Eksaody

Toko faha-25

⁷ vatosoa berila sy vatosoa fandatsaka an-tranotranony, hatao amin'ny efoda sy ny saron-tratra. ⁸ Hanao fitoerana masina ho ahy izy ireo dia honina eo aminy aho. ⁹ Ary arahinareo tsara izay rehetra hasehoko anareo izao, ny mariky ny tabernakla sy ny mariky ny fanaka rehetra momba azy. ¹⁰ Hanao fiara hazo akasià izy; roa hakiho sy sasany ny lavany, ary iray hakiho sy sasany ny hahavony.

¹¹ Hasianao takela-bolamena izy ao anatiny sy ao ivelany, ary hasianao tanjo-miolaka volamena ny manodidina azy. ¹² Handrendrika masom-bolamena efatra hatao aminy hianao, hapetaka amin'ny tongony efatra; ny masom-bolamena roa amin'ny lafiny iray, ny masom-bolamena roa amin'ny lafiny iray. ¹³ Hanao bao hazo akasià hianao ka hasianao takela-bolamena, ¹⁴ dia hampiditra ny bao amin'ny masom-bolamena eo an-danin'ny fiara avy, hitondrana azy. ¹⁵ Havela hijanona eo amin'ny masom-bolamena ny bao fa tsy hesorina eo. ¹⁶ Ary hataonao ao amin'ny fiara, ny vavolombelona izay homeko anao. ¹⁷ Hanao fanaovam-panavotana amin'ny volamena madio hianao, roa hakiho sy sasany ny lavany, iray hakiho sy sasany ny sakany.

¹⁸ Ary hanao kerobima volamena roa hianao hataonao an-tefiny, dia iray avy no ho eo an-daniny roa amin'ny fanaovam-panavotana; ¹⁹ ny kerobima iray hatao amin'ny laniny iray, ary ny kerobima iray amin'ny laniny iray koa; ny kerobima dia hatao tafahoatra ny fanaovam-panavotana amin'ny laniny roa. ²⁰ Hatao mivelatra miakatra ny elatry ny kerobima, hanarona ny fanaovam-panavotana amin'ny elany, ary hifanatrika ny tavany, hitodika manatrika ny fanaovam-panavotana ny tavan'ny kerobima. ²¹ Dia hapetrakao eo ambonin'ny fiara ny fanaovam-panavotana; ary hapetrakao ao anatin'ny fiara ny vavolombelona izay homeko anao. ²² Fa eo no hihaonako aminao; ary eo ambonin'ny fanaovam-panavotana, anelanelan'ny kerobima roa, izay ao ambonin'ny fiaran'ny vavolombelona, no hampandrenesako anao ny didy rehetra homeko anao ho an'ny zanak'Israely. ²³ Hanao latabatra hazo akasià hianao; ho roa hakiho ny lavany, iray hakiho ny sakany, ary iray hakiho sy sasany ny hahavony.

²⁴ Petaho volamena madio izy, ary asio tanjo-miolaka volamena ny manodidina azy. ²⁵ Hasianao sisiny vody voampelatànana ny manodidina azy, ka hasianao tanjo-miolaka volamena manodidina azy. ²⁶ Hanao masom-bolamena efatra hianao ka hapetrakao amin'ny zoron'ny latabatra efatra ireo masom-bolamena ireo, dia amin'ny tongony efatra. ²⁷ Hataonao eo akaikin'ny sisiny ny masom-bolamena, fa hampidirana ny bao hilanjana ny latabatra. ²⁸ Hazo akasià no hanaovanao ny bao ary hasianao takela-bolamena; dia hitondrana ny latabatra ireo. ²⁹ Dia hataonao ny loviany, ny vata kely fitoeran-java-manitra, ny kopy aman-tasiny hanaovana ny fanatitra araraka; ka volamena madio no hanaovanao azy. ³⁰ Hasianao ny mofo alahatra, izay ho eo anatrehako mandrakariva eo ambony latabatra. ³¹ Hanao fanaovan-jiro amin'ny volamena madio hianao; hataonao an-tefiny avokoa izy mbamin'ny faladiany sy ny tahony, ary fonjany iray ihany ny ravim-boninkazo, ny bokony ary ny voniny,

³² ka hasianao rantsany telo avy amin'ny laniny iray, ary ny rantsany telo avy amin'ny laniny iray. ³³ Ny rantsany voalohany dia hisy ravim-boninkazo telo miendrika vonin'amandia bokony sy voniny; ny rantsany faharoa dia hisy ravim-boninkazo telo miendrika vonin'amandia, bokony sy voniny; dia ho toy izany avokoa ny rantsany enina avy, amin'ny fanaovan-jiro. ³⁴ Ny tahon'ny fanaovan-jiro hisy ravim-boninkazo efatra miendrika vonin'amandia, bokony sy voniny. ³⁵ Hisy bokony iray eo ambanin'ny rantsany roa voalohany, avy amin'ny tahom-panaovan-jiro, bokony iray koa eo ambanin'ny rantsany roa manarakaraka, avy amin'ny tahom-panaovan-jiro, ary bokony iray koa eo ambanin'ny rantsany roa farany, avy amin'ny tahom-panaovan-jiro, araka ny rantsany enina avy amin'ny tahom-panaovan-jiro. ³⁶ Ho fonjany iray ihany amin'ny fanaovan-jiro ireo bokony sy rantsany ireo, ary ho fonjam-bolamena an-tefiny iray ihany avokoa izy manontolo, sady volamena madio. ³⁷ Manaova lalampy hatao aminy, ataovy fito ny isany, dia hataingina eny amin'ny rantsany ireo lalampiny ireo hanazava ny eo anoloana. ³⁸ Ataovy volamena madio ny hetin-jirony sy ny fitoeran-davenon-jirony. ³⁹ Volamena madio talenta iray no hanaovana ny fanaovan-jiro sy ny fanaka rehetra momba azy. ⁴⁰ Jereo ka ataovy araka ny marika aseho anao ao an-tendrombohitra.

Toko faha-26

¹ Ny hanaovana ny Fonenana dia ambainy folo; ny hanaovana azy ireo dia amin'ny rongony madinika voahasina, sy amin'ny jaky volomparasy, amin'ny jaky mangatrakatraka, ary amin'ny lamba mena antitra, asiana kerobima, asan-tànan'ny mpanenona mahay.

² Valo amby roapolo hakiho ny halavan'ny ambainy iray, ary efatra hakiho ny sakan'ny ambainy iray, ary hampitoviana daholo ny haben'ny ambainy rehetra. ³ Havitrana ho iray ny ambainy dimy, dia havitrana ho iray koa ny ambainy dimy hafa. ⁴ Hasianao tadivavarana jaky volomparasy ny sisiny iafaran'ireo ambainy navitrana voalohany ireo, dia hasianao toy izany koa ny sisiny iafaran'ireo ambainy navitrana faharoa. ⁵ Hataonao dimam-polo ny tadivavarana amin'ny ambainy voalohany, ary hataonao dimam-polo koa ny tadivavarana amin'ny sisiny iafaran'ny ambainy navitrana faharoa, ary hifanandrify ireo tadivavarana ireo. ⁶ Dia hanao jaigirafy volamena dimam-polo hampifanakambananao ny ambainy, mba ho voavoatra ho iray ihany ny Fonenana. ⁷ Hanao ambainy amin'ny volon'osy koa hianao, hatao lay ao ambonin'ny Fonenana, hataonao iraika ambin'ny folo ambainy izy,

⁸ telo-polo hakiho no ho lavan'ny ambainy iray, ary efatra hakiho no ho sakan'ny ambainy iray; ampitoviana daholo ny haben'ireo ambainy iraika ambin'ny folo ireo. ⁹ Ny ambainy dimy amin'izy ireo havitranao manokana; ary ny enina sisa havitranao manokana koa, ary haforitrao eo anoloan'ny lay ny ambainy fahenina. ¹⁰ Hasianao tadivavarana dimam-polo ny vavan'ny ambainy sisin'ireo navitrana voalohany ary dimam-polo koa amin'ny vavan'ireo navitrana faharoa. ¹¹ Dia hanao jaigirafy varahina dimam-polo hianao, hampidirinao amin'ny tadivavarana ny jaigirafy mba hanakambananao ny lay ho iray ihany. ¹² Ny ambiny tafahoatra amin'ny ambain'ny lay, izany hoe ny antsasaky ny ambainy, dia hiraviravy eo ivohon'ny Fonenana; ¹³ ary ny ambiny amin'ny halavan'ny ambainy dia ny hakiho iray amin'ny laniny iray, ny hakiho iray amin'ny laniny iray, dia hiraviravy avy eo an-daniny roa amin'ny Fonenana, handrakotra azy. ¹⁴ Hanao rakony hoditr'ondralahy voasoka mena hianao hatao amin'ny lay, ary rakony hodi-dogaona koa eo ambonin'io.

¹⁵ Hanao hazo fisaka koa hianao hatao amin'ny Fonenana, hazo fisaka amin'ny akasià dia hatsangana izany.

¹⁶ Hatao folo hakiho avy no halavan'ny hazo fisaka iray, ary iray hakiho sy sasany ny sakany.