Bokin'ny Mpitsara

Toko faha-4

¹⁰ Nantsoin'i Baràka ho any Kedesy Zabolona sy Neftalì, ka nisy lehilahy iray alina no rafitra nanaraka azy; ary Deborà nandeha niaraka taminy. ¹¹ Hebera ilay Kineana, dia nisaraka tamin'ny Kineana tarakan'i Hobaba, zaodahin'i Moizy ka nilasy hatrany amin'ny aoka any Senima, akaikin'i Kedesy. ¹² Nilazana Sisarà, fa niainga Baràka zanak'i Abinoema nankany amin'ny tendrombohitra Tabora,

¹³ ka nasainy nentina avy tany Haroseta-Goïma avokoa ny kalesiny vy sivin-jato mbamin'ny vahoaka rehetra izay tao aminy, ho ao amin'ny ranon-driaka Sisaona. ¹⁴ Tamin'izay dia hoy Deborà tamin'i Baràka: Mitsangàna, fa anio no andro nanoloran'ny Tompo an'i Sisarà ho eo an-tànanao. Moa tsy nivoaka teo alohanao va Iaveh? Koa nidina avy any an-tendrombohitra Tabora, Baràka, ary lehilahy iray alina no nanaraka azy. ¹⁵ Ary Sisarà mbamin'ny kalesiny rehetra sy ny tafiny rehetra dia nampifanaritahan'ny Tompo tamin'ny lelan-tsabatra teo anoloan'i Baràka, ka nidina niala tamin'ny kalesiny Sisarà, dia nandeha an-tongotra nandositra. ¹⁶ Nenjehin'i Baràka hatrany Haroseta-Goïma, ny kalesin'ny tafika ka lavony tamin'ny lelan-tsabatra avokoa ny tafik'i Sisarà rehetra, fa tsy nisy niangana na dia lehilahy iray aza. ¹⁷ Sisarà dia nandositra an-tongotra ho ao amin'ny lain'i Jahela vadin'i Hebera Kineana; fa nihavana Jabìna mpanjakan'i Asora sy ny fianakavian'i Hebera Kineana.

¹⁸ Nivoaka Jahela hitsena an'i Sisarà ka nanao taminy hoe: Mandrosoa, tompoko, mandrosoa aty amiko fa aza matahotra. Dia nandroso aminy tao an-day izy, ka nafeniny tao ambany firakofana. ¹⁹ Ary hoy izy taminy: Raha sitrakao mba omeo rano kely aho hosotroiko, fa mangetaheta. Dia nosokafany ny siny hoditra fasian-dronono ka nomeny azy hisotroany dia norakofany izy. ²⁰ Hoy ralehilahy taminy: Mitoera eo am-baravaran'ny lahy hianao, ka raha misy olona tonga manontany anao manao hoe: Misy lehilahy va ato? dia valio hoe: Tsia. ²¹ Fa nalain'i Jahela vadi'i Hebera kosa ny tsima-day, nataony an-tànana ny tantanana, ary nitsaitsaika nanatona azy izy, dia natsatony tamin'ny fihirifany ny tsimatra, ka tafagorobaka amin'ny tany, fa renoky ny torimaso izy azon'ny hasasarana mafy; dia maty izy. ²² Ary indro kosa fa nanenjika an'i Sisarà Baràka ka nivoaka hitsena azy Jahela, ka nanao taminy hoe: Avia, fa hasehoko anao ny lehilahy tadiavinao. Dia niditra tao aminy izy, ka hitany maty niampatra teo Sisarà, ary ny tsima-day teo amin'ny fihirifany. ²³ Tamin'izany andro izany no nanetren'Andriamanitra an'i Jabìna mpanjakan'i Kanaana, teo anoloan'ny zanak'Israely.

²⁴ Ary nihanahery nanampatra ny tànany tamin'i Jabìna, mpanjakan'i Kanaana, ny zanak'Israely, mandra-pandevony an'i Jabìna mpanjakan'ny Kanaana.

Toko faha-5

¹ Tamin'izany andro izany, dia nihira Deborà sy Baràka zanak'i Abinoema nanao hoe:

² Nitsangana hitarika ny lehibe ao amin'Israely; ny vahoaka nanolo-tena an-tsitra-po hiady; ka misaora an'ny Tompo amin'izany hianareo!

³ Mihainoa, ry mpanjaka, mampandria sofina, ry mpanjaka: fa izaho dia izaho no hidera an'ny Tompo amin'ny hira, hilaza hira ho an'ny Tompo Andriamanitr'Israely aho.

⁴ Tompo o, fony hianao nivoaka avy any Seira, nony nandroso avy any an-tsahan'i Edoma, nihorohoro ny tany, ny lanitra aza nitsonika, ary nitsonika ho rano ny rahona.

⁵ Nihozongozona teo anatrehan'ny Tompo ny tendrombohitra, dia io Sinaia io teo anatrehan'ny Tompo Andriamanitr'Israely.

⁶ Tamin'ny andron'i Samigara, zanak'i Amata, tamin'ny andron'i Jahela ny lalam-be tsy nodiavina, fa ny sakeli-dalana mihodivitra no nomban'ny mpandeha.

⁷ Lao ny tany an-tsahan'Israely, mandra-pitsangako, izaho Debora, mandra-pitsangako izaho reny teo amin'Israely.

⁸ Fa nifidy andriamani-baovao ny olona, ka nitsidika eo am-bavahady ny ady, ary ny ampinga aman-defona tsy nisy hita, teo amin'ny olona efatra alina, amin'Israely.

⁹ Miantoraka amin'ny mpitondra an'Israely ny foko sy amin'ny vahoaka anisan'ny nanolo-tena: MIsaora an'ny Tompo!

¹⁰ Hianareo izay mitaingina ampondravavy fotsy, hianareo izay mipetraka amin'ny karipetra, ary hianareo izay mizotra eny an-dalana, mihira hianareo.

¹¹ Aoka ny mpandefa zana-tsipika eo akaikin'ny rano fisotroam-biby, hankalaza amin'ny feony ny fahamarinan'ny Tompo, dia ny fahamarinana nataony tamin'ny taniny, ao amin'Israely! Tamin'izay ny vahoakan'ny Tompo nidina ho eny am-bavahadiny.

¹² Mifohaza, mifohaza, ry Debora, mifohaza, mifohaza ka manaova hira anankiray! Mitsangana, ry Baraka, sambory izay ho babonao, ry zanak'i Abinoemo.

¹³ Midìna amin'izay ny sisan'ny andriana amin'ny vahoaka! Midìna ho aty amiko, Iaveh, eo amin'ireo olo-mahery!

¹⁴ Avy any amin'i Efraima ny olona izay mandatsa-paka amin'i Amaleka; nikambana tamin'ny antokonao Benjamina teo aorianao; avy any amin'i Makira nisy lehibe nidina, avy any amin'i Zabolona nisy mpitondra nitana ny tehin'ny mpanoratra.

¹⁵ Miaraka amin'i Debora, ny andrianan'Isakara, eo anilan'i Baraka Isakara, teo an-tany lemaka dia voairaka hanaraka azy izy. Teo akaikin'ny sakeli-dranon-dRobena, nisy fikasana lehibe tao am-po:

¹⁶ Nahoana no nijanona teo afovoan 'ny tanim-bilonao hianao, nihaino ny feon-tsodin'ny mpiandry ondrinao? Teo akaikin'ny sakeli-dranon-dRobena nisy fikasana lehibe tao am-po.

¹⁷ Galaada tsy nandao ny fonenany tany an-dafin'i Jordany; ary Dana, nahoana no nitoetra tao an-tsambony? Asera nijanona tsy nihetsika akory teo amoron-dranomasina; teo am-pitodian-tsambony no nijanonany.

¹⁸ Fa Zabolona no firenena manao vy very ny ainy; torak'izany koa Neftali eo amin'ny havoany marin-tampona.

¹⁹ Tonga ireo mpanjaka ka nandrafitra ady izy ireo, nandrafitra ady tamin'izay ireo mpanjakan'i Kanaana, dia tao Tanaka teo amoron'ny ranon'i Magedao, fa tsy nahazo na dia akoram-bolafotsy iray aza.

²⁰ Ny tany an-danitra no niady ho antsika, ny kintana tamin'ny lalana ombany no niady tamin'i Sisara.

²¹ Ny ranon-driaka Sisaona nanakodia ny fatin'ireny, dia ny ranon-driaka tamin'ny andro fahagola, ny ranon-driaka Sisaona. Mandrosoa an-kasahiana, ry fanahiko o!

²² Nikatrokatroka tamin'izay ny kitron'ny soavaly, tamin'ny hazakazaka, dia ny firiotran'ny mpiadiny.

²³ Ozony Meroza, hoy ny anjelin'ny Tompo, Ozony dia ozony ny mponina ao! Fa tsy mba tonga hanampy an'ny Tompo ireny, tsy nanampy an'ny Tompo ireny niaraka tamin'ny mahery.

²⁴ Hosoavina noho ny vehivavy Jahela vadin'i Hebera, Kineana; hosoavina noho ny vehivavy mitoetra an-day anie izy.

²⁵ Rano no nangatahiny, ronono no nomeny azy; ronono tsy misy fangarony no natolony tamin'ny kopy mihaja.

²⁶ Ny tanany anila mandray ny tsima-day, ary ny tanany havanana ny tantanan'ny mpiasa. Dia asiany Sisara, vakìny ny lohany; torotoroiny, gorobahany ny fihirifany.

²⁷ Miretaka eo an-tongony, lavo miampatra izy; miretaka eo an-tongony lavo izy, ary eo amin'izay iretahany ihany, no itsirany tsy misy aina intsony.

²⁸ Eo am-baravaran-kely amin'ny makarakara, no mijery ny renin'i Sisara sady mikiakiaka: Nahoana izato kalesiny no dia ela fihavy? Nahoana izato saretiny no dia miadam-pandeha?

²⁹ Ny mahira-tsaina amin'ny andriambavy tandapany no mamaly azy; ary ny tenin'ireo no averiny ao am-pony:

³⁰ Tsy nahita va izy ireo, tsy mizara babo va izy ireo? Zazavavy iray, zazavavy roa ho an'ny isam-piady; lamba misoratsoratra ho babon'i Sisara; lamba samihafa soratra ho babo, lamba misoratsoratra iray, lamba roa samihafa soratra ho eo an-tsoroky ny vavy.

³¹ Ny fahavalonao rehetra anie ho levona toy izany, Tompo o, ary izay tia anao kosa, hanahaka ny masoandro raha ilay miposaka amin'ny heriny izy!

³² Dia nandry efapolo taona ny tany.

Toko faha-6

¹ Ary nanao izay ratsy eo imason'ny Tompo ny zanak'Israely, ka natolotry ny Tompo ho eo an-tànan'i Madiana, fito taona.

² Nahery tamin'Israely ny tànan'i Madiana. Noho ny amin'i Madiana no nanaovan'ny zanak'Israely ireo zohy any an-tendrombohitra, mbamin'ireo lava-bato sy ny havoana mimanda. ³ Rahefa namafy voa Israely, dia niakatra Madiana mbamin'i Amaleka ary ny zanaky ny Atsinanana ka nanafika azy.