Baiboly

• Hamaky baiboly
• Ny boky rehetra
• Fitadiavana

Boky Voalohan'ny Makabeo

       ¹Nitondra miaramila dimy arivo Gorjiasa, sy mpitaingin-tsoavaly voafantina arivo, ²ka niainga alina hanatona ny tobin'ny Jody sy hamely azy tampoka; ny miaramila avy amin'ny trano miamandan'i Siona no nitari-dàlana azy. ³Nony nandre izany Jodasa dia niainga izy sy ireo lehilahy mahery, hamely ny tafiky ny mpanjaka izay ao Emaosa, ⁴fony mbola tafaely tany ivelan'ny toby ny miaramila. ⁵Dia tonga tamin'ny alina, tao an-tobin'ny Jodasa, Gorjiasa, nefa tsy nahita olona, ka lasa nikaroka azy ireo tany an-tendrombohitra, fa hoy izy: nandositra antsika izy ireo. ⁶Vao nipoaka ny andro, dia niseho teo amin'ny tany lemaka Jodasa nitondra miaramila telo arivo; izy ireo anefa tsy mba nanana izay fitaovana niriny, na ny hiarovany tena na ny hamelezany. ⁷Raha nahita ny tobin'ny firenena voaro mafy izy ireo, ny miaramila misarona amin'ny fiarovan-tratra, ny miaramila an-tsoavaly misafo eny manodidina azy, izay samy zatra ady avokoa, ⁸dia hoy Jodasa tamin'ireo miaramila nomba azy: Aza matahotra izay hamaroan'ireo, na mivadi-po amin'izay famelezany, ⁹fa tsarovy ny namonjena ny razantsika tao amin'ny ranomasina Mena, fony izy nenjehin'i Faraona nomban-tafika lehibe. ¹⁰Koa ankehitriny miantsoa mitaraina amin'ny lanitra isika, ary matokia fa hamindra fo amintsika izy, hahatsiaro ny fanekeny tamin'ny razantsika ary handrava io tafika io anio eo imasontsika izy; ¹¹dia ho fantatry ny firenena rehetra fa manana olon-kanafaka sy hamonjy azy Israely.
       ¹²Tamin'izay nanopy ny masony ireo hafa firenena, ka nahatazana azy ireto tamy hamely azy, ¹³dia nivoaka ny toby hiady. Notsofin'ireo nomba an'i Jodasa niaraka tamin'izay, ny trompetra; ¹⁴dia rafitra ny ady, ka resy ny firenena sy nandositra teny amin'ny tany lemaka, ¹⁵lavon-tsabatra avokoa ny vody làlana, ary nenjehin'ny Jody hatrany Gazara, sy hatrany amin'ireo tany lemak'i Jodea sy Azota ary Jamnia, ka nahafatesany efa ho telo arivo lahy. ¹⁶Izay Jodasa sy ny tafiny, vao niverina nijanona tsy nanenjika intsony, ary hoy izy tamin'ny vahoaka: ¹⁷Aza liana ny hamabo hianareo, fa mbola misy ady miandry antsika. ¹⁸Ato an-tendrombohitra akaikintsika ato izao Gorjiasa sy ny miaramilany, ka tohay mafy aloha ny fahavalontsika, reseo izy, vao izay no hahazo maka ny babony tsy aman-tahotra hianareo. ¹⁹Mbola miteny eo Jodasa no indro niseho ny antoko-miaramilan'i Gorjiasa nivoaka avy ao an-tendrombohitra. ²⁰Hitan'ireo fa ny namany nandositra, ny toby nodoran'ny Jody, satria tazana ny setroka maneho izay natao. ²¹Raiki-tahotra mafy izy nahita izany; nony tazany koa amin'izay ny tafik'i Jodasa, nilahatra teo amin'ny tany lemaka, voaoman-kiady, ²²dia nandositra any amin'ny Filistina avokoa izy rehetra. ²³Fa Jodasa kosa niverina nandraoka ny babo tao an-toby, ka volamena sy volafotsy betsaka mbamin'ny lamba jaky volomparasy sy jaky mena mangatrakatraka ary harem-bevava no nentiny. ²⁴Hira no nataony nony nody; fiderana ny Tompo no nasondrony ho any an-danitra: Fa tsara izy, ary maharitra mandrakizay ny famindram-pony. ²⁵Nahazo famonjena lehibe Israely tamin'izany andro izany.
       ²⁶Nilaza ny nanjo rehetra tamin'i Lisiasa ireo hafa firenena izay afa-nandositra, ²⁷ka nalahelo sady kivy io, nony nandre izany vaovao izany, fa ny fikasany hamely an'Israely maty afo, ary ny didin'ny mpanjaka tsy tanteraka. ²⁸Tamin'ny taona manaraka, namory tafika iray indray Lisiasa, miaramila an-tongotra voafantina enina alina, ary an-tsoavaly dimy arivo, ho enti-mandresy ny kirin'ny Jody. ²⁹Dia nandroso nankany Jodea izy ireo, ka niorin-toby teo akaikin'i Betorona. Ary nandeha hanohitra azy Jodasa, nitarika miaramila iray alina. ³⁰Nony nahita ity tafika mahatahotra izy, dia nivavaka nanao hoe: Ry mpanafaka an'Israely ô, isaorana hianao, hianao ilay nanorotoro ny herin'ilay lehilahy goavana be, tamin'ny tànan'i Davida mpanomponao, sy nanolotra ny tobin'ny Filistina teo an-tànan'i Jonatasa, zanak'i Saola, sy ny dekany. ³¹Fiazo eo an-tànan'Israely vahoakanao io tafika io; ary aoka hifanaritaka izy ireo mbamin'ny miaramilany an-tongotra sy an-tsoavaly. ³²Ataovy raiki-tahotra izy, ketraho ny hasahiany be ebo; ary aoka ny fahareseny hampikorontana azy. ³³Ataovy lavon'ny sabatr'ireto tia anao izy ireo, ary aoka izay rehetra mahalala ny anaranao hanao hira fiderana anao avokoa. ³⁴Dia natombok'izy ireo ny ady, ka nisy dimy arivo lahy tamin'ny tafik'i Lisiasa no niampatra teo anoloan'ny Jody. ³⁵Nony hitan'i Lisiasa ity fiparitaky ny tafiny, sy izato fahasahian'ny miaramilan'i Jodasa, izay nitomban-ko velona na ho faty amim-boninahitra, dia nody ho any Antiokia izy, ka naka miaramila tamin'ny hafa firenena; ny hiverina ho any Jodea indray no nampoiziny rahefa nampitomboiny ny miaramilany.
       ³⁶Ary hoy kosa Jodasa sy ireo rahalahiny: Efa resy ity ny fahavalontsika, ka ndeha amin'izao hiakatra hanadio ny tempoly sy hitokana azy indray. ³⁷Dia nivory ny tafika manontolo, ka niakatra ho any an-tendrombohitra Siona. ³⁸Nony hitan'izy ireo ity fitoerana masina foana, ny otely voaloto, ny varavarana may, ny hazo madinika maniry tao amin'ny kianja, toy ny anaty ala na eny an-tendrombohitra, ary ny efitrano voarava, dia ³⁹norovitiny ny fitafiany, nigogogogo tamim-pisaonana mafy izy, nohosenany lavenona ny lohany, ⁴⁰nahohony tamin'ny tany ny tarehiny, ary raha niara-naneno nikarantsana ny trompetra, dia nandefa fitarainana tamin'ny lanitra izy ireo. ⁴¹Tamin'izay, dia nakan'i Jodasa antokony iray ny foloalindahy hiady amin'ny Siriana tao amin'ny trano mimanda mandra-panadio ny fitoerana masina. ⁴²Rahefa izany, nifidy mpisorona tsy manan-tsiny, miraiki-po amin'ny lalàn'Andriamanitra izy, ⁴³dia nodiovin'izy ireo ny fitoerana masina, ary notateriny any am-panarian'ondana ny vato voaloto. ⁴⁴Nifampihevitra ny amin'izay tokony hanaovana ny otelin-tsorona dorana izay efa voaloto, ⁴⁵ka nahita hevitra tsara izy, dia ny handrava an'io, fandrao hahatonga fahafaham-baraka ho azy, noho izy efa voaloton'ny jentily. Dia noravany ny otely, ⁴⁶ary napetrany teo amin'ny tendrombohitry ny tempoly amin'ny fitoerana mety tsara ny vato, mandra-pahatongan'izay mpaminany, hanapaka izay tokony hanaovana azy. ⁴⁷Dia naka vato tsy voapaika, araka ny lalàna, izy ireo ary nanangana otely anankiray vaovao, araka ny marik'ilay taloha. ⁴⁸Naoriny indray ny fitoerana masina mbamin'ny atin'ny tempoly, ary nohamasininy ny kianja. ⁴⁹Nanao fanaka masina vaovao indray izy; dia napetrany tao amin'ny tempoly indray ny fanaovan-jiro, ny otely fandoroan-java-manitra, ny latabatra. ⁵⁰Nodorany hanetona eo ambony otely ny emboka, nampirehetiny ny lalampy teo amin'ny fanavoan-jiro, ary notsilovin'ireo ny tempoly. ⁵¹Napetrany teo ambony latabatra ny mofo, ary nahantony ny efitra lamba.
Nony vitan'izy ireo ny asa rehetra nataony, ⁵²dia nifoha maraina koa izy, tamin'ny andro fahadimy amby roapolon'ny volana fahasivy, izay volana atao hoe Kasleo, tamin'ny taona fahavalo amby efapolo amby zato, ⁵³ka nanatitra sorona, araka ny lalàna, teo ambonin'ny otelin-tsorona dorana vaovao izay narafiny. ⁵⁴Tamin'ny volana sy ny andro nandotoan'ny firenena ny otely indrindra no nanamasinana azy indray, tamin'ny hiran'ny salamo, sy tamin'ny feon'ny harpa aman-dokanga sy kipantsona. ⁵⁵Indray nihohoka ny vahoaka, dia nitsaoka ary niandrandra ny lanitra, nisaotra an'ilay nanambina azy. ⁵⁶Naharitra valo andro no nanaovany ny fitokanana ny otely, ary an-kafaliana no nanaterany ny sorona dorana sy ny sorom-pisaorana amam-piderana. ⁵⁷Noravahany fehiloha aman'ampinga be renty ny anoloan'ny tempoly, namboariny koa ny fidirana amin'ny tempoly sy ny efitrano sady nasiany varavarana. ⁵⁸Nisy fifaliana lehibe indrindra teo amin'ny vahoaka, ka afaka ny fahafaham-baraka nafitsoky ny firenena. ⁵⁹Ary Jodasa nifanara-kevitra tamin'ireo rahalahiny mbamin'ny fiangonan'Israely rehetra, dia nandidy ny hankalazana ireo andro nitokanana ny otely, amim-pifaliana sy firavoravoana mandritra ny havaloana isan-taona, miantomboka amin'ny fahadimy amby roapolon'ny volana Kasleo. ⁶⁰Tamin'izany fotoana izany ihany, izy ireo nanorina teo amin'ny tendrombohitra Siona manda avo manodidina sy tilikambo mafy, mba tsy hahazoan'ny firenena manosihosy ny fitoerana masina intsony, toy ny efa nataony teo aloha. ⁶¹Nametraka miaramila iray toko tao Jodasa hiambina sy hiaro azy. Nohamafisina koa Betsora, mba hananan'ny vahoaka fiarovana tandrifin'Idomea. >