Ny Jenezy

Toko faha-4

²¹ Ny anaran'ny rahalahiny Jobala; izy no rain'izay rehetra mpitendry valiha sy mpitsoka sodina. ²² Selà kosa niteraka an'i Tobal-Kaina izay mpanefy fiasana maranitra isan-karazany na varahina na vy. Ny anaran'ny anabavin'i Tobal-Kaina dia Noema. ²³ Ary hoy Lameka tamin'ireo vadiny: Mandrenesa ny feoko, ry Adà sy Selà; Henoy ny teniko, ry vadin'i Lameka; Nahafaty lehilahy iray aho, noho ny feriko; Ary tovolahy iray, noho ny ratrako.

²⁴ Hovaliana faty impito heny Kaina, Ary hovaliana faty impito amby fitopolo heny Lameka.

²⁵ Ary Adama nahalala ny vadiny indray ka niteraka lahy iray izy, nataony hoe Seta, fa hoy izy: Nomen'Andriamanitra ny fara aho ho solon'i Abela izay novonoin'i Kaina.

²⁶ Seta koa niteraka lahy iray nataony hoe Enosy. Vao tamin'izay no nanomboka niantso ny anaran'ny Tompo ny olona.

Toko faha-5

¹ Ity no boky misy ny tantaran'i Adama. Tamin'ny naharian'Andriamanitra ny olombelona dia nataony manahaka an'Andriamanitra izy.

² Lahy sy vavy no nahariany azy; ary notsofiny rano izy, ary nomeny anarana hoe Olombelona, tamin'ny nahariany azy. ³ Telopolo amby zato taona ny andro niainan'i Adama vao nitera-dahy anankiray manahaka azy sy mitovy tarehy aminy, ka nomeny anarana hoe Seta.

⁴ Ary ny andron'i Adama taorian'ny niterahany an'i Seta dia valon-jato taona, sady niteraka zazalahy aman-jazavavy izy. ⁵ Telopolo amby sivin-jato taona no andro rehetra niainan'i Adama, dia maty izy. ⁶ Dimy amby zato taona ny andro niainan'i Seta vao niteraka an'i Enosy izy.

⁷ Mbola velona fito amby valon-jato taona Seta taorian'ny niterahany an'i Enosy, sady niteraka zazalahy aman-jazavavy. ⁸ Dimy amby sivin-jato taona no andro rehetra niainan'i Seta, dia maty izy. ⁹ Sivy folo taona ny andro niainan'i Enosy vao niteraka an'i Kainany izy.

¹⁰ Mbola velona dimy ambin'ny folo amby valon-jato taona Enosy taorian'ny niterahany an'i Kainany, sady niteraka zazalahy aman-jazavavy. ¹¹ Dimy amby sivin-jato taona ny andro rehetra niainan'i Enosy, dia maty izy. ¹² Fitopolo taona ny andro niainan'i Kainany vao niteraka an'i Malaleela izy. ¹³ Mbola velona efapolo sy valon-jato taona Kainany taorian'ny niterahany an'i Malaleela, sady niteraka zazalahy aman-jazavavy. ¹⁴ Folo amby sivin-jato taona no andro rehetra niainan'i Kainany, dia maty izy. ¹⁵ Dimy amby enim-polo taona ny andro niainan'i Malaleela, vao niteraka an'i Jareda izy.

¹⁶ Mbola velona telopolo amby valon-jato taona Malaleela taorian'ny niterahany an'i Jareda, sady niteraka zazalahy aman-jazavavy. ¹⁷ Dimy amby sivifolo sy valon-jato taona no andro rehetra niainan'i Malaleela, dia maty izy. ¹⁸ Roa amby enim-polo amby zato taona ny andro niainan'i Jareda vao niteraka an'i Enaoka izy.

¹⁹ Mbola velona telopolo amby valon-jato taona Jareda taorian'ny niterahany an'i Enaoka, sady niteraka zazalahy aman-jazavavy. ²⁰ Roa amby enim-polo amby sivin-jato taona no andro rehetra niainan'i Jareda, dia maty izy. ²¹ Dimy amby enim-polo taona ny andro niainan'i Enaoka vao niteraka an'i Matosalema izy.

²² Mbola nizotra nifanaraka tamin'Andriamanitra telon-jato taona Enaoka, taorian'ny niterahany an'i Matosalema, sady niteraka zazalahy aman-jazavavy. ²³ Dimy amby enimpolo sy telon-jato taona no andro rehetra niainan'i Enaoka. ²⁴ Nizotra nifanaraka tamin'Andriamanitra Enaoka, dia tsy hita intsony, fa nentin'Andriamanitra izy. ²⁵ Fito amby valopolo amby zato taona ny andro niainan'i Matosalema vao niteraka an'i Lameka izy.

²⁶ Mbola velona roa roa amby valopolo sy fiton-jato taona Matosalema taorian'ny niterahany an'i Lameka, sady niteraka zazalahy aman-jazavavy. ²⁷ Sivy amby enim-polo sy sivin-jato taona no andro rehetra niainan'i Matosalema, dia maty izy. ²⁸ Roa amby valopolo amby zato taona ny andro niainan'i Lameka vao niteraka zazalahy anankiray izy,

²⁹ nataony hoe Noe no anarany, fa hoy izy: Ity no hanamaivana antsika amin'ny fahasasarantsika sy amin'ny asa tànana mahasasatra avy amin'ity tany efa voaozon'ny Tompo. ³⁰ Mbola velona dimy amby fitopolo sy fiton-jato taona Lameka taorian'ny niterahany an'i Noe, sady niteraka zazalahy aman-jazavavy. ³¹ Ary fito amby fitopolo sy fiton-jato taona no andro rehetra niainan'i Lameka, dia maty izy. ³² Rahefa diman-jato taona Noe, dia niteraka an'i Sema sy Kama ary Jafeta.

Toko faha-6

¹ Nony efa niantomboka ho maro ny olona teto ambonin'ny tany ary efa niteraka zazavavy izy,

² dia hitan'ireo zanak'Andriamanitra fa tsara tarehy ny zanakavavin'ny olombelona, ka naka vady tamin'izy ireo izy, dia tamin'izay rehetra tiany. ³ Ary hoy Iaveh: Tsy hipetraka mandrakariva ao amin'ny olombelona ny fanahiko; fa nofo fotsiny ihany ny olombelona, ary ho roa-polo amby zato taona no androny. ⁴ Ary tamin'izany andro izany dia nisy ny rapeton'olona teto ambonin'ny tany, dia rahefa nankamin'ny zanakavavin'ny olombelona ny zanak'Andriamanitra, sy efa nahary zaza taminy. Ary ireny no olo-mahery nalaza hatrizay ela izay. ⁵ Hitan'ny Tompo fa be ny faharatsian'ny olona tambonin'ny tany, ary ny ratsy ihany no alehan'ny fisainana rehetra avy amin'ny fony isan'andro.

⁶ Ka nanenina Iaveh tamin'ny nahariany ny olombelona tambonin'ny tany; ary nalahelo tao am-pony izy, ⁷ ka hoy izy hoe: Haringako tsy ho eo ambonin'ny tany ny olombelona nohariko, hatramin'ny olombelona ka hatramin'ny biby fiompy, ny biby mikisaka sy ny voro-manidina, fa manenina aho noho ny nanaovako azy. ⁸ Noe kosa anefa dia nahita fitia teo imason'ny Tompo. ⁹ Izao no tantaran'i Noe: Lehilahy marina Noe, nanao ny rariny teo amin'ny olona niara-belona taminy, nizotra nifanaraka tamin'Andriamanitra Noe.

¹⁰ Niteraka telo mirahalahy izy, dia Sema sy Kama ary Jafeta. ¹¹ Ary tamin'izay nihasimba teo anatrehan'Andriamanitra ny tany, sy nihafeno faharatsiana.

¹² Nijery ny tany Andriamanitra ka indro, efa simba izy, fa samy efa nanimba ny làlany tambonin'ny tany avokoa ny nofo rehetra.