Evanjely Masin'i Jesoa-kristy Nosoratan'i Md. Matio

Toko faha-2

²⁰ ka nanao hoe: Mifohaza hianao, ento ny Zazakely sy ny reniny ka modia any amin'ny tanin'Israely, fa efa maty izay nitady ny ain'ny Zazakely. ²¹ Dia nifoha izy, nitondra ny Zazakely sy ny reniny ka tonga tany amin'ny tanin'Israely. ²² Nony reny anefa fa Arkelaosy no nanjaka tany Jodea nandimby an'i Heroda rainy, dia natahotra hankany izy, ka nankany Galilea nony efa nilazan'Andriamanitra tamin'ny nofy. ²³ Ary nony tonga tany izy, dia nonina tao amin'ny tanàna atao hoe Nazareta, mba ho tanteraka ilay tenin'ny mpaminany hoe: Fa hatao hoe Nazareta izy.

Toko faha-3

¹ Ary tamin'izany andro izany dia niseho Joany Batista, nitory teny tany an'efitr'i Jodea

² nanao hoe: Mibebaha hianareo, fa efa akaiky ny fanjakan'ny lanitra. ³ Izy no ilay voalazan'Izaia mpaminany hoe: Re ny feon'izay miantso any an'efitra hoe: Amboary ny làlan'ny Tompo, ahitsio ny alehany. ⁴ Akanjo volon-drameva no fitafian'io Joany io, fehikibo hoditra no tamin'ny valahany, ary valala sy tantely remby no hanina fihinany. ⁵ Ary nankany aminy daholo Jerosalema sy Jodea rehetra mbamin'ny tany manodidina an'i Jordany; ⁶ ka nony efa niaiky ny tahotany izy ireo, dia nataony batemy tao amin'ny ony Jordany. ⁷ Ary raha nahita ny Farisiana sy ny Sadoseana betsaka nanatona ny bateminy izy, dia hoy izy taminy: Ry taranaky ny menarana, iza no nanoro hevitra anareo handositra ny fahatezerana ho avy?

⁸ Koa manaova àry asa fibebahana mendrika tsara, ⁹ ary aza manao anakampo hoe: Manana an'i Abrahama ho rainay izahay; fa lazaiko aminareo fa Andriamanitra mahay manangona zanaka ho an'i Abrahama avy amin'ireto vato ireto. ¹⁰ Efa ao am-poto-kazo sahady ny famaky: koa ny hazo rehetra izay tsy mamoa voa tsara dia hokapaina, ka hatsipy any anaty afo. ¹¹ Izaho dia manao batemy anareo amin'ny rano, ho amin'ny fibebahana; fa ilay ho avy aoriako no mahery kokoa noho izaho, ary tsy mendrika hivimbina ny kapany akory aho; izy no hanao batemy anareo amin'ny Fanahy Masina sy ny afo; ¹² eny an-tànany ny fikororohany ary hodioviny tsara ny famoloany, ka ny variny hangoniny any an-tsopitra, fa ny mololo kosa hodorany any amin'ny afo tsy mety maty. ¹³ Ary tamin'izany dia tonga avy tany Galilea Jesoa ka nanatona an'i Joany teo amoron'i Jordany mba hataony batemy;

¹⁴ fa nandà Joany nanao hoe: Izaho no tokony hataonao batemy, ka hianao indray va no mankaty amiko? ¹⁵ Dia namaly Jesoa ka nanao taminy hoe: Ekeo izao, fa izao no mety hahatanterahantsika ny fahamarinana rehetra. Dia nanaiky izy. ¹⁶ Nony vita batemy Jesoa, dia niala avy teo anaty rano niaraka tamin'izay, ary indro nisokatra taminy ny lanitra, ka hitany ny Fanahin'Andriamanitra nidina tahaka ny voromailala nankeo amboniny. ¹⁷ Dia injay nisy feo avy any an-danitra nanao hoe: Ity no Zanako malalako izay ankasitrahako indrindra.

Toko faha-4

¹ Ary tamin'izay dia nentin'ny Fanahy nankany an'efitra Jesoa, mba halain'ny demony fanahy;

² ary nifady hanina efa-polo andro sy efa-polo alina izy, ka noana nony afaka izany. ³ Dia nanatona ny mpaka fanahy ka nanao taminy hoe: Raha Zanak'Andriamanitra hianao, asaovy ho tonga mofo ireto vato ireto. ⁴ Fa namaly izy ka nanao hoe: Efa voasoratra hoe: Tsy ny mofo ihany no iveloman'ny olona, fa ny teny rehetra izay aloaky ny vavan'Andriamanitra. ⁵ Tamin'izay dia nitondra azy nankany amin'ny tanàna masina ny demony ka nametraka azy teo an-tampon'ny tempoly, ⁶ dia nanao taminy hoe: Raha Zanak'Andriamanitra hianao, mianjerà any ambany any, fa efa voasoratra hoe: Ny anjeliny no nametrahany anao, ary izy ireo hitondra anao eo an-tànany, fandrao ho tafintohina amin'ny vato ny tongotrao. ⁷ Fa hoy Jesoa taminy: Efa voasoratra koa fa: Tsy haka fanahy ny Tompo Andriamanitrao hianao. ⁸ Dia nentin'ny demony nankany ambonin'ny tendrombohitra avo dia avo indray izy, ka nasehony azy ny fanjakana rehetra amin'izao tontolo izao mbamin'ny voninahiny, ⁹ ary hoy izy taminy: Homeko anao izao rehetra izao, raha miankohoka hivavaka amiko hianao. ¹⁰ Fa izao no navalin'i Jesoa azy: Mandehana, ry Satana, fa efa voasoratra hoe: Ny Tompo Andriamanitrao no hivavahanao, ary izy irery ihany no hotompoinao. ¹¹ Tamin'izay dia nandao azy ny demony, ary indreo nisy anjely tonga teo aminy ka nanompo azy. ¹² Ary nony ren'i Jesoa fa natao an-tranomaizina Joany, dia lasa izy nankany Galilea;

¹³ ka nony niala tany Nazareta dia tonga tao Kafarnaoma, tanàna amoron-dranomasina ao amin'ny sisin-tanin'i Zabolona sy Neftalì ka nonina tao, ¹⁴ mba ho tanteraka ny teny nolazain'Izaia mpaminany hoe: ¹⁵ Ny tanin'i Zabolona sy ny tanin'i Neftalì, ny làlana ao amoron-dranomasina, any an-dafin'i Jordany, i Galilean'ny jentily: ¹⁶ ny olona izay nitoetra tao amin'ny maizina dia nahita fahazavana lehibe, ary ireo izay nitoetra tao amin'ny tany aloky ny fahafatesana no niposahan'ny mazava. ¹⁷ Hatramin'izay dia nanomboka nitory teny Jesoa ka nanao hoe: Mibebaha hianareo, fa efa akaiky ny fanjakan'ny lanitra. ¹⁸ Ary raha nitsangatsangana teny amoron-dranomasin'i Galilea Jesoa, nahita olona mirahalahy, dia Simona ilay atao hoe Piera sy Andre rahalahiny, nanarato teo amin'ny ranomasina, fa mpanarato izy ireo.

¹⁹ Dia hoy izy taminy: Avia hanaraka ahy, fa hataoko mpanarato olona hianareo. ²⁰ Dia nandao ny haratony niaraka tamin'izay izy ireo, ka nanaraka azy. ²¹ Dia mbola nandroso ihany izy, ka nahita olona mirahalahy hafa koa, dia Jakoba zanak'i Zebede sy Joany rahalahiny izay teo an-tsambo niaraka tamin'i Zebede rainy, nanamboatra ny haratony; ary nantsoiny izy mirahalahy. ²² Nandao ny haratony sy ny rainy niaraka tamin'izay izy ireo, ka nanaraka azy. ²³ Ary Jesoa nitety an'i Galilea manontolo, nampianatra tao amin'ny sinagogan'ny olona, sy nitory ny Evanjelin'ny fanjakan'Andriamanitra, ary nanasitrana ny aretina sy ny rofy rehetra tamin'ny olona.

²⁴ Dia niely eran'i Siria manontolo ny lazany, ka nentin'ny olona tany aminy ny marary rehetra izay azon'ny aretina sy ny fijaliana samihafa, dia ny mararin-javatra, ny mararin'ny androbe, ny malemy, ka nositraniny ireny. ²⁵ Ary be ny vahoaka avy tany Galilea sy Dekapaoly sy Jerosalema sy Jodea, ary avy tany an-dafin'i Jordany no nanaraka azy.

Toko faha-5

¹ Ary nony nahita ny vahoaka Jesoa, dia niakatra teo an-tendrombohitra, ary rahefa tafapetraka izy, dia nanatona azy ny mpianany,

² ka niloa-bava izy nampianatra azy, nanao hoe: ³ Sambatra ny mahantra am-panahy, fa azy ny fanjakan'ny lanitra. ⁴ Sambatra ny malemy fanahy, fa izy no handova ny tany.