Ny Detoronomy

Toko faha-12

¹⁷ Tsy azonao hanina ao anaty vavahadinao ny fahafolon'ny varinao, sy ny divainao vaovao ary ny diloilonao, ny voalohan-teraky ny omby aman'ondrinao, ny fanolorana rehetra nanaovanao voady, ny fanatitra an-tsira-ponao, ny voatokan'ny tànanao;

¹⁸ fa eo anatrehan'ny Tompo Andriamanitrao, amin'ny fitoerana voafidin'ny Tompo Andriamanitrao no hihinananao azy, dia hianao sy ny zanakao lahy mbamin'ny zanakao vavy, ary ny ankizilahy aman'ankizivavinao, mbamin'ny Levita ao anatin'ny vavahadinao, dia hifaly eo anatrehan'ny Tompo Andriamanitrao hianao amin'ny fizakana ny harena rehetra harin-tànanao. ¹⁹ Mitandrema tsy hanary ny Levita mandritra ny andro rehetra hahavelomanao eo amin'ny taninao. ²⁰ Rahefa nitarin'ny Tompo araka ny nampanantenainy anao ny faritry ny taninao, ka hoy hianao: Te hihinan-kena aho, fa mahatsiaro liana te hihinan-kena ny fanahinao, dia mahazo mihinan-kena isaky ny maniry izany hianao.

²¹ Raha lavitra anao ny fitoerana nofidin'ny Tompo Andriamanitrao, hametrahana ny anarany, azonao amonoana ny omby sy ny ondrinao izay nomen'ny Tompo anao, araka ny efa nandidiako anao; ary hihinana izany eo anatin'ny vavahadinao isaky ny maniry izany hianao. ²² Toy ny fihinana gazela sy serfa no hihinananao izany ka na ny olona madio na ny maloto dia samy mahazo mihinana azy. ²³ Fa ataovy raikitra ny tsy fihinanana rà, satria ny rà no aina, ka tsy mahazo mihinana ny aina miaraka amin'ny hena hianao. ²⁴ Aza mihinana izany, fa araraho amin'ny tany toy ny rano izy. ²⁵ Aza mihinana izany mba ho sambatra hianao, hianao sy ny zanakao mandimby anao amin'ny fanarahana izay mahitsy eo imason'ny Tompo. ²⁶ Fa ny fanatitra masina andidiana anao mbamin'izay nanaovanao voady, dia aloavy ary mankanesa amin'izay fitoerana nofidin'ny Tompo,

²⁷ dia atero eo ambonin'ny otelin'ny Tompo Andriamanitrao, ny soronao dorana, ny nofony sy ny rany; ary amin'ny sorona hafa, ny rà dia haidina eo ambonin'ny otelin'ny Tompo Andriamanitrao, fa ny nofony dia hohaninao. ²⁸ Toavy sy henoy izao zavatra rehetra andidiako anao izao, mba ho sambatra mandrakizay hianao, dia hianao sy ny zanakao manaraka anao, amin'ny fanatanterahana izay tsara sy mahitsy eo imason'ny Tompo. ²⁹ Rahefa ho voaringan'ny Tompo Andriamanitrao ny firenena amin'izay tany halehanao mba handroaka azy eo anoloanao, ka efa voatosikao izy, ka hianao no honina amin'ny taniny;

³⁰ dia mitandrema fandrao ho voafandrika hianao maka tahaka azy, rahefa voaringana teo anoloanao ireny; aza mikarokaroka ny andriamanitr'izy ireo hianao, manao hoe: Nanao ahoana no nanompoan'ireo firenena ireo ny andriamaniny? Fa mba te-hanao toy izany koa aho. ³¹ Aza manao toy izany amin'ny Tompo Andriamanitrao; fa ny fahavetavetana rehetra halan'ny Tompo no nataon'izy ireo tamin'ny andriamaniny, ary afoiny ho dorana aza ny zanany lahy sy ny zanany vavy ho fanajana ny andriamaniny. ³² Toavy sy araho izay rehetra andidiako anareo, fa aza ampiana, aza anesorana.

Toko faha-13

¹ Raha misy mpaminany na mpanonofy mitranga eo aminao, milaza famantarana na zava-mahatalanjona aminao,

² sady tanteraka tokoa ny famantarana na ny zava-mahatalanjona nolazainy, nataony hoe: Andeha hanatona andriamani-kafa sy hanompo azy, nefa andriamanitra tsy fantatrao izany, ³ dia aza mihaino ny tenin'izany mpaminany na mpanonofy izany akory, fa mizaha toetra anareo Iaveh Andriamanitrareo, hahalalany raha tia an'ny Tompo Andriamanitrareo amin'ny fonareo rehetra sy amin'ny fanahinareo rehetra hianareo. ⁴ Iaveh Andriamanitrareo no araho, izy no atahory; tandremo ny didiny, ekeo ny feony; manompoa azy, ary mifikira aminy. ⁵ Fa izany mpaminany na mpanonofy izany kosa dia ataovy maty, satria fikomiana amin'ny Tompo Andriamanitrareo, izay nampivoaka anareo tany amin'ny tany Ejipta, sy nanafaka anareo tamin'ny trano fanandevozana, no efa notorìna mba hampivily anao hiala amin'ny làlana nasain'ny Tompo Andriamanitrao halehanao. Dia izany no hamongoranao ny ratsy eo aminao. ⁶ Raha mitaona anao mangingina ny rahalahinao zanaky ny reninao, na ny zanakao lahy, na ny zanakao vavy, na ny vehivavy izay ampofoanao, na ny sakaiza toy ny ainao, ka manao hoe: Andeha isika hanompo andriamani-kafa, dia andriamanitra tsy fantatrao na ny razanao akory,

⁷ anisan'ireo andriamanitry ny vahoaka manodidina anareo na akaiky na lavitra anao, hatramin'ny faran'ny tany rehetra, ⁸ dia aza mety ho taominy na mihaino azy, aza miantra maso azy, na mitsitsy azy, na manarontsarona azy, ⁹ fa vonoy ho faty izy, ka ny tànanao mihitsy no aoka hiainga voalohany hamely azy ho faty vao ny tànan'ny vahoaka rehetra. ¹⁰ Tonafy vato izy mandra-pahafaty azy, fa efa nitady hampiala anao amin'ny Tompo Andriamanitrao, izay nampivoaka anao tany amin'ny tany Ejipta, tamin'ny trano fanandevozana. ¹¹ Ary handre izany Israely rehetra, dia ho raiki-tahotra ka tsy hanao izany heloka bevava izany eo aminao intsony. ¹² Raha ny iray amin'ny tanàna nomen'ny Tompo Andriamanitrao anao honenana no lazain'ny olona hoe:

¹³ Nisy olona tena ratsy fanahy nivoaka avy tany aminao, ka nitaona ny mponina ao an-tanànany, nanao hoe: Andeha isika hanompo andriamani-kafa, andriamanitra tsy fantatrareo, ¹⁴ dia manaova famotorana, ka adiho sy anontanio tsara. Fa raha marina izany ary voaporofo izany zavatra izany, raha tanteraka teo afovoanao izany fahavetavetana izany, ¹⁵ dia tsy maintsy hovonoina amin'ny lelan-tsabatra ny mponina ao amin'io tanàna io, hatao anatema ny tanàna mbamin'izay rehetra ao anatiny, ary ny biby fiompiny dia hovonoinao amin'ny sabatra. ¹⁶ Angony eo afovoan'ny kianja ny babo rehetra avy ao, dia dory amin'ny afo tsy hisy miangana ny tanàna mbamin'ny babo rehetra avy ao, ho an'ny Tompo Andriamanitrao, ho kila hotohoto mandrakizay ny sisan'ny tanàna; tsy haorina intsony. ¹⁷ Rahefa mety ho zavatra natao anatema, dia aoka tsy hisy hofihinin'ny tànanao, mba hiononan'ny Tompo amin'ny firehetan'ny fahatezerany, sy hanaovany fiantrana amam-pamindram-po aminao, dia hohamaroiny hianao, araka ny efa nianianany tamin'ny razanao, ¹⁸ raha manaiky ny feon'ny Tompo Andriamanitrao amin'ny fitandremana ny didiny rehetra izay andidiako anao anio, amin'ny fanaovana izay mahitsy eo imason'ny Tompo Andriamanitrao.

Toko faha-14

¹ Zanak'Iaveh Andriamanitrareo hianareo. Aza mitetika ny tenanareo; aza misy faritra haratanareo amin'ny elanelan-masonareo, noho ny amin'ny maty.

² Fa vahoaka masina ho an'ny Tompo Andriamanitra hianao, ary nofidin'ny Tompo mba ho vahoakany manokana amin'ny firenena rehetra eto ambonin'ny tany. ³ Aza mihinan-javatra maloto na inona na inona.

⁴ Izao no biby ho fihinanareo: ny omby, ny ondry sy ny osy,

⁵ ny serfa, ny gazela, ny daima, ny osy dia madinika, ny antilopa, ny ombimanga, ny osy dia. ⁶ Rahefa mety ho biby mivaky kitro sy mitsampan-tongotra ary mandinika dia hano; ⁷ fa aza mihinana izay mandinika fotsiny, na izay mivaky kitro sy misampan-tongotra fotsiny, toy ny rameva sy ny bitro dia amam-bitro, fa mandinika ireo, fa tsy mivaky kitro, maloto aminareo ireny; ⁸ toy izany koa ny kisoa, mivaky kitro ihany izy fa tsy mandinika, haloto aminareo izy, koa aza mihinana ny henany, aza mikasika ny fatiny. ⁹ Izao no biby hohaninareo amin'izay rehetra ao anaty rano: izay rehetra misy vombo aman-kirany dia hohaninareo,

¹⁰ fa aza mihinana izay rehetra tsy misy vombo aman-kirany, maloto aminareo izany. ¹¹ Hano avokoa ny vorona madio rehetra.

¹² Izao no tsy hohaninareo: ny egla, ny orofiray, ny papango; ¹³ ny voromahery, ny fanindry, mbamin'ny aotoro isan-karazany; ¹⁴ ny goaika isan-karazany, ¹⁵ ny ostrisa, ny tararaka, ny vorondriaka, mbamin'ny hitsikitsika isan-karazany; ¹⁶ ny vorondolo, ny ibisy, ny vorondolo be;