Bokin'ny Eklesiastika

Toko faha-21

¹ Anaka, nanota va hianao? aza manao izany intsony, fa raha manatona azy hianao, hokekeriny.

² Mandosira toy ny eo anatrehan'ny bibilava, eo anatrehan'ny fahotana; fa raha manatona azy hianao, hokekeriny. Nifin-diona ny nifiny, ka mahafaty ny olombelona.

³ Tahaka ny sabatra roa lela, ny fandian-didy rehetra, tsy azo sitranina ny ratra afitsony.

⁴ Mandrava harena ny fandrahonana amam-panevatevana, izany no naharava ny tranon'ny mpiavonavona.

⁵ Ny fangatahan'ny mahantra, miakatra avy amin'ny molony ho amin'ny sofin'ny mpanana; fa ho tonga faingana amin'ny mpiavonavona, ny fitsarana azy.

⁶ Izay mankahala anatra, manara-dia ny mpanota, fa izay matahotra an'Andriamanitra mitodika azy amin'ny fo tsotra.

⁷ Ny olona mahery am-bavany dia efa manambara tena mbola lavitra any; fa ny olona manan-tsaina, mahalala raha diso izy.

⁸ Ny olona manao trano amin'ny vola tsy azy, dia tahaka izay manangom-bato ho amin'ny ririnina.

⁹ Ny andiam-pahavalo, dia tahaka ny antontan-drongony, ka ho rembin'ny afo no hiafarany.

¹⁰ Vita ngorodom-bato ny lalan'ny mpanota, fa ny hantsan'ny seoly no any am-parany.

¹¹ Izay mitandrina ny lalana, mamolaka ny heviny; ary ny vokatra faran'ny fahatahorana ny Tompo, dia ny fahendrena.

¹² Izay tsy ampy fahakingana tsy ho vita fianarana; nefa misy fahakingana miteraka fahoriana be mangidy.

¹³ Be hoatra ny rano tondraka, ny fahaizan'ny hendry, ary loharanon'aina ny toroheviny.

¹⁴ Toy ny vilany vaky ny fon'ny adala, ka tsy mahatam-pahalalana, na dia iray aza.

¹⁵ Raha ny manan-tsaina no mandre teny maneho fahendrena, dia mankalaza izany izy, ary mampitombo azy koa aza. Fa raha mpanaram-batana kosa no mandre izany, halany izany, ary ariany any ivohony.

¹⁶ Ny lahatenin'ny adala, toy ny entana fitondra mivahiny; fa amin'ny molotry ny manan-tsaina no misy ny mahafinaritra.

¹⁷ Ilaina eo am-piangonana, ny vavan'ny olon-kendry, ary saintsainina ao am-po ny teniny.

¹⁸ Ny fahendrena dia trano rava ho an'ny adala, ary ny fahaizan'ny adala, dia teny tsy mifandray akory.

¹⁹ Amin'ny adala ny fampianarana, toy ny gadra amin'ny tongotra, sy famatorana amin'ny tanana ankavanana.

²⁰ Ny adala mitokalakalaka ery, raha mihomehy, fa ny olon-kinga kosa mitsiky kely foana tsy re.

²¹ Amin'ny olona manan-tsaina ny fampianarana sahala amin'ny firavaka volamena sy fehin-tanana amin'ny tanana ankavanana.

²² Raha miditra an-trano, ny adala manao dia faingana, fa ny olon-kendry kosa miahotra toa tsy sahy eo am-pidirana.

²³ Ny adala miondrika hanarangarana ny ao an-trano, eo am-baravarana, fa ny olona tsara taiza kosa, mijanona any ivelany.

²⁴ Tsy fahaiza-miaina ho an'ny olona, ny mihaino eo am-baravarana; ka mahatezitra ny manan-tsaina, ny asa mahamenatra toy izany.

²⁵ Ny molotry ny adala, tsy manonona afa-tsy hadalana; fa ny tenin'ny olon-kendry kosa, voalanja amin'ny mizana.

²⁶ Ny fon'ny adala dia eo am-bavany, fa ny fon'ny hendry kosa, dia ny vavany.

²⁷ Raha manozona ny fahavalony ny ratsy fanahy, dia manozona ny tenany ihany.

²⁸ Mandoto tena ny mpitati-bolana, ka ankahalain'ny olona rehetra manatona azy.

Toko faha-22

¹ Sahala amin'ny vato feno maloto ny kamo, ka akorain'ny olona rehetra ny fahafaham-barakany.

² Sahala amin'ny vonga-taim-biby ny kamo, ka izay mandray azy manifikifi-tanana.

³ Ny zazalahy ratsy taiza, dia henatra ho an'ny rainy niteraka azy, ny zazavavy torak'izany, latsaka an-tany ho fanimbana azy.

⁴ Ny zazavavy malina hahazo vady; fa izay ahazoan-kenatra kosa, mampalahelo ny rainy.

⁵ Ny vehivavy tsy valahara, henatra ho an-drainy sy ny vadiny, ka samy hanamavo azy izy roa tonta ireo.

⁶ Sahala amin'ny mozika amin'ny fisaonana, ny lahateny tsy amin'ny fotoana, fa ny tsora-kazo amam-pamaizana, dia fahendrena, amin'ny fotoana rehetra.

⁷ Ny mampianatra adala, dia mamitrana vilany tany vaky, (milaza zavatra amin'ny tsy mihaino) dia mamoha olona rendrika lalina amin'ny torimaso.

⁸ Miteny amin'ny olona matory ny miresaka amin'ny adala, farany izy vao hanontany hoe: Ahoana hoe a?

⁹ Itomanio ny maty, fa tsy manam-pahazavana, itomanio ny adala, fa tsy manan-tsaina. Ny maty itomanio moramora, satria mahazo fitsaharana, fa ny fiainan'ny adala no ratsy noho ny fahafatesana.

¹⁰ Ny fisaonana ny maty, maharitra hafitoana; fa ny an'ny adala sy ny mpankahala fivavahana, mandritra ny andro iainany.

¹¹ Aza lava resaka amin'ny adala, ary aza miara-mandeha amin'ny olona tsy misy saina. Mitandrema tena aminy, raha tsy te-hahazo hasosorana, dia tsy ho voaloton'ny fifandraisana aminy hianao. Mihodivira aminy, dia hahita fitsaharana hianao, sy tsy hahazo alahelo amin'ny fahitana ny hadalany.

¹² Inona no mavesatra noho ny firaka? ary inona no anaran-kafa azo omena azy, afa-tsy ny hoe adala?

¹³ Ny fasika, ny sira, ny vongam-by, dia mora entina kokoa noho ny olona tsy manan-tsaina.

¹⁴ Ny fitambaran'ny hazon-tafo tsara rafitra, tsy mba hosarahin'ny horohoron-tany: toy izany ny fo miraikitra amin'ny fikasana voahevitra tsara, tsy mba hanan-tahotra, na avy aza ny fotoana sarotra.

¹⁵ Ny fo miankina amin'ny hevi-pahendrena, dia toy ny lalotra voaharo fasika amin'ny rindrina voalama.

¹⁶ Tsy maharitra ny rivotra ny arofanina an-tampon'ny avo, tsy mahatoha ny tahotra toy izany koa ny fo saro-tahotra mbamin'ny fikasany.

¹⁷ Ny maneritery maso, mampilatsa-dranomaso; ny maneritery fo, manetsik'alahelo.

¹⁸ Ny mitora-bato ny vorona, mampandrositra azy, ny mandatsa ny sakaiza amin'ny soa natao taminy, manapaka ny fihavanana.

¹⁹ Nanatsoaka sabatra hamely ny sakaizanao va hianao? Aza manary toky: fa mbola mety hisy ihany ny hiverenany.

²⁰ Niloa-bava hamely ny sakaizanao va hianao? aza matahotra: mbola azo hatao ny mihavana indray. Fa raha latsa ny amin'ny soa natao kosa, na ny eso an'avonavona; na ny fanambarana ny zava-miafina, na ny famelezan'ny lela mamitaka, dia mampandositra ny sakaiza rehetra izany.

²¹ Aza mivadibadika amin'ny sakaizanao ao anatin'ny fahantrany, mba hiarahanao miarana aminy, amin'ny fanambinana azy. Aza mandao azy amin'ny andro fitsapana azy, mba hanananao anjara amin'ny fananana ho tonga aminy.

²² Misondrotra alohan'ny afo, ny etona avy amin'ny memy sy ny setroka; mipoaka alohan'ny fandatsahan-dra koa ny teny manala baraka.