Levitika

Toko faha-25

³⁴ Ny saha manodidina ny tanànan'ny Levita, dia tsy hamidy fa fananany mandrakizay izany. ³⁵ Raha misy rahalahinao mihamahantra sy mihaosa tànana eo akaikinao, na dia izay hafa firenena na vahiny aza, dia tohàny izy, mba hivelona eo akaikinao.

³⁶ Aza maka zana-bola na tombony aminy, fa matahora ny Andriamanitrao, ka aoka hivelona eo akaikinao ny rahalahinao. ³⁷ Aza mampanàna vola aminy, na mampisambotra hanina hilan-tombony aminy. ³⁸ Izaho no Iaveh Andriamanitrao, izay namoaka anareo tany amin'ny tany Ejipta, hanomezako anareo ny tany Kanaana, mba ho Andriamanitrareo. ³⁹ Raha mihamahantra ny rahalahinao eo akaikinao, ka mivaro-tena aminao, aza dia ampanaovina asan'andevo izy,

⁴⁰ fa ataovy toy ny mpikarama, na vahiny an-trano, ary mandra-pahatongan'ny taona Jobile no hanompoany anao. ⁴¹ Amin'io dia ho afaka izy mbamin'ny zanany miaraka aminy, ka hody any amin'ny fianakaviany sy hiverina amin'ny fananan-drazany indray. ⁴² Fa mpanompoko nentiko nivoaka avy any amin'ny tany Ejipta izy ireo ka tsy hamidy toy ny fivarotra andevo. ⁴³ Tsy hizaka azy amin-kalozana hianao, fa hatahotra ny Andriamanitrao. ⁴⁴ Ireo firenena manodidina anao no azonao angalana andevo lahy na vavy, mba ho anao; amin'ireo no hividiananareo ankizilahy aman'ankizivavy. ⁴⁵ Ireo zana-bahiny mitoetra eo aminareo koa no azonareo hividianana, na ireo fianakavian'izy ireo, izay miara-monina aminareo, sy naterany teo amin'ny taninareo; ka dia ho fanananareo ireny. ⁴⁶ Havelanareo ho lovan'ny zanakareo mandimby anareo ireny, mba hizakany azy ireo toy ny fananana; ho andevonareo mandrakizay izy. Fa raha ny amin'ny rahalahinareo, ny zanak'Israely kosa, dia aza misy aminareo mizàka ny rahalahiny amin-kalozana. ⁴⁷ Raha misy olon-kafa firenena na vahiny tonga nanan-karena teo akaikinao ary misy rahalahinao nihanahantra teo akaikiny, ka nivaro-tena tamin'ilay hafa firenena vahiny eo akaikinao, na amin'ny taranaky ny fianakaviana hafa firenena,

⁴⁸ dia azo avotana izy, rahefa nivaro-tena; ny iray amin'ny rahalahiny mahazo manavotra azy; ⁴⁹ na ny rahalahin-drainy, na ny zanadrahalahin-drainy mahazo manavotra azy; na ny iray amin'ny havany akaiky mahazo manavotra azy; na ny tenany, rahefa mba mahazo harena izy, dia hiavo-tena. ⁵⁰ Izy sy ilay nividy azy no hiara-manisa ny taona hatramin'ny nivarotany tena tamin'izy io, ka hatramin'ny taona Jobile; dia hatao araka izay isan'ny taona ny vola nivarotany ny tenany; hotombanana toy ny fanao amin'ny mpikarama izay andro niasany. ⁵¹ Raha mbola maro ny taona sisa, dia haloany araka izay isan'izany taona izany ny vola avony, atao ara-kevitry ny vola nividianana azy ihany. ⁵² Ary raha vitsy sisa ny taona hatramin'ny Jobile, dia hisaina izany: hatao arak'izany taona izany ny vola avony haloany. ⁵³ Ho toy ny mpikarama an-taona no ho fitoetrany ao aminy; ary tsy ho an-kalozana no hitondrany azy, eo imasonao. ⁵⁴ Raha tsy misy hanavotana azy akory, dia ho afaka amin'ny taona Jobile izy mbamin'ny zanany miaraka aminy. ⁵⁵ Satria amiko ny zanak'Israely no mpanompo; mpanompoko nentiko nivoaka avy any amin'ny tany Ejipta izy. Izaho no Iaveh Andriamanitrareo.

Toko faha-26

¹ Aza manao sampy; aza manangan-tsary voasokitra, na tsangam-baton-tsampy, na manorina vato voaravaka sarin-javatra eo amin'ny taninareo, hiankohofanareo eo anatrehany; fa izaho no Iaveh Andriamanitrareo.

² Tandremo ny sabatako, ary hajao ny fitoerako masina. Izaho no Iaveh. ³ Raha manaraka ny lalàko sy mitandrina ny didiko hianareo, ka mankatò izany,

⁴ dia halatsako amin'ny fotoany ny orana ho anareo; hahavokatra ny tany; hamoa ny hazo eny an-tsaha. ⁵ Ny fivelezam-bary haharitra hatramin'ny fitoazam-boaloboka; ny fitoazam-boaloboka hahatratra ny famafàna; dia hihinana hianareo ka ho voky tsara, ary handry fahizay eo amin'ny taninareo. ⁶ Hasiako fiadanana eo amin'ny tany, ka handry tsy hisy hanaitra hianareo. Ny biby masiaka hofongorako amin'ny tany; ary ny sabatra tsy hamakivaky ny taninareo. ⁷ Hanenjika ny fahavalonareo hianareo; ary lavon-tsabatra eo anoloanareo izy. ⁸ Dimy aminareo no hanenjika zato, ary zato aminareo no hanenjika iray alina; ho lavon-tsabatra eo anoloanareo ny fahavalonareo. ⁹ Hitodika anareo aho, ka hahamaro anaka anareo sy hampitombo anareo ary hanorina ny fanekeko aminareo. ¹⁰ Hihinana ny vokatra tranainy hianareo, dia ny tranainy hahitana toerana ho an'ny vao. ¹¹ Hanorina ny fonenako eo afovoanareo aho, ary tsy ho tofoka aminareo ny fanahiko. ¹² Handeha eo afovoanareo aho, ho Andriamanitrareo aho, ary hianareo ho vahoakako. ¹³ Izaho no Iaveh Andriamanitrareo izay namoaka anareo hiala any amin'ny tany Ejipta, mba tsy ho andevo any intsony; nanapaka ny baran'ny jioganareo aho, dia nandefa anareo handeha misolanandrana. ¹⁴ Fa raha tsy mihaino ahy kosa hianareo, ka tsy mankatò ireo didy rehetra ireo;

¹⁵ raha manamavo ny lalàko hianareo ka boboky ny fitsipiko ny fanahinareo ka tsy hankatoavinareo ny didiko rehetra sy hivadihanareo ny fanekena amiko, ¹⁶ dia izao no hataoko aminareo: Hanirahako tebiteby sy areti-mihinana ary tazo hianareo, izay hahalali-maso anareo, sy handrerak'aina anareo; hafafinareo foana ny voa famafinareo, fa ny fahavalonareo no hihinana azy. ¹⁷ Hanandrina anareo ny vatako, ka ho resin'ny fahavalonareo hianareo; izay manakahala anareo no hanapaka anareo, ary handositra tsy enjehina hianareo. ¹⁸ Raha tsy mbola mihaino ahy amin'izany ihany hianareo, dia hofaiziko impito mihoatra izany, noho ny fahotanareo.

¹⁹ Horavako ny reharehan'ny herinareo; hataoko toy ny vy ny lanitrareo, ary toy ny varahina ny taninareo. ²⁰ Ho lany maina ny herinareo, fa ny taninareo tsy hahavokatra, ny hazo amin'ny tany tsy hamoa ny voany. ²¹ Raha mandroso manohitra ahy ihany hianareo, fa tsy mety mihaino ahy, dia hokapohiko impito mihoatra, araka ny fahotanareo.

²² Halefako hamely anareo ny biby dia, hifaoka ny zanakareo, hamiravira ny biby fiompinareo, hahavitsy isa anareo, ka hanjary efitra ny làlanareo. ²³ Rahefa voan'ireo sazy ireo hianareo, ka mbola tsy mety hanariko hianareo fa mandroso manohitra ahy ihany,

²⁴ dia izaho kosa no handroso hamely anareo, ka hikapoka anareo koa aho impito mihoatra, noho ny fahotanareo. ²⁵ Hampiditra sabatra hamely anareo aho, ho valin'ny nivadihanareo ny fanekeko; hiangona ao an-tanànanareo hianareo, dia hanirahako ny pesta ho eo aminareo ary ho voatolotra eo an-tànan'ny fahavalo hianareo, ²⁶ rahefa hotapahiko ny mofo tohan'ainareo, ka lafaoro fanendasa-mofo iray no hanendasan'ny vehivavy folo ny mofonareo, ary an-danjany no hizarany ny mofonareo, dia hihinana hianareo fa tsy ho voky. ²⁷ Rahefa izany ka mbola tsy mihaino ahy hianareo, fa mbola mandroso manohitra ahy,

²⁸ dia handroso hanohitra anareo amin-katezerana mafy koa aho, ka hofaiziko impito mihoatra hianareo, noho ny fahotanareo.