Ny Jenezy

Toko faha-22

⁴ Nony tamin'ny andro fahatelo, nanopy ny masony Abrahama ka mbola lavitra ihany izy dia nahatazana ilay fitoerana,

⁵ dia nilaza tamin'ireto mpanompony Abrahama nanao hoe: Mijanòna eto amin'ny ampondra hianareo, fa izaho sy ny zaza dia mikasa ho ery hivavaka, vao hiverina eto aminareo indray. ⁶ Dia nalain'i Abrahama ny hazo hataina amin'ny sorona dorana, ka natataony an'Isaaka zanany, ary ny afo sy ny antsy kosa nentiny teny an-tanany, dia niara-nandeha izy mianaka. Fa hoy Isaaka tamin'i Abrahama rainy: ⁷ Dada ô! Ka hoy ny navaliny: Inty aho, anaka. Dia hoy Isaaka: Ny afo sy ny kitay ireto dia efa eto, fa izay zanak'ondry atao sorona dorana kosa no aiza? ⁸ Hoy ny navalin'i Abrahama: Hataon'Andriamanitra izay hahitana ny zanak'ondry hatao sorona dorana, anaka. Dia niara-nandeha izy mianaka. ⁹ Nony tonga teo amin'ny fitoerana natoron'Andriamanitra azy izy, dia naorin'i Abrahama teo ny otely; nalahany ny kitay hazo, ary nafatony Isaaka zanany, ka napetrany tambonin'ny otely eo ambonin'ny kitay.

¹⁰ Dia naninjitra ny tànany Abrahama ka nandray ny antsy hamonoana ny zanany. ¹¹ Tamin'izay niantso tany an-danitra ny Anjelin'ny Tompo nanao hoe: Ry Abrahama! ry Abrahama ô! ka hoy ny navaliny: Inty aho. ¹² Dia hoy ny anjely: Aza manainga ny tànanao hamely ny zaza, ary aza manino-maninona azy akory, fa efa hitako izao fa matahotra an'Andriamanitra hianao, sady tsy nandà hianao fa nahafoy ny zanakao, ilay lahitokanao ho ahy. ¹³ Ary nanopy maso Abrahama, ka nahita ondralahy anankiray teo ivohony, voasingazotry ny kirihitr'ala tamin'ny tandrony; dia lasa Abrahama naka ilay ondralahy, ka io no nateriny ho sorona dorana ho solon'ny zanany. ¹⁴ Ary nataon'i Abrahama hoe Iaveh-Iereh ny anaran'io fitoerana io. Ary avy amin'izany ilay fitenenan'ny olona mandraka androany hoe: Ho hita ihany izany any an-tendrombohitry ny Tompo. ¹⁵ Ary ny anjelin'ny Tompo niantso an'i Abrahama fanindroany tany an-danitra, ka nanao hoe:

¹⁶ Efa nianiana tamin'ny tenako aho, hoy Iaveh, fa noho hianao nanao izany sy tsy nandà fa nahafoy ny zanakao, ilay lahitokanao, ho ahy, ¹⁷ dia hanisy soa anao aho, hahamaro ny taranakao tahaka ny kintana eny an-danitra sy ny fasika eny amoron-dranomasina, ary ny taranakao hahazo ny vavahadin'ny fahavalony. ¹⁸ Amin'ny taranakao no hanasoavana ny firenena rehetra ambonin'ny tany, satria nanaiky ny teniko hianao. ¹⁹ Dia niverina nankeny amin'ny mpanompony Abrahama, ka niainga izy ireo dia niara-nandeha nankany Bersabea. Ary nonina tao Bersabea Abrahama.

²⁰ Taty aorian'izany, nisy nampandre vaovao tamin'i Abrahama dia izao: Efa nitera-dahy tamin'i Nakora rahalahinao koa Melkà,

²¹ dia Hosa lahimatoany, Boza lahiaivo, Kamoela rain'i Arama, ²² Kaseda, Azao, Feldasa, Jedlafa ary Batoela. ²³ Batoela no rain-dRebekà. Izy valo lahy ireo no naterak'i Melkà tamin'i Nakora rahalahin'i Abrahama. ²⁴ Ilay vaditsindranony atao hoe Ramà koa dia niteraka an'i Tabea sy Gahama, ary Toasy sy Maakà.

Toko faha-23

¹ Ny andro niainan'i Sarà dia fito amby roa-polo amby zato taona, izany no taona niainany.

² Ary Sarà dia maty tany Kiriatarbe, dia Hebrona izany, any amin'ny tany Kanaana; ka tonga Abrahama hisaona an'i Sarà sy hitomany azy. ³ Dia nitsangana Abrahama niala teo anilan'ny maty, ka niteny tamin'ny zanak'i Heta hoe: ⁴ Olona hafa firenena sy vahiny eto aminareo aho, ka mba avelao aho hanana tany fandevenana eto aminareo, mba hisy hanalako ny fatin'ny vadiko tsy ho eto anoloako, sy handevenako azy. ⁵ Dia namaly an'i Abrahama ny zanak'i Heta, ka nanao taminy hoe: ⁶ Henoy izahay, Tompokolahy; andrian'Andriamanitra no eto aminay hianao, ka aleveno amin'izay fasana tsara indrindra eto aminay ny fatin'ny vadinao, fa tsy hisy aminay hiaro ny fasany aminao, tsy hametrahana ny fatin'ny vadinao. ⁷ Dia nitsangana Abrahama ka niankohoka teo anatrehan'ny vahoaka tompon-tany, dia ny zanak'i Heta,

⁸ ary nanao taminy hoe: Raha tianareo ny hanalako ny fatin'ny vadiko tsy ho eto anoloako ka handevenako azy, dia henoy aho, ary mangataha ho ahy amin'i Efrona, zanak'i Seora, ⁹ mba hafoiny ho ahy ny zohy ao Makpelà, izay azy, eo amin'ny sisin-tsahany, mba hafoiny ho ahy eto anatrehanareo, araka izay tokom-bidiny, hataoko tany fandevenana, tena ahy tokoa. ¹⁰ Ary Efrona nipetraka teo afovoan'ny zanak'i Heta. Efrona Heteana namaly an'i Abrahama teo anatrehan'ny zanak'i Heta, dia izay rehetra miditra ny vavahadin'ny tanànany; hoy izy taminy: ¹¹ Tsia, Tompokolahy, fa henoy ny ahy; omeko anao ny saha; omeko anao koa ny zohy izay ao; ary eto anatrehan'ny zanaky ny fireneko no anomezako azy ho anao, ka aleveno ny fatin'ny vadinao. ¹² Niankohoka teo anatrehan'ny vahoaka tompon-tany Abrahama, ¹³ ka niteny tamin'i Efròna teo anatrehan'ny vahoaka tompon-tany hoe: Aoka ihany re mba hohenoinao aho: Omeko ny vidin'ny saha, ka mba raiso amiko izany, dia haleviko ao ny fatin'ny vadiko. ¹⁴ Namaly Efròna ka nanao tamin'i Abrahama hoe: ¹⁵ Henoy ny ahy, tompokolahy: tanin'efa-jato sikla volafotsy io; ka zinona izany amiko sy aminao? Fa aleveno ny vadinao. ¹⁶ Nohenoin'i Abrahama i Efrona ka nolanjain'i Abrahama ny vola voalazany teo anatrehan'ny zanak'i Heta, dia volafotsy efa-jato sikla, araka ny fandraisan'ny mpivarotra azy. ¹⁷ Koa amin'izany ny sahan'i Efrona, ao Makpelà, tandrifin'i Mambre, dia ny saha sy ny zohy ao, mbamin'ny hazo ao anaty saha, ary ny hazo eny amin'ny sisiny manodidina;

¹⁸ dia tapaka ho fananan'i Abrahama eo anatrehan'ny zanak'i Heta, dia izay rehetra miditra ny vavahadin'ny tanànany. ¹⁹ Izay Abrahama vao nandevina an'i Sarà vadiny, tao an-johin'i Makpelà, tandrifin'i Mambre dia Hebrona izany, any amin'ny tany Kanaana. ²⁰ Ka ny saha sy ny zohy ao anatiny dia tapaka lasan'i Abrahama, varo-maty, ho tany fandevenana, avy amin'ny zanak'i Heta.

Toko faha-24

¹ Efa zoky olona sy nandroso fahanterana Abrahama sady nosoavin'ny Tompo tamin'ny zavatra rehetra.

² Ary hoy Abrahama tamin'ny mpanompony, ilay tranainy indrindra tao an-tranony, nanapaka ny fananany rehetra: Ataovy ato ambanin'ny feko ny tananao, ³ hampianianiko anao amin'ny anaran'ny Tompo Andriamanitry ny lanitra sy Andriamanitry ny tany fa tsy haka vady ho an'ny zanako ao amin'ny zanakavavin'ny Kananeana, izay iraisako monina, hianao, ⁴ fa any amin'ny tanindrazako, any amin'ny tany nihaviako, no halehanao haka vady ho an'Isaaka zanako. ⁵ Ary hoy ny navalin'ilay mpanompony: Angamba tsy hety hiaraka amiko hankaty amin'ity tany ity ny vehivavy; ka ny zanakao ve no tokony hoentiko mankany amin'ny tany nihavianao? ⁶ Hoy Abrahama taminy: Tandremo sao dia entinao mankany ny zanako. ⁷ Iaveh Andriamanitry ny lanitra izay naka ahy tao an-tranon'ny raiko, sy tany amin'ny tany nahaterahako, izay niteny koa no haniraka ny Anjeliny eo alohanao, ka haka vady avy any ho an'ny zanako hianao. ⁸ Ary raha tsy mety hanaraka anao ny vehivavy dia afaka amin'izao fianianana ampanaoviko izao hianao; fa aza entinao mankany ny zanako. ⁹ Dia napetrak'ilay mpanompo tao ambany fen'i Abrahama tompony ny tànany, ka nanao fianianana momba izany teo anatrehany.