Epistolan'i Md. Paoly Ho An'ny Kolosiana

Toko faha-2

⁴ Izaho no milaza izany aminareo, dia ny mba tsy hahavoafitaka anareo amin'ny fandrebireben'ny sasany: ⁵ fa na dia tsy atý aminareo amin'ny vatana aza aho, dia atý aminareo amin'ny fanahy ihany, ka faly mijery izato filaminanareo sy hamafin'ny finoanareo ny Kristy. ⁶ Araka ny nandraisanareo ny Kristy Jesoa Tompo àry, no aoka handehananareo ao aminy koa,

⁷ ka hamaka tsara sy hiorina ao aminy, ary hohamafisin'ny finoana sy handroso hatrany hatrany amim-pisaorana azy. ⁸ Mitandrema fandrao dia lasan-ko babon'ny sasany, amin' izany hoe fahaizan-dalina, izay famitahana foana, avy amin'ny hevitr'olombelona sy araka ny abidim-pianaran'izao tontolo izao, fa tsy araka ny Kristy. ⁹ Ao aminy anefa no itoeran'ny hafenoan'ny fomban'Andriamanitra an-davany sy an-tsakany; ¹⁰ ao aminy no anananareo ny zavatra rehetra, fa izy no lohan'izay rehetra mety ho fanapahana sy fahefana; ¹¹ tao aminy no namoràna anareo tamin'ny famoràna tsy nataon-tànana, izay manala ny tena nofo, dia tamin'ny famoran'ny Kristy; ¹² fa niara-nilevina taminy hianareo tamin'ny batemy, ary niara-nitsangana taminy tamin'ny batemy ihany koa, noho ny finoanareo ny herin'Andriamanitra izay nanangana azy tamin'ny maty. ¹³ Koa hianareo izay matin'ny fahotanareo sy ny tsy fiforàn'ny vatanareo, dia novelomin'Andriamanitra niaraka taminy indray, nony efa navelany ny fahotantsika rehetra. ¹⁴ Fa novonoiny ny sora-tànan'ny didy niampanga antsika sy namely antsika, sady nesoriny tsy hisy intsony aza izany, tamin'ny nanomboany azy tamin'ny hazo fijaliana; ¹⁵ ary naongany ny fanapahana sy ny fahefana, sady nasehony miharihary ho fizahan'ny olona ka nampombainy ny mpandresy tao amin'ny hazo fijaliana. ¹⁶ Koa aoka hianareo tsy hotsarain'olona ny amin'ny fihinana amam-pisotro, na ny amin'ny andro fety aman-tsinam-bolana, na ny amin'ny andro sabata,

¹⁷ satria aloky ny zavatra ho avy fotsiny ireny, fa ao amin'ny Kristy ny tena zavatra. ¹⁸ Aoka hianareo tsy ho vosakan'olona tsy hahazo ny lokan'ady, amin'ny fitaomana anareo ho amin'ny fanetren-tena tsy izy, sy amin'ny fanompoana ny anjely, dia olona mitompo amin'ny zavatra hitany, hono, sady feno fiavonavonana erý ao amin'ny fisainany manaraka ny nofo, ¹⁹ nefa olona tsy mikambana amin'ny loha, izay iveloman'ny tena manontolo, sy iraisany tsara amin'ny hozatra amam-pamavàny, ka ahazoany ny fitomboana tian'Andriamanitra homena azy. ²⁰ Raha niara-maty tamin'ny Kristy ny amin'ireny abidim-pianaran'izao tontolo izao àry hianareo, nahoana no hoatra ny mbola velona amin'izao tontolo izao ihany, ka mety hodidiana foana hoe:

²¹ Aza mandray! Aza manandrana! Aza manendry! ²² Nefa zavatra manjary levona foana avokoa amin'ny fomba fampiasana azy fotsiny izany zavatra rehetra izany! - Eisy! didy sy fampianaran'olombelona foana izany; ²³ sady toa misy fahendrena no fijery azy, raha araka izato fombam-panompoana noforininy, sy izato fanetrena amam-panivàna ny tena asehony, kanjo tsy misy na inona na inona akory, fa fampanaranana ny nofo foana no tadiavina aminy.

Toko faha-3

¹ Koa raha niara-nitsangana tamin'ny Kristy ianareo, dia ny zavatra any ambony, amin'izay itoeran'ny Kristy eo an-kavanan'Andriamanitra, no katsaho;

² ny zavatra any ambony no ankafizo, fa aza ny zavatry ny tany. ³ Fa maty hianareo, ary miara-miafina amin'ny Kristy ao amin'Andriamanitra ny fiainanareo; ⁴ fa rahefa hiseho ny Kristy izay fiainantsika, vao hiara-miseho aminy amim-boninahitra koa hianareo. ⁵ Koa ataovy maty àry ny rantsam-batanareo, dia ny an'ny ety an-tany, izany hoe: ny fijangajangana, ny fahalotoana, ny fahavetavetana, ny fanirian-dratsy, ary ny filan-dratsin'ny nofo izay fanompoan-tsampy;

⁶ fa izany rehetra izany no mahatonga ny fahatezeran'Andriamanitra amin'ny zanaky ny tsy finoana; ⁷ niara-nandeha tamin'ireny koa hianareo taloha fony ianareo nanaraka izany fiainana izany. ⁸ Fa ankehitriny kosa, ario kosa izao zavatra izao: dia fahatezerana, fahavinirana, fahasomparana, fitenenan-dratsy, teny mahamenatra aloaky ny vavanareo; ⁹ aza mifandainga hianareo, fa efa narianareo ny olombelona taloha mbamin'ny asany, ¹⁰ ary efa notafinareo ny olom-baovao, izay havaozina ho amin'ny fahalalana lavorary araka ny endrik'ilay nahary azy, ¹¹ ka tsy mahalala intsony izay hoe jentily na Jody, voafora na tsy voafora, baribariana na Sita, andevo na olona afaka, fa izao ihany: ny Kristy no zavatra rehetra ao amin'izy rehetra. ¹² Olom-boafidin'Andriamanitra àry hianareo, sady masina sy malala, ka mitafia famindram-po amam-piantrana, halemem-panahy amam-panetren-tena, fahamaotonana amam-pandeferana.

¹³ Aoka hifandefitra sy hifamela heloka, raha misy manana alahelo amin'ny namany. Aoka ho tahaka ny namelan'ny Tompo heloka anareo no hamelanareo heloka koa. ¹⁴ Fa ambonin'izany rehetra izany, dia mitafia ny fitiavana, izay fehin'ny hatsaram-panahy rehetra. ¹⁵ Hanjaka ao am-ponareo anie ny fiadanan'ny Kristy izay niantsoana anareo hiforona ho tena iray; ary hahay mankasitraka anie hianareo. ¹⁶ Hitoetra be dia be ao anatinareo anie ny tenin'ny Kristy, ka hifampianatra sy hifananatra amin'ny fahendrena rehetra hianareo; ary hoentin'ny fahasoavana hihira ho an'Andriamanitra ao am-ponareo, amin'ny salamo aman-kira fiderana, mbamin'ny tonon-kira masina. ¹⁷ Ary na inona na inona ataonareo, na amin'ny teny, na amin'ny asa, dia ataovy amin'ny anaran'i Jesoa Tompo ny zavatra rehetra, sy amim-pisaorana an'Andriamanitra Ray amin'ny alàlany. ¹⁸ Hianareo vehivavy, maneke ny vadinareo, araka ny mety ao amin'ny Tompo.

¹⁹ Hianareo lehilahy, tiavo ny vadinareo, ary aza sosotsosotra aminy. ²⁰ Hianareo zanaka, maneke ny ray aman-dreninareo amin'ny zavatra rehetra, fa ankasitrahan'ny Tompo izany.

²¹ Hianareo ray, aza mampahatezitra ny zanakareo, fandrao dia mamoy fo izy. ²² Hianareo mpanompo, maneke ny tomponareo araka ny nofo amin'ny zavatra rehetra, tsy eo imasony ihany, toy ny mpila sitraka amin'olombelona, fa amim-pahatsoram-po sy amim-pahatahorana ny Tompo.

²³ Na inona na inona ataonareo, dia ataovy amin'ny fo tokoa, toy ny amin'ny Tompo, fa tsy amin'olombelona, ²⁴ satria fantatrareo fa ny Tompo no handraisanareo ny valiny, dia ny lova any an-danitra; koa manompoa ny Kristy Tompo hianareo. ²⁵ Sady izay manao ny tsy marina anie, ka handray araka ny tsy marina nataony e! fa tsy mba misy fizahan-tavan'olona.

Toko faha-4

¹ Hianareo tompo, manaova ny marina sy ny mety amin'ny mpanomponareo; fa fantatrareo fa manan-Tompo any an-danitra koa hianareo.

² Mahareta amin'ny fivavahana; ataovy amim-piambenana sy fisaorana izany.

³ Ary mangataha koa ho anay, mba hamohan'Andriamanitra varavarana hitorianay teny, sy hanambarako ny zava-miafina ny amin'ny Kristy, izay hany ifatorako izao, ⁴ ary hampahafantarako azy araka ny tokony hilazako azy. ⁵ Mahaiza mitondra tena amin'izay eo ivelany; ary mahaiza manararaotra ny fotoana.