Levitika
Toko faha-8
36 Dia nataon'i Aarona sy ny zanany ny zavatra rehetra nandidian'ny Tompo tamin'ny alàlan'i Moizy.Toko faha-9
1 Nony mby amin'ny andro fahavalo, nampanalain'i Moizy Aarona sy ny zanany ary ny loholon'Israely,2 ka hoy izy tamin'i Aarona: Makà hianao zanak'omby tanora hatao sorona noho ny ota, sy ondralahy iray hatao sorona dorana izay samy tsy manan-kilema, ka atolory eo anatrehan'ny Tompo. 3 Ary mitenena amin'ny zanak'Israely lazao hoe: Makà hianareo osilahy iray, hatao sorona noho ny ota; ary zanak'omby iray, sy zanak'ondry iray, samy efa iray taona sy tsy misy kilema avy, hatao sorona dorana; 4 omby iray sy ondralahy iray hatao sorom-pihavanana, hovonoina eo anatrehan'ny Tompo, ary fanatitra voaharo diloilo. Fa hiseho aminareo anio Iaveh. 5 Dia nentin'izy ireo, ho eo anoloan'ny trano lay fihaonana izay rehetra nandidian'i Moizy azy, ary nanatona avokoa ny fiangonana rehetra ka nijanona teo anatrehan'ny Tompo.
6 Ary hoy Moizy: Ataovy izay andidian'ny Tompo anareo, ka hiseho aminareo ny voninahitry ny Tompo. 7 Dia hoy Moizy tamin'i Aarona: Manatòna ny otely ka atolory ny sorona noho ny ota sy ny sorona dorana, ka manaova ny fanonerana ho an'ny tenanao sy ho an'ny vahoaka; atolory koa ny fanatitry ny vahoaka, ary manaova ny fanonerana ho azy araka ny nandidian'ny Tompo. 8 Dia nanatona ny otely Aarona, namono ny zanak'omby hatao sorona noho ny ota, hatolotra ho an'ny tenany.
9 Ary natolotr'ireo zanak'i Aarona azy ny rà, ka natsobony tao ny rantsan-tànany, notentenany ny tandroky ny otely, ary naidiny teo an-tongotry ny otely ny rà. 10 Nodorany hanetona eo ambonin'ny otely ny saborany, ny voany, ny saron'atiny, tamin'ny sorona noho ny ota, araka ny nandidian'ny Tompo an'i Moizy. 11 Fa ny nofony aman-kodiny kosa, nodorany tamin'ny afo tany ivelan'ny toby. 12 Novonoiny koa ny sorona dorana ka nony natolotr'ireo zanak'i Aarona azy ny rà, dia naidiny manodidina tamin'ny otely.
13 Natolotr'ireo azy indray, ny sorona dorana voatetika, mbamin'ny lohany, dia nodorany hanetona eo ambonin'ny otely. 14 Ary nosasany ny tsinainy aman-tongony, dia nodorany hanetona eo ambonin'ny otely tambonin'ny sorona dorana. 15 Nanolotra ny fanatitry ny vahoaka izy. Nalainy ny osilahy hatao sorona noho ny ota atolotra ho an'ny vahoaka, dia novonoiny ary natolony ho fanonerana torak'ilay sorona voalohany.
16 Natolony koa ny sorona dorana, ary novonoiny araka ny fomba fanaovana azy. 17 Ary natolony ny fanatitra: nakany eran-tànan'ila, nodorany ambonin'ny otely fanampin'ny sorona dorana maraina. 18 Novonoiny ny ombalahy aman'ondralahy hatao sorom-pihavanana ho an'ny vahoaka. Natolotr'ireo zanak'i Aarona azy ny rà, ka dia naidiny manodidina amin'ny otely. 19 Natolony koa ny tavin'ombalahy aman'ondralahy, ny hofany, ny sabora saron-tsinainy, ny voany, ary ny saron'atiny; 20 napetrany teo ambonin'ny tratran'izy ireo ny saborany; dia nodoran'i Aarona hanetona eo ambonin'ny otely ny sabora. 21 Rahefa izany dia nahevahevan'i Aarona teo anatrehan'ny Tompo ny tratran'ireo amam-peny havanana, ho fanatitra ahevaheva, araka ny nandidian'i Moizy. 22 Dia nasandratr'i Aarona manandrify ny vahoaka ny tànany, ka nitso-drano azy izy; ary nidina izy, nony avy nanolotra ny sorona noho ny ota sy ny sorona dorana ary ny sorom-pihavanana.
23 Niditra tao an-trano lay fihaonana Moizy sy Aarona; nony nivoaka avy ao izy ireo, dia nitso-drano ny vahoaka. Ary niseho tamin'ny vahoaka rehetra ny voninahitry ny Tompo. 24 Ary nisy afo nivoaka avy eo anatrehan'ny Tompo nandevona ny sorona dorana mbamin'ny sabora teo ambonin'ny otely. Ary nahita izany daholo ny vahoaka rehetra, dia nihoby an-kafaliana sady rafitra niankohoka.
Toko faha-10
1 Ary Nabada sy Abiò, zanak'i Aarona, samy naka ny fanembohany avy dia nanisy afo tao anatiny, sy nametraka zava-manitra teo amboniny, dia nitondra afo hafa teo anatrehan'ny Tompo, nefa tsy nahazo didy momba izany izy.2 Ka nisy afo nivoaka teo anatrehan'ny Tompo nandevona azy ireo, any ka maty teo anatrehan'ny Tompo izy ireo. 3 Dia hoy Moizy tamin'i Aarona: Efa voalazan'ny Tompo izany tamin'izy nanao hoe: Hohamasinina aho ao amin'izay manakaiky ahy, ary homem-boninahitra eo anatrehan'ny vahoaka rehetra. Sina Aarona. 4 Ary Moizy niantso an'i Misaela sy Elisafona, zanak'i Oziela, rahalahin-drain'i Aarona, nilaza tamin'ireo hoe: Manatòna hianareo ka ento ny rahalahinareo hanalavitra ny fitoerana masina, any ivelan'ny toby. 5 Dia nanatona ireo ka nitondra azy mbola miakanjo ny tonikiny, nankany ivelan'ny toby, araka ny nandidian'i Moizy azy.
6 Hoy Moizy tamin'i Aarona sy Eleazara ary Itamara: Aza avalenareo hirakaraka foana ny volon-dohanareo, ary aza triarinareo ny fanamianareo, fandrao dia maty hianareo, ary ho tratry ny hatezeran'ny Tompo ny fiangonana rehetra. Ny rahalahinareo sy ny taranak'Israely rehetra no aoka hitomany noho izao fandoroana narehitry ny Tompo izao.
7 Fa hianareo kosa aza mivoaka ny varavaran'ny trano lay fihaonana akory, fandrao dia maty hianareo, satria efa mby ao aminareo ny diloilo fanosoran'ny Tompo. Dia nataon'izy ireo izay nolazain'i Moizy. 8 Ary Iaveh niteny tamin'i Aarona nanao hoe:
9 Aza misotro divay na fisotro mahamamo hianao, sy ny zanakao koa, rahefa hiditra ao an-trano lay fihaonana, mba tsy hahafaty anareo; 10 sady hahaizanareo manavaka ny masina sy ny tsy masina, ny madio sy ny tsy madio, 11 ary mba hahaizanareo mampianatra ny zanak'Israely ny lalàna rehetra nomen'ny Tompo azy ireo, tamin'ny alàlan'i Moizy. 12 Dia hoy Moizy tamin'i Aarona sy tamin'ireo zanak'i Aarona, roa lahy sisa, Eleazara sy Itamara: Alao ny fanatitra sisa avy amin'ny sorona natao tamin'ny afo ho an'ny Tompo, ka hano tsy misy lalivay, eo akaikin'ny otely, fa zava-masina dia masina izany.
13 Hano eo amin'ny fitoerana masina izany, fa anjaranao, sy anjaran'ireo zanakao, avy amin'ny fanatitra atao amin'ny afo ho an'ny Tompo, araka ny didy azoko. 14 Eo amin'izay toerana madio koa no hihinananao sy ny zanakao lahy aman-janakao vavy, ny tratrany nahevaheva sy ny feny navahana, fa ireo didiny ireo dia omena ho anjaranao sy anjaran'ny zanakao, avy amin'ny sorom-pihavanana ataon'ny zanak'Israely. 15 Hoentin'izy ireo ho fanampin'ny sabora voatokana hodorana amin'ny afo, ny feny avahana sy ny tratrany ahevaheva, mba hahevaheva eo anatrehan'ny Tompo; dia ho anjaranao sy ny zanakao izany, noho ny lalàna tsy tapaka araka ny didin'ny Tompo. 16 Ary Moizy nanadina ny amin'ny osilahy natao sorona noho ny ota, ka indro efa voadotra izany; ka tezitra tamin'i Eleazara sy Itamara hany sisa zanakalahin'i Aarona izy, sy nanao tamin'izy ireo hoe:
17 Nahoana no tsy nohaninareo, teo amin'ny fitoerana masina, ny sorona noho ny ota? Fa zava-masina dia masina izany, ary nomen'ny Tompo anareo, mba hitondranareo ny otan'ny fiangonana sy hanaovanareo ny fanonerana ho azy, eo anatrehan'ny Tompo. 18 Ka indro izao fa ny ràn'ny sorona tsy nentina tao anatin'ny fitoerana masina; hianareo koa, tokony ho nihinana azy, teo amin'ny toerana masina, araka ny nandidiako azy. 19 Fa hoy Aarona tamin'i Moizy: Izy ireo androany dia efa nanatitra ny sorony noho ny ota sy ny sorony dorana, teo anatrehan'ny Tompo; fa izaho kosa, noho ny nanjò ahy, moa ho nankasitrahana teo imason'ny Tompo aho, raha nihinana ny sorona noho ny ota androany? 20 Nony nandre izany teny izany Moizy dia nankasitraka izany.
Toko faha-11
1 Ary niteny tamin'i Moizy sy Aarona Iaveh nanao tamin'izy ireo hoe:2 Mitenena amin'ny zanak'Israely ka lazao hoe: Izao no ho biby fihinanareo amin'ny biby rehetra eto ambonin'ny tany: 3 Ny biby rehetra mivaky kitro sy misampan-tongotra ary mandinika no hohaninareo; 4 fa ny mandinika fotsiny na mivaky kitro fotsiny tsy hohaninareo. Ohatra ny rameva, izay mandinika nefa tsy mivaky kitro, dia ho maloto aminareo. 5 Ohatra ny zerboaza, izay mandinika fa tsy mivaky kitro, dia ho maloto aminareo.