Bokin'ny Mpitsara

Toko faha-2

¹⁴ Dia nirehitra tamin'Israely ny fahatezeran'ny Tompo ka natolony ho eo an-tànan'ny fahavalony manodidina azy, ary tsy nahatanty ny fahavalony intsony.

¹⁵ Izay nalehany namelezan'ny tànan'ny Tompo hampahory azy avokoa, araka ny efa voalazan'ny Tompo, araka ny nianianan'ny Tompo taminy rahateo, ka dia azon'ny fahoriana mafy izy. ¹⁶ Nanangana mpitsara ihany Iaveh hanafaka azy ireo tamin'izay nandroba azy; ¹⁷ nefa tsy nihaino izay mpitsarany akory izy; fa nandeha nitolo-tena tamin'ny andriamani-kafa, sy niankohoka teo anoloan'ireny. Nalaky nivily izy tamin'ny làlana nomban'ny razany, izay nitandrina ny didin'ny Tompo; tsy nanao tahaka izany izy. ¹⁸ Nony nanangana mpitsara ho azy ireo Iaveh, dia nomban'ny Tompo izany mpitsara izany ka namonjy azy ireo tamin'ny tànan'ny fahavalony, tamin'ny andro rehetra iainan'ny mpitsara; satria nalahelo Iaveh noho ny fitarainany teo anoloan'ireo nampahory sy nampijaly azy.

¹⁹ Rahefa maty anefa ny mpitsara dia nihasimba indray izy mihoatra noho ny razany indray aza, ka lasa nanaraka andriamani-kafa mba hanompo azy sy hiankohoka eo anatrehany, fa tsy niala amin'ny hadisoany amam-pikiribibiany. ²⁰ Tamin'izany dia nirehitra tamin'Israely ny fahatezeran'ny Tompo ka hoy izy: Noho ity firenena ity nivadika tamin'ny fanekena nandidiako ny razany ary noho izy ireo tsy nihaino ny feoko, ²¹ dia tsy hisy horoahiko eo anoloany ireo firenena navelan'i Josoe tamin'ny nahafatesany, na dia iray aza; ²² ireo no hizahako toetra an'Israely, na hazoto hanaraka ny làlan'ny Tompo izy, toy ny nahazoto ny razany, na tsia. ²³ Dia navelan'ny Tompo handry fahizay ireo firenena tsy mbola natolony teo an-tànan'i Josoe ireo, fa tsy nalaky noroahiny.

Toko faha-3

¹ Ireto no firenena navelan'ny Tompo handry fehizay hoetni-mizaha toetra an'Israely, dia izay rehetra tsy nahita ny ady rehetra tany Kanaana.

² Ary hany nokendreny tamin'izany dia fampianarana ny taranak'Israely sy fampahaizana hiady, dia ho an'izay tsy mbola nahalala izany taloha ahay. ³ Ny andriana dimy tamin'ny Filistina, ny Kananeana sy ny Sidoniana ary ny Heveana rehetra izay nonina tamin'ny tendrombohitra Libàna, hatramin'ny tendrombohitra Baala-Hermona, ka hatramin'ny vava lalan'i Hamata. ⁴ Ireo no nokendrena hizahan-toetra an'Israely mba hahitàna na hitandrina ny didy izay nandidian'ny Tompo ny razany tamin'ny alàlan'i Moizy izy ireo na tsia. ⁵ Ary ny zanak'Israely dia nonina tao afovoan'ny Kananeana, ny Heteana, ny Amoreana, ny Ferezeana, ny Heveana, ary ny Jeboseana. ⁶ Ny zanaka vavin'ireo nalainy ho vady, ny zanany vavy nomeny ho vadin'ny zanaka lahin'ireo; ary ny andriamanitr'ireo no notompoiny. ⁷ Nanao izay ratsy teo imason'ny Tompo ny zanak'Israely: Iaveh nohadinoiny, fa Baala sy ny Askerota no notompoiny,

⁸ ka nirehitra tamin'Israely ny fahatezeran'ny Tompo; namidiny ho eo an-tànan'i Kozana-Rasataima mpanjakan'i Mesopotamia izy, dia nanompo an'i Kozana-Rasataima valo taona ny zanak'Israely. ⁹ Fa nitaraina tamin'ny Tompo ny zanak'Israely ka nananganana'Iaveh mpanafaka izay namonjy azy izy, dia Otoniela zanak'i Keneza, zandrin'i Kaleba. ¹⁰ Nilatsaka tamin'io ny Fanahin'ny Tompo, ka nitsara an'Israely izy, ary nivoaka hiady; ary natolotry ny Tompo ho eo an-tànany Kozana-Rasataima mpanjakan'i Mesopotamia, ka nahery tamin'i Kozana-Rasataima ny tànany. ¹¹ Dia nandry efapolo taona ny tany, ary maty Otoniela zanak'i Keneza. ¹² Fa nanao izay ratsy eo imason'ny Tompo indray ny zanak'Israely, ka noho izy nanao izay ratsy eo imason'ny Tompo dia nampaherezin'ny Tompo tamin'Israely, Eglona mpanjakan'i Moaba.

¹³ Nikambana tamin'ny taranak'i Amona sy Amaleka, Eglona, dia niainga nandeha. Nandresy an'Israely izy ka nahafaka ny tanànan-drofia. ¹⁴ Dia nanompo an'i Eglona mpanjakan'i Moaba, valo ambin'ny folo taona, ny zanak'Israely. ¹⁵ Fa nitaraina tamin'ny Tompo ny zanak'Israely, ka nananganana'Iaveh mpanafaka, dia Aoda, zanak'i Gerà, Benjamita, izay tsy nampiasa ny tànany an-kavanana. Nampitondrain'ny zanak'Israely fanomezana ho an'i Eglona mpanjakan'i Moaba izy.

¹⁶ Nanao sabatra roa lela Aoda, hakoho no halavany, nafehiny anatin'ny akanjony tamin'ny valahany havanana. ¹⁷ Natolony an'i Eglona mpanjakan'i Moaba ny fanomezana, ary lehilahy matavy be Eglona. ¹⁸ Nony vitany ny fanolorana ny fanomezana dia nalefany ny olona nitondra ny fanomezana; ¹⁹ fa izy kosa dia niverina, avy hatreo amin'ilay sampy vato akaikin'i Galgalà ka nanao hoe: Ry mpanjaka ô, misy zavatra tsy ambara telo holazaiko aminao. Ka hoy ny mpanjaka: Mangina! Dia nivoaka avokoa izay olona rehetra teo aminy. ²⁰ Nipetraka irery tao an-tranony fakana hatsiatsiaka izy no nohatonin'i Aoda ka nataony hoe: Manana teny avy amin'Andriamanitra ho anao aho. Tafatsangana niala tamin'ny fiketrahany Eglona. ²¹ Dia naninjitra ny tànany havia Aoda tamin'izay, nanatsoaka ny sabatra teny am-balahany havanana, ary notrabarany tamin'io ny kibony; ²² ka ny lelan-tsabatra dia difotra mba-jarany ary nikatona teo ambonin'ny lelan-tsabatra ny taviny fa tsy notsoahiny tamin'ny kibony ny sabatra ary tafagorobaka hatrany an-damosiny. ²³ Ny tohatra any ivelany no nivoahan'i Aoda, ary ny varavaram-ben'ny trano ambony nohidiany tamin'ny karetsaka. ²⁴ Rahefa tafavoaka izy dia tonga ny mpanompon'ny mpanjaka dia nizaha izy ka indro fa ny varavaram-ben'ny trano ambony dia voahidy karetsaka, ka hoy izy: Tsy maintsy misaron-tongotra ato an-trano fakana hatsiatsiaka izy. ²⁵ Dia niandry ela teo izy ireo ka efa menatra aza, ary nony tsy novohany ny varavaran'ny trano ambony dia nalain'izy ireo ny fanalahidy ka novohany; ary indro fa maty niampatra tamin'ny tany teo ny tompony. ²⁶ Dieny mbola niatoato teo izy ireo dia efa lasa nitsoaka Aoda, sy tafahoatra ny sampy vato ary nandositra tany Seirata. ²⁷ Vao tonga izy dia notsofiny ny trompetra tany amin'ny tendrombohitr'i Efraima. Nidina avy any amin'ny tendrombohitra niaraka taminy, ny zanak'Israely, ary izy no nitarika azy ireo. ²⁸ Hoy izy taminy: Manaraha ahy, fa efa natolotry ny Tompo eo an-tànanareo ny fahavalonareo, ny Moabita. Dia nidina nanaraka azy ireo, ka azony ny fitana an'i Jordany tandrifin'i Moaba, ary notapahiny tsy hitan'olona na dia iray aza. ²⁹ Nandresy an'i Moaba izy ireo tamin'izany andro izany, tokony ho lehilahy iray alina, samy tomady sy mahery avokoa, ka tsy afa-nandositra na dia iray aza. ³⁰ Dia voaetry eo ambanin'ny tànan'Israely Moaba tamin'izany andro izany ka nandry valopolo taona ny tany. ³¹ Samigara zanak'i Anata no nanarakaraka azy. Nandresy Filistina enin-jato lahy, tamin'ny fanindronan'omby izy, ka mpanafaka an'Israely koa.

Toko faha-4

¹ Nony maty Aoda, dia mbola nanao izay ratsy eo imason'ny Tompo indray ny zanak'Israely;

² ka namidin'ny Tompo teo an-tànan'i Jabìna mpanjakan'i Kanaana, izay nanjaka tao Asora. Sisarà no lehiben'ny foloalindahy, ary tao Haroseta-Goïma izy no nitoetra. ³ Nitaraina tamin'ny Tompo ny zanak'Israely fa nanan-kalesy vy sivin-jato Jabìna, ary nampahory mafy ny zanak'Israely hatramin'ny roapolo taona. ⁴ Tamin'izany andro izany dia Deborà vehivavy mpaminany, vadin'i Lapidota no nitsara ny zanak'Israely.

⁵ Teo ambanin'ny rofian'i Deborà, anelanelan'i Ramà sy Betela, amin'ny tendrombohitr'i Efraima, no nipetrahany hitsara; niakatra ny zanak'Israely nanatona azy hotsaraina. ⁶ Naniraka olona hiantso an'i Baràka, zanak'i Abinaema, tany Kadesa any Neftalì, izy, ka nanao taminy hoe: Tsy izao va no didy nomen'ny Tompo Andriamanitr'Israely: Mandehana mankany an-tendrombohitra Tabora hianao ary mitondrà lehilahy iray alina amin'ny taranak'i Neftalì sy amin'ny taranak'i Zabolona hiaraka aminao, ⁷ fa hoentiko ho ao aminao ao amin'ny ranon-driaka Sisaona Sisarà, lehiben'ny foloalindahin'i Jabìna, mbamin'ny kalesiny sy ny antoko-miaramilany ka hatolotro eo an-tànanao. ⁸ Hoy Baràka taminy: Raha handeha miaraka amiko hianao, dia handeha aho; fa raha tsy handeha hiaraka amiko hianao, dia tsy handeha aho. ⁹ Ka hoy ny navaliny: Eny àry, handeha hiaraka aminao aho; fa tsy ho anao ny voninahitra amin'izao fanafihana halehanao izao, satria ho eo an-tànam-behivavy no hanoloran'ny Tompo an'i Sisarà. Dia niainga Deborà, ka lasa niaraka tamin'i Baràka nankany Kedesy.