Levitika

Toko faha-24

⁷ Hasianao emboka madio eo ambonin'ny isan'antontany avy, ho fahatsiarovana, eo ambin'ny mofo atolotra amin'ny afo ho an'ny Tompo. ⁸ Halahatra tsy tapaka isan'andro sabata ireo mofo ireo avy amin'ny zanak'Israely, eo anatrehan'ny Tompo: fanekem-pihavanana maharitra lalandava izany. ⁹ Ho anjaran'i Aarona sy ny zanany, ireo; ary eo amin'izay toerana masina no hihinanany azy, satria zava-masina dia masina ho azy ireo izany amin'ny fanatitra atao amin'ny afo ho an'ny Tompo. Lalàna maharitra lalandava izany. ¹⁰ Nisy zanakalahin'ny vehivavy Israelita anankiray, nefa zanaky ny lehilahy Ejipsiana, nankeo afovoan'ny zanak'Israely: ary nifampila kisa teo an-toby ny zanakalahin'ilay vehivavy Israelita sy ny lehilahy anankiray amin'Israely.

¹¹ Ny zanakalahin'ny vehivavy Israelita nanevateva ny Anarana masina sady nanozona; ary ny anaran-dreniny dia Salomita, zanak'i Dabrì, avy amin'ny fokon'i Dana; ¹² ka nambenan'ny olona izy mandra-pilaza amin'izy ireo ny tenin'ny Tompo. ¹³ Dia niteny tamin'i Moizy Iaveh nanao hoe: ¹⁴ Asaovy mivoaka ny toby ilay mpanevateva, ka aoka hametra-tànana eo ambonin'ny lohany izay rehetra nandre azy, dia aoka ny fiangonana rehetra hitora-bato azy. ¹⁵ Ary hiteny amin'ny zanak'Israely hianao hanao hoe: Izay rehetra manozona ny Andriamaniny, dia hilonjy ny helony; ¹⁶ ary izay manevateva ny anaran'ny Tompo, dia hohelohin-ko faty, ka hitora-bato azy ny fiangonana rehetra. Na vahiny, na tompon-tany, rahefa manevateva ny Anarana masina dia ho faty. ¹⁷ Izay mamono mahafaty olona, dia hovonoin-ko faty.

¹⁸ Izay mamono mahafaty biby fiompy, dia hanonitra hoatra azy: aina solon'ny aina. ¹⁹ Izay mandratra ny namany, dia hasiana toraky ny nataony: ²⁰ tapaka efain-tapaka, maso efai-maso, nify efai-nify, izay ratra nafitsony ny namany dia mba afitsoka azy koa. ²¹ Izay mahafaty biby fiompy hanonitra hoatra azy; fa izay mahafaty olona kosa, dia hatao maty koa. ²² Hofehezin'izany lalàna iray izany avokoa hianareo na vahiny na tompon-tany, fa izaho no Iaveh Andriamanitrareo. ²³ Nony voalazan'i Moizy tamin'ny zanak'Israely izany, dia navoakan'izy ireo ilay mpanevateva, ka notorahany vato. Notanterahin'ny zanak'Israely ny didy nomen'ny Tompo an'i Moizy.

Toko faha-25

¹ Ary Iaveh niteny tamin'i Moizy tany an-tendrombohitra Sinaia nanao hoe:

² Mitenena amin'ny zanak'Israely ka lazao aminy hoe: Rahefa tafiditra any amin'ny tany omeko anareo hianareo, hisy fitsaharana ho an'ny tany; ho sabata fankalazana an'ny Tompo izany. ³ Mandritra ny taona enina no hamafazanao ny sahanao, mandritra ny taona enina no handrantsananao ny voalobokao sy hitoazanao ny vokany. ⁴ Fa ny taona fahafito kosa dia ho sabata fitsaharana lehibe ho an'ny tany, sabata fankalazana an'ny Tompo, ka tsy hamafy amin'ny taninao hianao na handrantsana ny voalobokao. ⁵ Aza mijinja izay maniry, avy amin'ny voa nihintsana tamin'ny fijinjana lasa, na hioty ny salohim-boaloboka avy amin'ny voaloboka tsy norantsanana: taona fitsaharana ho an'ny tany izany. ⁶ Izay ho vokatry ny tany mandritra ny sabatany dia hatao fivelomana ho anao, mbamin'ny ankizilahinao, ny ankizivavinao, ny mpikaramanao, ny vahiny miara-monina aminao; ⁷ ary ho an'ny biby fiompinao koa sy ny biby dia eo amin'ny taninao, dia hatao fivelomana ny vokany rehetra. ⁸ Hanisy taon-tsabata fito impito fito taona hianao: fotoana mahalany sivy amby efapolo taona no faharetan'izany taona sabata fito izany.

⁹ Ny andro fahafolon'ny volana fahafito dia tsofy ataovy manakoako ny feon'ny trompetra; amin'ny andron'ny Fanonerana dia tsofy hatraiza hatraiza eo amin'ny taninareo ny trompetra. ¹⁰ Ary ankamasino ny taona fahadimam-polo, ataovy antso avo ny fahafahana ho an'ny mponina rehetra amin'ny tany. Fa Jobile ho anareo izany, ka samia hianareo mody amin'ny taniny avy, samia mody ao amin'ny fianakaviany avy. ¹¹ Jobile ho anareo ny taona fahadimam-polo: tsy hamafy hianareo, tsy hijinja izay maniry ho azy amin'ny tany; ary tsy hioty ny voaloboka tsy norantsanana, ¹² fa Jobile izany, ka masina ho anareo. Izay ho vokatry ny taninareo no hohaninareo. ¹³ Amin'izany taona Jobile izany, samia hianareo mody amin'ny taninareo avy.

¹⁴ Raha misy varotra ifanaovanareo amin'ny namanareo, na misy zavatra vidinareo aminy, dia aza misy mamono antoka ny rahalahiny. ¹⁵ Araka ny isan-taona isaina hatramin'ny Jobile lasa teo no hividiananao amin'ny namanao, ary araka ny isan'ny fotoam-pahavokarana no hivarotany aminao. ¹⁶ Araka ny hamaroan'ny taona mbola ho avy no hanondrotanao ny vidiny, ary araka ny havitsian'ny taona no hampihenanao ny vidiny: satria ny isan'ny vokatra isan-taon-pijinjana no ivarotany aminao. ¹⁷ Aza misy mamono antoka ny rahalahinareo hianareo, fa matahora an'Andriamanitra, satria izaho no Iaveh Andriamanitrareo. ¹⁸ Araho ny didiko; tandremo ny fitsipiko, ary tanteraho izany, ka handry fahizay amin'ny tany hianareo.

¹⁹ Ny tany hahavokatra, hianareo hihinana amim-panaranam-po, ka dia handry fahizay hianareo. ²⁰ Ndrao manao hoe hianareo: Inona no hohaninay amin'ny taona fahafito, fa tsy hamafy izahay, na hampakatra ny vokatray? ²¹ Hampidina aminareo ny fanambinako amin'ny taona fahenina aho, dia hahavokatra ho ampy anareo telo taona izy; ²² amin'ny taona fahavalo no hamafazanareo, ka hihinana ny tranainy hianareo, ary hatramin'ny taona fahasivy, mandra-pahavokaran'ny taona dia hihinana ny tranainy hianareo. ²³ Tsy azo amidy varo-maty ny tany, fa ahy ny tany; ary hianareo hipetraka aty amiko toy ny vahiny sy olona mpihavy fotsiny.

²⁴ Avelao ho azo avotana avokoa ny tany ao amin'ny tany rehetra hanananareo.

²⁵ Raha tonga mahantra ny rahalahinao ka ivarotany ny sasany amin'ny taniny, dia ny solony, ny havany akaiky, no ho avy ka hanavotra izay namidin'ny rahalahiny. ²⁶ Raha tsy manana olona ho solony ralehilahy, fa ny tenany ihany no mba mahita izay ampy hanavotany azy; ²⁷ hisainy ny taona hatramin'ny nivarotany azy, ka izay an-kevitry ny taona sisa no haloany amin'ilay nivarotany azy, dia hody amin'ny taniny indray izy. ²⁸ Ary raha tsy mahazo izay ampy handoavany izany onitra izany izy dia hitoetra eo an-tànan'ilay nividy ihany aloha ny tany namidiny, mandra-pahatongan'ny taona Jobile, fa amin'ny Jobile dia afaka izy, ka hody amin'ny fananany indray. ²⁹ Raha misy olona mivarotra trano ao anaty tanàna mimanda dia azony avotana izany, mandritra ny herintaona hatramin'ny nivarotany azy, ka maharitra hetintaona maninjitra no ahazoany manavotra azy.

³⁰ Fa raha tsy voavotra mandra-pahatapitry ny herintaona maninjitra kosa ilay trano ao anaty tanàna mimanda, dia tapaka varo-maty ho an'ilay nividy azy sy ho an'ny taranany, ka tsy ho afaka aminy amin'ny Jobile. ³¹ Fa ny trano ao amin'ny tanàna tsy voaisy manda manodidina kosa, dia hatao momba ny tany ihany: azo avotana ireny, ary ho afaka amin'ny Jobile. ³² Ny amin'ny tanànan'ny Levita kosa, ny amin'ny trano hananany ao an-tanàna, dia azony avotana hatrany hatrany. ³³ Raha misy mividy trano amin'ny Levita, dia ho afaka amin'ny Jobile ny trano namidy ao amin'ny tanàna efa nomena azy ireo; satria ny trano ao an-tanànan'ny Levita dia fananany eo afovoan'ny zanak'Israely.