Bokin'i Nehemia
Toko faha-3
35 Hoy koa Tobia Amonita, teo anilany: Avelao ihany hanamboatra eo ireo, fa na fosa iray aza hiantoraka eo dia haharava ny manda vaton'ireo! 36 Mihainoa, ry Andriamanitray ô, fa voaeso izahay. Atsingereno amin'ny lohany ny famingavingana nataony, ary atolory ho remby eny amin'ny tany hamaboana azy izy!37 Aza avela ny helony, ary aza vonoina tsy ho eo anatrehanao ny fahotany, fa efa nanao fanafintohinana teo anatrehan'ireto mandrafitra izy. 38 Dia narafitray ny manda, ka voatsangana indray avokoa ny manda manodidina hatreo amin'ny antsasaky ny hahavony, fa niasa an-jotom-po ny vahoaka.
Toko faha-4
1 Nisafoaky ny hatezerana avokoa anefa Sanabalata, Tobia, ny Arabo, ny Amonita, ary ny Azotiana, nony nandre fa hoe mandroso ny fanamboarana ny manda, ary efa mitampina miandalandalana ny banga,2 ka niray tetika izy rehetra handeha hamely an'i Jerosalema sy hanabataba azy. 3 Dia nivavaka tamin'Andriamanitray izahay, sady nametraka mpiambina andro aman'alina, hanohitra azy sy hiaro-tena aminy mba hisorohanay ny famelezany. 4 Hoy anefa Jodà: Tsy ampy hery ny mpitondra entana fa be ny korontan-javatra, ka tsy haharafitra ny manda izahay. 5 Ny fahavalonay koa nanao hoe: Tsy hahalala ireo na hahita, raha tsy efa tonga eo afovoany isika, ka dia hamono azy sy hampitsahatra ny asa. 6 Kanjo nony tonga ireo Jody nonina tao akaikiny dia nampandre anay impolo na avy aiza na avy aiza no ihavian'ny fahavalo hamely anay. 7 Ka dia natokotokoko ara-pianakaviana ny vahoaka, samy nitondra ny sabany sy ny lefony aman-tsipìkany, ho any ivohon'ny manda, amin'ny ilany iva indrindra, amin'ny toerana tsy misy manakontakona. 8 Nony nijery aho, dia nitsangana nilaza izao tamin'ny lehibe sy ny andriambaventy ary ny vahoaka sisa hoe: Aza matahotra eo anatrehan'ireny hianareo! Fa ny Tompo lehibe sy mahatahotra no tsarovy; ary miadia hiaro ny rahalahinareo sy ny zanakareo lahy aman-janakareo vavy ary ny vadinareo sy ny ankohonanareo. 9 Nony ren'ny fahavalonay fa efa nahalala izahay, sy efa nofoanan'Andriamanitray ny heviny, dia niverina ho any amin'ny manda izahay rehetra, samy nankany amin'ny asany avy.
10 Hatramin'izay andro izay dia ny antsasaky ny oloko ihany no nanao ny asa, fa ny antsasany kosa nitana lefona aman'ampinga sy tsipìka aman'akanjo fiarovan-tratra, ary ny filohany dia samy teo ivohon'ny fianakavian'i Jodà rehetra.
11 Amin'ireo nanao ny manda, ny sasany, dia izay nitondra entana sy nivesatra azy, nanao ny asa tamin'ny tanany an'ila sy nitam-piadiana tamin'ny tanany an'ila. 12 Ny sasany, dia izay nandrafitra, samy nanana ny sabany voafehy tamin'ny valahany avy, teo am-pandrafetana; ny mpitsoka trompetra tsy niala teo akaikiko. 13 Dia hoy aho tamin'ny lehibe sy ny andriambaventy ary ny vahoaka sisa: Lehibe ity ny asa, sady amin'ny tany malalaka; ka tafaely eny amin'ny manda sy tafasaraka be ihany isika rehetra. 14 Koa na aiza na aiza no andrenesanareo ny feon'ny trompetra dia mivoria eto aminay hianareo, fa Andriamanitsika no hiady ho antsika. 15 Dia nanao ny asa izahay; ny antsasany taminay nitan-defona hatramin'ny mazava atsinanana ka mandra-piposaky ny kintana. 16 Tamin'izany andro izany, hoy koa aho tamin'ny vahoaka: Samia mandry eto Jerosalema, miaraka amin'ny mpanompony avy, mba hiambina antsika mandritra ny alina, sy hiasa mandritra ny andro. 17 Fa na izaho, na ireo rahalahiko, na ny oloko, na ny mpiambina nanaraka ahy, dia tsy nisy niala akanjo; handro tokana matoa nanala azy.
Toko faha-5
1 Velon-taraina mafy ny sarababem-bahoaka mbamin'ny vadiny, noho ny amin'ireo Jody rahalahiny.2 Hoy ny sasany: Maro izahay, mbamin'ny zanakay lahy aman-janakay vavy, ka aoka handray vary hohaninay ka ho velona izahay. 3 Hoy koa ny sasany: Ataonay antoka ny taninay mbamin'ny tanimboalobokay sy ny tranonay, mba hahazoanay vary mandritra ny mosary. 4 Hoy koa ny hafa: Ny taninay aman-tanimboalobokay izao, efa nataonay antoky ny vola nosamborinay handoavana ny hetran'ny mpanjaka. 5 Ary ankehitriny dia mba toy ny nofon'ny rahalahinay ihany ny nofonay ka mba toy ny zanany ihany koa ny zanakay, kanjo indro fa ampidirinay amin'ny fanandevozana ny zanakay lahy aman-janakay vavy, ary ny sasany amin'ny zanakay vavy efa andevo sahady. Ary ataonay ahoana moa fa efa lasan'ny sasany ny taninay aman-tanimboalobokay. 6 Loza ny hatezerako nony nandre ny fitarainan'izy ireo, sy izany teny izany.
7 Nony nieritreritra aho anakampoko, dia ireo lehibe aman'andriambaventy no nanariko mafy sy nataoko hoe: Mampanjanaka vola hianareo izany, samy amin'ny rahalahiny avy! Koa nanao fivorian-dehibe noho ny amin'izy ireo aho, 8 dia nilaza taminy hoe: Izahay nanavotra ny Jody rahalahintsika namidy tamin'ny firenena araka ny anananay, ka hianareo kosa ve, hivarotra ny rahalahinareo, sady hivarotra azy aminay! Gina tsy nahita havaly izy ireo. 9 Ary hoy koa aho: Tsy tsara izao nataonareo izao. Moa tsy tokony ho nandeha tamim-pahatahorana an'Andriamanitsika va hianareo, mba tsy ho voan'ny fanaratsian'ny firenena fahavalontsika? 10 Izaho mbamin'ireo rahalahiko sy ny mpanompoko koa, efa samy nampisambotra taminy vola sy vary. Ka andeha isika samy hamoy izany trosa izany. 11 Anio ihany dia samia mamerina ny tanin'izy ireo, ny tanimboalobony, ny fototr'olivany, ny tranony, ary ny ampahazaton'ny vola mbamin'ny divay vaovao aman-diloilo nasainareo haloany ho zana-bola. 12 Ka izao no navalin'izy ireo: Haverinay izany, ary tsy hitaky na inona na inona aminy intsony izahay, fa hotanterahinay ny voalazanao. Dia nantsoiko ny mpisorona ary nampanaoviko fianianana fa araka izany teny izany no hataony. 13 Ka sady nanakopaka ny kapaotiko aho no nilaza hoe: Hakopak'Andriamanitra toy izao anie ny olona rehetra tsy mahatanteraka izany teny izany, ho eo ivelan'ny tranony amam-pananany, ka dia ho voakopaka sy ho avela tsy manana na inona na inona izy. Dia indray namaly ny fiangonana nanao hoe: Amena, sady nidera an'Andriamanitra; ary notanterahin'ny vahoaka tokoa izany teny izany. 14 Hatramin'ny andro nametrahan'ny mpanjaka ahy ho governora teo amin'ny tanin'i Jodà, izany hoe: hatramin'ny taona faharoapolo, ka hatramin'ny taona faharoa amby telopolo nanjakan'i Artakserksesa, dia nandritra ny roa ambin'ny folo taona, tsy mba nihinana ny mofon'ny governora, na izaho na ireo rahalahiko.
15 Ny governora teo alohako, nahavaky tratra ny vahoaka ary nandray mofo aman-divay taminy, ivelan'ny volafotsy efapolo sikla; hatramin'ny mpanompony avy no nampahory ny vahoaka; fa izaho kosa dia tsy mba nanao toy izany, noho ny fahatahorako an'Andriamanitra. 16 Mainka fa nimasoako ny fanamboarana io manda io; tsy mba nividy tany akory izahay, fa vory nihohoka teo amin'ny asa avokoa ny oloko. 17 Ny nihinana eo amin'ny latabatro dia dimampolo amby zato lahy, Jody sy andriambaventy, afa-tsy izay tonga ao aminay, avy amin'ny firenena manodidina. 18 Ka izao no natokana isan'andro: omby iray, ondry voafantina enina, ary vorona no nahandroina, ka izaho no nandoa ny lany; isan-kafoloana koa namononana ny divay ilaina natao betsaka. Na dia izany aza anefa, tsy mba nitaky ny mofon'ny governora aho, satria efa mavesatra loatra tamin'izany vahoaka izany ny asa nataony. 19 Tsarovy, ry Andriamanitra ô, ka hahazoako sitraka anie izay rehetra nataoko ho an'izany vahoaka izany.
Toko faha-6
1 Nony fantatr'i Sanabalata, Tobia, Gosena Arabo, mbamin'ireo fahavalonay hafa, fa hoe, voarina indray ny manda, ary tsy misy banga intsony;2 -nefa hatramin'io fotoana io mbola tsy nataoko tamin'ny varavarana ny lelany, - dia naniraka nankaty amiko Sanabalata sy Gosena, hilaza hoe: Tongava, fa aoka isika hihaona kely any amin'ireo vohitra, amin'ny lohasahan'i Onao. Ny hanisy ratsy ahy no heviny. 3 Nandefa iraka aho hilaza aminy hoe: Asa lehibe no ataoko ka tsy afa-midina aho. Ary nahoana ange ny asa no hiato, fa hilaozako hankany aminareo? 4 Inefatra izy no nampitondra tamiko izany hevitra izany, nefa izany ihany no navaliko azy hatrany. 5 Fa nirahin'i Sanabalata fanindiminy, araka izany ihany indray, ny mpanompony, nitondra taratasy nivelatra teny an-tànany; 6 ka izao no soratra tao: Efa mahoraka amin'ny firenena, sady lazain'i Gosena koa fa hoe, mihevitra ny hikomy hianao sy ny Jody, ka izany no anaovanao ny manda; ary hianao, araka izany honohono izany, no mitady ny ho tonga mpanjakany. 7 Ary efa nanendry mpaminany hianao aza, hiantso ampahibemaso ao Jerosalema hoe: Efa misy mpanjaka any Jodà, mantsy anao. Ary ankehitriny dia ampandrenesina izany raharaha izany ny mpanjaka, ka avia dia hiara-mihevitra isika. 8 Dia naniraka tany aminy aho, hilaza hoe: Tsy misy nitranga araka izany zavatra lazainao izany, fa zavatra foronin'ny sainao fotsiny. 9 Ny hampitahotra anay no kendren'izy rehetra, satria hoy izy: Hiaosa ny tànany dia hilaozany ny asa, ka tsy ho tontosa. Koa ankehitriny herezo ny tànako, ry Andriamanitro. 10 Ary nankao amin'i Semaiasa zanak'i Dalaiasa, zanak'i Metabeela aho. Nihidy aman-trano izy, ary izao no nolazainy tamiko: Andeha isika hiara-mankao an-tranon'Andriamanitra eo anatin'ny tempoly, fa tamy hamono anao ny olona; ary amin'ny alina no hahatongavan'ny olona hamono anao.