Boky Voalohan'ny Makabeo

Toko faha-6

²⁷ Ka raha tsy sakananao faingana mialoha izy, dia handroso handroso eo ihany, ka tsy ho azonao tohaina intsony. ²⁸ Nentin-katezerana ny mpanjaka, nony nandre izany, ka nantsoiny avokoa ny sakaizany, ny mpitari-tafiny, mbamin'ireo mpifehy ny mpitaingin-tsoavaly.

²⁹ Nisy miaramila mpikarama koa, tonga teo aminy, avy amin'ny fanjakana hafa sy amin'ny nosin-dranomasina. ³⁰ Izao no isan'ny tafiny: miaramila an-tongotra iray hetsy, an-tsoavaly roa alina, ary elefanta zatra ady roa amby telopolo. ³¹ Nandroso nihazo an'Idomea izy ireo, dia niorin-toby teo anoloan'i Betsora, niady naharitra ela izy, sady nanorina milina fiadiana, fa nivoaka nandoro azy ny Jody naneho herim-po lehibe. ³² Tamin'izay, nialan'i Jodasa ny manda ka lasa izy nitoby tao Beta-Zakaria, tandrifin'ny tobin'ny mpanjaka. ³³ Nifoha maraina koa ny mpanjaka, nasainy niainga tampoka nihazo ny làlana mankany Beta-Zakaria ny tafiny, ka dia nivonon-kamely sy nampaneno trompetra ny miaramila. ³⁴ Norosoany ranom-boaloboka amam-boaroihazo, teo imason'ny elefanta, mba hamporisika azy hiady. ³⁵ Nozarainy hatao anelanelan'ny isan-tokony avy ireo biby ireo, ka isan'elefanta dia notronin'ny miaramila arivo miakanjo fiarovan-tratra, makarakara vy, misatroka satroka varahina, ary mpitaingin-tsoavaly diman-jato voafantina, nilahatra teo anilany. ³⁶ Ireo an-tsoavaly ireo dia raikitra ho eo amin'izay misy ity biby mandrakariva; izay alehan'io no alehan'ireo koa, fa tsy misaraka aminy na oviana na oviana ireo. ³⁷ Eo ambonin'ny isan'elefanta, nisy tilikambo hazo mafy, ho fiarovana azy, mifatotra manodidina ny tenany, amin'ny anja-koditra, ka mpiady roa amby telopolo lahy, miady ao amin'io tilikambo io, no entin'ny elefanta iray, afa-tsy ny mpiandry azy. ³⁸ Ny mpitaingin-tsoavaly sisa, dia nalahatr'izy ireo, ho eo an-daniny roa, amin'ny tafika, mba hanahirana ny fahavalo sy hiaro ny antoko-miaramilany. ³⁹ Nony mitaratra amin'ny ampinga volamena sy varahina ny tana-masoandro, dia mamirapitratra ny tendrombohitra tarafin'ireo kosa, ka manjopiaka ohatran'ny fanilo afo. ⁴⁰ Ny laniny iray amin'ny tafiky ny mpanjaka nivelatra teo amin'ny tendrombohitra avo, ny laniny iray kosa teo amin'ny lohasaha, ary nandroso tamim-pandeha matotra sy milahatra tsara izy ireo. ⁴¹ Nivadi-po avokoa ny olona tamin'ny akoralavan'izany vahoaka izany, sy ny firodorodon'ny diany, ary ny fikitrakitran'ny fiadiany. Fa tena tafika maro indrindra sy mahery tokoa izany. ⁴² Dia nandroso nitondra ny tafiny hiady Jodasa, ka enin-jato lahy no nitsingidina tamin'ny tafiky ny mpanjaka.

⁴³ Eleazara, natao hoe koa Abarona, nahatazana iray tamin'ireo elefanta, niravaka firongon'ny elefantan'andriana, sady avo mihoatra noho ny namany. ⁴⁴ Noheveriny fa tao ny mpanjaka, ka nahafoy ny ainy izy hamonjy ny fireneny, sy hamelon-tatara tsy maty ny anarany mandrakizay. ⁴⁵ Niezaka an-kasahiana nanatona an'io izy, namaky ny antoko-miaramila, namono ny teo an-kavanany sy teo an-kaviany; ka nisava nankeo an-daniny roa teo anoloany ny fahavalo. ⁴⁶ Dia nitsorofoka tao ambanin'ny elefanta izy, dia notrabarany io ka matiny, fa nidaraboka tamin'ny tany teo amboniny kosa ny elefanta, ka maty teo Eleazara. ⁴⁷ Nahita ny herin'ny fanjakana sy izato fimamamaman'ny miaramila anefa ny Jody, ka nihataka teo anoloany. ⁴⁸ Niakatra ho ao Jerosalema tamin'izay ny miaramila tamin'ny tafiky ny mpanjaka, hitsena ny Jody: dia niorin-toby hamely an'i Jodea sy ny tendrombohitra Siona ny mpanjaka.

⁴⁹ Nanaovany fanekem-pihavanana ny tao Betsora dia nivoaka ny tanàna izy ireo, fa efa tsy nisy hanina ho enti-mihiboka ho azy ireo ao an-tanàna, satria taona fampitsaharana ny tany tamin'izay. ⁵⁰ Izany no nahazoan'ny mpanjaka an'i Betsora sy nametrahany miaramila hiambina azy. ⁵¹ Niorin-toby teo anoloan'ny fitoerana masina izy, naharitra andro maro, ka nanangana tilikambo fandefasam-bato, milina fiadiana, milina fandefasan-java-maranitra mirehitra mbamin'ny vato, maingoka fandefasan-jana-tsipika, ary antsamotady. ⁵² Ireo nafahirano koa nanao milina hanoherana ny an'ireto namahirano ka nampaharitra ela ny nanoherany azy. ⁵³ Nefa tsy nisy hanina tao amin'ny magazay, satria taona fahafito ny tamin'izay, ary ny sisa napetraka hotahirizina, lanin'ny Israelita izay nandositra tany Jodea, teo anoloan'ny firenena. ⁵⁴ Ka Jody vitsy foana sisa tafajanona tao amin'ny fitoerana masina, fa nihahaka samy nody any aminy avy izy, satria nandroso nandroso teo ihany ny hanoanana. ⁵⁵ Tamin'izany Filipo, ilay notendren' i Antiokosa mpanjaka, fony izy mbola velona, hanabe sy hampanjaka an'i Antiokosa zanany,

⁵⁶ no tonga avy any Persa sy Media, nomban'ny miaramila nanaraka ny mpanjaka, ka nitady handray ny raharaham-panjakana ho eo an-tanany. ⁵⁷ Nony nahare izany vaovao izany Lisiasa dia tsy nisy nahadodoka azy intsony afa-tsy ny hiala eo ihany. Hoy izy tamin'ny mpanjaka sy ny lehiben'ny tafika ary ny miaramila: Isika ity mihena an-toerana isan'andro, ny hanina kely sisa ananantsika, ny toerana ataontsika fahirano voamanda, kanefa ny raharaham-panjakana izao tokony ho raharahaintsika. ⁵⁸ Koa ankehitriny, ndao hifandray tànana amin'ireo olona ireo, manaova fanekem-pihavanana aminy sy amin'izy rehetra iray firenena; ⁵⁹ ekeo ny hahazoany manao toe-piainana araka ny lalany toy ny taloha, fa noho ny amin'ireo lalàna ireo, izay notadiavintsika ho foanana ihany, no nahatezitra azy sy nahavitany izao zavatra rehetra izao. ⁶⁰ Sitraky ny mpanjaka sy ny mpifehy izany teny izany, ka naniraka olona hanao raharaham-pihavanana amin'izy ireo izy, ary nanaiky izany izy. ⁶¹ Nankatoavin'ny mpanjaka sy ny mpifehy tamim-pianianana ny fanekena, ka dia nivoaka ny manda ireo natao fahirano. ⁶² Kanjo nony tafiditra tao an-tendrombohitra Siona ny mpanjaka, ka nahita izato manda, dia nivadihany ny fianianana nataony, ka nanome didy handrava ny manda manodidina izy. ⁶³ Izay izy dia niainga maika dia maika hiverina ho any Antiokia, izay nahitany an'i Filipo, efa tonga tompon'ny tanàna, ka niady taminy izy, dia azony ny tanàna.

Toko faha-7

¹ Tamin'ny taona faharaika amby dimampolo amby zato, nitsoaka avy ao an-tanànan'i Roma Demetriosa zanak'i Seleokosa, ka teo amin'ny tanàna anankiray amoron-dranomasina no nitodiany nomban'olona vitsivitsy, ary teo izy naka ny anarana hoe mpanjaka.

² Vao tafiditra teo amin'ny fanjakan'ny razany izy, dia nosamborin'ny miaramila Antiokosa sy Lisiasa, hoentiny mankany aminy. ³ Nony nampandrenesina izany izy, dia hoy izy: Aza atao mahita tava an'ireo aho. ⁴ Ka dia novonoin'ny miaramila ireo, ary Demetriosa nipetraka eo amin'ny seza fiandrianan'ny fanjakany. ⁵ Tamin'izany, nirohotra nankao aminy avokoa ny olona tsy marina sy mpankahala ny fivavahana tamin'Israely, notarihin'i Alsima, izay naniry ho mpisorona lehibe. ⁶ Nampangain'izy ireo tamin'ny mpanjaka ny vahoaka, nataony hoe: Novonoin'i Jodasa sy ireo rahalahiny ny sakaizanao, ary noroahiny tamin'ny taninay izahay. ⁷ Koa ankehitriny, maniraha izay olona mahatoky anao, handeha hizaha ny fanimbana rehetra nataony taminay, sy tamin'ny faritanin'ny mpanjaka, ary hamay ny meloka mbamin'izay rehetra manampy azy. ⁸ Dia nofidin'ny mpanjaka tamin'ireo sakaizany Bakidesa governoran'ny tany any an-dafin'ny ony, lehilahy ambony indrindra teo amin'ny fanjakana, sy niraiki-po amin'ny mpanjaka; ka io no nirahiny miaraka amin'i Alsima, mpankahala ny fivavahana, ⁹ izay nomeny toky hahazo ny laharam-pisoronana ambony indrindra, sy nodidiany hamaly ny ratsy nataon'ny zanak'Israely. ¹⁰ Nony nandeha izy ireo, ka tonga tany amin'ny tanin'i Jodà nitondra tafika lehibe, dia nandefa iraka nitondra tenim-pihavanana ho any amin'i Jodasa mbamin'ireo rahalahiny hamitahana azy. ¹¹ Saingy tsy nohenoin'izy ireto ny teniny, noho izy tonga nomban-takika lehibe. ¹² Nanatona an'i Alsima sy Bakidesa anefa, ny antoko-mpampiana-dalana anankiray ¹³ mba hitady izay rariny, ary ny Asideana izay lohalaharana teo amin'ny zanak'Israely koa, nila fihavanana tamin'izy ireo; fa hoy izy: