Levitika

Toko faha-5

²³ raha nanota tamin'izany izy ka mahazo heloka, dia hamerina ny zavatra nangalariny na nalainy an-keriny, ny zavatra napetraka hotehiriziny, ny zava-bery hitany; ²⁴ na izay zavatra rehetra nanaovany fianianana tsy marina. Hamerina ny zavatra manontolo izy, no sady hanampy ampahadimin-tombany koa ambonin'izany; ary androtry ny hanaterany ny sorony fanonerana ihany no hanomezany izany an'izay tompon-javatra. ²⁵ Ondralahy iray tsy misy kilema, avy amin'ny andian'ondriny, izay hotombananao, no hoentiny eo amin'ny mpisorona, hateriny ho an'ny Tompo, hatao sorona fanonerana. ²⁶ Ary ny mpisorona hanao ny fanonerana ho azy eo anatrehan'ny Tompo, dia ho voavela ny otany, na inona na inona ota nahadiso azy.

Toko faha-6

¹ Ary niteny tamin'i Moizy Iaveh nanao hoe:

² Omeo an'i Aarona sy ny zanany izao didy izao, lazao azy hoe: Izao no lalàna momba ny sorona dorana: Hirehitra mandritra ny alina, mandra-pahamaraina, eo am-patan'ny otely ny sorona dorana; ary velomina eo mandrakariva ny afon'ny otely. ³ Isa-maraina ny mpisorona, rahefa niakanjo ny toniky rongony madinika, sy nanao ny kalisaona rongony madinika manolo-koditra azy, dia handraoka ny lavenona avy amin'ny afo nandorana ny sorona dorana eo ambonin'ny otely, ka hametraka azy eo anilan'ny otely. ⁴ Rahefa izany, havelany ny fanamiana, dia hosoloany hafa, hitondrany ny lavenona any ivelan'ny toby, amin'ny fitoerana madio. ⁵ Hovelomina tsy havela ho faty ny afo eo ambonin'ny otely. Isa-maraina ny mpisorona no hampirehitra kitay hazo eo, dia handahatra ny sorona dorana eo amboniny, sy handoro ny saboran'ny sorom-pihavanana hanetona eo. ⁶ Tsy maintsy misy afo tsy maty, mirehitra mandrakariva, eo ambonin'ny otely. ⁷ Izao no lalàna momba ny fanatitra: Hatolotr'ireo zanak'i Aarona eo anatrehan'ny Tompo, eo anoloan'ny otely izy. ⁸ Dia hangalan'ny mpisorona eran-tànan'ila ny lafarina tsara indrindra mbamin'ny diloilo ao aminy miaraka amin'ny emboka rehetra eo ambonin'ny fanatitra, ka hodorany hanetona eo ambonin'ny otely izany ho hanitra ankasitrahana, ho fahatsiarovana an'ny Tompo. ⁹ Izay sisa amin'ny fanatitra dia hohanin'i Aarona sy ny zanany; ka hohaniny tsy misy lalivay, eo amin'ny fitoerana masina, amin'ny kianjan'ny trano lay fihaonana. ¹⁰ Tsy handrahoina amin'ny lalivay izany. Izany no anjarany natokako ho azy avy amin'ny fanatitra hodorana amin'ny afo ho ahy. Zava-masina dia masina izany, toy ny sorona noho ny ota sy ny sorona fanonerana. ¹¹ Ny lahy rehetra amin'ny zanak'i Aarona no hihinana amin'izany. Lalàna tsy tapaka hatrany amin'ny taranakareo izany, ny amin'ny fanatitra atao amin'ny afo, ho an'ny Tompo. Ho masina izay rehetra hikasika izany. ¹² Ary niteny tamin'i Moizy Iaveh nanao hoe:

¹³ Izao no fanatitra hataon'i Aarona sy ny zanany amin'ny Tompo, amin'ny andro handraisany ny fanosorana: lafarina tsara indrindra ampahafolon'ny efah ho fanatitra tsy tapaka, antsasany maraina, antsasany hariva. ¹⁴ Amin'ny lapoaly no handrahoana azy, ka hasiana diloilo; ary rahefa mendy izy, dia hoentinao ka haterinao voavakivaky, ho fanatitra voavakivaky, ho hanitra ankasitrahan'ny Tompo. ¹⁵ Hanao izany fanatitra izany koa izay mpisorona voahosotra ka handimby amin'ny taranany: lalàna tsy tapaka eo anatrehan'ny Tompo izany. Hisondro-ko etona avokoa izy. ¹⁶ Ny fanatitra rehetra avy amin'ny mpisorona dia hodorana avokoa, fa tsy hohanina. ¹⁷ Ary niteny tamin'i Moizy Iaveh nanao hoe:

¹⁸ Mitenena amin'i Aarona sy ny zanany, ka lazao hoe: Izao no lalàna momba ny sorona noho ny ota: eo amin'ny fitoerana famonoana ny sorona dorana no famonoana ny sorona noho ny ota, eo anatrehan'ny Tompo; zava-masina dia masina izany. ¹⁹ Izay mpisorona hanolotra ny sorona noho ny ota no hihinana azy, ka eo amin'ny toerana masina, amin'ny kianjan'ny trano lay fihaonana no hihinanana azy. ²⁰ Ho masina avokoa izay hikasika ny nofony. Raha misy fitafiana nipitihan'ny rany, dia hosasanao eo amin'ny toerana masina izay faritra nipitihan'ny rà. ²¹ Izay vilany tany andrahoana azy, dia ho montsanina, fa raha vilany varahina no andrahoana azy, dia hodiovina sy hontsanan-drano. ²² Ny lehilahy rehetra amin'ny mpisorona no hihinana amin'izany zava-masina dia masina izany. ²³ Tsy nisy hohanina anefa ny sorona rehetra noho ny ota, izay angalana ny ràny hoentina ao an-trano lay fihaonana, hanaovam-panavotana ao amin'ny fitoerana masina, fa hodorana amin'ny afo.

Toko faha-7

¹ Izao no lalàna momba ny sorona fanonerana; zava-masina dia masina izany.

² Ao amin'ny fitoerana famonoana ny sorona dorana no amonoana ny sorona fanonerana. Hararaka manodidina amin'ny otely ny rany. ³ Hatolotra daholo ny saborany, ny hofany, ny sabora saron-tsinainy, ⁴ ny voany roa mbamin'ny fonom-boany izay miraikitra amin'ny faritry ny voany, ny saron'atiny izay hoendahana ao akaikin'ny voany. ⁵ Hodoran'ny mpisorona hanetona eo ambonin'ny otely izany ho sorona atao amin'ny afo ho an'ny Tompo. Sorona fanonerana izany. ⁶ Ny lehilahy rehetra amin'ny mpisorona no hihinana amin'izany, ka eo amin'ny toerana masina no hihinanany azy; zava-masina dia masina izany. ⁷ Sahala amin'ny sorona noho ny ota, ny sorona fanonerana; iray ny lalàna amin'izy roa: an'izay mpisorona manao ny fisoronana ny sorona. ⁸ Ny mpisorona manolotra ny sorona dorana avy amin'ny olona, dia hanana ny hoditry ny zavatra natao sorona dorana avy aminy. ⁹ Ny fanatitra rehetra nendasina tamin'ny lafaoro, na nandrahoina tamin'ny kasitrola, na tamin'ny lapoaly, dia an'izay mpisorona manolotra azy. ¹⁰ Ny fanatitra rehetra voadity tamin'ny diloilo, na maina, dia an'ny zanak'i Aarona rehetra, ka hiara-misalahy izy. ¹¹ Izao no lalàn'ny sorom-pihavanana haterina ho an'ny Tompo.

¹² Raha fisaorana no hanaterana izany, dia izao no hatolotra miaraka amin'ny sorom-pisaorana: mofo mamy tsy misy lalivay voadity tamin'ny diloilo, ary lafarina nendasina ho mofo mamy voadity tamin'ny diloilo. ¹³ Ary hampiana mofo mamy misy lalivay, ny fanatitra izay haterina miaraka amin'ny sorom-pisaorana hanaovana sorom-pihavanana. ¹⁴ Dia samy hanolorana anankiray avy ireo fanatitra ireo natokana ho an'ny Tompo, dia ho an'ny mpisorona izay hamafy ny ràn'ny sorom-pihavanana izany. ¹⁵ Amin'ny andro anaterana azy ihany no ihinanana ny henan'ny sorom-pisaorana amin'ny sorom-pihavanana, fa tsy avela hisy tra-maraina. ¹⁶ Raha sorona aterina ho fanalam-boady na ho fanatitra an-tsitra-po dia hohanina amin'ny andro hanaterana azy ny sorona, ary izay sisa tavela dia hohanina ny ampitso;

¹⁷ izay henan-tsorona tavela hatramin'ny andro fahatelo, dia hodorana amin'ny afo. ¹⁸ Raha misy olona mihinana amin'ny andro fahatelo ny hena avy amin'ny sorom-pihavanana nateriny, dia tsy hankasitrahana ny sorona nateriny, tsy ho isaina ho azy nanatitra, ho fahavetavetana izany; ary izay rehetra nihinana amin'izany dia hivesatra ny otany. ¹⁹ Tsy fihinana ny hena mikasi-java-maloto, fa hodorana amin'ny afo. Fa ny henan'ny sorom-pihavanana, samy mahazo mihinana amin'izany izay olona madio rehetra. ²⁰ Fa izay ao anatin'ny fahalotoana kosa, raha mihinana amin'ny hena avy amin'ny sorom-pihavanana, izay an'ny Tompo, dia hofongorana tsy ho eo amin'ny fireneny. ²¹ Ary izay nikasi-java-maloto, na loton'olona na biby maloto, na izay zava-betaveta maloto; raha mihinana amin'ny henan'ny sorom-pihavanana, izay an'ny Tompo, dia hofongorana tsy ho eo amin'ny fireneny izany olona izany. ²² Ary niteny tamin'i Moizy Iaveh nanao hoe:

²³ Mitenena amin'ny zanak'i Israely, ka izao no lazao azy: Aza mihinana saboran'omby, na ondry, na osy, hianareo.