Bokin'ny Ohabolana

Toko faha-20

¹⁶ Endaho ny lambany fa efa niantoka olon-kafa izy; tereo izy hanome antoka noho ny amin'ny vahiny.

¹⁷ Mamin'ny olona ny hanina azo am-pitaka, nefa amin'ny farany feno fasika ny vavany.

¹⁸ Ny filan-kevitra mampiorina ny hevitra kasaina; ka fahiratan-tsaina no itariho ny ady.

¹⁹ Izay mamafy fifosana manambara zavatra miafina; ka ialao tsara rahefa olona miteniteny lava.

²⁰ Raha misy manozona ny ray aman-dreniny, dia ho faty jiro ao anatin'ny aizim-pito.

²¹ Ny lova malaky azo tam-boalohany, dia tsy arahin-tsodrano any amparany.

²² Aza manao hoe: Hamaly ratsy ny nataony aho; fa manantena an'ny Tompo, dia hamonjy anao izy.

²³ Halan'ny Tompo ny vato-mizana samihafa; ary tsy mba tsara ny mizana mandainga.

²⁴ Iaveh no mitarika ny dian'ny olona; ary ataon'izay olombelona ahoana no fahalala ny lalany?

²⁵ Fandrika ho an'ny olona ny manaonao foana hoe: Zavatra masina ity; ka efa vita ny voady vao mieritreritra.

²⁶ Ny mpanjaka hendry manafoana ny ratsy fanahy; sy mandefa kodia eo ambonin'ireny.

²⁷ Jiron'ny Tompo, ny fanahin'ny olombelona, maninteraka hatrany anatin'ny fo.

²⁸ Ny fahatsaram-po amam-pahamarinana no miaro ny mpanjaka; ary ny hatsaram-po no anamafisany ny seza fiandrianany.

²⁹ Ny hery no haingon'ny zatovo, ary ny volo fotsy no ravaky ny anti-panahy.

³⁰ Ny kapoka mandrovidrovitra ny nofo, mahasitrana ny faharatsiana; torak'izany koa, ny kapoka mihatra hatrany an-kibo.

Toko faha-21

¹ Rano mandeha eo an-tanan'ny Tompo ny fon'ny mpanjaka, ka atongilany amin'izay rehetra tiany.

² Mahitsy eo imason'ny olona ny lalany rehetra, nefa Iaveh ihany no mandanja ny fo.

³ Ny manaraka ny rariny sy ny hitsiny, no tsara eo imason'ny Tompo mihoatra noho ny sorona.

⁴ Ny fijery miandranandrana sy fo miavonavona: fanilon'ny ratsy fanahy, dia fahotana avokoa izany.

⁵ Ny fikasan'ny olo-mazoto ahazoan-karena be; fa izay mikorapaka foana amin'ny ataony dia mosary ihany no azony.

⁶ Ny rakitra azon'ny lela mandainga, dia rehareha mihelina ho an'olona mila faty.

⁷ Ny hatezeran'ny ratsy fanahy mampivaona azy; satria efa tsy trany ny hanaraka ny rariny.

⁸ Miolikolika ny lalan'ny olo-meloka, fa ny tsy manan-tsiny kosa dia mahitsy amin'ny asany.

⁹ Aleo mitoetra eny an-joron-tafontrano, toy izay miara-monina amin'ny vehivavy tia ady.

¹⁰ Maniry ny ratsy ny fahanin'ny ratsy fanahy, ka ny sakaizany avy no tsy mahita fitia aminy.

¹¹ Raha faizina ny ratsy fanahy, mihahendry ny kely saina, ary raha toroana ny hendry dia vao mainka mihahendry.

¹² Dinihin'ny marina ny tranon'ny ratsy fanahy; Andriamanitra mamarina ny ratsy fanahy amin'ny loza.

¹³ Izay manentsin-tadiny amin'ny fitarainan'ny mahantra, dia mba hitaraina koa fa tsy hovaliana akory.

¹⁴ Ny fanomezana mangingina mampitony hatezerana; ny fanatitra alaina anaty valombalonan-damba mampitsahatra fahavinirana efa tafahoatra.

¹⁵ Hafaliana ho an'ny marina, ny manaraka ny rariny, fa vadi-po kosa, no an'ilay manao ratsy.

¹⁶ Ny olona miala amin'ny lalan'ny fahamalinana, dia handry eny amin'ny fivorian'ny maty.

¹⁷ Ho tratry ny fahantrana izay tia fifaliana, tsy mba mitombo harena izay tia divay aman-diloilo manitra.

¹⁸ Ny ratsy fanahy hisolo voina ny marina; ary ny mpivadika hisolo voina ny olo-mahitsy fo.

¹⁹ Aleo mitoetra any an'efitra, toy izay amin'ny vehivavy tia ady sy foizina.

²⁰ Ny tranon'ny hendry misy rakitra sarobidy sy diloilo; fa ny adala kosa mikepoka ireny.

²¹ Izay fatra-panaraka ny fahamarinana amam-pamindram-po, hahazo ny fiainana amam-pahamarinana ary ny voninahitra.

²² Mahanika ny vohitry ny mahery ny hendry; sady mandrodana ny manda nataony fianteherana.

²³ Izay miambina ny vavany aman-delany, mpiaro ny fanahiny tsy ho azon'ahiahy.

²⁴ Ny atao hoe mpamazivazy dia izay olona mianjonanjona, feno avona, izay fatra-pirehaka amin'ny ataony.

²⁵ Ny faniriana foan'ny kamo mahafaty azy, satria manda tsy hiasa ny tanany.

²⁶ Maniry mafy izy tontolo andro, fa manome tsy an-kijanona kosa, ny marina.

²⁷ Ny soron'ny ratsy fanahy, dia havetavetana, indrindra fa raha sain-dratsy no anaterany azy.

²⁸ Ny vavolombelona mandainga, ho faty; fa ny olona mihaino kosa manan-kalahatra mandrakariva.

²⁹ Ny ratsy fanahy maneho hasahisahiana amin'ny endriny, fa ny mahitsy fo kosa manitsy ny lalany.

³⁰ Tsy misy fahendrena na fahamalinana, na fisainana eo anatrehan'ny Tompo.

³¹ Ny olona manomana ny soavaly ho amin'ny andro hiadiana, fa Iaveh ihany, no iankinan'ny fandresena.

Toko faha-22

¹ Aleo laza tsara, toy izay harem-be, ary ny fanajana dia ambony vidy noho ny volafotsy amam-bolamena.

² Mihaona ny mpanana sy ny mahantra, samy asan'ny Tompo, izy roa tonta.

³ Ny mahira-tsaina, mahatsinjo ny ratsy, dia miery; fa ny kely saina kosa, mandroso ihany, ka voa.

⁴ Ny vokatry ny fanetren-tena, dia ny fahatahorana an'ny Tompo; harena amam-boninahitra ary fiainana izany.