Boky Faharoan'ny Tantara

Toko faha-4

¹⁵ ary ny ranomasina, mbamin'ireo omby roa ambin'ny folo tambaniny, ¹⁶ ny vilany, ny sotron-davenona, ny fitrebika. Nanao ireo fanaka rehetra ireo ingahy Hirama ho an'i Salomona mpanjaka, ho an'ny tranon'ny Tompo: varahina manganohano ireo zavatra ireo. ¹⁷ Tao amin'ny tany lemak'i Jordany amin'ny tany be tanimanga, anelanelan'i Sokota sy Saredà, no nampanaovan'ny mpanjaka anidina azy. ¹⁸ Be dia be ireo fanaka rehetra nataon'i Salomona ireo, ka tsy notsapaina ho fantatra marina izay lanjan'ny varahina. ¹⁹ Ary nataon'i Salomona ny fanaka rehetra ho an'ny tranon'Andriamanitra, dia ny otely volamena, ny latabatra fametrahana ny mofo alahatra.

²⁰ Ny fanaovan-jiro mbamin'ny lalampiny volamena madio, hampirehetina eo anoloan'ny fitoerana masina, araka ny lalàna, ²¹ ny voniny, ny lalampiny, ny hetin-jiro volamena, volamena madio indrindra, ²² ny antsy, ny kopy, ny tasy, ny fanembohana, volamena madio, ny lela varavarana volamena, hanaovana ny varavarana ao anatin'ny trano, ao amin'ny fidirana ho ao amin'ny fitoerana masina indrindra, ary hanaovana ny varavaran'ny trano ao amin'ny fidirana ho ao amin'ny tempoly.

Toko faha-5

¹ Toy izany no nahavitan'ny voa-javatra rehetra nataon'i Salomona amin'ny tranon'ny Tompo. Dia nalain'i Salomona ny zavatra rehetra natokan'i Davida rainy, sy ny volafotsy amam-bolamena mbamin'ny fanaka rehetra ka nataony tao amin'ny rakitry ny tranon'ny Tompo.

² Tamin'izay dia novorin'i Salomona tany Jerosalema ny loholon'Israely sy ny lohan'ny isam-poko rehetra, ary ny loham-pianakavian'ny zanak'Israely, hamindra ny fiaran'ny faneken'ny Tompo avy amin'ny tanànan'i Davida, izany hoe any Siona.

³ Koa nivory teo amin'ny mpanjaka ny lehilahy rehetra amin'Israely hanao ny fety, izay natao tamin'ny volana fahafito. ⁴ Nony tonga ny loholon'Israely rehetra, dia nentin'ny taranak'i Levì ny fiara.

⁵ Nafindrany ny fiara mbamin'ny trano lay fihaonana ary ny fanaka masina rehetra tao amin'ny lay, ka ny mpisorona taranak'i Levì no nitondra azy. ⁶ Salomona mpanjaka sy ny fiangonan'Israely rehetra izay nantsoiny ho eo aminy, dia samy teo anoloan'ny fiara avokoa. Namono ondry sy omby natao sorona izy ireo ary tsy azo isaina na tombanana fa maro loatra. ⁷ Dia nentin'ny mpisorona ny fiaran'ny faneken'ny Tompo, ho ao amin'ny fitoerany, ao amin'ny fitoerana masin'ny trano, amin'ny fitoerana masina indrindra, teo ambanin'ny elatry ny kerobima. ⁸ Ny elatr'ireo kerobima nivelatra tambonin'ny fitoeran'ny fiara dia nanaloka ny fiara mbamin'ny baony teo amboniny. ⁹ Lava be ny bao, ka hita ny lohany, raha eo anoloan'ny fitoerana masina, lavidavitry ny fiara, fa raha any ivelany no tsy tazana izy. Dia tao mandrak'androany ny fiara. ¹⁰ Tao anatin'ny fiara, dia tsy nisy afatsy ny takelaka roa napetrak'i Moizy tao, tany Horeba, fony Iaveh nanao fanekena tamin'ny Zanak'Israely, tamin'ny nivoahany avy tany Ejipta. ¹¹ Tamin'ny fotoana nivoahan'ny mpisorona avy tao amin'ny fitoerana masina, - fa ny mpisorona rehetra nanatrika teo dia samy nanamasina ny tenany avokoa fa tsy voatana ny filaharan'ny isan-tokony,

¹² ny Levita mpihira rehetra, Asafa, Hemàna, Iditòna, mbamin'ny zanany aman-drahalahiny, samy nitafy rongony madinika, dia nitsangana teo atsinanan'ny otely, nitondra kipantsona sy valiha ary harpa, ary teo anilany ny mpisorona roapolo amby zato, samy nitsoka trompetra; - ¹³ nony niray feo hankalaza sy hidera an'ny Tompo ireo nitsoka ny trompetra sy ireo nihira, ka nampaneno ny feon'ny trompetra amam-kipantsona mbamin'ny zava-maneno ka nankalaza an'ny Tompo amin'ny teny hoe: Fa tsara izy, fa maharitra mandrakizay ny famindra-pony, tamin'izay dia tonga feno rahona anankiray ny trano, dia ny tranon'ny Tompo. ¹⁴ Ka tsy afa-nijanona tao hanao ny fanompoana ireo mpisorona, noho ny rahona, fa nameno ny tranon'Andriamanitra ny voninahitry ny Tompo.

Toko faha-6

¹ Tamin'izay, dia hoy Salomona: Tian'ny Tompo ny mitoetra eo amin'ny aizina.

² Ary nanao trano aho, ka ho fonenanao izy, ary toerana mba hitoeranao mandrakizay. ³ Rahefa izany, dia nitodika ny fiangonan'Israely ny mpanjaka ary nitso-drano azy, ary ny fiangonan'Israely rehetra dia tafatsangana. Dia hoy izy:

⁴ Isaorana anie Iaveh Andriamanitr'Israely fa ny vavany nilaza tamin'i Davida raiko, ary ny tànany nanatanteraka ilay nolazainy hoe: ⁵ Hatramin'ny andro namoahako ny vahoakako tany amin'ny tany Ejipta, tsy nisy tanàna nofidiko, teo amin'ny fokon'Israely rehetra, hanaovan-trano hitoeran'ny anarako, ary tsy nisy olona nofidiko ho mpanapaka an'Israely vahoakako; ⁶ fa Jerosalema no nofidiko hitoeran'ny anarako, ary Davida no nofidiko hanjaka amin'Israely vahoakako. ⁷ Nihevitra hanao trano ho an'ny anaran'ny Tompo Andriamanitr'Israely Davida raiko, ⁸ fa hoy Iaveh tamin'i Davida raiko: Noho hianao nihevitra hanao trano ho an'ny anarako, dia zavatra soa ny nanananao izany hevitra izany. ⁹ Tsy hianao anefa no hanao ny trano, fa ny zanakao naloaky ny kibonao no hanao ny trano ho an'ny anarako. ¹⁰ Ary notanterahin'ny Tompo ny teny voalazany, fa nisandratra handimby an'i Davida raiko aho, sy mipetraka eo amin'ny seza fiandrianan'Israely, araka ny efa voalazan'ny Tompo, sady efa nanao ny tranon'ny Tompo Andriamanitr'Israely. ¹¹ Efa napetrako tao ny fiara misy ny faneken'ny Tompo, dia ny fanekena nataon'ny Tompo tamin'ny zanak'Israely. ¹² Dia nankeo anoloan'ny otelin'ny Tompo Salomona nanatrika ny fiangonan'Israely rehetra, sady namelatra ny tànany.

¹³ Fa nanao lampihazo varahina Salomona, dia natsangany teo afovoan'ny kianja: dimy hakiho ny lavany, dimy hakiho ny sakany, ary telo hakiho ny hahavony. Niakatra teo izy, dia nandohalika nanatrika ny fiangonan'Israely rehetra, sy nanandratra ny tànany hanandrandra ny lanitra, ¹⁴ ary nanao hoe: Iaveh Andriamanitr'Israely o, tsy misy Andriamanitra tahaka anao, na any an-danitra na ety an-tany; mitandrina ny fanekena amam-pamindram-po amin'ny mpanomponao, izay mandeha eo anatrehanao amin'ny fony rehetra hianao. ¹⁵ Toy ny nitandremanao ny teninao tamin'i Davida raiko, mpanomponao, fa notanterahin'ny tànanao ny efa voalazan'ny vavanao, araka izao hita anio izao. ¹⁶ Ary ankehitriny, ry Iaveh Andriamanitr'Israely ô, tanteraho noho ny fitiavanao an'i Davida mpanomponao raiko, ny teny nataonao taminy hoe: Tsy ho lany taranaka eo anatrehako hianao, fa hisy hipetraka eo amin'ny seza fiandrianan'Israely mandrakariva, raha tany ny taranakao mitandrina ny làlana alehany ka mizotra amin'ny làlako toy ny fandehananao eo anatrehako. ¹⁷ Koa aoka ary ho tanteraka, ry Iaveh Andriamanitr'Israely, ny teny nataonao tamin'i Davida mpanomponao. ¹⁸ Fa moa dia marina va fa miara-monina amin'ny olombelona ety an-tany Andriamanitra? Indro fa ny lanitra aza, mbamin'ny lanitry ny lanitra tsy omby anao, ka mainka fa ity trano nataoko ity!

¹⁹ Kanefa, ry Iaveh Andriamanitro ô, tsimbino ny vavaka amam-pitarainan'ny mpanomponao, amim-pihainoanao ny antsom-pifaliana amam-pangatahana ataon'ny mpanomponao eo anatrehanao, ²⁰ ary ny masonao ataovy mihiratra andro aman'alina amin'ity trano ity, dia eto amin'ity toerana voalazanao hametrahana ny anaranao ity, dia henoy ny vavaka ataon'ny mpanomponao eto amin'ity fitoerana ity. ²¹ Henoy ny fitarainan'ny mpanomponao sy Israely vahoakanao, raha hivavaka eto amin'ity fitoerana ity. Mihainoa any amin'ny fitoeram-ponenanao any an-danitra; mihainoa dia mamelà heloka. ²² Raha misy olona manota amin'ny namany, ka asaina hanao fianianana izy, koa tonga mianiana eo anoloan'ny otelinao, eto amin'ity trano ity,

²³ dia mihainoa azy any an-danitra hianao, manefà ary mitsarà ireo mpanomponao ireo, ka manameloha ny meloka manatsingerina amin'ny lohany izay nataony, ary hamarino ny tsy manan-tsiny, mamalý azy araka ny fahamarinany. ²⁴ Nony resy eo anatrehan'ny fahavalo Israely vahoakanao, noho ny nanotany taminao, raha miverina aminao indray izy sy manome voninahitra ny anaranao, raha manao fivavahana sy fifonana aminao ao anatin'ity trano ity,

²⁵ dia mihainoa azy hianao any an-danitra, avelao ny fahotan'Israely vahoakanao, ary ampodio amin'ny tany nomenao azy sy ny razany izy. ²⁶ Nony mihantona ny andro, fa tsy misy ranonorana, noho ny nanotany taminao, raha mivavaka eto amin'ity fitoerana ity izy sy manome voninahitra ny anaranao, sady miala amin'ny fahotany satria nampahorianao:

²⁷ mihainoa azy hianao any an-danitra, avelao ny fahotan'ny mpanomponao sy Israely vahoakanao, amin'ny fanoroana azy ny làlana tsara tokony halehany; ary alatsaho amin'ny tany nomenao ho lovan'ny vahoakanao, ny ranonorana. ²⁸ Nony tonga amin'ny tany ny mosary, nony misy ny pesta, nony misy ny roly, ny niela, ny valala, ny hasila, nony ataon'ny fahavalo fahirano ao amin'ny taniny sy eo am-bavahadiny ny vahoakanao, na misy loza inona na misy aretina inona,