Boky Voalohan'ny Makabeo

Toko faha-7

¹⁴ Mpisorona taranak'i Aarona no miaraka amin'ny tafika ka tsy mety hanisy ratsy antsika io. ¹⁵ Dia nanao tenim-pihavanana tamin'izy ireo tokoa io, sady nianiana izy hoe: Tsy mihevitra akory ny hanisy ratsy anareo na ny sakaizanareo izahay. ¹⁶ Ka natoky izany izy ireo, kanjo nasain'io nosamborina ny enimpolo tamin'izy ireo, ka nasainy novonoina tamin'ny indray andro ihany, araka ny tenin'ny Soratra Masina hoe: ¹⁷ Nanely ny nofo sy nandatsaka ny ran'ireo masinao manodidina an'i Jerosalema izy ireo, ary tsy nisy olona handevina an'ireny akory. ¹⁸ Koa raiki-tahotra sy nivadi-po ny vahoaka rehetra, fa tsy misy intsony izay rariny sy hitsiny amin'izy ireo, hoy ny olona, satria ny fanekena amam-pianianana nataony nivadihany. ¹⁹ Niala tao Jerosalema Bakidesa dia nandeha nitoby teo Bezeta, nasainy nosamborina ny maro tamin'ireo nisindaka tsy hiandany aminy intsony, mbamin'ny sasantsasany tamin'ny vahoaka, dia novonoiny ary navariny tao amin'ilay lava-drano lehibe ny fatin'izy ireo.

²⁰ Ary napetrak'i Bakidesa tamin'i Alsima ny tany, sady namelany miaramila hiaro azy io, dia niverina ho any amin'ny mpanjaka izy. ²¹ Nanao izay tratry ny ainy Alsima hahazo ny fahefam-pisoronana. ²² Nivory teo aminy avokoa ireo mpanabataba ny fireneny, dia nahazo nitany ny tanin'i Jodà, ary nampidi-doza lehibe tamin'Israely. ²³ Nony hitan'i Jodasa ny loza nafitsok'i Alsima sy ireo mpiandany aminy tamin'ny zanak'Israely, izay mangidy noho izay nataon'ny jentily aza, ²⁴ dia nitety ny tany Jodea manontolo izy, ka namay ny mpivadika sy nisakana azy tsy hiely any ambanivohitra. ²⁵ Nony hitan'i Alsima fa tonga nahery Jodasa sy ny namanay, ka tsy hahaleo an'ireo izy, dia niverina ho any amin'ny mpanjaka izy, sady niampanga azy ireo ho nanao ratsy lozan-tany. ²⁶ Dia nirahin'ny mpanjaka Nikanora, iray amin'ireo jeneraliny malaza indrindra, sy feno fahasosorana amam-pankahalana an'Israely, sady nomeny didy handringana ny vahoaka.

²⁷ Nony tonga tany Jerosalema Nikanora nitondra tafika, dia nandefa tenim-pihavanana tamin'i Jodasa sy ireo rahalahiny hisaroroany azy. ²⁸ Aoka re, hoy izy, tsy hisy ady aminareo sy amiko; mba te-ho avy aho miaraka amin'olona vitsivitsy hahita tava anareo amim-pihavanana. ²⁹ Dia tonga teo amin'i Jodasa izay, ka nifampiarahaba, sy samy naneho fisakaizana teo izy roalahy, kanjo iretsy fahavalo izany, efa vonon-kisambotra an'i Jodasa. ³⁰ Nisy nampandre an'i Jodasa kosa anefa, fa fikendrena hamadika no nankanesan'i Nikanora teo aminy, ka natahotra izy, sady nihataka tsy nety nihaona taminy intsony. ³¹ Fantatr'i Nikanora tamin'izay fa vaky ny tetik'adiny, ka rafitra niaraka tamin'izay teo akaikin'i Kafarsalama, ny adin'izy sy Jodasa. ³² Nahafatesana sahabo ho dimy arivo lahy ny tafik'i Nikanora, ary nandositra nakao an-tanànan'i Davida ny sisa. ³³ Taorian'izany, niakatra tao an-tendrombohitra Siona Nikanora, ka nivoaka avy eo amin'ny fitoerana masina ny mpisorona sasantsasany nomban'ny maro tamin'ny loholon'ny vahoaka, hiarahaba azy tamim-pihavanana, sy haneho aminy ny sorona dorana, natolotra ho an'ny mpanjaka.

³⁴ Izy kosa anefa namazivazy sy namingavinga azy, nandoto azy, nanao teny avonavona taminy, ³⁵ ary nanao izao fianianana izao tamin-katezerana: Raha tsy atolotra ho eo an-tanako miaraka amin'izay Jodasa sy ny tafiny, dia hodorako ity trano ity, raha vao tafaverina amim-piadanana aho. ³⁶ Sady dia nivoaka an-katezerana izaitsizy izy. Ka dia niditra ny mpisorona, nitsangana teo anoloan'ny otely sy ny fitoerana masina, nanao tamin-dranomaso hoe: ³⁷ Hianao ry Tompo, no nifidy ity trano ity, hametrahanao ny anaranao, mba ho trano fivavahana amam-pitarainana ho an'ny vahoakanao. ³⁸ Koa valio ny ratsy nataon'iny lehilahy iny, mbamin'ny tafiny; aoka ho lavon-tsabatra izy ireo. Tsarovy ny teny manevateva ny fivavahana nataony, ka aza avela hiaina ireo. ³⁹ Niala teo Jerosalema Nikanora dia lasa nitoby teo akaikin'i Betsora, ary nisy antoko-miaramila Siriana iray tonga nitsena azy.

⁴⁰ Jodasa kosa nitoby teo akaikin'i Adasa, nomba-miaramila telo arivo, dia nivavaka nanao hoe: ⁴¹ Ireo nirahin'ny mpanjakan'ny Asiriana dia nanevateva anao, ry Tompo, ka tonga ny anjelinao namono ny dimy arivo sy valo alina sy iray hetsy tamin'izy ireo. ⁴² Koa aringano torak'izany koa ity tafika eto anatrehanay ity anio, mba hoeken'ny sisa rehetra fa nanao teny manevateva ny fitoerana masina izy, ka tsarao araka ny haratsiam-panahiny. ⁴³ Dia rafitra ny adin'ireto tafika tamin'ny andro fahatelo ambin'ny folon'ny volana Adara, ka montsana mihitsy ny miaramilan'i Nikanora ary ny tenany aza no nitsingidina voalohany teo amin'ny ady. ⁴⁴ Rahefa nahita an'i Nikanora nitsingidina ny miaramila, nariany ny fiadiany, dia vaky nandositra izy. ⁴⁵ Nenjehin'ny Jody làlana indray andro izy ireo hatrany Adasa ka hatrany akakin'ni Gazara, ary nampitatatata ny trompetra avy ato aoriana. ⁴⁶ Ny olona avy amin'ny tanàna manodidina rehetra tany Jodea nivoaka nanarona ny Siriana, dia niverina nifanehatra izy samy izy, ka lavon-tsabatra avokoa tsy nisy afa-nandositra, na dia iray aza. ⁴⁷ Nendahin'ireo, ireto resy, nobaboiny izay nananany, ny lohan'i Nikanora notapahiny mbamin'ny tanany havanana, izay nahinjiny tamim-pireharehana, ka nentiny sy nahantony nanatrika an'i Jerosalema. ⁴⁸ Feno hafaliana ny vahoaka ary nankalazainy toy ny androm-pifaliana lehibe izany andro izany. ⁴⁹ Dia naraikitra hankalazaina isan-taona izany andro izany amin'ny fahatelo ambin'ny folon'ny volana Adara. ⁵⁰ Ary nandry fahizay kelikely ny tanin'i Jodà.

Toko faha-8

¹ Ary nisy ren'i Jodasa nilaza ny amin'ny Romana: Mahery an'ady izy ireo, hoy ny olona taminy, manisy soa an'izay rehetra mifikitra miandany aminy izy, manao fihavanana amin'izay rehetra manatona azy izy, ary mahery an'ady izy.

² Notantarain'ny olona taminy ny adiny sy ny herim-po nasehony tamin'ny adiny tamin'ny Galata, izay nampanekeny azy sy tongany mpandoa hetra ho azy, ³ ny nataony rehetra tany amin'ny tany Espania, mba hahazoany ny tany fihadiam-bolamena sy volafotsy hita tany, mbamin'ny nampanekeny izany tany rehetra izany, noho ny fahamalinany amam-paharetany, ⁴ nefa lavitra dia lavitra azy ireo izany tany izany. Nataony toy izany koa ny mpanjaka avy tany am-para vazan-tany tonga nanafika azy; dia nandresy azy ireo izy, sy nataony nitondra faisana, ary ny sisa dia mandoa hetra ho azy isan-taona. ⁵ Resiny an'ady avokoa Filipo sy Persea mpanjakan'ny Seteana mbamin'izay nandray fiadiana hamely azy, ka nampanekeny azy. ⁶ Resin'izy ireo koa Antiokosa Lehibe mpanjakan'i Asia, izay tonga hiady taminy, nitondra elefanta roapolo amby zato, mpitaingin-tsoavaly, kalesy, ary tafika lehibe dia lehibe. ⁷ Nataony sambo-belona ilay io dia notereny hanao fanekena handoa hetra be dia be ho azy, izy mbamin'ny dimbiny, sady hametraka olona ho antoka, sy hahafoy ny ilany amin'ny fanjakany, ⁸ dia ny tany India, Media, Lidia, ary ny ilany amin'ireo faritany tsara indrindra; ka nony noraisiny avy aminy ireo, dia natolony ho an'i Eomena mpanjaka. ⁹ Nanao fikasana hamely sy handrava azy ireo, ry zareo tany Gresy; fa nony nandre izany ny Romana, ¹⁰ dia naniraka jeneraly iray monja hamely azy, dia niady taminy izy ireo, ka be no matiny; nobaboiny ny vadiny aman-janany, norobainy ny fananany, nampanekeny ny taniny, noravany ny mandany ary nandevoziny mandrak'androany ny mponina. ¹¹ Ny fanjakana hafa rehetra, mbamin'ny nosy nanohitra azy, noravany sy nampanekeny avokoa. ¹² Fa izay sakaizany sy izay mametraka ny fitokiany aminy kosa, dia itsimbinany fihavanana. Tonga tompon'ny fanjakana eo akaikiny sy any lavitra azy izy, ary matahotra azy avokoa izay mandre ny anarany. ¹³ Izay rehetra tiany hampiana sy homem-panjakana, dia manjaka; izay tiany halam-pahefana kosa, dia alany; firenena mahery izy.