Evanjely Masin'i Jesoa-kristy Nosoratan'i Md. Lioka

Toko voalohany

¹ Noho ny maro efa nanoratra ny tantaran'ny zavatra inoana tokoa amintsika

² sy noraisintsika tamin'ny vavolombelona sady nahita maso no mpitory teny hatramin'ny voalohany, ³ dia nataoko fa mety koa, rahefa niala nenina aho hahalala tsara ny zavatra rehetra hatramin'ny niandohany, ny hanoratra azy milamina tsara ho anao, ry Teofily manan-kaja, ⁴ mba ho fantatrao fa marina tokoa izay nampianarina anao. ⁵ Tamin'ny andron'i Heroda mpanjakan'i Jodea, nisy mpisorona anankiray atao hoe Zakaria isan'ny fianakavian'i Abià, ary ny vadiny dia taranak'i Aarona sy natao hoe Elizabeta.

⁶ Samy marina teo imason'Andriamanitra izy mivady, sady nitondra tena tsy nanan-tsiny tamin'ny didy sy ny tenin'ny Tompo rehetra. ⁷ Tsy nanan-janaka izy, fa momba Elizabeta, ary efa samy zokiolona izy mivady. ⁸ Indray andro, nony nanao ny raharahan'ny mpisorona teo anatrehan'Andriamanitra Zakaria araka ny anjaran'ny antokony,

⁹ dia voatendrin'ny loka araka ny fanaon'ny mpisorona hiditra ao amin'ny tempolin'ny Tompo, hanolotra ny emboka, ¹⁰ ary ny vahoaka rehetra dia tao alatrano no nivavaka, tamin'ny ora fanolorana ny emboka. ¹¹ Fa nisy anjelin'ny Tompo niseho taminy, nitsangana teo an-kavanan'ny otely fanolorana ny emboka. ¹² Taitra Zakaria nony nahita azy ka raiki-tahotra. ¹³ Fa hoy ny anjely taminy: Aza matahotra, ry Zakaria, fa efa nohenoina ny fangatahanao, ka Elizabeta vadinao dia hiteraka zazalahy aminao, ary Joany no hataonao anarany: ¹⁴ dia ho faly sy ho ravo hianao, ary maro koa no ho faly amin'ny hahaterahany. ¹⁵ Fa ho lehibe eo imason'ny Tompo izy: tsy hisotro divay na zava-mahamamo izy, sady ho fenon'ny Fanahy Masina hatrany an-kibon-dreniny; ¹⁶ maro amin'ny zanak'Israely no hampodiny amin'ny Tompo Andriamanitra, ¹⁷ dia hialoha azy amin'ny fanahy sy ny herin'i Elia izy hampody ny fon'ny ray ho amin'ny zanaka ary ny tsy manoa ho amin'ny fahendren'ny olo-marina, hamboatra firenena voavonona ho an'ny Tompo. ¹⁸ Dia hoy Zakaria tamin'ny anjely: Inona no hahafantarako izany? fa izaho efa antitra, ary koa efa zokiolona ny vadiko.

¹⁹ Namaly ny anjely nanao taminy hoe: Izaho no Gabriely, ilay mitsangana eo anatrehan'Andriamanitra, ary nirahina aho hiteny aminao hampandre anao izany teny mahafaly izany; ²⁰ fa indro, ho moana hianao ka tsy hahay miteny ambara-pahatongan'izany, noho hianao tsy nino ny teniko, izay ho tanteraka amin'ny fotoan'androny. ²¹ Niandry an'i Zakaria anefa ny olona ka gaga noho izy naharitra ela tao anatin'ny tempoly; ²² kanjo nony nivoaka izy, dia tsy nahay niteny taminy, ka fantatry ny olona fa nahita fahitana tao anatin'ny tempoly izy: dia baikon'ny moana no nitenenany taminy, fa moana tokoa izy. ²³ Ary nony tapitra ny anjara androny amin'ny raharahany, dia nody tany an-tranony izy.

²⁴ Ary taorian'izany andro izany dia nitoe-jaza Elizabeta vadiny, ary niery dimy volana ka nanao hoe: ²⁵ Izao no nataon'ny Tompo tamiko, tamin'ny andro nitsinjovany ahy hahafa-tondro-maso ahy amin'ny olona. ²⁶ Ary rahefa nandray enina izy, dia nirahin'Andriamanitra ny anjely Gabriely ho any amin'ny tanàna anankiray any Galilea atao hoe Nazareta,

²⁷ ho any amin'ny Virjiny anankiray fofom-badin'ilay lehilahy atao hoe Josefa, taranak'i Davida, ary ny anaran'ilay Virjiny dia Maria. ²⁸ Ary nony niditra tao aminy ilay anjely dia nanao hoe: Arahaba, ry ilay feno hasoavana, ny Tompo ao aminao; nosoavina noho ny vehivavy hianao. ²⁹ Taitra izy nahare izany, ka nieritreritra izay tokony ho hevitr'izany fiarahabana izany. ³⁰ Fa hoy ny anjely taminy: Aza matahotra, ry Maria, fa sitrak'Andriamanitra hianao. ³¹ Ary indro, hitoe-jaza hianao, ka hiteraka zazalahy, ary Jesoa no hataonao anarany. ³² Ho lehibe izy ka hatao hoe Zanaky ny Avo indrindra; dia homen'Andriamanitra ny fiketrahan'i Davida rainy izy, ka hanjaka mandrakizay amin'ny taranak'i Jakoba, ³³ ary tsy hanam-pahataperana ny fanjakany. ³⁴ Fa hoy Maria tamin'ilay anjely: Ahoana no hahatongavan'izany, fa tsy mahalala lahy aho?

³⁵ Ny Fanahy Masina, hoy ny anjely namaly azy, no ho tonga ao aminao, ary ny herin'ny Avo indrindra hanaloka anao; noho izany dia hatao hoe Zanak'Andriamanitra ny Masina haterakao. ³⁶ Ary indro, Elizabeta rahavavinao dia efa mitoe-jaza koa na dia efa antitra aza, ary efa mandray enina izy izao ilay natao hoe momba, ³⁷ fa tsy hisy tsy ho hain'Andriamanitra atao. ³⁸ Dia hoy Maria: Inty aho ankizivavin'ny Tompo, aoka anie ho tanteraka amiko araka ny teninao. Dia niala teo aminy ny anjely. ³⁹ Niainga Maria tamin'izany andro izany, ka nandeha haingana ho any amin'ny tany be tendrombohitra, ho any an-tanàna anankiray any Jodà,

⁴⁰ ary niditra tao an-tranon'i Zakaria ka niarahaba an'i Elizabeta. ⁴¹ Nony vao ren'i Elizabeta ny fiarahaban'i Maria azy, dia nientana ny zaza tao an-kibony, ary feno ny Fanahy Masina Elizabeta, ⁴² ka nanandra-peo niantso mafy hoe: Nosoavina noho ny vehivavy rehetra hianao, ary nosoavina ny hateraky ny kibonao. ⁴³ Ary avy aiza amiko izao no mba vangian'ny renin'ny Tompoko aho? ⁴⁴ Fa indro raha vao ren'ny sofiko ny feonao niarahaba ahy, dia nientan-kafaliana ny zaza tao an-kiboko. ⁴⁵ Ary sambatra ilay nino fa ho tanteraka izay nampilazain'ny Tompo taminy! ⁴⁶ Ary hoy Maria: Mankalaza ny Tompo ny fanahiko, ⁴⁷ ary faly sy ravo amin'Andriamanitra Mpamonjy ahy ny foko, ⁴⁸ fa notsinjoviny ny fiambanian'ny ankizivaviny. Fa indro, hatramin'izao, dia hataon'ny taranaka rehetra hoe, sambatra aho, ⁴⁹ satria efa nanao zavatra lehibe tamiko ilay Mahefa. Ary masina ny anarany, ⁵⁰ sady amin'izay matahotra azy hatramin'ny taranaka fara mandimby ny famindram-pony.