Eksaody

Toko faha-21

²⁵ efain-dotra ny voadotra, efain-dratra ny ratra, efai-mangana ny mangana. ²⁶ Raha misy olona mamely ny mason'ny ankizilahiny na ny ankizivaviny, ka maha-jamba ny masony, dia halefany ho afaka izy ho onitry ny masony.

²⁷ Ary raha mahafa-nify iray amin'ny ankizilahiny na ny ankizivaviny izy, dia handefa azy ho afaka ho onitry ny nifiny. ²⁸ Raha misy omby manoto lehilahy na vehivavy ka mahafaty azy, dia ny omby no hotoraham-bato sy tsy hohanin-kena, fa ny tompony ho afaka.

²⁹ Raha omby efa nanoto hatramin'ny ela anefa sady efa nilazana izany ny tompony, nefa tsy mitandrina azy, dia hotoraham-bato ny omby, raha mahafaty lehilahy na vehivavy, ary atao maty koa ny tompony. ³⁰ Raha vidin'aina no asaina hataon'ny tompon'omby dia haloany izay didiana haloany. ³¹ Raha zazalahy na zazavavy no totoin'ny omby, dia io lalàna io ihany koa no hampiasaina. ³² Fa raha andevolahy na andevovavy no totoin'ny omby dia volafotsy telo-polo sikla no haloa ho an'ny tompon'andevo, ary ny omby hotoraham-bato. ³³ Raha misy olona manokatra lava-drano, na olona vao nandavaka lava-drano ka tsy mandrakotra azy, ka misy omby na ampondra latsaka ao,

³⁴ dia hanonitra ny tompon-davaka, haloany volafotsy izay vidin'ny biby, fa ny biby maty no ho azy. ³⁵ Raha misy ombin'olona manoto ombin'olon-kafa ka mahafaty azy, dia hamidin'izy ireo ny omby velona, ka ny vidiny hozarainy, ny omby maty koa hozarainy.

³⁶ Raha fantatra anefa fa efa mpanoto hatramin'ny ela ilay omby fa tsy nitandrina azy ihany ny tompony, dia hanonitra izy, hefainy omby ny omby, fa ny omby maty no ho azy.

Toko faha-22

¹ Raha misy olona mangalatra omby na zanak'ondry, ka mamono izany na mivarotra, dia honerany omby dimy ny omby iray ary zanak'ondry efatra ny zanak'ondry iray.

² Raha misy mpangalatra azo manami-trano alina, ka voavely izy ka maty, dia tsy misy valin-drà amin'izany;

³ fa rahefa niposaka kosa ny masoandro dia hisy valin-drà ihany. Hanonitra ny mpangalatra; raha tsy manana na inona na inona izy dia ny tenany no amidy ho onitr'izay nangalariny; ⁴ ary raha mbola tratra velona eo an-tànany izay nangalariny, na omby na ampondra na ondry, dia honerany avo sasaka. ⁵ Raha misy olona nanimba voly na tanim-boaloboka, fa nampitondraka ny bibiny tamin'ny sahan'olona dia honerany izany amin'izay tsara indrindra amin'ny voliny sy amin'izay tsara indrindra amin'ny tanim-boalobony.

⁶ Raha misy afo mirehitra ka mahazo ny tsilo aloha, izay vao mandevona amboaram-bary koa, na vary tsy mbola voajinja, na saha, dia hanonitra izay nandrehitra ny afo.

⁷ Raha misy nametra-bola na fanaka hotehirizin'ny namany, ka nangalarin'ny sasany tao an-tranon'ity namany izany: raha hita ny nangalatra dia hanonitra avo sasaka,

⁸ fa raha tsy hita ny mpangalatra, dia hiseho eo anatrehan'Andriamanitra ny tompon-trano, sao dia noraisin'ny tànany ihany ny fananan'ny namany. ⁹ Na inona na inona zavatra ifandirana, na omby na ampondra na ondry na fitafiana, na zavatra inona na zavatra inona very, ka lazain'olona hoe: Izy indrindra ity, dia hoentina eo anatrehan'Andriamanitra ny tenin'izy roa tonta, ka izay hohelohin'Andriamanitra dia hanonitra avo sasaka ho an'ny namany. ¹⁰ Raha misy olona manome omby na ondry na biby hafa anankiray hotehirizin'ny namany, ka maty ilay biby na tapaka, na nisy naka, nefa tsy nisy nahita,

¹¹ dia ny fianianana amin'ny Tompo no hampanaovina amin'izy roa tonta hahalalàna raha noraisin'ny tànany ny fananan'ny namany, ary hanaiky izany ny tompom-biby, dia tsy hanonitra itsy anankiray. ¹² Raha tao aminy anefa no nangalarana ny biby, dia tsy maintsy manonitra amin'ny tompom-biby izy. ¹³ Ary raha voaviraviram-biby masiaka ny biby, izay sisa tsy laniny no hoentiny ho vavolombelona, dia tsy hanonitra ilay biby voaviravira izy. ¹⁴ Raha misy olona mindram-biby amin'ny namany, ka tapaka na maty ilay biby tsy teo anatrehan'ny tompony, dia hisy onitra;

¹⁵ fa raha teo anatrehan ny tompony kosa, tsy hisy onitra. Ary raha biby nohofany, dia ny hofany no ho solon'ny onitra. ¹⁶ Raha misy lehilahy manakojikojy zazavavy tsy foafofo ka mandry aminy dia handoa ny hajam-bolany izy ka hanambady azy.

¹⁷ Ary raha lavin-drainy ny hanambadiany azy, dia ny vola fanome amin'ny zazavavy virijiny no haloany. ¹⁸ Aza velomina izay zazavavy mpanao ody.

¹⁹ Ataovy maty izay olona miray amin'ny biby.

²⁰ Ataovy anatema izay manolotra sorona amin'ny andriamanitra, fa tsy amin'ny Tompo irery.

²¹ Aza ratsy fitondra vahiny na mampahory azy, fa efa mba vahiny tany amin'ny tany Ejipta koa hianao.

²² Aza manao izay hampalahelo ny mpitondra tena sy ny kamboty;

²³ fa raha manao izay mampalahelo ireny hianao, dia hitaraina amiko izy, ka hohenoiko ny fitarainany; ²⁴ hirehitra ny fahatezerako ka haringako amin'ny sabatra hianareo; ary ny vadinareo ho mpitondra tena, ny zanakareo ho kamboty. ²⁵ Raha mampisambo-bola olona amin'ny vahoakako hianao, amin'ny mahantra eo aminao, aza mitsangan-ko mpànana vola aminy, aza maka zana-bola aminy.

²⁶ Raha alainao ho antoka ny kapaotin'ny namanao dia avereno aminy alohan'ny maty masoandro,

²⁷ fa iny no hany firakofany, iny no fitafiana anaronany ny vatany, ka inona ary no hentiny mandry? Raha mitaraina amiko izy, hohenoiko ny fitarainany, fa antra olona aho. ²⁸ Aza miteny ratsy an'Andriamanitra, na manozona ny filohany amin'ny firenena.

²⁹ Aza milasilasy amin'ny fanaterana amiko ny voaloham-bokatry ny varinao sy ny voalobokao. Atolory ahy ny lahimatoa amin'ny zanakao lahy.

³⁰ Ataovy toy izany koa ny voalohan-teraky ny omby aman'ondrinao; hafitoana no hiarahany amin-dreniny dia haterinao ho ahy izy amin'ny andro fahavalo. ³¹ Ho olona masina ho ahy hianareo; aza mihinan-kena voaviraviram-biby hita any an-tsaha, fa atsipazo ho an'ny amboa ireny.

Toko faha-23

¹ Aza manely tsaho tsy marina. Aza manampy ny ratsy fanahy ka mitsangan-ko vavolombelona manombotomboka.

² Aza momba ny maro hanao ratsy; raha misy ady aza miandany amin'ny maro ka mitsangan-ko vavolombelona nampitanila ny fitsarana.

³ Aza momba ny malahelo amin'ny adiny. ⁴ Raha hitanao mania ny ombim-pahavalonao na ny ampondrany dia aza diso ny mamerina izany any aminy.

⁵ Raha hitanao mihonaka ao ambanin'ny entany ny ampondran'izay mankahala anao, dia aza ilaozanao izy, fa miraisa hina aminy hanala ny entany. ⁶ Aza mamilivily ny rariny ananan'ny mahantra raha manana ady izy.

⁷ Fadio ny ady tsy marina ka aza mamono ny tsy manan-tsiny sy ny marina, fa tsy hamela ny meloka aho.