Bokin'i Jeremia

Toko faha-30

⁸ Fa hisy toy izao amin'izany andro izany, - teny marin'ny Tompon'ny tafika: Hotapahako ho afaka amin'ny vozonao ny jiogany, ary hotsoahako ny fatoranao; tsy hampanompo azy intsony ny olon-kafa;

⁹ fa ho mpaneky an'ny Tompo Andriamaniny izy ireo, sy an'i Davida mpanjakany, izay hatsangako ho azy.

¹⁰ Koa aza matahotra hianao, ry Jakoba, mpanompoko, - teny marin'ny Tompo, ary aza manam-badi-po, ry Israely. Fa indro aho hanaisotra anao any an-tany lavitra, sy ny taranakao, avy any amin'ny tany nahababo azy. Dia ho tafaverina Jakoba, ka hiadana, handry fahizay, tsy hisy mpanabataba azy.

¹¹ Fa momba anao aho, - teny marin'ny Tompo, - hamonjy anao; hataoko ringana ny firenena rehetra nampielezako anao. Fa hianao kosa, tsy mba haringako; hofaiziko ara-drariny ihany hianao, fa tsy dia havelako ho afa-potsiny tsy akory.

¹² Fa izao no lazain'ny Tompo: Tsy azo sitranina ny ratranao, manaintaina ny ferinao;

¹³ tsy misy olona hisolo vava anao amin'ny adinao, mba hamehezana ny ferinao, tsy misy fanafody mahasitrana ho anao.

¹⁴ Ny lehilahinao rehetra, nanadino anao, fa tsy manan-draharaha aminao akory. Satria nasiako toy ny famely fahavalo hianao, tamin'ny famaizana lozan-tany, noho ny habetsahan'ny helokao, fa efa nitombo be ny fahotanao.

¹⁵ Nahoana no mitaraina hianao noho ny faharatranao, noho ny tsy fahazoana manasitrana ny ferinao? Noho ny habetsahan'ny helokao ihany, sy noho ny nitomboan'ny fahotanao, no nanaovako izany zavatra izany taminao.

¹⁶ Koa izay rehetra mandany anao, holanina; izay rehetra mampahory anao, ho lasan-ko babo; izay mambabo anao, hobaboina; ary izay rehetra mandroba anao, hatolotro horobaina.

¹⁷ Fa efa hamehy anao aho, efa hositraniko amin'ny ferinao hianao, - teny marin'ny Tompo. Fa ny anaranao dia atao hoe: Ikala noroahina, Siona tsy manam-piahy!

¹⁸ Izao no lazain'ny Tompo: Indro hatsangako indray ny lain'i Jakoba, ary hamindrako fo ny fonenany; ny tanàna haorina indray eo amin'ny havoany; ary ny lapany hatsangana indray eo amin'ny fitoerany.

¹⁹ Hira fiderana no hivoaka avy ao, sy hobim-piravoravoana. Hahamaro azy aho, ka tsy hohavitsina intsony izy; hanome voninahitra azy aho, ka tsy hohamavoina intsony izy;

²⁰ ho tahaka ny taloha ny zanany; hiorina mafy eo anatrehako ny fiangonany, ary hofaiziko avokoa ny mpampahory azy.

²¹ Ny iray amin'izy ireo ihany no ho filohany; ary ny avy ao anatiny no ho mpanapaka azy; hasaiko manatona izy, dia hanatona ahy; fa zovy moa no olona hahay manamboatra ny fony, ka mba hanatona ahy? - teny marin'ny Tompo.

²² Ary hianareo dia ho oloko, ary izaho ho Andriamanitrareo.

²³ Indro, ny tafio-drivotry ny Tompo, ny fahatezerana, efa hipoaka: mivatravatra ny ranonoram-baratra, miantonta amin'ny lohan'ny ratsy fanahy.

²⁴ Tsy hihemotra ny firehitry ny hatezeran'ny Tompo, raha tsy efa niasa sy nanatanteraka ny hevitry ny fony izy: ho fantatrareo any am-paran'ny andro any.

Toko faha-31

¹ Amin'izany andro izany, - teny marin'ny Tompo, Izaho ho Andriamanitry ny fianakaviana rehetra amin'Israely, ary izy ireo ho oloko.

² Izao no lazain'ny Tompo: Nahita fitia tany an'efitra ny vahoaka afaka tamin'ny sabatra; ta-hanome fitsaharana an'Israely aho.

³ Niseho tamiko tany lavitra tany Iaveh. Fitiavana mandrakizay no nitiavako anao; izany no nampaharetako ny famindram-po aminao.

⁴ Izaho hanorina anao indray, dia ho voaorina indray hianao, ry virjinin'Israely; hiramarama amin'ny ampongatapakao indray, ary hamindra amin'ny dihy fifaliana.

⁵ Hamboly ny tanim-boalobokao indray hianao any an-tendrombohitr'i Samaria: izay mamboly, hamboly ka hioty.

⁶ Fa efa avy ny andro, hiantsoan'ny mpiambina any amin'ny tendrombohitr'i Efraima hoe: Mitsangàna hianareo, ka andeha isika hiakatra any Siona, ho any amin'ny Tompo Andriamanitsika!

⁷ Fa izao no lazain'ny Tompo: Mihobia an-kafaliana, ny amin'i Jakoba, manaova firavoravoana, noho ny amin'ilay lohan'ny firenena; ataovy re ny feonareo, mihirà hira fiderana, ka lazao hoe: Ry Iaveh, vonjeo ny olonao, dia ny sisa amin'Israely!

⁸ Indro aho mamerina azy avy any amin'ny tany avaratra; manangona azy avy any amin'ny faran'ny tany. Ho eo amin'izy ireo ny jamba sy ny mandringa, ny manan'anaka sy ny efa mihetsi-jaza; hanao dia be izy ireo no hiverina atý.

⁹ Hiverina amin-dranomaso izy; ary eo amin'ny fifonany no hitondrako azy miverina; eny amin'ny rano velona, no hitarihako azy, amin'ny làlana marin-tampona tsy hahatafintohina azy; satria efa ray ho an'Israely aho, ary lahimatoako Efraima.

¹⁰ Hianareo, firenena, mihainoa ny tenin'ny Tompo, ary torionareo izany, any amin'ireo nosy lavitra; ataovy hoe: Ilay nampiely an'Israely, dia hanangona azy indray; ary hiandry azy toy ny fiandrin'ny mpiandry ondry ny ondry;

¹¹ Satria Iaveh, efa nanavotra an'i Jakoba, sy nanafaka azy tamin'ny tànan'ny mahery noho izy.

¹² Ho avy izy, omban-kobim-pifaliana ho eo amin'ny havoan'i Siona. Hitanjozotra ho eo amin'ny zava-tsoan'ny Tompo izy ireo, ho amin'ny vary, ny divay vaovao, ny diloilo, ho amin'ny ondry aman'omby; ho toy ny saha vonton-drano ny fanahiny, ka hitsahatra tsy halazo intsony.

¹³ Amin'izany, hifaly amin'ny dihy ny zazavavy, mbamin'ny zazalahy, sy ny anti-panahy koa. Hampodiko ho fifaliana ny fisaonany, halako alahelo, hampifaliko izy ireo manaraka ny fijaliany.

¹⁴ Hovokisako ny matavy ny fanahin'ny mpisorona; ary hivoky ny zava-tsoako ny oloko; - teny marin'ny Tompo.

¹⁵ Izao no lazain'ny Tompo: Nisy feo re tany Rama, dia fidradradradrana sy fitomaniana mangidy; fa nitomany ny zanany Rasely ka mandà tsy hampiononina izy, ny amin'ny zanany, satria tsy velona intsony ireo.

¹⁶ Izao no lazain'ny Tompo: Sakano ny feonao tsy hitaraina ary ny masonao tsy hitomany; fa hahazo valisoa ny asanao, - teny marin'ny Tompo. Hody avy any an-tanim-pahavalo izy ireo.

¹⁷ Misy fanantenana ho amin'ny fara andronao, - teny marin'ny Tompo, ary dia hiverina ho amin'ny faritaniny indray ny zanakao.

¹⁸ Reko ny fitarainan'i Efraima hoe: Nofaizinao aho, ka voafay, toy ny vantotr'ombalahy tsy voafolaka; avereno aho, dia hiverina, satria hianao no Iaveh Andriamanitro;

¹⁹ Fa nony efa nivily aho, dia nanenina; ary nony efa nahalala aho, dia nisafo sirana sady menatra sy nangaihay, satria mitondra ny fahafaham-barakan'ny fahatanorako aho.

²⁰ Moa zanaka malala loatra ho ahy va Efraima, zanaka mahazo tombom-pitia? fa isaky ny miteny mamely azy aho, dia mba mahatsiaro azy ihany indray; ka mangotika ny atiko noho ny aminy. Eny hamindra fo aminy aho. - Teny marin'ny Tompo.

²¹ Manangàna famantaran-dalana, manorena famolaina ho anao, tandremo ny làlam-be, ny làlana efa nalehanao. Miverena, ry virjinin'Israely, miverena aty amin'ny tanànanareo indray. Mandra-pahoviana no hiriariavanao, ry zanaka vavy mpiodina?

²² Fa nahary zava-baovao amin'ny tany Iaveh: vehivavy hanodidina lehilahy.

²³ Izao no lazain'ny Tompon'ny tafika, Andriamanitr'Israely: Izao teny izao koa no holazaina any amin'ny tanin'i Jodà, sy amin'ny tanànany, raha avy izay hampodiako ireo lasan-ko babo tamin'izy ireo: Hohasoavin'ny Tompo anie hianao, ry firenen'ny fahamarinana, ry tendrombohitry ny fahamasinana!

²⁴ Honina ao avokoa Jodà sy ny tanànany rehetra, ny mpiasa tany mbamin-dry zareo mitarika ny biby fiompy.

²⁵ Fa ny fanahy mangetaheta, hampisotroiko, ary ny fanahy reraka, hovokisako.

²⁶ Tamin'izay, dia nahatsiaro aho, ka hitako fa mamy ny torimaso azoko.

²⁷ Indro, avy ny andro, - teny marin'ny Tompo, hamafazako eo amin'ny taranak'Israely aman-taranak'i Jodà, masombolin'olombelona sy masombolim-biby. Ka izao no hitranga: toy ny niambenako azy ireo: hongotana, hazera, harodana, horavana ary hampahoriana,

²⁸ no hiambenako azy kosa, haorina sy hambolena, - teny marin'ny Tompo.

²⁹ Amin'izany andro izany, tsy hisy intsony hanao hoe: Ny ray no nihinam-boaloboka marikivy, ka ny zanany no madilo nify.

³⁰ Fa samy ho fatin'ny helony avy ny olon-drehetra: izay mihinam-boaloboka marikivy, na iza na iza, dia izy ihany no hadilo nify koa.

³¹ Indro avy ny andro, - teny marin'ny Tompo, hanaovako fanekena vaovao amin'ny taranak'Israely sy ny taranak'i Jodà:

³² ka tsy fanekena toy ny nataoko tamin'ny razany, tamin'ny andro nitantanako azy, nitondrako azy nivoaka avy any amin'ny tany Ejipta, fanekena nivadihan'izy ireo, na dia vadiny aza aho.

³³ Fa izao no fanekena hataoko amin'ny taranak'Israely, rahefa afaka izany andro izany, - teny marin'ny Tompo: Hataoko ao anatiny ny lalàko, dia sady hosoratako ao am-pony; ka ho Andriamanitr'izy ireo aho, ary izy ireo ho oloko.