Eksaody

Toko faha-36

³⁶ ary nanaovana andry efatra amin'ny hazo akasià, nopetaham-bolamena, sy faraingony volamena; ary volafotsy no narendrika natao faladiany efatra. ³⁷ Ny fidirana ho ao amin'ny lay, nanaovana varavarana lamba jaky volomparasy, jaky mangatrakatraka, lamba mena antitra, ary rongony madinika mihasina, taozavatra misoratsoratra.

³⁸ Nanaovana andriny dimy mbamin'ny faraingony avy io varavarana lamba io, ary voapetaka takela-bolamena ny koronosin'ireo mbamin'ny anjaka itohizany, ary varahina ny faladiany dimy.

Toko faha-37

¹ Hazo akasià no nanaovan'i Beseleela ny fiara: roa hakiho sy sasany ny halavany, iray hakiho sy sasany ny sakany, ary iray hakiho sy sasany ny hahavony.

² Nopetahany takela-bolamena madio ny atiny sy ivelany, nasiany tanjo-miolaka volamena ny manodidina azy. ³ Nandrendrika masom-bolamena efatra ho azy izy, nataony tamin'ny tongony efatra: masom-bola roa tamin'ny ilany iray, masom-bola roa tamin'ny ilany iray hafa. ⁴ Nanao bao tamin'ny hazo akasià izy, ary nopetahany takela-bolamena. ⁵ Natsofony tamin'ireo masom-bola teo amin'ny lanin'ny fiara ny bao hitondrana azy. ⁶ Nanao fanaovam-panavotana tamin'ny volamena madio izy; roa hakiho sy sasany ny lavany, iray hakiho sy sasany ny sakany. ⁷ Nanao kerobima volamena roa izy, nataony volamena an-tefiny, tao amin'ny tendrony roa amin'ny fanaovam-panavotana. ⁸ Ny kerobima iray amin'ny tendrony iray ary ny kerobima iray amin'ny tendrony iray hafa, nataony tafahoatra ny fanaovam-panavotana eo amin'ny tendrony roa avy ny kerobima. ⁹ Nivelatra niakatra ny elatry ny kerobima manaloka ny fanaovam-panavotana ary ny tavany mifanatrika, ary ny tavan'ny kerobima mitodika manatrika ny fanaovam-panavotana. ¹⁰ Hazo akasià koa no nanaovany ny latabatra: roa hakiho ny lavany, iray hakiho ny sakany, ary iray hakiho sy sasany ny hahavony.

¹¹ Nopetahany takela-bolamena madio izy, ary nasiany tanjo-miolaka volamena manodidina azy. ¹² Nasiany sisiny iray vody voampelatanana manodidina azy, ary io sisiny io nanaovany tanjo-miolaka volamena manodidina. ¹³ Nandrendrika masom-bolamena efatra izy ary nataony tamin'ny zorony efatra ny masom-bolamena, dia amin'ny tongony efatra. ¹⁴ Tao akaikin'ny sisiny ny masom-bola hidiran'ny bao hitondrana ny latabatra. ¹⁵ Ny bao dia nataony tamin'ny hazo akasià nopetahana volamena: izany no nitondrana ny latabatra. ¹⁶ Nanao fanaka hapetraka eo ambonin'ny latabatra izy, dia ny loviany, ny fitoeran-java-manitra, ny kopiny ary ny tasiny fanaovam-panatitra araraka; volamena madio no nanaovany an'ireo. ¹⁷ Volamena madio no nanaovany ny fanaovan-jiro; volamena an-tefiny avokoa, na ny fanaovan-jiro na ny tongony aman-tahony; iray aminy koa ny ravim-boniny mbamin'ny bokony sy ny voniny.

¹⁸ Rantsany enina no teo an-daniny roa; ny rantsany telo amin'ny fanaovan-jiro dia tao amin'ny laniny iray; ary ny rantsany telo amin'ny fanaovan-jiro dia tao amin'ny laniny iray hafa. ¹⁹ Ka ny rantsany voalohany nisy ravim-boniny telo miendrika vonin'amandia, bokony sy voniny; ny rantsany faharoa nisy ravim-boniny telo miendrika vonin'amandia, bokiny sy voniny; dia nisy toy izany avokoa ny rantsany enina misampana avy amin'ny fanaovan-jiro. ²⁰ Teo amin'ny tahon'ny fanaovan-jiro nisy ravim-boniny efatra miendrika vonin'amandia, bokony sy voniny: ²¹ bokony iray teo ambanin'ny rantsany roa voalohany, misampana avy amin'ny fanaovan-jiro; bokony iray teo amin'ny rantsany roa manarakaraka avy amin'ny fanaovan-jiro; ary bokony iray teo ambanin'ny rantsany roa farany avy amin'ny fanaovan-jiro, araka ny rantsany enina misampana avy amin'ny fanaovan-jiro. ²² Iray amin'ny fanaovan-jiro ireo bokony aman-drantsany, fa vongam-bolamena an-tefy iray ihany, volamena madio, no nanaovana azy rehetra manontolo. ²³ Volamena madio avokoa no nanaovany ny lalampiny fito sy ny hetin-jirony, ary ny fitoeran-davenon-jirony. ²⁴ Volamena madio talenta iray no lany nanaovana ny fanaovan-jiro mbamin'ny fanaka rehetra momba azy. ²⁵ Hazo akasià no nanaovany ny otely fandoroan-java-manitra; iray hakiho ny lavany, iray hakiho ny sakany, efa-joro mitovy lafiny efatra, ary roa hakiho ny hahavony, iray aminy ny tandrony.

²⁶ Nopetahany takela-bolamena madio izy dia ny tampony, ny lafiny manodidina, ny tandrony; ary nasiany tanjo-miolaka volamena manodidina. ²⁷ Nasiany masom-bolamena roa teo ambanin'ny tanjo-miolaka amin'ny rirany roa; nataony teo an-daniny roa ireo, hidiran'ny bao hitondrana azy. ²⁸ Hazo akasià, nopetahany volamena, no nanaovany ny bao. ²⁹ Dia nanao ny diloilo fanosorana masina izy, sy ny zava-manitra fanembohana, vita araka ny fahaizana momba ny fanaovan-java-manitra.

Toko faha-38

¹ Hazo akasià no nanaovany ny otely fanaovan-tsorona dorana; dimy hakiho ny halavany, dimy hakiho ny sakany, fa mitovy ny lafiny efatra, ary telo hakiho ny hahavony.

² Ny zorony efatra nasiany tandrony mivoaka avy amin'ny otely, sy nopetahany takela-barahina ny otely. ³ Nataony avokoa ny fanaka momba ny otely: Ny tavin-davenona, ny lapela, ny tavy, ny fitrebika ary ny fatana; varahina no nanaovany an'ireo fanaka rehetra ireo. ⁴ Nanaovany karakara varahina ny otely, nataony toy ny harato, dia napetrany teo ambanin'ny koronosin'ny otely, avy eo ambany ka hatreo amin'ny fisasahany. ⁵ Nandrendrika masom-bola efatra izy ho eo amin'ny zorony efatra amin'ny karakara varahina, hitsofohan'ny bao.

⁶ Hazo akasià nopetahany varahina, no nanaovany ny bao. ⁷ Natsofony tamin'ny masombola eo andaniny roan'ny otely ny bao hitondrana azy. Nataony hoboka àty tamin'ny hazo fisaka ny otely. ⁸ Nanao ny tavy varahina sy ny faladiany varahina izy tamin'ny fitaratr'ireo vehivavy mpivory eo amin'ny fidiran'ny trano lay fihaonana.

⁹ Dia nanao ny kianja izy. Ny fefy lamba tamin'ny lafiny atsimo, ao an-kavanana, dia zato hakiho ny lavany; rongony madinika mihasina no nanaovana azy;

¹⁰ roapolo ny andriny, roapolo ny faladiany varahina; volafotsy ny faraingo amin'ny andriny sy ny anjaka hitohizany. ¹¹ Tamin'ny lafiny avaratra, zato hakiho ny fefy lamba, roapolo ny andriny, roapolo ny faladiany varahina; ary volafotsy ny faraingo amin'ny andriny sy ny anjaka hitohizany. ¹² Tamin'ny lafiny andrefana, dimampolo hakiho ny fefy lamba, folo ny andriny ary folo ny faladiany. ¹³ Tamin'ny lafiny atsinanana anoloana, dimampolo hakiho koa. ¹⁴ Tamin'ny ilany iray, fefy lamba dimy ambin'ny folo hakiho, sy ny andry telo mbamin'ny faladiany telo. ¹⁵ Ary tamin'ny ilany iray, - fa samy tamin'ny ilany iray amin'ny vavahadin'ny kianja avy izy, - fefy lamba dimy ambin'ny folo hakiho sy ny andriny telo mbamin'ny faladiany telo. ¹⁶ Rongony madinika mihasina avokoa ny lamba rehetra namefy ny kianja; ¹⁷ varahina ny faladian'ny andry, volafotsy ny faraingo amin'ny andry sy anjaka itohizany, ary voapetaka takela-bolafotsy ny koronosy amin'ny lohany. Voakambana amin'ny anja-bolafotsy avokoa ny andry amin'ny kianja. ¹⁸ Ny lamba varavarana tamin'ny vavahadin'ny kianja dia asan-tenona misoratsoratra, natao tamin'ny jaky volomparasy, jaky mangatrakatraka, lamba mena antitra, ary rongony madinika mihasina; roapolo hakiho ny halavany, dimy hakiho ny hahavony, tahaka ny sakan'ny fefy lamba amin'ny kianja;