Boky Faharoan'ny Tantara

Toko faha-6

²⁹ raha misy olona iray, raha Israely rehetra vahoakanao, manao vavaka amam-pifonana, ary samy mahalala ny fijaliany amam-pahoriany avy ny olona, ka mamelatra ny tànany manandrify ity trano ity, ³⁰ dia mihainoa azy hianao any an-danitra amin'ny fitoeran'ny fonenanao, ka mamelà heloka; samy valio araka ny làlany rehetra avy izy, hianao mahalala ny fony, fa hianao irery no mahalala ny fon'ny zanak'olombelona rehetra, ³¹ mba hatahorany anao eo am-pizorana amin'ny làlanao mandritra ny andro rehetra hiainany eo ambonin'ny tany nomenao ny razany. ³² Ny amin'ny vahiny, tsy anisan'Israely vahoakanao, fa avy any an-tany lavitra, noho ny anaranao lehibe, ny tànanao mahery ary ny sandrinao ahinjitra, nony tonga hivavaka eto amin'ity trano ity izy,

³³ dia mihainoa azy hianao any an-danitra amin'ny fitoeran'ny fonenanao; tanteraho izay rehetra angatahin'izany vahiny izany aminao, mba ho fantatry ny firenena rehetra ambonin'ny tany ny anaranao, hatahorany anao tahaka an'Israely vahoakanao, ary hahalalany fa antsoina amin'ity trano nataoko ity ny anaranao. ³⁴ Nony hivoaka hiady amin'ny fahavalony, ny vahoakanao manaraka ny làlana andefasanao azy, raha mivavaka mitodika ity tanàna nofidinao ity sy ity trano nataoko ho an'ny anaranao ity,

³⁵ dia henoy any an-danitra ny vavaka amam-pifonany, ary omeo ny rariny izy. ³⁶ Raha avy izay hanotany aminao, fa tsy misy olombelona tsy manota, ka tezitra aminy hianao, dia manolotra azy amin'ny fahavalony ary ny mpandresy hitondra azy ho babo any an-tany lavitra na akaiky,

³⁷ raha mieritreritra ao am-pony izy nony mby any amin'ny tany nahababo azy, ka miverina aminao, sy manolotra fifonana aminao, any amin'ny tany nahababo azy, manao hoe: Nanota izahay, nanao ratsy izahay, nahavita heloka izahay, ³⁸ raha miverina aminao amin'ny fony rehetra sy amin'ny fanahiny rehetra izy, any amin'ny tany nahababo azy, izay nitondrana azy babo, ka mivavaka aminao mitodika atý amin'ny tany nomenao ny razany, atý amin'ny tanàna nofidinao sy atý amin'ny trano nataoko ho an'ny anaranao, ³⁹ mihainoa hianao any an-danitra any amin'ny fitoeran'ny fonenanao, ny vavaka amam-pifonany, omeo rariny izy, ary avelao ny fahadisoan'ny vahoakanao, izay nataony taminao. ⁴⁰ Ary ankehitriny, ry Andriamanitra ô, aoka hahiratan'ny masonao sy hohenoin'ny sofinao ny vavaka atao amin'ity fitoerana ity!

⁴¹ Ankehitriny, ry Iaveh Andriamanitra, aoka hitsangana hianao ho any amin'ny fitoerana fitsaharanao, dia hianao sy ny fiaran'ny herinao! Aoka hitafy famonjena ny mpisoronao, ry Iaveh Andriamanitra, ary aoka hiarana amin'ny hasambarana ny olonao masina. ⁴² Aza atosi-boho-tànana ny tavan'ny voahosotrao, ry Iaveh Andriamanitra ô, fa tsarovy ny fahasoavana nomena tamin'i Davida mpanomponao.

Toko faha-7

¹ Nony tapitra ny vavak'i Salomona, dia nodoran'ny afo avy any an-danitra ny sorona dorana mbamin'ny sorona ary nameno ny trano ny voninahitry ny Tompo.

² Ka tsy afa-niditra tao an-tranon'ny Tompo ny mpisorona, fa feno ny voninahitry ny Tompo ny tranony. ³ Nahita ny nilatsahan'ny afo sy ny voninahitry ny Tompo teo ambonin'ny trano ny zanak'Israely rehetra, ka niankohoka tamin'ny tany tamin'ny lampivato, niankohoka nidera an'ny Tompo nanao hoe: Fa tsara izy, fa maharitra mandrakizay ny famindram-pony. ⁴ Dia nanolotra sorona teo anatrehan'ny Tompo ny mpanjaka sy ny vahoaka rehetra.

⁵ Omby roa arivo amby roa alina, sy ondry roa alina sy iray hetsy, no novonoin'i Salomona mpanjaka natao sorona. Toy izany no nanaovan'ny mpanjaka sy ny vahoaka rehetra ny fitokanana ny tranon'Andriamanitra. ⁶ Ny mpisorona nitsangana tamin'ny fitoerany avy, mbamin'ny Levita koa nitondra ny zava-manenon'ny Tompo izay nataon'i Davida mpanjaka, hiderana an'ny Tompo hoe: Fa maharitra mandrakizay ny famindram-pony, raha nankalaza an'ny Tompo tamin'ny alàlan'izy ireo izy. Nitsoka trompetra tandrifin'ireo, ny mpisorona, ary tafatsangana Israely rehetra. ⁷ Nohamasinin'i Salomona ny afovoan'ny kianja, eo anoloan'ny tranon'ny Tompo, fa teo no nanolorany ny sorona dorana mbamin'ny saboran'ny sorom-pihavanana, satria tsy omby ny sorona dorana sy ny fanatitra ary ny sabora, ny otely varahina nataony. ⁸ Hafitoana no nankalazan'i Salomona ny fety tamin'izany, dia izy mbamin'Israely rehetra, vahoaka zavon-tany hatrany amin'ny hadilàlan'i Emata ka hatrany amin'ny ranon-driakan'i Ejipta.

⁹ Nony tamin'ny andro fahavalo, dia nanao ny fivoriana famaranana ny fety izy, fa hafitoana no nanaovany ny fitokanan'ny otely, ary hafitoana no nanaovany ny fety. ¹⁰ Ary tamin'ny andro fahatelo amby roapolon'ny volana fahafito, dia nampodin'i Salomona ho any an-dainy avy ny vahoaka; samy faly sy ravoravo avokoa, noho ny soa nataon'ny Tompo tamin'i Davida, tamin'i Salomona ary tamin'Israely vahoakany. ¹¹ Vitan'i Salomona ny tranon'ny Tompo sy ny tranon'ny mpanjaka, sady efany soa aman-tsara izay rehetra noheverin'ny sainy hatao tao amin'ny tranon'ny Tompo sy ny tranon'ny mpanjaka.

¹² Ary niseho taminy Iaveh nony alina, ka nanao taminy hoe: Efa nohenoiko ny vavakao, ary efa nofidiko ho trano fanateran-tsorona ity fitoerana ity. ¹³ Koa nony hampihantona ny andro aho ka tsy hisy ranonorana, nony asaiko handevona ny tany ny valala, na haniraka ny pesta ho ao amin'ny vahoakako, ¹⁴ raha manetry tena sy mivavaka ary mitady ny tavako ny vahoakako, izay iantsoana ny anarako, ka miala amin'ny lalan-dratsiny, dia hihaino azy aho any an-danitra, hamela ny fahotany aho, sady hahasitrana ny taniny. ¹⁵ Ary ankehitriny dia hahiratan'ny masoko sy hohenoin'ny sofiko ny vavaka atao amin'ity fitoerana ity. ¹⁶ Fidìko sy hamasiniko hatramin'izao ity trano ity, hitoeran'ny anarako mandrakizay, ary ho eo mandrakariva ny masoko sy ny foko. ¹⁷ Ary ny aminao, raha mandeha eo anatrehako tahaka ny nandehanan'i Davida rainao hianao, ka manaraka an'izay rehetra nandidiako anao, sy mitandrina ny lalàna amam-pitsipiko, ¹⁸ dia hataoko mafy orina ny seza fiandrianan'ny fanjakanao, araka ny efa nifanekeko tamin'i Davida rainao, nataoko hoe: Tsy ho lany taranaka hanjaka eo amin'Israely hianao na oviana na oviana. ¹⁹ Fa raha mivily kosa hianareo, ka mahafoy ny didy aman-dalàko, izay nataoko teo anoloanareo, ka mandeha manompo andriamani-kafa, sy miankohoka eo anatrehan'ireny; ²⁰ dia hofongorako amin'ny taniko izay nomeko azy izy ireo; ity trano nohamasiniko ho an'ny anarako ity, hariako tsy ho eo anatrehako, sy hataoko zary fandatsa sy fanarabian'ny olona any amin'ny firenena rehetra. ²¹ Ka ity trano ity izay efa voasandratra avo erý, hanjary fitalanjonan'izay rehetra handalo azy, sy hataony hoe: Naninona re no dia nataon'ny Tompo toy izao ity tany sy ity trano ity? ²² Dia hamaly ny olona hanao hoe: Satria izy ireo nahafoy an'ny Tompo Andriamanitry ny razany izay namoaka azy tany amin'ny tany Ejipta, ary nifikitra tamin'andriamani-kafa, niankohoka teo anatrehan'ireny, ary nanompo ireny, ka izany no nampianjerany an'izao loza rehetra izao taminy.

Toko faha-8

¹ Nony afaka ny roapolo taona, ka efa vitan'i Salomona ny tranon'ny Tompo sy ny tranony,

² dia naoriny indray ireo tanàna nomen'i Hirama azy, ka zanak'Israely no namponeniny tao. ³ Notafihin'i Salomona, Etama-Sobà, ka azony.

⁴ Dia nanorina an'i Tadmora tany an'efitra izy, mbamin'ireo tanàna fitehirizana rehetra any amin'ny faritanin'i Emata. ⁵ Naoriny koa Betorona ambony sy Betorona ambany, tanàna mafy misy manda sy vavahady ary karetsaka hazo. ⁶ Baalata mbamin'ny tanàna fitehirizana rehetra izay an'i Salomona, ny tanàna rehetra ho an'ny kalesy, ny tanàna ho an'ny mpitaingin-tsoavaly, mbamin'izay rehetra tian'i Salomona naorina tany Jerosalema sy tany Libàna ary tany amin'ny tany rehetra nanapahany. ⁷ Ny vahoaka rehetra sisa tavela, tamin'ny Heteana, ny Amoreana, ny Ferezeana, ny Heveana ary ny Jeboseana, izay tsy isan'Israely, ⁸ dia ny taranak'ireo, izay nandimby azy nipetraka tamin'ny tany, ka tsy naringan'ny zanak'Israely, no nalain'i Salomona ho mpanao fanompoana, mandrak'androany. ⁹ Fa tsy mba nisy nandevozin'i Salomona nampanaovina ny raharahany ny zanak'Israely, na dia iray aza; fa izy ireo kosa no miaramilany sy mpifehy ny manam-boninahiny ary komandin'ny kalesy amam-pitaingin-tsoavaliny. ¹⁰ Dimampolo sy roan-jato no lehiben'ny komadaoron'i Salomona mpanjaka, niandraikitra ny fanapahana ny vahoaka. ¹¹ Nasain'i Salomona niakatra avy any an-tanànan'i Davida, ny zanakavavin'i Faraona, ho ao amin'ny trano nataony ho azy, fa hoy izy: Tsy hitoetra ao an-tranon'i Davida mpanjakan'Israely ny vadiko, satria masina izany fitoerana izany, izay efa nidiran'ny fiaran'Andriamanitra.

¹² Tamin'izany Salomona dia nanatitra sorona dorana ho an'ny Tompo teo ambonin'ny otelin'ny Tompo izay naoriny teo anoloan'ny fidirana.

¹³ Ka izay voadidin'ny lalàn'i Moizy dia nateriny isan'andro sy isan-tsabata; ary amin'ny voalohan'ny volana, sy amin'ny fety, intelo isan-taona, dia ny fetin'ny azima, ny fetin'ny herinandro, ary ny fetin'ny tabernakla. ¹⁴ Notendreny, araka ny nandaharan'i Davida rainy azy, ny antokon'ny mpisorona ho amin'ny fanompoany, sy ny Levita ho amin'ny anjara raharahany, hankalaza an'ny Tompo sy hanao fanompoana eo anoloan'ny mpisorona, araka ny fandaharana ny andro isany, ary ny mpiandry varavaravana ho an'ny isam-baravarana, araka ny antokony avy, fa toy izany no nandaharan'i Davida, olon'Andriamanitra, azy.