Bokin'i Ezekiela

Toko faha-24

⁶ Ka izao no lazain'ny Tompo Iaveh: Loza ho an'ny tànana mpandatsa-dra, vilany misy taim-barahana ao anatiny, ka tsy afaka tao aminy ny taim-barahana! Loary tsirairay ny didin-kena, aza hanaovana filokana,

⁷ fa ny ra nalatsany dia mbola ao aminy; nataony teo amin'ny vatolampy mangadihady fa tsy nalatsany tamin'ny tany hosaronan'ny vovoka. ⁸ Mba hampirehitra ny hatezerana ary mba hanao famaliana azy, dia nataoko latsaka tamin'ny vatolampy mangadihady ny ra nalatsany tsy ho voasarona. ⁹ Ka izao no lazain'ny Tompo Iaveh: Loza ho an'ny tànana mpandatsa-dra. Izaho koa hanangona antontan-kitay betsaka.

¹⁰ Angony ny kitay hazo, ampireheto ny afo, ataovy motraka ny hena, ataovy mangotraka ny koban-kena, ary aoka ho levon'ny afo koa ny taolana. ¹¹ Dia ataovy eo ambony vainafo ny vilany foana, hahafana azy, hahamay ny varahana, hiempoan'ny lotony ao anatiny, hahalevona ny taim-barahany. ¹² Aim-bery foana! fa tsy mety afaka ny vonga-taim-barahany, maharitra ny afo ny taim-barahany. ¹³ Misy zavatra lozan-tany amin'ny lotonao: satria tsy mety madio hianao, rahefa nodioviko dia tsy ho voadio amin'ny lotonao na oviana na oviana hianao, raha tsy efa nataoko mipetraka aminao ny hatezerako. ¹⁴ Izaho Iaveh no niteny, ho tonga izany ary hotanterahako; tsy hiahotrahotra aho, na hitsimbina, na hanenina. Hotsaraina araka ny nataonao sy ny helokao be vava hianao, - teny marin'ny Tompo Iaveh. ¹⁵ Tonga tamiko ny tenin'ny Tompo, nanao hoe:

¹⁶ Ry zanak'olona, indro hesoriko tampoka aminao, amin'ny indray mitselaka monja, ilay fifalian'ny masonao; nefa aza midradradradra na mitomany, na mandatsa-dranomaso akory. ¹⁷ Misentoa mangingina, fa aza misaona ny maty. Ataovy amin'ny lohanao ny hamamanao, asio kiraro ny tongotrao, aza saronana ny volombavanao, ary aza mihinana ny mofom-piononana. ¹⁸ Nony maraina dia niteny tamin'ny olona aho, ka ny harivan'izany ihany dia maty ny vadiko; ary ny ampitso maraina indray dia notanterahako izay nandidiana ahy.

¹⁹ Ka hoy ny olona tamiko: Tsy hovoasanao aminay va izay hevitra mahazo anay amin'izao ataonao izao? ²⁰ Dia izao no nolazaiko tamin'ireo: Tonga tamiko ny tenin'ny Tompo nanao hoe: ²¹ Lazao amin'ny taranak'Israely hoe: Izao no lazain'ny Tompo Iaveh: Indro, hovetavetaiko ny fitoerako masina, ilay reharehan'ny herinareo, fifalian'ny masonareo, fitiavan'ny fanahinareo; ary ho lavon-tsabatra ny zanakalahinareo aman-janakavavinareo, izay nilaozanareo. ²² Amin'izany hianareo, hanao toy izao nataoko izao: tsy hanarona ny volombavanareo; tsy hihinana ny mofom-piononana. ²³ Ho eo an-dohanareo ihany ny hamamanareo, ary ho eo an-tongotrareo ny kiraronareo, tsy hidradradradra na hitomany, fa hihalevona ao anatin'ny helokareo hianareo, ka hitoloko eo am-pifanilanareo. ²⁴ Ezekiela no famantarana ho anareo; izay rehetra nataony no hataonareo, rahefa tonga izany; dia ho fantatrareo fa izaho no Tompo Iaveh. ²⁵ Ary hianao, ry zanak'olona, amin'ny andro hanesorako amin'izy ireo ny heriny, ny voninahiny, ny firavoravoany, ny fahafinaretan'ny masony, ary ny fanirian'ny fanahiny; - dia ny zanany lahy aman-janany vavy; -

²⁶ amin'izany andro izany, hisy olona mpandositra hankaty aminao, hilaza izany vaovao izany aminao. ²⁷ Amin'izany andro izany, dia amin'ny fahatongavan'ilay mpadositra vao hisokatra ny vavanao, ka hiteny hianao fa tsy ho moana intsony; ary ho famantarana ho azy ireo hianao, dia ho fantatr'izy ireo fa Tompo Iaveh aho.

Toko faha-25

¹ Tonga tamiko ny tenin'ny Tompo nanao hoe:

² Ry zanak'olona, atodiho mankany amin'ny taranak'i Amona ny tavanao, ka maminania ny hanjo azy ireo.

³ Lazao amin'ny taranak'i Amona hoe: Mihainoa ny tenin'ny Tompo Iaveh ! Izao no lazain'ny Tompo Iaveh : Noho hianao nanakora hoe: Hià! Hià! ny amin'ny fitoerako masina satria efa voavetaveta, sy ny amin'ny tanin'Israely, satria efa voarava, sy ny amin'ny taranak'i Jodà, satria lasan-ko babo izy ireo;

⁴ noho izany dia indro hatolotro hozakain'ny zanaky ny Atsinanana kosa hianao; ka hanorina ny tobiny eo aminao izy ireo, sy hiorim-ponenana ao aminao; izy no hihinana ny voankazonao, sy hisotro ny ronononao.

⁵ Ary Rabata hataoko tany fihinanan-drameva; ary ny tanin'ny taranak'i Amona ho valan'ondry, dia ho fantatrareo fa Iaveh aho.

⁶ Fa izao no lazain'ny Tompo Iaveh: Noho hianao niteha-tànana sy nigado-tongotra, ary nifaly tao am-ponao tamin'ny fanesoanao rehetra, ny amin'ny momba ny tanin'Israely;

⁷ noho izany dia indro aho haninji-tànana aminao: hanolotra anao ho babon'ny firenena, hamongotra anao, eo amin'ny vahoaka, hanesotra anao tsy ho isan'ny tany; handringana anao aho, ka ho fantatrao fa Iaveh aho.

⁸ Izao no lazain'ny Tompo Iaveh: Noho Moaba sy Seira manao hoe: Indro ny taranak'i Jodà fa sahala amin'izao firenena rehetra izao ihany,

⁹ noho izany dia indro hotatahako ny lanivoan'i Moaba, hatrany amin'ny tanàna, hatrany amin'ny tanànany, hatrany amin'ny faritry ny taniny, tabihan'ny tany, Betjesimota, Beelmeona, Kariataina.

¹⁰ Hotatahako hidiran'ny zanaky ny Atsinanana izy, toraky ny tanin'ny taranak'i Amona, hatolotro hozakainy izy, mba tsy hotsaroana intsony eny amin'ny firenena ny taranak'i Amona.

¹¹ Hanao fitsarana any amin'i Moaba aho, ka ho fantany fa Iaveh aho.

¹² Izao no lazain'ny Tompo Iaveh: Noho Edoma namaly an-kalozana ny taranak'i Jodà, ka nanao heloka makadiry tamin'ny namaliany azy ireo;

¹³ noho izany dia izao no lazain'ny Tompo Iaveh: Haninji-tànana amin'i Edoma aho; ka haringako ny olona sy ny biby eo aminy; hataoko zary efitra, hatrany Temàna izy; ary ho lavon-tsabatra hatrany Dedàna.

¹⁴ Ny hanaovako famaliana an'i Edoma, dia ny tànan'Israely, vahoakako; hasiany araka ny hatezerako amam-pahavinirako i Edoma, ka ho fantany ny famaliako, - teny marin'ny Tompo Iaveh.

¹⁵ Izao no lazain'ny Tompo Iaveh: Noho ny Filistina nanampatra ny famaliana, sady namaly an-kalozana, tamin'ny fanesoana ao am-po, mba handringana izao rehetra izao noho ny fankahalany tsy misy farany,

¹⁶ noho izany dia izao no lazain'ny Tompo Iaveh: Indro aho haninji-tànana amin'ny Filistina, handringana ny Kretoà, ary handrava izay sisa monina eny amoron-dranomasina.

¹⁷ Hanao famaliana lehibe azy ireo aho, manasazy azy amin-katezerana mafy, ka ho fantany fa Iaveh aho, rahefa mampihatra aminy ny famaliako aho.

Toko faha-26

¹ Tamin'ny taona faharaika ambin'ny folo, andro voalohan'ny volana, tonga tamiko ny tenin'ny Tompo nanao hoe:

² Ry zanak'olona, noho ny nitenenan'i Tira momba an'i Jerosalema nataony hoe: Hià! Hià! vaky ilay vavahadin'ny firenena! aty amiko indray no todihin'ny olona; ka izaho ho feno; izy kosa efa zary efitra! -

³ noho izany, dia izao no lazain'ny Tompo Iaveh: Indro, hihaviako hianao, ry Tira! Hampiakatra firenena maro hamely anao aho, toy ny fampisondrotry ny ranomasina ny hady izy;

⁴ Horavan'ireo ny mandan'i Tira, sady harodany ny tilikambony; hailiko lavitra azy ny vovo-taniny; ary hataoko toy ny vatolampy mangadihady izy;

⁵ dia ho fitoerana fanahazana harato, ao afovoan'ny ranomasina izy, fa efa niteny aho - teny marin'ny Tompo Iaveh; ka ho babon'ny firenena izy.

⁶ Ny zanany vavy eny an-tanety hovonoina amin'ny sabatra, ka ho fantatra fa Iaveh aho.

⁷ Fa izao no lazain'ny Tompo Iaveh: Indro, hoentiko avy any avaratra hamely an'i Tira, Nabokodonozora mpanjakan'i Babilona, mpanjakan'ny mpanjaka, mitondra soavaly aman-kalesa, mpitaingin-tsoavaly, omba-miaramila betsaka sy vahoaka maro.

⁸ Hovonoiny amin'ny sabatra ny zanakao vavy eny an-tanety, hanorina manda hamelezana anao izy, hanandratra tovon-tany hamelezana anao, handahatra ny sokatra ampinga hanoherany anao.

⁹ Hanitsy ny fikapoky ny lohondry vy ho ao amin'ny mandanao, ary handrava ny tilikambonao amin'ny farangony.

¹⁰ Tsy erany ny habetsahan'ny soavaliny, ka ho tototry ny vovo-taniny hianao; ary azon'ny firodorodon'ny mpitaingin-tsoavaly, sy ny kodiarana aman-kalesa, dia hihozongozona ny mandanao, rahefa miditra amin'ny vavahadinao izy, toy ny fiditry ny olona amin'ny tanàna voabanga.

¹¹ Ny lalam-benao rehetra, hohitsakitsahan'ny kitron-tsoavaliny; ny olonao, hovonoiny amin'ny sabatra, ary ny andrinao mafy, hazerany amin'ny tany.