Levitika

Toko faha-21

⁸ Hataonao ho masina izy, fa manolotra ny mofon'ny Andriamanitrao, ka ho masina ho anao, satria masina aho Iaveh, izay manamasina anareo. ⁹ Raha zanakavavin'ny mpisorona no manala bara-tena mijangajanga dia manala baraka an-drainy izy, ka hodorana amin'ny afo. ¹⁰ Ny mpisorona lehibe izay ambonin'ireo rahalahiny, izay nampidinana ny diloilo fanosorana ny lohany, sy voatokana hitafy ny fanamiana masina, tsy hanala satroka ny lohany, na handriatra ny fitafiany.

¹¹ Tsy hiditra am-paty izy ka tsy handoto ny tenany, na amin'ny rainy na amin'ny reniny. ¹² Tsy hivoaka ny fitoerana masina izy, tsy hametaveta ny fitoerana masin'ny Andriamaniny, fa fehiloha voninahitra ao aminy ny diloilo masin'ny Andriamaniny. Izaho no Iaveh. ¹³ Izay mbola virjiny no halainy ho vady. ¹⁴ Tsy haka ho vady ny efa maty vady, na ny vehivavy efa voasaotra, na ny vehivavy efa afa-baraka, na ny mpijangajanga, fa izay mbola virjiny eo amin'ny fireneny ihany, no halainy ho vady. ¹⁵ Tsy hanao izay hanala baraka ny taranany eo amin'ny fireneny izy, fa izaho no Iaveh manamasina azy. ¹⁶ Ary niteny tamin'i Moizy Iaveh nanao hoe:

¹⁷ Mitenena amin'i Aarona ka lazao hoe: Tsy hisy hanatona hanolotra ny mofon'ny Andriamanitrao, izay olona rehetra manan-kilemam-batana, amin'ny taranakao hatramin'ny fara mandimby. ¹⁸ Fa izay manan-kilemam-batana na iza na iza, dia tsy hanatona: na olona jamba, na mandringa, na izay nahafahana, na izay manan'amby; ¹⁹ na olona misy tapaka amin'ny tongony na amin'ny tànany, ²⁰ izay vokoka, na zeny, na mipentina ny masony, izay hatenina, izay anakandroana, ny torotoro vihy. ²¹ Tsy hisy hanatona hanolotra ny sorona atao amin'ny afo ho an'ny Tompo ny olon-drehetra amin'ny taranak'i Aarona mpisorona, izay manan-kilemam-batana, fa manan-kilemam-batana izy, ka aza manatona izy hanolotra ny mofon'ny Andriamaniny. ²² Azony hanina ihany ny mofon'ny Andriamaniny, ny zava-masina dia masina, ny zava-masina. ²³ Fa tsy handroso amin'ny efitra lamba izy, tsy hanatona ny otely, satria manan-kilemam-batana izy; tsy handoto ny fitoerako masina, fa izaho no Iaveh manamasina azy ireo. ²⁴ Dia nolazain'i Moizy izany tamin'i Aarona sy ny zanany ary ny zanak'Israely rehetra.

Toko faha-22

¹ Ary niteny tamin'i Moizy Iaveh nanao hoe:

² Mitenena amin'i Aarona sy ny zanany mba hifadiany ny zava-masina atokan'ny zanak'Israely ho ahy sy tsy hanamavoany ny anarako masina. Izaho no Iaveh. ³ Lazao aminy hoe: Ny olona rehetra amin'ny taranakareo hatramin'ny fara mandimby izay mbola manam-pahalotoana ao aminy, nefa manakaiky ny zava-masina atokan'ny zanak'Israely ho an'ny Tompo, dia hofongorana eo anatrehako. Izaho no Iaveh. ⁴ Ny olona rehetra amin'ny taranak'i Aarona, izay azon'ny habokana na marary mitsika dia tsy hihinana ny zava-masina mandra-pahadiony. Torak'izany koa izay nikasika olona voaloto, nikasika faty, izay nandeha rano maloto, ⁵ izay nikasika biby mandady nahaloto azy, na olona maloto namindra fahalotoana taminy, na fahalotoana inona na fahalotoana inona, ⁶ haloto mandra-paharivan'ny andro izay nikasika ireo zavatra ireo, ka tsy hihinana ny zava-masina, handro amin'ny rano izy, ⁷ ka hadio, rehefa maty ny masoandro, dia hahazo mihinana ny zava-masina, fa fihinany izany. ⁸ Tsy hihinana biby maty ho azy na voaviravira izy mba tsy ho voaloton'izany. Izaho no Iaveh. ⁹ Hitandrina ny didiko izy ireo, sao hahazo ota ny amin'izany, na ho fatin'ny fanamavoana ny zava-masina. Izaho no Iaveh manamasina azy. ¹⁰ Tsy hisy olon-kafa hihinana zava-masina, na ny mipetraka ao amin'ny mpisorona, na ny mpikarama, dia samy tsy hihinana ny zava-masina.

¹¹ Mahazo mihinana ihany anefa, izay mpanompon'ny mpisorona novidiny vola, toy izany koa izay teraka tao an-tranony; azon'ireny hanina izay fihinany. ¹² Tsy hihinana ny navahana tamin'ny zava-masina ny zanakavavin'ny mpisorona, nanambady olon-kafa. ¹³ Fa raha maty vady na voasaotra tsy mbola niteraka, ny zanakavavin'ny mpisorona, ka mody any an-tranon-drainy, toy ny fony mbola kely, dia mahazo mihinana izay fihinan-drainy; fa ny olon-kafa tsy hihinana izany. ¹⁴ Raha misy olona nihinana tsy nahy tamin'ny zava-masina, dia honerany amin'ny mpisorona ny zava-masina, ka hotongoavany ny ampaha-diminy. ¹⁵ Aoka ny mpisorona tsy hametaveta ny zava-masin'ny zanak'Israely, izay natokany ho an'ny Tompo, ¹⁶ sy tsy hampivesatra azy ny heloka ataony amin'ny fihinanana ny zava-masina avy aminy; fa izaho no Iaveh manamasina azy. ¹⁷ Ary niteny tamin'i Moizy Iaveh nanao hoe:

¹⁸ Mitenena amin'i Aarona sy ny zanany mbamin'ny zanak'Israely rehetra, ka lazao aminy hoe: Na zovy na zovy amin'ny zanak'Israely, na amin'ny vahiny eo amin'Israely manatitra ny fanatiny, na ho fanalam-boady, na ho fanomezana an-tsitra-po, ka ateriny amin'ny Tompo ho sorona dorana, ¹⁹ dia aoka ho lahy tsy manan-kilema no hatao sorona, na omby izany, na ondry, na osy, mba hankasitrahana anareo. ²⁰ Aza manatitra izay manan-kilema fa tsy hankasitrahana izany. ²¹ Raha misy olona manatitra biby fiompy vaventy na madinika amin'ny Tompo, hatao sorom-pihavanana, na ho fanalam-boady izany, na ho fanomezana an-tsitra-po, dia tsy maintsy ho tsara mihitsy ny hatao sorona mba hankasitrahana azy, tsy tokony hanan-kilema akory izy. ²² Izay biby jamba, na mandringa, na tapaka, na ferèna, na hatenina, na tsingaohina, dia tsy haterinareo ho an'ny Tompo, tsy hanaovanareo sorona amin'ny afo eo ambonin'ny otely, ho an'ny Tompo. ²³ Raha hatao fanatitra an-tsitra-po, dia azo vonoina ihany ny omby na ondry, diso lava na fohy rantsam-batana; fa raha fanalam-boady, tsy ankasitrahana ny sorona toy izany. ²⁴ Aza haterinareo ho an'ny Tompo izay biby voaporitra, na voatoro, na voaombotra, na voadidy ny vihiny; aza manao izany amin'ny taninareo. ²⁵ Rahefa mety ho sorona toy ireny, dia aza raisinareo haterina ho fàhan'ny Andriamanitrareo ireny, na dia avy eo an-tànan'ny olon-kafa firenena aza, fa efa simba ireny fa manan-kilema, ka tsy hahazoanareo sitraka. ²⁶ Ary hoy Iaveh tamin'i Moizy:

²⁷ Na omby, na ondry, na osy, raha vao teraka, dia hitoetra amin-dreniny hafitoana izy, fa rahefa hatramin'ny andro fahavalo no ho miakatra, vao ankasitrahana ny hanaterana azy ho sorona atao amin'ny afo amin'ny Tompo. ²⁸ Aza atao indray mamono amin'ny indray andro ny biby sy ny zanany, na omby izany, na ondry. ²⁹ Raha manatitra sorom-pisaorana amin'ny Tompo hianareo, dia atolory araka izay ankasitrahana azy. ³⁰ Izay andro amonoana azy ihany no ihinanana azy, fa tsy hisy havela ho tra-maraina. Izaho no Iaveh. ³¹ Tandremo ny didiko, ka araho izany. Izaho no Iaveh.

³² Aza manevateva ny anarako masina, fa hohamasinina eo afovoan'ny zanak'Israely aho. Izaho no Iaveh manamasina anareo, ³³ sy namoaka anareo avy any amin'ny tany Ejipta, mba ho Andriamanitrareo. Izaho no Iaveh.