Boky Voalohan'ny Makabeo

Toko faha-8

¹⁴ Na dia izany rehetra izany aza, tsy mba misy misatroka diadema izy, na mitafy jaky hanambony tena foana. ¹⁵ Namorona parlemanta izy ireo, ka misy roapolo sy telon-jato lahy izy, miara-midinika isan'andro mikarakara tsy tapaka izay hahasoa ny vahoaka mba hiadanany. ¹⁶ Lehilahy iray no ametrahany ny fahefana isan-taona hanapaka ny taniny rehetra, dia samy manaiky izany lehilahy iray izany izy rehetra, ary tsy mba misy fitsiriritana na fialonana eo amin'izy ireo. ¹⁷ Ary Jodasa nifidy an'i Eopolema zanak'i Joany, zanak'i Akosa, sy Jasona zanak'i Eleazara, ka naniraka an'ireo ho any Roma, hanao raharaham-pihavanana amam-pisakaizana amin'izy ireo,

¹⁸ ary mba hanafahany azy amin'ny jioga, satria hitany ny fanandevozan'ny fanjakana Greka an'Israely. ¹⁹ Dia lasa nankany Roma ireo, nandeha lalan-davitra dia lavitra. Nony tafiditra tao amin'ny parlemanta izy, dia nandaha-teny toy izao: ²⁰ Naniraka anay ho aty aminareo Jodasa Makabeo sy ireo rahalahiny mbamin'ny Jody, hanao fanekem-pihavanana amam-piadanana aminareo ary mba hosoratana ho isan'ireo mpihavana aman-tsakaizanareo izahay. ²¹ Noraisina tsara izany fangatahana izany, ²² ka izao no kopian'ny fanekena nosoratan'ny Romana tamin'ny takela-barahina sy nalefany ho any Jerosalema hapetraka any, ho tsangam-baton'ny fanekena amam-pihavanana. ²³ Hoambinina mandrakizay anie ny Romana sy ny firenena Jody, na ambony ranomasina na an-tanety! Ho lavitra azy anie ny sabatra amam-pahavalo!

²⁴ Raha manan'ady aloha ny Romana na ny iray amin'ireo mpihavana aminy, ao anatin'izao fanjakany manontolo izao, ²⁵ dia hanampy azy amin-jotom-po tokoa, araka izay azony atao amin'izany fotoana izany, ny firenena Jody. ²⁶ Ka izay miady amin'izany, tsy homeny na hamononany vary, na fiadiana, na vola, na sambo. Izany no sitrapon'ny Romana; ary hotanterahin'ny Jody ny zavatra nekeny, nefa tsy handray na inona na inona izy. ²⁷ Torak'izany koa, raha manana ady aloha ny firenena Jody, dia hiara-miady aminy, amin'ny fony tokoa, araka izay azony atao amin'izany fotoana izany ny Romana; ²⁸ ka ny miaramila mpanampy tsy hiantoham-bary na fiadiana, na vola, na sambo. Izany no sitra-pon'i Roma ka izay nekeny dia hotanterahiny tsy misy fitaka. ²⁹ Izany ny zavatra tapaka natao tao amin'ny faneken'ny Romana sy ny firenena Jody. ³⁰ Any aoriana, raha misy te-hanampy na hanala amin'izany izy roa tonta, dia azony atao araka izay tiany izany, ka tsy maintsy tovina izay nanampy na nalana. ³¹ Ary inty ny amin'ny fampahoriana nataon'i Demetriosa mpanjaka azy ireo, dia efa nanoratra ho any amin'io izahay, nanao hoe: Nahoana no vesaranao jioga ny Jody, sakaizanay sy mpihavana aminay?

³² Koa raha mbola ampangain'izy ireo aminay indray hianao, dia hanohana ny rariny ananany sy hiady aminao ambony ranomasina sy an-tanety izahay.

Toko faha-9

¹ Nony ren'i Demetriosa fa resy tamin'ny ady Nikanora sy ny tafiny dia nalefany ho any Jodea indray Bakidesa sy Alsima, nitondra ny vazan-tafika havanana.

² Ny làlana mankany Galgala no nombany dia niorin-toby tao Masalota, izay any amin'ny faritanin'i Arbela izy ireo; azony io tanàna io, ary namonoany maro be ny mponina. ³ Tamin'ny volana voalohany, taona faharoa amby dimampolo amby zato, dia nalahany teo anoloan'i Jerosalema ny miaramilany. ⁴ Rehefa izany dia nangoron-day izy, dia nankany Berea, nitondra miaramila roa alina sy mpitaingin-tsoavaly roa arivo. ⁵ Jodasa kosa niorin-toby tao Eleasa, omba-miaramila voafantina telo arivo. ⁶ Raiki-tahotra mafy izy ireo, nony nahita ireto fahavalo marobe, ka maro no nitsoaka mangingina niala teo an-toby; valon-jato lahy sisa tafajanona. ⁷ Hitan'i Jodasa fa nitsoaka ny miaramilany, ary ny ady efa antomotra, torotoron'ny alahelo ny fony, fa ny fotoana hamoriany ny momba azy tsy misy, ka tsaroany reraka ny tanany. ⁸ Kanefa izao no nolazainy tamin'ireto sisa tafajanona teo aminy: Andeha handroso hamely ny fahavalontsika, raha mbola afaka hiady aminy koa isika. ⁹ Notohain'izy ireo tsy hanao izany anefa izy, nataony hoe: Tsy leontsika ka ndeha aloha hanavotra aina sy miverina ho any amin'ireo rahalahintsika, vao ho avy indray hiady amin'ny fahavalontsika isika. ¹⁰ Fa hoy Jodasa tamin'izy ireo: Sanatria ahy izay hanao izany, ka hiamboho handositra! Raha tonga ny fotoana anjarantsika, aoka ho faty amin-kerim-po isika, ho an'ny rahalahintsika, ary aza asiana pentina ny voninahitsika. ¹¹ Dia nivoaka ny toby ny tafiky ny Siriana, hitsena azy ireo: nizara roa toko ny an-tsoavaly, ny mpandefa an-tsamotady sy mpandefa tsipika teo aloha, ny mahery indrindra no loha-laharana;

¹² Bakidesa teo amin'ny vazan-tafika havanana, ary nandroso tamin'ny feon-trompetra teo an-daniny avy, ny antokony. ¹³ Ry Jodasa koa, tatsy an-daniny, nampaneno trompetra, ka nihorohoro ny tany, azon'ny firohondrohon'ny tafika roa tonta, dia rafitra ny ady, ka naharitra hatramin'ny maraina ka hatramin'ny hariva. ¹⁴ Nony hitan'i Jodasa fa teo amin'ny vazan-tafika havanana Bakidesa sy ny miaramilany mahay indrindra, dia novoriny hanodidina azy ny miaramila mahery fo rehetra, ¹⁵ ka noreseny ny vazan-tafika havanan'ny Siriana, dia notanahiny hatrany an-tendrombohitra Azota. ¹⁶ Kanjo hitan'ireto vazan-tafika havia fa resy ny vazan-tafika havanana, ka nifontenany narahina avy ato aoriana Jodasa sy ny namany. ¹⁷ Niha-nangotraka ny ady, ka samy be maty, izy roa tonta. ¹⁸ Maty koa Jodasa dia vaky nandositra ireo namany. ¹⁹ Dia nentin'i Jonatasa sy Simona, Jodasa rahalahin'izy ireo, ka nalevina tao amin'ny fasan-drazany ao Modìna.

²⁰ Nitomanian'Israely rehetra izy sy nigogogogoany mafy ary naharitra andro maro no nisaonany azy, ²¹ sy nanaovany hoe: Ahoana re no dia nahafaty an'ilay mahery, an'ila nanafaka an'Israely! ²² Ny tantaran'i Jodasa sisa, sy ny adiny hafa, sy ny herim-po hafa nasehony ary ny antom-boninahiny, dia tsy voasoratra, satria maro loatra. ²³ Nony efa maty Jodasa, dia nitrangatranga eran'ny tanin'Israely manontolo ny mpankahala ny fivavahana ary niarin-doha ny mpanao ny tsy marina rehetra.

²⁴ Nisy mosary lehibe tamin'izany andro izany, ka nivadika tamin'izy ireo mbamin'ny tany aza. ²⁵ Ny olona mpankahala ny fivavahana no nofidin'i Bakidesa sy notendreny hitondra ny tany. ²⁶ Nokarohin'ireo ny sakaizan'i Jodasa ka nony mahita izy, entiny any amin'i Bakidesa, dia faizin'io sy ataony fihomehezana kosa. ²⁷ Ary lalina loatra ny fahoriana nanjo an'Israely, fa tsy mbola nisy toy izany hatramin'izay andro tsy nisian'ny mpaminany teo amin'Israely. ²⁸ Ka nivory izay rehetra sakaizan'i Jodasa nilaza tamin'i Jonatasa hoe: ²⁹ Hatrizay nahalasanan'i Jodasa rahalahinao izay, tsy misy lehilahy toa azy intsony, nitsangan-kanohitra ny fahavalontsika Bakidesa, mbamin'ireo rehetra mankahala ny firenentsika. ³⁰ Ka dia hianao no fidinay anio ho lehibenay hisolo azy, sy ho komandinay amin'ny adintsika. ³¹ Dia noraisin'i Jonatasa ny fanapahana tamin'izany andro izany, ary nitsangana izy nisolo an'i Jodasa rahalahiny.