Bokin'ny Eklesiastika

Toko faha-19

⁸ Aza milaza izany, na amin-tsakaiza na amim-pahavalo, ary aza manambara izany, afa-tsy raha hahadiso anao, tokana.

⁹ Fa raha reny hianao, hitandrin-tena izy aminao, ary mbola any ny andro, hisehoany ho fahavalonao.

¹⁰ Raha mandre resaka be vava hianao, ento maty izany, aza manan'ahiahy, tsy hampipoaka anao izany.

¹¹ Raha misy teny iray tsy maintsy hotanany, dia mijaly ny adala, toy ny vehivavy mihetsi-jaza.

¹² Sahala amin'ny zana-tsipika tafatsatoka amin'ny fe, ny teny iray amin'ny fon'ny adala.

¹³ Anontanio ny sakaizanao, fa angamba tsy nanao izany izy; ary raha nanao ihany izy, dia tsy mba hanao izany intsony.

¹⁴ Anontanio ny sakaizanao, fa angamba tsy nilaza izany izay, ary raha nilaza izany izy, dia tsy mba hamerina intsony.

¹⁵ Anontanio ny sakaizanao, fa matetika misy endrikendrika, ka aza mino izao lazain'ny olona rehetra izao hianao.

¹⁶ Misy mba diso ihany, nefa tsy fanahy iniana; ary zovy moa no tsy nanota tamin'ny lelany?

¹⁷ Anontanio ny sakaizanao, alohan'ny handrahonana azy, ary miraiketa hianao amin'ny fitandreman'ny lalan'ny Avo Indrindra.

¹⁸ Ny fahendrena rehetra, dia ao amin'ny fahatahorana ny Tompo; ary ao amin'ny fahendrena rehetra, ny fanatanterahana ny lalana.

¹⁹ Ny fahendrena, tsy mba ny fahaiza-manao ratsy; ary ny fahamalinana tsy mba hita amin'ny torohevitry ny mpanota.

²⁰ Misy fahaizana tokony hankahalaina, ary misy hadalana izay tsy inona fa tsy fahampian'ny fahendrena.

²¹ Aleo olona kely fahiratan-tsaina matahotra an'Andriamanitra toy izay olona be fahazavan-tsaina mandika ny lalana.

²² Misy mahay tokoa nefa mandika ny rariny, ary misy mandainga amin'ny ady atsangany mba hampamoaka fitsarana araka ny iriny.

²³ Misy ratsy fanahy mandeha manjoko azon'ny alahelo, ary feno fitaka ny fony.

²⁴ Manondri-doha izy, marenina ilany izy, ary nony vao tsy jerijerena izy, dia ialohany hianao.

²⁵ Ka raha tsy afa-manota izy, noho ny fahosany, dia hanao ratsy nony vao mahita hanaovana.

²⁶ Ny tarehiny no hahalalana ny olona, ary ny endrika asehony no hahalalana ny hendry.

²⁷ Ny fitafian'ny olona, ny fitsikin'ny molony, ary ny fandehan'ny olona no manambara ny toetrany.

Toko faha-20

¹ Misy anatra tsy tandrifin'ny tokony hanaovana azy, ary misy mangina, maneho fahamalinana.

² Aleo mananatra, toy izay mirehi-katezerana ao am-po, ary izay mitsotra, dia hierem-patiantoka.

³ Sahala amin'ny eonoka maniry handoto zazavavy, izay mamoaka fitsarana, manao am-bohika fotsiny. Endrey, mba tsara loatra raha anarina ny maneho fanenenana! fa amin'izany no ahafahanao amin'ny fahotana iniana atao.

⁴ Misy miseho ho hendry, amin'ny fahanginana; ary misy tonga mahadikidiky noho ny tsy fahalalany onony amin'ny fitenenana.

⁵ Misy mangina, fa tsy mahita havaly; misy mangina fa mahalala ny fotoana mety.

⁶ Ny hendry mangina, mandra-pisin'ny fotoana mety; fa ny mahery vava sy tsy mihevitra kosa, mihoatra an'izany.

⁷ Izay mampitombo teny, hankahalaina, ary izay manaram-po loatra hanjary hahadikidiky.

⁸ Misy olona mahita zavatra mahasoa azy amin'ny fahoriana, ary ny fanambinana tsy nampoizina tonga loza ho azy.

⁹ Misy fanomezana, tsy ahazoanao n'inon'inona, ary misy fanomezana valiana avo sasaka.

¹⁰ Misy toe-draharaha be voninahitra, mampiditra fatiantoka; ary misy manandratra ny lohany, avy amin'ny fietrena.

¹¹ Misy mividy zavatra betsaka mora vidy foana, izay mandoa izany impito hoatra ny vidiny.

¹² Izay hendry am-pitenenana dia tiavin'ny olona, fa very maina kosa ny teny malefaka ataon'ny adala.

¹³ Tsy ahazoanao n'inon'inona ny fanomezan'ny adala, satria tsy mba tokana ny masony fa maro.

¹⁴ Kely fanome izy, ary be fandidy, ary miloa-bava toy ny mpiantso kabary. Anio izy mampisambotra, rahampitso izy mitaky, maharikoriko ny olona toy izany.

¹⁵ Hoy ny adala: Tsy manan-tsakaiza aho; ary tsy sitraky ny olona ny soa ataoko; ratsy vava izy mihinana ny mofoko.-

¹⁶ Impiry sy olona firy akory, no manao azy ho fihomehezana!

¹⁷ Aleo lavo amin'ny ngorodona toy izay lavon'ny lela; izany no mahatonga faingana ny faharavan'ny ratsy fanahy.

¹⁸ Ny olona mahasosotra, dia angano ivelan'ny fotoana, tsy afaka am-bavan'ny olona ratsy taiza.

¹⁹ Tsy raisin'ny olona ny fotokevitra aloaky ny vavan'ny adala, satria tsy mba lazainy amin'ny fotoana mety aminy.

²⁰ Misy tsy afa-manota, noho ny tsy fananany, ary amin'ny fitsaharany, dia manam-panenenana izy.

²¹ Misy manary tena, noho ny henatra tsy an-drariny, ary latsaka am-paharavana noho ny fijerin'ny adala.

²² Misy mampanantena be ny sakaizany, noho ny henatra tsy an-drariny, ka mahatonga azy ho fahavalony maimaim-poana.

²³ Manisy pentina mahamenatra amin'ny olona ny lainga: eo ambavan'ny olona ratsy taiza mandrakariva izy.

²⁴ Aleo mpangalatra toy izay olona manao ny lainga ho raharahany; samy faharavana no ho anjaran'izy roa tonta.

²⁵ Ny fomban'ny mpandainga manala baraka; ary ny henatry ny mpandainga, dia momba azy hatrany hatrany.

²⁶ Izay hendry amin'ny teniny, dia misandratra fanajana, ary ny olona malina, mahazo sitraka amin'ny lehibe.

²⁷ Izay miasa ny taniny hanangom-bary miavosa be, izay mahazo sitraka amin'ny lehibe, mahazo fanalana ny hadisoany.

²⁸ Ny fanatitra amam-panomezana, mahajamba maso ny hendry; ary misakana ny tsiny, toy ny fehivavam-biby.

²⁹ Fahendrena miafina, harena tsy hita: inona no asan'izy roa ireo?

³⁰ Aleo olona manafina ny hadalany, toy izay olona manafina ny fahendreny.