Eksaody

Toko faha-39

³⁹ ny otely varahina, ny karakarany varahina, ny baony ary ny fanaka rehetra momba azy, ny tavy amam-paladiany; ny fefy lamban'ny kianja, mbamin'ny andriny amam-paladiany, ⁴⁰ ny vavahady lamba fidirana amin'ny kianja, ny kofehiny, ny tsimany, ary ny fanaka rehetra hoenti-manao fanompoam-pivavahana ao amin'ny Fonenana, amin'ny trano lay fihaonana, ⁴¹ ny fanamiana enti-manao ny fanompoana ao amin'ny fitoerana masina, ny fanamiana masina ho an'i Aarona mpisorona, sy ny fanamian'ireo zanany, fitondrany amin'ny raharaham-pisoronana. ⁴² Vitan'ny zanak'Israely izany asa rehetra izany, araka izay rehetra nandidian'ny Tompo an'i Moizy.

⁴³ Nodinihin'i Moizy ny zava-nataony rehetra, ka hitany fa tanterany tokoa, vitany araka ny nandidian'ny Tompo. Ka dia nitso-drano azy ireo Moizy.

Toko faha-40

¹ Ary Iaveh niteny tamin'i Moizy ka nanao hoe:

² Amin'ny andro voalohan'ny volana voalohany no hanangananao ny Fonenana, ny trano lay fihaonana.

³ Hapetrakao ao ny fiaran'ny vavolombelona ka hokoboninao amin'ny lamba.

⁴ Dia hoentinao ny latabatra, ka halahatrao eo amboniny izay tsy maintsy hatao eo; hoentinao ny fanaovan-jiro dia hapetrakao eo amboniny ny lalampiny.

⁵ Hataonao eo anoloan'ny fiaran'ny vavolombelona ny otely volamena fandoran-java-manitra, ary hataonao eo amin'ny fidirana ao amin'ny Fonenana ny varavarana lamba.

⁶ Hataonao eo anoloan'ny fidirana ao amin'ny Fonenana, ao amin'ny trano lay fihaonana, ny otely fanaovan-tsorona dorana.

⁷ Hapetrakao eo anelanelan'ny trano lay fihaonana sy ny otely ny tavy, ka hasianao rano.

⁸ Hatsanganao ny kianja manodidina dia hataonao amin'ny kianja ny vavahady lamba.

⁹ Halainao ny diloilo fanosorana dia hohosoranao ny Fonenana mbamin'izay rehetra ao aminy; hohamasininao izy sy ny fanaka rehetra momba azy, dia ho masina izy.

¹⁰ Hanosotra ny otely fanaovan-tsorona dorana mbamin'ny fanaka rehetra momba azy hianao, hanamasina ny otely, dia ho masina indrindra ny otely.

¹¹ Hanosotra ny tavy amam-paladiany hianao dia hanamasina azy.

¹² Hasainao handroso ho eo akaikin'ny fidirana amin'ny trano lay fihaonana Aarona sy ireo zanany, ka hanadio azy amin'ny rano hianao.

¹³ Rahefa izany dia hatafinao an'i Aarona ny fanamiana masina ka hohosoranao sy hohamasininao izy dia ho mpisorona hanao ny fanompoana ahy.

¹⁴ Hasainao handroso koa ireo zanany ka hatafinao azy ny toniky,

¹⁵ dia hohosoranao toy ny nanosoranao an-drainy izy, dia ho mpisorona hanao ny fanompoana ahy. Izany fanosorana izany no hampahazo azy ny fahefam-pisoronana mandrakizay amin'ny taranany mandimby azy.

¹⁶ Dia nataon'i Moizy izay rehetra nandidian'ny Tompo azy, dia vitany arak'izany.

¹⁷ Tamin'ny andro voalohan'ny volana voalohany amin'ny taona faharoa, dia voatsangana ny Fonenana.

¹⁸ Natsangan'i Moizy ny Fonenana; naoriny ny faladiany, nalahany ny hazo fisany mbamin'ny barany, dia natsangany ny andriny.

¹⁹ Novelariny ny lay teo ambonin'ny Fonenana, ary nataony teo ambony ny firakotry ny lay, araka ny nandidian'ny Tompo an'i Moizy.

²⁰ Nalainy ny Vavolombelona, dia napetrany tao anaty fiara; nataony tamin'ny fiara ny bao, ary napetrany teo ambonin'ny fiara ny fanaovam-panavotana.

²¹ Nentiny tao anatin'ny Fonenana ny fiara, dia nahantony ny efitra lamba faneferana nanakonany ny fiaran'ny vavolombelona, araka ny nandidian'ny Tompo an'i Moizy.

²² Napetrany tao an-trano lay fihaonana ny latabatra amin'ny lafiny avaratra amin'ny Fonenana, aty ivelan'ny efitra lamba,

²³ dia nalahany eo amboniny, tao anatrehan'ny Tompo ny mofo, araka ny nandidian'ny Tompo an'i Moizy.

²⁴ Nataony tao an-trano lay fihaonana koa ny fanaovan-jiro, tandrifin'ny latabatra, amin'ny lafiny atsimo amin'ny Fonenana,

²⁵ dia nametrahany ny lalampy, teo anatrehan'ny Tompo, araka ny nandidian'ny Tompo an'i Moizy.

²⁶ Napetrany tao an-trano lay fihaonana, anoloan'ny efitra lamba, ny otely volamena,

²⁷ dia nandoroany emboka, araka ny nandidian'ny Tompo an'i Moizy.

²⁸ Nataony teo amin'ny fidirana amin'ny Fonenana ny varavarana lamba.

²⁹ Nataony teo amin'ny fidirana amin'ny Fonenana, amin'ny trano lay fihaonana, ny otely fanaovan-tsorona dorana, dia nanolorany ny sorona dorana sy ny fanatitra araka ny nandidian'ny Tompo an'i Moizy.

³⁰ Napetrany teo anelanelan'ny trano lay fihaonana sy ny otely ny tavy, dia nasiany rano ho fiafanana;

³¹ ary nanasa ny tànany sy ny tongony teo Moizy sy Aarona mbamin'ny zanany.

³² Rahefa hiditra ao an-trano lay fihaonana sy hanatona ny otely izy ireo, dia nisasa, araka ny nandidian'ny Tompo an'i Moizy.

³³ Ary nanangana ny kianja manodidina ny Fonenana sy ny otely izy, sy nanantona ny lamba amin'ny vavahadin'ny kianja. Toy izany no nahavitan'i Moizy izany raharaha izany.

³⁴ Tamin'izay ny rahona nanarona ny trano lay fihaonana: ary ny voninahitry ny Tompo nameno ny Fonenana.

³⁵ Ka tsy afa-niditra intsony tao an-trano lay fihaonana Moizy, fa nijanona teo amboniny ny rahona, ary nameno ny Fonenana ny voninahitry ny Tompo.

³⁶ Nandritra ny andro rehetra nandehanan'ny zanak'Israely, dia niainga izy ireo raha niakatra niala teo ambonin'ny Fonenana ny rahona,

³⁷ fa tsy niainga kosa izy ireo raha tsy niakatra ny rahona, mandra-pahatongan'ny andro niakaran'ny rahona indray.

³⁸ Fa ny rahon'ny Tompo dia nijanona teo ambonin'ny Fonenana, raha antoandro ny andro, ary amin'ny alina dia nisy afo, hitan'ny taranak'Israely rehetra, teo amin'ny rahona, mandritra ny andro rehetra nandehanany.

Levitika

Toko voalohany

¹ Ary Iaveh niantso an'i Moizy ka niteny taminy tao amin'ny trano lay fihaonana, nanao hoe:

² Mitenena amin'ny zanak'Israely ka lazao aminy hoe: Raha misy aminareo hanao fanatitra amin'ny Tompo dia biby fiompy no ataovy, na ny vaventy na ny madinika. ³ Raha biby vaventy no ateriny ho sorona dorana, dia lahy tsy misy kilema no hateriny; ka eo anoloan'ny trano lay fihaonana no hanaterany azy, mba hankasitrahana eo anatrehan'ny Tompo.

⁴ Hametra-tànana eo ambonin'ny lohan'ny sorona dorana izy, dia horaisina izany mba ho soa ho azy, mba hanaovana fanonerana ho azy. ⁵ Izy no hamono ny vantotr'ombalahy eo anatrehan'ny Tompo; ary ireo mpisorona zanak'i Aarona kosa, hanolotra ny rà sy handraraka azy manodidina eo ambonin'ny otely izay ao amin'ny fidirana amin'ny lay fihaonana. ⁶ Endahana ny sorona dorana dia raisina ho didiny. ⁷ Ary hanisy afo eo ambony otely ny zanak'i Aarona mpisorona sy hanohoka kitay hazo eo ambonin'ny afo;