Bokin'ny Ohabolana
Toko faha-22
5 Tsilo amam-pandrika no eny amin'ny lalan'ny ratsy fanahy, fa izay miaro ny fanahiny kosa manalavitra izany.6 Ampianaro ny zaza ny lalana tokony alehany, dia tsy hiala amin'izany izy, na rahefa antitra aza.
7 Ny manan-karena manapaka ny mahantra; ary ny misambotra mpanompon'ny mpampisambotra.
8 Izay mamafy heloka, hijinja fahoriana, ary ho foana ny tsorakazon'ny fahatezerany.
9 Hambinina ny olona antra fijery, fa anomezany ny mahantra ny mofony.
10 Roahy ny mpamazivazy, dia ho tapaka ny fifandirana, hitsahatra ny ady amam-panalam-baraka.
11 Izay tia ny fahadiovam-po sy mahafinaritra ny tenin'ny molony, dia ho sakaizan'ny mpanjaka.
12 Miaro ny fahaizana ny mason'ny Tompo, fa mamaky betroka ny tenin'ny olon-dratsy kosa izy.
13 Hoy ny kamo: Misy liona any ivelany! Ho vonoin-ko faty eny an-kianja eny aho!
14 Lavaka lalina ny vavan'ny vehivavy an'olon-kafa; izay mahatezitra an'ny Tompo ho latsaka ao.
15 Miraikitra amin'ny fon'ny zaza ny hadalana; ny tsorakazon'ny famaizana no hanesotra izany aminy.
16 Ny mampahory ny mahantra no mampitombo harena azy; ny manome ny manankarena no mampihena ny ananany. (Tenin'ny olon-kendry)
17 Mampandria sofina ka henoy ny tenin'ireo hendry, manombena saina amin'ny fampianarako.
18 Fa zava-mahafinaritra izany raha tany tehirizinao ao anatinao; aoka hipetraka eo amin'ny molotrao avokoa izy!
19 Mba hianteheran'ny fitokianao amin'ny Tompo, dia hianao no tiako ho toroana izao.
20 Moa tsy efa imbetsaka va izaho no nanao an-tsoratra, torohevitra amam-pampianarana ho anao?
21 Mba ampianarana anao ny mahamarina ny zavatra fantatra tsara, hahazoanao mamaly teny marina an'izay maniraka anao.
22 Aza endahanao ny mahantra noho izy mahantra, ary aza mampahory ny ory eo am-bavahady.
23 Fa Iaveh hiaro azy ireny amin'ny adiny; sy hanala aina an'izay nanendaka an'ireny.
24 Aza mikambakambana amin'izay olona foizina, na miarakaraka amin'izay olona masiaka:
25 fandrao mianatra ny lalany hianao, ka manomana fandrika ho an'ny fanahinao.
26 Aza mba mety ho isan'izay mora manao fanekena, dia ireo izay miantoka trosan'olona.
27 Raha tsy manan-kaloa hianao, nahoana no dia mitono-tena, halain'olom-parafara eo ambaninao?
28 Aza mamindra ny faritany fahataloha, izay efa naorin'ireo razanao.
29 Mahita olona mailaka amin'ny raharahany va hianao? Ho eo anilan'ny mpanjaka no honenany, fa tsy mba hifanila fonenana amin'ny olona ambany izy.
Toko faha-23
1 Raha tafaray latabatra amin'ny lehibe hianao, dia hevero tsara izay eo anatrehanao.2 Andraso antsy ny tendanao, raha dia liana loatra hianao.
3 Aza mitsiriritra ny hanim-piny, fa hanina manodoka izany.
4 Aza miferin'aina ho tonga mpanan-karena, fadio ny mandany ron-doha amin'izany.
5 Te hanara-maso izay zava-mandalo va hianao? fa maniry elatra ny harena, ka misidina ho eny an-danitra, toy ny voromahery.
6 Aza mihinana ny mofon'ny mpialona, ary aza mitsiriritra izay hanim-piny;
7 fa izy akory tsy tsara noho ny hevitra ao am-pony; Mihinana, misotroa, hoy izy aminao, kanjo ny fony tsy momba anao akory.
8 Haloanao izay sombiny voatelinao; ary ho very maina ny teny soa nataonao.
9 Aza mba miteny hohenoin'ny adala, fa hohamavoiny foana, ny fahendren'ny lahateninao.
10 Aza mamindra ny faritany fahataloha; ary aza mitsofoka amin'ny sahan'ny kamboty.
11 Fa mahery ny mpamaly ho azy, dia hiaro azy amin'ny adiny aminao.
12 Mandraiketa ny fonao amin'ny fanoroana, ary ny sofinao amin'ny tenin'ny fahaizana.
13 Aza mitsitsy famaizana aman-janaka, fa tsy dia hahafaty azy akory raha kapohinao amin'ny tsorakazo.
14 Ny mikapoka azy amin'ny tsorakazo, no anafahanao ny fanahiny amin'ny seoly.
15 Anaka, raha hendry ny fonao, izaho koa, dia hifaly ny foko.
16 Dia hientan-kafaliana ny kiboko, raha miteny izay marina ny molotrao.
17 Aoka tsy hialona ny mpanota ny fonao, fa hitoetra mandrakariva amin'ny fahatahorana an'ny Tompo.
18 Satria misy tokoa ny ho avy, ka tsy ho foana ny fanantenanao.
19 Mihainoa, anaka, ka hendre; ampizory amin'ny lala-mahitsy ny fonao.
20 Aza mba anisan'ny mpiboboka divay, na eo amin'izay fatra-piletra hena,
21 fa hahantra ny fatra-pisotro amam-pihinan-kanina, ary mampisaringo-borodamba ny faharendremana.
22 Maneke ny rainao, izy izay niteraka anao; ary aza manamavo an-dreninao, saingy efa antitra izy.
23 Mahazoa ny marina, ka aza amidinao, mbamin'ny fahendrena, ny fampianarana, ary ny fahalalana.
24 Ravoravo ny rain'ny marina; izay miteraka ny hendry dia ho faly amin'izany.
25 Aoka hifaly ny ray aman-dreninao; aoka hiravoravo ny reninao niteraka anao.