Bokin'ny Mpitoriteny

Toko faha-3

¹¹ ka ny zavatra rehetra samy nataon'Andriamanitra ho tsara amin'ny fotoany avy: ny mandrakizay nataony ao am-pon'izy ireo koa, nefa tsy azon'ny olombelona fantarina ny asa ataon'Andriamanitra hatramin'ny fiandohany ka hatramin'ny fiafarany.

¹² Ary hitako fa tsy misy soa ho azy ireo, mihoatra ny mifaly sy manao izay hiadanany amin'ny andro iainany:

¹³ ary fantatro koa fa matoa misy olona mihinana sy misotro, sady mahita fiadanana amin'ny asany rehetra dia fanomezan'Andriamanitra izany.

¹⁴ Fantatro fa haharitra mandrakizay, izay ataon'Andriamanitra, tsy misy tokony hanampiana an'izany na analana amin'izany. Ka ny hahatahoran'ny olona azy, no nanaovan'Andriamanitra an'izany.

¹⁵ Ny atao izao dia efa nisy sahady, ary izay mbola hatao koa, efa nisy sahady; fa averin'Andriamanitra ny efa lasa.

¹⁶ Izao koa no hitako, taty ambany masoandro: Ny fiketraham-pitsarana araka ny rariny, dia ipetrahan'ny faharatsiana, ary ho solon'ny fahamarinana dia ao ny tsy fahamarinana.

¹⁷ Hoy aho anakampoko: Hotsarain'Andriamanitra ny marina sy ny ratsy, fa samy manana ny fotoany avokoa ny zavatra rehetra sy ny asa rehetra.

¹⁸ Hoy aho anakampoko: Ny amin'ny zanak'olombelona: Tonga izany, mba hizahan'Andriamanitra toetra azy ireo, sy hahitan'izy ireo, fa raha ny momba ny tenany ihany, dia biby navela teo izy.

¹⁹ Fa ny anjaran'ny zanak'olombelona, dia ny anjaran'ny biby, iray ihany no anjaran'izy roa tonta; toy ny ahafatesan'ny iray, no ahafatesan'ny iray koa; fofon'aina iray no an'izy roa tonta; ka tsy misy ihoaran'ny olombelona amin'ny biby, fa samy zava-poana ny zavatra rehetra.

²⁰ Fitoerana iray, no alehan'ny zavatra rehetra: vovoka no nihavian'ny zava-drehetra; ary vovoka no hiverenan'ny zava-drehetra.

²¹ Iza moa no mahalala ny fofon'ain'ny zanak'olombelona miakatra any ambony, ary ny fofon'ain'ny biby, midina any ambany mankamin'ny tany?

²² Ka dia hitako fa tsy misy soa ho an'ny olombelona, mihoatra ny mifaly ao amin'ny asany; fa izany no anjarany. Fa aiza moa no mety hahafantarany izay ho avy any aoriany?

Toko faha-4

¹ Nitodika aho dia nahita ny fampahoriana rehetra atao aty ambany masoandro: ao ny ampahoriana, vonton-dranomaso, ary tsy misy olona manala alahelo azy. Iharan'ny fanaovana an-kerin'ireo mpampahory azy, ary tsy misy olona manala alahelo azy.

² Dia loa-bava aho niantso ho sambatra ny maty izay efa maty, noho ny velona izay mbola velona izao.

³ Ary sambatra noho izy roa tonta ireo indray aza, ny tsy mbola hary akory, ka tsy nahita ny asa ratsy, atao aty ambany masoandro.

⁴ Hitako fa ny asa rehetra mbamin'ny fahakingana rehetra amin'ny taozavatra dia ny fialonana mihatra amin'olona avy amin'ny namany ihany; koa dia zava-poana amam-panenjehan-drivotra foana koa izany.

⁵ Ny adala manohon-tànana ihany, sady mihinana ny nofon'ny tenany.

⁶ Aleo tànan'ila feno fiadanana; toy izay tànan-droa feno fisasarana amam-panenjehan-drivotra.

⁷ Nitodika aho ka nahita zava-poana hafa aty ambany masoandro:

⁸ Misy olona mitoetra irery, ka tsy misy anankiray hafa miaraka aminy, tsy zanaka, tsy rahalahy, kanefa asa lava tsy misy farany ny azy, ary tsy afa-dian-karena ny masony: Ho an'iza ary ity iasako, sy tsy ampananako fiadanana ny fanahiko? Zava-poana koa izany, ary lahasa ratsy.

⁹ Aleo roa miara-mitoetra, toy izay manirery; fa rahefa olon-droa dia misy karama be azony amin'ny asany,

¹⁰ fa raha lavo izy ireo, azon'ny anankiray arenina ny namany. Fa loza kosa no mahazo ny manirery, ka lavo tsy misy namana hanarina azy!

¹¹ Izao koa, raha roa no miara-mandry, mafanafana izy roroa; fa raha olona iray monja kosa, ahoana no hahafana azy?

¹² Ary raha misy maharesy ny irery, ho voatohitry ny roa ihany kosa; ary ny kofehy telo olana tsy mora tapahina.

¹³ Aleo zatovo mahantra sy hendry, toy izay mpanjaka antitra sy adala, tsy mety mihaino torohevitra intsony;

¹⁴ fa nivoa-kanjaka, avy ao an-tranomaizina izy, na dia teraka mahantra teo amin'ny fanjakany aza.

¹⁵ Nahita ny velona rehetra izay mihetsiketsika ambany masoandro aho, teo anilan'ilay tovolahy nitsangan-kisolo ny mpanjaka antitra.

¹⁶ Tsy nisy fahataperana izany vahoaka be rehetra izany, dia ireo rehetra ireo izay notarihiny làlana avy eo aloha. Nefa ny taranaka tsy hifaly aminy akory. Zava-poana amam-panenjehan-drivotra foana koa izany.

¹⁷ Tandremo ny tongotrao, raha mankany an-tranon'Andriamanitra hianao; fa ny manatona hihaino no tsara noho ny manatitra sorona, araka ny fanaon'ny adala; satria entin'ny tsy fahalalany hanao ratsy izy ireny.

Toko faha-5

¹ Aza haingam-bava foana, ary aoka ny fonao tsy ho maimay foana hanonona teny eo anatrehan'Andriamanitra: fa Andriamanitra any an-danitra, hianao ety an-tany; ka aoka ho vitsy teny hianao.

² Fa ny hamaroan-draharaha, miteraka nofy; ary ny hamaroan-teny, mampisy rediredin'adala.

³ Raha manao voady amin'Andriamanitra hianao, aza ela fanefa izany, fa tsy misy hasoavana homena ny adala: koa efao ny voady ataonao.

⁴ Tsara kokoa ho anao ny tsy mivoady, toy izay mivoady tsy mahefa.

⁵ Aza avela hampanota ny nofonao, ny vavanao; ary aza milaza eo anatrehan'ny irak'Andriamanitra hoe: zavatra tsy nahy izany: fa nahoana moa Andriamanitra no ho tezitra ny amin'ny teninao, ka handrava ny asan'ny tànanao?

⁶ Fa toy ny isian'ny zava-poana amin'ny hamaroan-draharaha, no isian'izany koa, amin'ny teny maro; ka matahora an'Andriamanitra.

⁷ Raha misy tany hahitanao fampahoriana ny mahantra, fanitsakitsahana ny rariny amam-pahamarinana: aza sanganehana foana amin'izany, fa ny olona ambony tandreman'ny ambony kokoa, ary mbola misy ambony kokoa indray aza mitandrina azy ireo.

⁸ Tena soa tokoa ho an'ny tany, raha dinihina tsara, ny ananany mpanjaka mikarakara ny fambolena.

⁹ Izay tia vola tsy mety vokim-bola; ary izay tia harena, tsy hanandrana ny vokatr'izany. Zava-poana koa izany.

¹⁰ Raha mitombo ny harena, mitombo koa ny mpihinana azy, ary inona moa no soa azon'ny tompony amin'izany, afa-tsy ny mahita maso izany fotsiny?

¹¹ Mamy ny torimason'ny mpiasa, na kely na be no hanin-kohaniny; fa tsy ahitan'ny mpanankarena tory kosa ny fahavokisany.

¹² Misy loza makadiry hitako taty ambany masoandro, dia harena tehirizin'ny tompony, ka mampidi-doza ny tenany.

¹³ Fa sendra misy zava-mihatra ka levona izany harena izany; ary raha mitera-dahy ralehilahy, dia tsy manana na inona na inona eo an-tanany.

¹⁴ Ny toetra nivoahany avy ao an-kibon-dreniny no hiverenany ao, dia mitanjaka toy ny nihaviany avy ao ihany; fa tsy hahazo na inona na inona avy amin'ny asany, ho azony tentina eny an-tànany.

¹⁵ Fahoriana lehibe koa izao, dia ny hahalasanany toy ny nihaviany: Ka inona no soa azony, tamin'ny nisasarany ho an'ny rivotra?

¹⁶ Fanampin'izany, nandritra ny andro rehetra niainany, nihina-maizina izy sady be alahelo amam-pijaliana sy fahasosorana.

¹⁷ Ka izao no hitako: Tsara sy mety ho an'ny olona ny mihinana sy misotro, ary ny mahazo miadana amin'ny asa rehetra ataony, izay imasoany aty ambany masoandro, mandritra ny andro iainany, omen'Andriamanitra azy; fa izany no anjarany.

¹⁸ Fanampin'izany koa, ny olona rehetra mandray vola aman-karena tamin'Andriamanitra hahazoany mihinana sy maka izay anjarany amin'izany ary mifaly amin'ny asany: dia fanomezan'Andriamanitra izany.

¹⁹ Fa tsy eritreretiny loatra amin'izay ny andro iainany, satria efa rotsahan'Andriamanitra fifaliana ny fony.

Toko faha-6

¹ Misy ratsy hitako aty ambany masoandro; sady mavesatra amin'ny olombelona izany ratsy izany:

² Misy olona nomen'Andriamanitra vola aman-karena sy voninahitra, ka tsy misy tsy ananany, rahefa mety ho zavatra, irin'ny fanahiny; nefa tsy omen'Andriamanitra fahefana hiarana amin'izany izy, fa olon-kafa no miarana amin'izany. Zava-poana amam-pahoriana mavesatra koa izany.