Levitika

Toko faha-18

² Mitenena amin'ny zanak'Israely ka lazao aminy hoe: Izaho no Iaveh Andriamanitrareo. ³ Aza manao toy ny ataon'ny any amin'ny tany Ejipta izay nonenanareo, ary aza manao toy ny ataon'ny any amin'ny tany Kanaana, izay hitondrako anareo; aza manaraka ny lalàn'ireny hianareo. ⁴ Ny fitsipiko no harahinareo, ary ny lalàko no hotandremanareo, ka harahinareo izany, fa izaho no Iaveh Andriamanitrareo. ⁵ Tandremo ny lalàna amam-pitsipiko, fa ny olona manaraka izany, no ho velona amin'izany. Izaho no Iaveh. ⁶ Aza misy manatom-behivavy, havany akaiky, mba hanokatra ny fitanjahany. Izaho no Iaveh.

⁷ Aza manokatra ny fitanajahan-drainao, na ny fitanjahan-dreninao, fa reninao izy, ka aza manokatra ny fitanjahany. ⁸ Aza manokatra ny fitanjahan-drenikelinao, fa fitanjahan-drainao izany. ⁹ Aza manokatra ny fitanjahan'ny anabavinao, zana-drainao, na zana-dreninao, teraka tao an-trano, na teraka tany ivelany; aza manokatra ny fitanjahany. ¹⁰ Aza manokatra fitanjahan'ny zanakavavin'ny zanakao lahy, na ny zanakavavin'ny zanakao vavy, fa fitanjahanao izany. ¹¹ Aza manokatra ny fitanjahan'ny zanakavavin'ny vadin-drainao natera-drainao, fa anabavinao izy. ¹² Aza manokatra ny fitanjahan'ny anabavin-drainao, fa nofon-drainao izany. ¹³ Aza manokatra ny fitanjahan'ny rahavavin-dreninao, fa nofon-dreninao izany. ¹⁴ Aza manokatra ny fitanjahan'ny rahalahin-drainao amin'ny fakana ny vadiny, fa anabavin-drainao izy. ¹⁵ Aza manokatra ny fitanjahan'ny vinantovavinao, fa vadin-janakao izy. Aza manokatra ny fitanjahany. ¹⁶ Aza manokatra ny fitanjahan'ny vadin-drahalahinao, fa fitanjahan'ny rahalahinao izany. ¹⁷ Aza manokatra ny fitanjahan'ny vehivavy aman-janany vavy, aza maka ny zanakavavin'ny zanany lahy, na ny zanakavavin'ny zanany vavy, mba hanokatra ny fitanjahany, fa mpihavana akaiky izy, ka mahameloka. ¹⁸ Aza maka ny rahavavin'ny vadinao ho rafiny, amin'ny fanokafana ny fitanjahany sy ny an'ny vadinao izay mbola velona. ¹⁹ Aza manatom-behivavy mandritra ny fahalotoam-padim-bolany mba hanokatra ny fitanjahany.

²⁰ Aza mikambana amin'ny vadin'ny namanao, handoto tena aminy. ²¹ Aza misy omenao hatolotra hodorana hankalazana an'i Moloka ny zanakao; aza mametaveta ny anaran'ny Andriamanitrao. Izaho no Iaveh. ²² Aza mandry amin-dehilahy toy ny fandry amim-behivavy, fa fahavetavetana izany. ²³ Aza mandry amin'ny biby handoto tena aminy. Aoka ny vehivavy tsy hijanona eo anoloan'ny biby handoto tena aminy, fa zava-mahamenatra izany. ²⁴ Aza mandoto tena amin'ireo zavatra ireo, na dia iray aza, fa tamin'ireo no nandoto tena ny firenena horoahiko eo anoloanareo.

²⁵ Voaloto ny tany, ka hovaliako ny helony, ary haloan'ny tany ny mponina eo aminy. ²⁶ Fa hianareo kosa, hitandrina ny lalàna amam-pitsipiko, ka tsy hanao amin'ireo fahavetavetana ireo, na dia iray aza, na hianareo tompon-tany na ny vahiny mitoetra eo afovoanareo. ²⁷ Fa ireo fahavetavetana rehetra ireo, no nataon'ny olon'izany tany izany, izay nonina tao talohanareo, ka izany no nahaloto ny tany. ²⁸ Ary hianareo tsy mba haloan'ny tany amin'ny fandotoana azy, toy ny nandoavany an'ireo firenena izay tao talohanareo; ²⁹ satria hofongorana amin'ny fireneny izay rehetra manao ireo fahavetavetana ireo, na dia iray aza. ³⁰ Tandremo ny didiko mba tsy hanatanterahanareo na inona na inona amin'ireo fomba vetaveta fanao talohanareo, ka tsy handotoanareo ny tenanareo amin'izany. Izaho no Iaveh Andriamanitrareo.

Toko faha-19

¹ Ary Iaveh niteny tamin'i Moizy nanao hoe:

² Mitenena amin'ny fiangonan'Israely rehetra, lazao aminy hoe: Aoka ho masina hianareo, satria masina aho, Iaveh Andriamanitrareo. ³ Samia matahotra ny reninareo sy ny rainareo, ary tandremo ny sabatako. Izaho no Iaveh Andriamanitrareo.

⁴ Aza mitodi-doha amin'ny sampy; ary aza manao andriamanitra anidina ho anareo. Izaho no Iaveh Andriamanitrareo.

⁵ Raha manatitra sorom-pihavanana amin'ny Tompo hianareo, ataovy arak'izay hahazoanareo sitraka aminy, izany.

⁶ Izay andro hamonoana ny sorona, na ny ampitson'izay, no hihinanana azy; izay sisa tratry ny andro fahatelo, dia hodorana amin'ny afo. ⁷ Raha misy mihinana amin'izany amin'ny andro fahatelo, dia fahavetavetana izany, ka tsy hankasitrahana ny sorona. ⁸ Ary izay mihinana azy amin'izany, dia hilonjy ny helony, fa mametaveta ny zava-boahasina ho an'ny Tompo, ka hofongorana amin'ny fireneny izany olona izany. ⁹ Raha mijinja ny vokatry ny taninareo hianareo, aza mijinja ny sahanao hatrany am-paran'ny sisiny indrindra, ary aza fakoinao izay mbola hotsimponin'ny hafa amin'ny varinao.

¹⁰ Aza mioty ny salohiny tavela amin'ny voalobokao; ary aza mitsimpona ny voankazo latsaka amin'ny sahanao; fa avelao izany ho an'ny mahantra sy ny vahiny. Izaho no Iaveh Andriamanitrareo. ¹¹ Aza mangalatra, aza mifamitaka na mifandainga hianareo.

¹² Aza mianian-tsy tò amin'ny anarako, fa fanamavoana ny anaran'Andriamanitrao izany. Izaho no Iaveh.

¹³ Aza mampahory ny namanao, na manendaka azy. Aza tànanao miloak'alina ny karaman'ny mpikarama.

¹⁴ Aza manozona ny marenina, na mametraka eo alohan'ny jamba izay zavatra mety hamotraka azy, fa matahora an'Andriamanitrao. Izaho no Iaveh.

¹⁵ Aza manao ny tsy rariny amin'ny fitsarana: ny mahantra aza ananana tombom-pitia, ny manan-karena aza ananana fankasitrahana, fa ny rariny ihany no hitsaranao ny namanao.

¹⁶ Aza manely fanaratsiana eo amin'ny firenenao. Ary aza mitsangan-ko vavolombelona handatsaka ny ràn'ny namanao. Izaho no Iaveh.

¹⁷ Aza mankahala ny rahalahinao ao am-ponao, fa mananara ny namanao, mba tsy hahazoanao heloka noho ny aminy.

¹⁸ Aza mamaly ratsy, na manao an-dolom-po amin'ny zanaky ny firenenao. Fa tiavo ny namanao tahaka ny tenanao. Izaho no Iaveh. ¹⁹ Tandremo ny didiko. Aza mampivady biby samihafa karazana; aza mamafy voan-javatra roa karazana amin'ny tanimbolinao, ary aza mitafy fitafiana voatenona tamin'ny kofehy roa karazana.

²⁰ Raha misy lehilahy mandry sy miray amim-behivavy andevon'olona ka efa voafofon-dehilahy hafa, nefa mbola tsy voavotra na afaka, dia hofaizina izy roroa, nefa tsy hohelohin-ko faty, satria tsy olona afaka ravehivavy.

²¹ Ary ho sazin'ny fahotany dia hoentin-dralehilahy amin'ny Tompo ny ondralahy iray eo anoloan'ny varavaran'ny trano lay fihaonana hatao sorona fanonerana.