baony, ny fanaka rehetra momba azy, ary ny tavy amam-paladiany; ¹⁷ ny fefy lamba amin'ny kianja mbamin'ny andriny, ny faladiany, ary ny vavahady lamba amin'ny kianja; ¹⁸ ny tsimatry ny Fonenana sy ny tsimatry ny kianja mbamin'ny kofehiny; ¹⁹ ny fanamiana fitondra raha manao fanompoam-pivavahana ao amin'ny fitoerana masina, ny fanamiana masina ho an'i Aarona mpisorona sy ny fanamian'ireo zanany fitondrany raha manao raharaham-pisoronana. ²⁰ Nony nirava avy eo anatrehan'i Moizy ny fiangonan'ny zanak'Israely rehetra,