Boky Voalohan'i Samoela

Toko faha-26

⁴ dia naniraka mpitsikilo Davida ka nahalala fa tonga tokoa Saola. ⁵ Dia niainga Davida ka tonga teo amin'ny toerana nitobian'i Saola. Hitan'i Davida ny toerana nandrian'i Saola sy Abnera zanak'i Nera lehiben'ny miaramilany; tao afovoan'ny toby Saola no nandry ary nitoby manodidina azy ny vahoaka. ⁶ Koa niteny tamin'i Akimeleka Heteana sy tamin'i Abisaï zanak'i Sarvia sy rahalahin'i Joaba, Davida ka nanao hoe: Iza no manaiky hiara-midina amiko, ho any an-toby any amin'i Saola? Dia hoy Abisaï namaly azy: Izaho no hiara-midina aminao. ⁷ Alina no nahatongavan'i Davida sy Abisaï tany amin'ny vahoaka; ary inty Saola nandry tao afovoan'ny toby ka natory, ary ny lefony nitsatoka amin'ny tany teo anilan'ny ondany; Abnera sy ny vahoaka nandry manodidina azy.

⁸ Dia hoy Abisaï tamin'i Davida: Voahidin'ny Tompo eo an-tànanao ity ny fahavalonao anio, ka ankehitriny mba avelao kely re hasiako amin'ny lefona izy dia hataoko miboroaka amin'ny tany amin'ny indray mamely monja, fa tsy hiverenako fanindroany. ⁹ Fa hoy Davida tamin'i Abisaï: Aza mamono azy! Fa iza moa no haninji-tànana amin'ny voahosotry ny Tompo, ka afa-maina tsy ho voasazy? ¹⁰ Ary hoy Davida: Marina fa velona Iaveh, koa dia Iaveh ihany no hamely azy, na ho tapitr'andro izy ka maty, na hirotsaka amin'ny ady izy ka maty; ¹¹ fa aoka harovan'ny Tompo tsy haninji-tànana amin'ny voahosotry ny Tompo aho! Koa ankehitriny ny lefona eo anilan'ny ondany sy ny sny fitoeran-drano no alao, dia ndao isika handeha. ¹² Dia nalain'i Davida ny lefona sy ny siny fitoeran-drano teo anilan'ny ondan'i Saola, dia nandeha izy ireo. Tsy nisy olona nahita azy, tsy nisy nahalala, tsy nisy nahatsiaro, fa natory daholo izy rehetra, fa nandatsahan'ny Tompo torimaso nandrenoka azy izy ireo. ¹³ Niampita teny an-dafy Davida, ka nijanona lavitra teo an-tampon'ny tendrombohitra nisy elanelany lavitra nampisaraka azy roa tonta.

¹⁴ Ary Davida niantso ny vahoaka sy Abnera zanak'i Nera nanao hoe: Tsy hamaly va hianao, ry Abnera? Dia hoy Abnera namaly: Zovy moa hianao, miantso aty amin'ny mpanjaka? ¹⁵ Ary hoy Davida tamin'i Abnera: Tsy lehilahy va hianao? Ary iza no toa anao amin'Israely? Koa nahoana hianao no tsy niambina ny mpanjaka tomponao? Fa nisy anankiray tamin'ny vahoaka tonga teny hamono ny mpanjaka tomponao. ¹⁶ Tsy mety mihitsy izany nataonao izany. Fa marina tokoa fa velona Iaveh, koa dia ny maty no tandrifin'anao, satria hianareo tsy niambina ny tomponareo, ilay voahosotry ny Tompo. Jereo ange izao: nankaiza àry ny lefon'ny mpanjaka, sy ny siny fitoeran-drano, teo anilan'ny ondany? ¹⁷ Fantatr'i Saola ny feon'i Davida, ka hoy izy: Feonao va izany, ry Davida, zanako ô! Dia hoy Davida namaly: Feoko tokoa, ry mpanjaka tompoko!

¹⁸ Sady nampiany hoe: Nahoana ny tompoko no manenjika ity mpanompony? Fa nanao inona aho? Inona no ratsy nataon'ny tànako? ¹⁹ Ho sitraky ny mpanjaka tompoko anie ankehitriny ny hihaino ny tenin'ny mpanompony: Raha Iaveh no nanesika anao hamely ahy, aoka hankasitrahany ny hanitry ny fanatitra anankiray; fa raha olombelona kosa, aoka ho voaozona eo anatrehan'ny Tompo izy, satria efa nandroaka ahy izy izao, mba hanesotra amiko ny anjara toerako amin'ny lovan'ny Tompo, nanao hoe: mandehana manompo andriamani-kafa. ²⁰ Koa ankehitriny, aoka ny rako tsy ho latsaka aminny tany lavitra ny tavan'ny Tompo! Fa ny mpanjakan'Israely ity no niainga hitady izay parasy anankiray, mova tsy ny manenjika tsipoy eny an-tendrombohitra! ²¹ Dia hoy Saola: Nanota aho, miverena re, ry Davida zanako, fa tsy hanisy ratsy anao intsony aho, satria sarobidy teo imasonao ny aiko androany. Nanao toy ny adala aho, ka nahavita ratsy lehibe.

²² Namaly Davida hoe: Indro ny lefona, ry mpanjaka. Ny iray amin'ny zatovonao no aoka haka azy ety. ²³ Samy hovalian'ny Tompo araka ny fahitsiana amam-pahamarinany avy; fa efa natolotry ny Tompo teo an-tànako hianao androany, nefa tsy nety naninjitra ny tànako tamin'ny voahosotry ny Tompo aho. ²⁴ Ary indro fa toy ny nahasarobidy ny ainao teo imasoko androany, no mba hahasarobidy ny aiko eo imason'ny Tompo koa, ka hanafahany ahy amin'ny tebiteby rehetra. ²⁵ Dia hoy Saola tamin'i Davida: Hambinina anie hianao, ry Davida zanako. Marina fa ho vanona tsara ny raharaha iandraiketanao. Dia nanohy ny diany Davida; ary Saola nody any aminy.

Toko faha-27

¹ Ary hoy Davida anakampony: Mbola ho fatin'ny tànan'i Saola ihany aho, indray andro any, ka ny mandositra faingana any amin'ny tanin'ny Filistina no mety amiko indrindra, mba hitsaharan'i Saola tsy hitady ahy intsony amin'ny faritanin'Israely rehetra, dia ho afaka amin'ny tànany aho.

² Koa niainga Davida sy izy enin-jato lahy nomba azy, nankany amin'i Akisa, zanak'i Maoka mpanjakan'i Geta. ³ Dia nitoetra teo amin'i Akisa, tany Geta Davida sy ny olony, samy nomban'ny fianakaviany avy, ary nomba an'i Davida izy roa vavy, dia Akinoama avy any Jezraela, sy Abigaila avy any Karmela, ilay novinadin'i Nabala. ⁴ Nilazana Saola fa nandositra tany Geta Davida ka dia tsy nandeha hanjohy azy intsony izy. ⁵ Hoy Davida tamin'i Akisa: Raha mba nahita fitia eo imasonao ihany aho, dia aoka homena ahy ny fitoerana anankiray honenako ao amin'ny anankiray amin'ny tanàna any an-tsaha, satria aiza ka dia hiara-monina aminao, eto amin'ny renivohi-panjakanao ny mpanomponao?

⁶ Dia nomen'i Akisa azy androtr'izay ihany Sikelega; noho izany dia an'ny mpanjakan'i Jodà Sikelega mandrak'androany. ⁷ Herintaona sy efa-bolana no andro nipetrahan'i Davida tany amin'ny tanin'ny Filistina. ⁸ Niakatra Davida sy ny olony ary nanafika ny Gesoriana sy ny gerziana ary ny Amalesita, fa olona nonina any an-kilan'i Sora ka hatrany amin'ny tany Ejipta izy ireo izany ela izany.

⁹ Noravan'i Davida mihitsy ny tany fa ny olona tsy nasiany miangana na lahy na vavy, ny ondry, ny omby, ny ampondra, ny rameva, mbamin'ny fitafiana, nobaboiny avokoa; vao niverina tany amin'i Akisa izy. ¹⁰ Ary hoy Akisa: Taiza no nanafika hianareo androany? Dia namalay Davida: Tany amin'ny Negeban'i Jodà, tany amin'ny Negeban'i Jerameelita ary tany amin'ny Negeban'ny Kineana. ¹¹ Fa ny olona no tsy nasian'i Davida miangana, ho enti-mankany Geta, na lahy na vavy, dia hoy izy anakampo: fandrao manao filazana mamely antsika ireo, manao hoe: Izao sy izao no nataon'i Davida. Ary toy izany mandrakariva no nataony, tamin'ny andro rehetra nitoerany tany amin'ny tanin'ny Filistina; ¹² ka natoky an'i Davida Akisa, fa hoy izy: Nanao izay hampangidy hoditra azy amin'Israely vahoakany izy, ka ho mpanompoko mandrakizay.

Toko faha-28

¹ Tamin'izany andro izany nangonin'ny Filistina ho tafika iray ihany ny antoko-miaramilany rehetra hiady amin'Israely. Ka hoy Akisa tamin'i Davida: Fantaro fa ho avy miaraka amiko any an-toby hianao sy ny olonao.

² Ary hoy ny navalin'i Davida tamin'i Akisa: Koa ho hitanao ny hafitsoky ny mpanomponao. Ka hoy Akisa tamin'i Davida: Ary izaho kosa hanangana anao ho mpiambina ny tenako mandrakizay. ³ Efa maty Samoela ka nitomanian'Israely rehetra ary naleviny tany Ramà tao amin'ny tanànany. Ary efa noroahin'i Saola hiala amin'ny tany ny olona mpamoha angatra sy mpanao sikidy.

⁴ Nony tafangona ny Filistina dia tonga nitoby tao Sonama; ary Israely rehetra novorin'i Saola ka nitoby tao Jelboe.

⁵ raiki-tahotra sy nivadi-po mafy Saola, nony nahita ity tobin'ny Filistina. ⁶ Nanontany an'ny Tompo Saola, nefa tsy namaly azy Iaveh, na tamin'ny nofy, na tamin'ny Orima, na tamin'ny mpaminany. ⁷ Dia hoy Saola tamin'ny mpanompony: Izahao vehivavy mpamoha angatra aho dia handeha hanatona azy sy hantontany azy aho. Ka hoy ny mpanompony taminy: Any Endora misy vehivavy mpamoha angatra. ⁸ Dia nanova tarehy sy nitafy fitafiana hafa Saola, ka niainga narahin'ny olona roa lahy. Alina no tonga tany amin'ilay vehivavy izy ireo ka hoy Saola taminy: Lazao amiko mialoha izay ho avy, amin'ny fiantsoana ny maty anankiray, ary asaovy miakatra mankaty amiko izay hotononiko aminao. ⁹ Fa namaly azy ravehivavy: Indro fa fantatro ihany ny nataon'i Saola, dia ny nandroahany hiala amin'ny tany izay olona mpamoha angatra sy mpanao sikidy, ka nahoana hianao no dia mamela-pandrika hahafaty ny aiko? ¹⁰ Nianiana taminy, tamin'ny Tompo, Saola, nanao hoe: Marina fa velona Iaveh. Koa tsy hampidi-doza aminao akory izao zavatra izao. ¹¹ Dia hoy ravehivavy: Iza àry no hasaiko miakatra mankaty aminao? Ka hoy ny navaliny: Samoela no asaovy miakatra mankaty amiko. ¹² Vao nahita an'i Samoela ravehivavy dia nidradradradra mafy, ary hoy ravehivavy tamin'i Saola hoe: Ahoana no namitahanao ahy? Hianao no Saola.

¹³ Ary hoy ny mpanjaka taminy: Aza matahotra; fa inona no hitanao? Dia hoy ravehivavy tamin'i Saola: andriamanitra miakatra avy amin'ny tany no hitako. ¹⁴ Ka hoy izy taminy: Manao ahoana ny endriny? Ary hoy ny navaliny: Anti-dahy io miakatra io, ary mihodidina amin'ny kapaoty izy. Fantatr'i Saola fa Samoela izay, ka tafaondrika tamin'ny tany tery izy, dia niankohoka. ¹⁵ Ary hoy Samoela tamin'i Saola: Ahoana no manabataba ahy hianao amin'ny fampiakarana ahy? Dia namaly Saola nanao hoe: Poritra loatra aho: ny Filistina miady amiko, ary Andriamanitra nihataka tamiko, fa tsy namaly ahy izy, na tamin'ny mpaminany, na tamin'ny nofy. Niantso anao aho, mba hampahalala ahy izay tsy maintsy hataoko.

¹⁶ Ary hoy Samoela: Ahoana no anontanianao ahy, nefa Iaveh efa nihataka taminao, sy efa tonga fahavalonao?