Epistola Voalohan'i Md. Paoly Ho An'ny Tesalonisiana

Toko faha-3

⁸ velona terý izahay izao, mahita anareo maharitra tsara ao amin'ny Tompo. ⁹ Fisaorana manao ahoana re no azonay avaly an'Andriamanitra, noho ny aminareo sy noho ny hafaliana tanteraka tsaroanay noho ny aminareo eo anatrehan'Andriamanitra! ¹⁰ Endrey, izany fangatahanay an-kafanam-po lehibe andro aman'alina hahita tava anareo, sy hameno izay tsy ampy amin'ny finoanareo! ¹¹ Enga anie ka ny tenan'Andriamanitra Raintsika, sy Jesoa-Kristy Tompontsika no hanitsy làlana anay ho atý aminareo;

¹² ary ny Tompo hampitombo sy hampandroso anareo amin'ny fifankatiavanareo, sy amin'ny fitiavanareo ny olona rehetra, tahaka anay aminareo izao! ¹³ Hankahery ny fonareo anie izy, ary hiaro azy tsy hanan-tsiny amin'ny fahamasinana eo anatrehan'Andriamanitra Raintsika, ho amin'ny fahatongavan'i Jesoa-Kristy Tompontsika mbamin'ny olo-masiny rehetra. Amena.

Toko faha-4

¹ Farany, ry rahalahy, izao no angatahinay sy ihantanay aminareo ao amin'i Jesoa Tompo: efa nianaranareo taminay izay fitondran-tena mety hankasitrahan'Andriamanitra, sady efa arahinareo koa, ka mandrosoa mandrakariva amin'ny fandehanana araka izany.

² Efa fantatrareo, araka ny didy nomenay anareo avy amin'i Jesoa Tompo, ³ fa ny hanamasinanareo ny tenanareo no sitra-pon'Andriamanitra: dia ny hifadianareo ny fijangajangana, ⁴ sy ny hahaizanareo tsirairay avy manana ny fanaky ny tenanareo amin'ny fahamasinana sy fananan-kaja, ⁵ fa tsy amin'ny filan-dratsin'ny nofo araka ny fanaon'ny jentily izay tsy mahalala an'Andriamanitra, ⁶ ary ny tsy hisian'olona manao an-keriny na an-kafetsena amin'ny rahalahiny amin'izany raharaha izany, fa ny Tompo no mpamaly izany rehetra izany, araka ny efa voalazanay sy nasehonay marina taminareo; ⁷ satria tsy ho amin'ny fahalotoana, fa ho amin'ny fahamasinana no niantsoan'Andriamanitra antsika. ⁸ Koa izay manamavo izany didy izany, dia tsy manamavo olombelona, fa manamavo an'Andriamanitra, izay nanome ny Fanahiny Masina ho ao aminareo. ⁹ Ny amin'ny fifankatiavan'ny mpirahalahy, dia tsy ilaina ny hanoratana izany aminareo, satria tenanareo no nampianarin'Andriamanitra hifankatia,

¹⁰ sady efa manao izany rahateo amin'ny rahalahy rehetra eran'i Masedonia hianareo. Miangavy aminareo anefa izahay, ry rahalahy, mba handroso kokoa mandrakariva amin'izany. ¹¹ Mahaiza miaina amim-piadanana, sy manatanteraka tsara ny raharahanareo, ary miasa tànana araka ny nandidianay anareo, ¹² mba handehananareo amim-pahamendrehana amin'izay eo ivelany, sy tsy hiankinanareo amin'olona foana. ¹³ Ary tsy tianay ny tsy hahafantaranareo ny amin'izay efa nody mandry, sao dia malahelo toy ny sasany tsy manam-panantenana koa hianareo.

¹⁴ Fa araka ny inoantsika an'i Jesoa ho efa maty sy nitsangana tamin'ny maty no hitondran'Andriamanitra an'izay nody mandry hiaraka aminy koa, amin'ny alalan'i Jesoa. ¹⁵ Ka izao no lazainay aminareo, araka ny tenin'ny Tompo: Isika izay velona sy tavela ho amin'ny fihavian'ny Tompo, dia tsy mba hialoha izay efa nody mandry tsy akory; ¹⁶ fa hisy baiko homena, sy feon'arkanjely, ary feon-trompetr'Andriamanitra, dia hidina avy any an-danitra ny tenan'izy Tompo, ka izay maty tao amin'ny Kristy no hitsangana aloha; ¹⁷ rahefa izany, hakarina hiaraka amin'izy ireo eny amin'ny rahona koa isika velona sisa tavela, hitsena ny Tompo eny amin'ny habakabaka, dia ho any amin'ny Tompo mandrakizay isika. ¹⁸ Koa izany teny izany àry no aoka hifanalanareo alahelo.

Toko faha-5

¹ Fa ny amin'ny andro sy ny fotoana, ry rahalahy, dia tsy ilaina akory ny hanoratanay izany aminareo,

² satria efa mahalala marina rahateo hianareo fa ho avy toy ny mpangalatra amin'ny alina ny andron'ny Tompo. ³ Amin'ilay hanaovan'ny olona hoe: Fiadanana sy fandriam-pahalemana re izany! iny indrindra no hilatsahan'ny fandringanana tampoka amin'izy ireo, tahaka ny fihetsehan-jaza amin'ny bevohoka, ka tsy afa-mandositra izy. ⁴ Hianareo anefa, ry rahalahy, dia tsy mba ao amin'ny maizina, ka tsy mba hanampoka anareo toy ny mpangalatra izany andro izany;

⁵ fa zanaky ny mazava avokoa hianareo, ary zanaky ny andro koa; tsy misy an'ny alina isika, na an'ny maizina akory. ⁶ Koa aza mba matory tahaka ny sasany isika, fa aoka hiari-tory sy hifady hanina. ⁷ Fa ny alina no fatorian'izay matory, ary ny alina no fimamoan'izay mimamo. ⁸ Koa aoka isika an'ny andro kosa hifady ary hitafy ny finoana amam-pitiavana ho fiarovan-tratra, sy ny fanantenana ny famonjena ho fiarovan-doha. ⁹ Satria tsy ny ho an'ny fahatezerana no nanendren'Andriamanitra antsika, fa ny hahazo famonjena amin'ny alalan'i Jesoa-Kristy Tompontsika, ¹⁰ izay maty ho antsika mba hahatonga antsika hiara-belona aminy, na mahatsiaro na matory isika. ¹¹ Noho izany àry, mifanalà alahelo hianareo, ary mifamporisiha handroso, araka ny efa ataonareo rahateo. ¹² Mangataka anareo koa izahay, ry rahalahy, mba hanaja izay miasa ao aminareo, sy mifehy anareo ao amin'ny Tompo, ary izay mananatra anareo.

¹³ Noho ny asan'izy ireo, manàna fitiavana azy lehibe koa, ary mihavàna tsara aminy hianareo. ¹⁴ Mangataka aminareo koa izahay, ry rahalahy: anaro izay tsy mipetraka tsara, alao alahelo ny osa, ankaherezo ny malemy, mandefera amin'ny olon-drehetra. ¹⁵ Tandremo fandrao misy mamaly ratsy na amin'iza na amin'iza, fa ny soa ho an'ny namana sy ny olon-drehetra no katsaho mandrakariva. ¹⁶ Mifalia mandrakariva; ¹⁷ mivavaha lalandava; ¹⁸ ary misaora amin'ny zavatra rehetra, fa izany no sitrapon'Andriamanitra, ao amin'ny Kristy Jesoa ho anareo rehetra. ¹⁹ Aza mamono ny Fanahy; ²⁰ aza manamavo ny faminaniana, ²¹ fa zahao toetra ny zavatra rehetra, ka tano izay tsara; ²² fa fadio kosa na dia izay mitarehin-javatra ratsy fotsiny aza. ²³ Ary Andriamanitry ny fiadanana anie hanamasina ny tenanareo manontolo, ka hotahiriziny tsy hanan-tsiny ho amin'ny fahatongavan'i Jesoa-Kristy Tompontsika avokoa ny fanahinareo sy ny ainareo ary ny vatanareo.

²⁴ Tsy mivadika ilay niantso anareo, ka izy ihany koa no hanefa izany. ²⁵ Mivavaha ho anay, ry rahalahy!

²⁶ Mampanao veloma ny rahalahy rehetra amin'ny fanorohana masina izahay.