Bokin'i Nehemia

Toko faha-10

¹⁴ Odaiasa, Bani, Banino. ¹⁵ Filohan'ny vahoaka: Farosa, Fahat-Moaba, Elama, Zetò, Banì, ¹⁶ Bonì, Azgada, Bebaì, ¹⁷ Adoniasa, Begoaì, Adìna, ¹⁸ Atera, Ezekiasa, Azora, ¹⁹ Odaiasa, Hasoma, Besaì, ²⁰ Harefa, Anatota, Nebaì, ²¹ Megfiasa, Mosolama, Hazira, ²² Mesezabela, Sadaoka, Jedoà, ²³ Feltiasa, Hanàna, Anaiasa, ²⁴ Osea, Anania, Hasoba, ²⁵ Alohesa, Faleà, Sobeka, ²⁶ Rehoma, Hasebnà, ²⁷ Maasiasa, Ekiasa, Hanana, ²⁸ Anana, Melòka, Harima, Baanà. ²⁹ Ny vahoaka sisa, ny mpisorona, ny levita, ny mpiandry varavarana, ny mpihira, ny Natineana, ary izay rehetra nisaraka tamin'ny vahoakan'ny tany, hanaraka ny lalàn'Andriamanitra, mbamin'ny vadin'ireo, ny zanany lahy aman-janany vavy,

³⁰ izay afa-nahalala sy manan-tsaina rehetra, dia samy nikambana tamin'ireo rahalahiny, dia ny andriandahiny, avokoa, nanome toky tamim-piozonana amam-pianianana fa hanaraka ny lalàn'Andriamanitra, izay nomena tamin'ny alalan'i Moizy, mpanompon'Andriamanitra, hitandrina sy hankatò ny didin'ny Tompo Tompontsika, mbamin'ny fitsipiny aman-dalàny. ³¹ Indrindra fa nanome toky izahay fa tsy hanome ny zanakay vavy ho vadin'ny vahoakan'ny tany, na haka ny zanany vavy ho vadin'ny zanakay lahy; ³² tsy hividy na inona na inona amin'ny andro sabata sy ny andro fety amin'ny entam-barotra na zava-pihinana, na inona na inona, raha sendra misy entin'ny vahoakan'ny tany hamidy amin'ny andro sabata; hamela ny tany hijanona tsy ambolena amin'ny taona fahafito, sady hamoy ny trosa rehetra. ³³ Nataonay didy ho anay ny handoa ampahatelon-tsikla isan-taona, amin'ny momba ny fanompoana ao an-tranon'Andriamanitra,

³⁴ ny mofo alahatra, ny fanatitra tsy tapaka, ny sorona dorana tsy tapaka, ny sorona amin'ny sabata, ny voaloham-bolana ary ny fety, ny zavatra masina, ny sorona noho ny ota, hanaovana ny fanonerana ho an'ny zanak'Israely, mbamin'izay rehetra fanao ao an-tranon'Andriamanitsika. ³⁵ Nanao filokana izahay mpisorona, levita, vahoaka, ny amin'ny hanaterana ny kitay hazo, mba samy hitondra izany ao an-tranon'Andriamanitsika, isam-pianakaviana araka ny anjara fotoany avy, amin'ny fotoana voaraikitra, isan-taona, mba harehitra eo ambonin'ny otelin'ny Tompo Andriamanitsika, araka ny voasoratra ao amin'ny lalàna.

³⁶ Nametra-teny izahay fa hanatitra ao an-tranon'ny Tompo isan-taona ny voaloham-bokatry ny taninay sy ny santatry ny voankazo rehetra avy amin'ny hazo mamoa rehetra, ³⁷ hitondra ho ao an-tranon'Andriamanitsika, amin'ny mpisorona manao ny fanompoana ao an-tranon'Andriamanitsika, ny lahimatoanay sy ny voalohan-teraky ny biby fiompinay, araka ny voasoratra ao amin'ny lalàna, ary ny voalohan-teraky ny omby aman'ondrinay. ³⁸ Toraka izany koa hanatitra ho an'ny mpisorona ao amin'ny efitrano, ao an-tranon'Andriamanitsika, ny santatry ny kobanay amam-panatitray voaavaka mbamin'ny voankazo avy amin'ny hazo rehetra, ny divay vaovao ary ny diloilo, ary hanolotra amin'ny levita ny ampahafolon'ny vokatry ny taninay; ary ny tenan'ny levita no haka ny ampahafolony any amin'ny tanàna rehetra fambolenay. ³⁹ Ny mpisorona taranak'i Aarona, hiaraka amin'ny levita, rahefa mandray ny fahafolony ny levita, ary ny ampahafolon'ny fahafolony dia haterin'ny levita ao an-tranon'Andriamanitra ao amin'ny efitrano fitehirizan-drakitra. ⁴⁰ Fa ao amin'ny efitrano no hanateran'ny zanak'Israely sy ny taranak'i Levì ny fanatitra avy amin'ny vary sy ny divay aman-diloilo; ao no misy ny fanaky ny fitoerana masina, sy itoeran'ny mpisorona manao ny fanompoana, mbamin'ny mpiandry varavarana sy ny mpihira, ka amin'izany tsy hataonay mosalahy ny amin'ny tranon'Andriamanitra.

Toko faha-11

¹ Niorim-ponenana tao Jerosalema ny lehiben'ny vahoaka, ary nanaovana filokana ny vahoaka sisa mba ho tonga honina ao Jerosalema tanàna masina ny iray isam-polo, fa ny sivy toko sisa no ho amin'ny tanàna hafa.

² Ary nisaoran'ny vahoaka izay rehetra nanolo-tena ho azy, honina ao Jerosalema. ³ Izao no loham-pianakaviana avy any ambanivohitra tonga nonina tao Jerosalema. Tany amin'ny tanànan'i Jodà, samy nonina teo amin'ny taniny aman-tanànany avy: dia Israely, ny mpisorona sy ny levita ary ny Natineana mbamin'ny mpanompon'i Salomona.

⁴ Ny niorim-ponenana tao Jerosalema dia ny avy amin'ny taranak'i Jodà sy Benjamina. Avy amin'ny taranak'i Jodà: Ataiasa zanak'i Aziama, zanak'i Zakaria, zanak'i Amariasa, zanak'i Safatiasa, zanak'i Malaleela, avy amin'ny taranak'i Faresa;

⁵ ary Maasiasa zanak'i Baròka, zanak'i Kolhozà, zanak'i Haziasa, zanak'i Adaiasa, zanak'i Joiariba, zanak'i Zakaria, zanak'i Selà. ⁶ Lehilahy mahery valo amby enimpolo sy efa-jato no tontalin'ny avy amin'ny taranak'i Faresa tonga nonina tao Jerosalema. ⁷ Ary izao no taranak'i Benjamina: Seloma, zanak'i Mosolama, zanak'i Joeda, zanak'i Fadaiasa, zanak'i Kolaiasa, zanak'i Maasiasa, zanak'i Eteela, zanak'i Isaia; ⁸ ary nanarakaraka azy: Gebai-Selaì: valo amby roapolo sy sivin-jato izy. ⁹ Joela zanak'i Zekrì no mpifehy azy; ary Jodà zanak'i Senoà no lefitry ny komandin'ny tanàna. ¹⁰ Avy amin'ny mpisorona: Idaiasa zanak'i Joiariba,

¹¹ Jasina, Saraiasa zanak'i Helkiasa, zanak'i Mosolama, zanak'i Sadaoka, zanak'i Meraiota, zanak'i Akitoba, andriandahy amin'ny tranon'Andriamanitra, ¹² mbamin'ny rahalahin'ireo, izay nanao ny raharaha tao an-trano: roa amby roapolo sy valon-jato; Adaiasa zanak'i Jerohama, zanak'i Feleliasa, zanak'i Amsì, zanak'i Zakaria, zanak'i Fasora, zanak'i Melkiasa, ¹³ mbamin'ireo rahalahiny, samy loham-pianakaviana: roa amby efapolo sy roan-jato; ary Amasaì zanak'i Azreela, zanak'i Ahazì, zanak'i Mosolamota, zanak'i Emera, ¹⁴ mbamin'ny rahalahin'ireo, samy lehilahy mahery: valo amby roapolo amby zato. Zabdiela zanak'i Hagdolima no mpifehy azy ireo. ¹⁵ Avy amin'ny levita: Semeiasa zanak'i Hasoba, zanak'i Ezrikama, zanak'i Hasabiasa, zanak'i Bonì;

¹⁶ Sabataì sy Jozabada, anisan'ny lohan'ny levita, tonian'ny raharaha teo ivelan'ny tranon'Andriamanitra; ¹⁷ Mataniasa zanak'i Mika, zanak'i Zebedeì, zanak'i Asafa, ilay lehibe mpiventy ny hira fiderana amin'ny fivavahana; Bekbekiasa ilay nanarakaraka teo amin'ireo rahalahiny, sy Abdà zanak'i Samoà, zanak'i Galala, zanak'Iditòna. ¹⁸ Efatra amby valopolo sy roan-jato no tontalin'ny levita tao amin'ny tanàna masina. ¹⁹ Ary ny mpiandry varavarana dia Akoba, Telmona, mbamin'ireo rahalahiiny, mpiambina ny vavahady: roa amby fitopolo amby zato.

²⁰ Israely sisa, ny mpisorona ary ny levita dia tany amin'ny tanànan'i Jodà rehetra, samy tany amin'ny zara taniny avy.

²¹ Ny Natineana dia nonina teo amin'ny faritanin'i Ofela: Sihà sy Gasfà no nifehy ny Natineana.

²² Ny mpifehy ny levita tao Jerosalema, dia Azì zanak'i Banì zanak'i Hasabiasa, zanak'i Mataniasa, zanak'i Mikà, anisan-taranak'i Asafa, ireo mpihira niadidy ny fanompoana ao an-tranon'Andriamanitra. ²³ Fa nisy didin'ny mpanjaka ny amin'izy ireo, sy karama voafetra homena ny mpihira isan'andro.