Bokin'ny Eklesiastika

Toko faha-24

²¹ Izay mihaino ahy tsy ho menatra mandrakizay, ary na iza na iza, raha izaho no entiny miasa, tsy mba hanota.

²² Izany rehetra izany dia ny bokin'ny faneken'Andriamanitra Avo Indrindra, lalana nomen'i Moizy, ho lovan'ny fiangonan'i Jakoba.

²³ Izany lalana izany no mahatondraka ny fahendrena tahaka an'i Fisona, tahaka an'i Tigra, amin'ny fotoanan'ny voankazo vao.

²⁴ Mandefa onjam-pahalalana tahaka an'i Eofrata izy, tahaka an'i Jordany amin'ny taom-pijinjana.

²⁵ Mampiboiboika ny fahaizana, tahaka ny Ony izy; tahaka an'i Gehona, amin'ny fotoam-piotazam-boaloboka.

²⁶ Ny voalohany nianatra azy, tsy mahatapitra ny fahalalana azy; ary ny farany, tsy mbola nahatakatra azy,

²⁷ Fa malalaka noho ny ranomasina ny sainy, ary lalina noho ny hantsana lehibe ny fisainany.

²⁸ Ary izaho dia nisononoka toy ny lakan-drano avy amin'ny ony, tahaka ny tetezan-drano manondraka tanimboly mahafinaritra.

²⁹ Hoy aho: Hanondraka ny tanimboliko aho, handena ny kisahasahako, ary indro fa tonga ony ny lakan-dranoko, tonga ranomasina ny oniko.

³⁰ Koa mbola maniry hampamirapiratra ny fahendrena hoatra ny mazava atsinanana aho sy hampahalala ny foto-keviny any lavitra any.

³¹ Mbola iriko koa ny hampiely ny fampianarana, hoatra ny faminaniana, sy hamela azy ho lovan'ny taranaka any aoriana any.

³² Fantaro fa tsy miasa ho an'ny tenako irery aho, fa ho an'izay rehetra mitady ny fahendrena.

Toko faha-25

¹ Misy zavatra telo ankasitrahako, sady tsara izy ireo eo anatrehan'ny Tompo sy ny olombelona: dia ny fifanarahan'ny mpirahalahy, ny fifankatiavan'ny mpihavana, ary ny fifanarahan'ny mpivady tsara.

² Fa misy olona telo karazana halako, sady tena tsy tiako fiaina mihitsy: dia ny mahantra miavonavona, ny mpanana manambaka, ary ny anti-panahy manaram-batana, tsy misy saina.

³ Tsy nahangona na inona na inona hianao tamin'ny fahatanoranao, ahoana no hanananao amin'ny fahanteranao?

⁴ Zavatra tsara loatra ny itsaran'ny fotsy volo araka ny mety sy ny ahalalan'ny anti-panahy ny hevitra tsara!

⁵ Tandrifiny tsara ho an'ny anti-panahy ny fahendrena, ary ho an'izay hajaina, ny fahamalinana amam-pisainana.

⁶ Ny fehilohan'ny anti-panahy dia ny nahitany ny zavatra betsaka. Ny voninahiny, dia ny fahatahorana ny Tompo.

⁷ Misy zavatra sivy tombanan'ny foko ho mahafaly, ary ny iray fahafolo koa ankalazain'ny lelako. Ny olona mahazo hafaliana amin'ny zanany, izay ampy andro iainana, hahita ny faharavan'ny fahavalony.

⁸ Sambatra izay miara-monina amin'ny vehivavy manan-tsaina; mbamin'izay tsy manota amin'ny lelany. Sambatra izay nahazo sakaiza mahatoky, mbamin'izay tsy manompo tompo tsy manendrika azy!

⁹ Sambatra izay mahazo fahamalinana, sady mampianatra izany amin'ny sofina mitandrina!

¹⁰ Endrey ny halehiben'ny olona nahazo fahendrena! kanefa tsy ambony noho izay matahotra ny Tompo izy.

¹¹ Mihoatra noho ny zavatra rehetra ny fahatahorana ny Tompo; zovy moa no hampitahaina amin'izay manana azy? Ny fahatahorana ny Tompo no fiandohan'ny fitiavana azy, ary ny finoana no fiandohan'ny firaiketana amin'Andriamanitra.

¹² Ny fahoriana rehetra anie, fa aza ny fahorian'ny fo; ny hasomparana rehetra anie, fa aza ny hasomparan'ny vehivavy!

¹³ Ny loza rehetra anie, fa aza ny loza afitsoky ny rafilahy, ny famaliana rehetra anie, fa aza ny famalian'ny fahavalo!

¹⁴ Tsy misy poizina ratsy noho ny poizin'ny menarana; ary tsy misy hatezerana lehibe noho ny hatezeran'ny vehivavy.

¹⁵ Aleoko miara-monina amin'ny liona sy ny dragona, toy izay miara-monina amin'ny vehivavy ratsy fanahy.

¹⁶ Manova endrika ny vehivavy ny haratsiam-panahiny, fa manamainty ny tarehiny tahaka ny lasaka.

¹⁷ Mba mandeha mipetraka eo amin'ireo sakaizany ny lahy, ka misento fatratra izy, mandre an'ireo!

¹⁸ Maivana ny haratsiana rehetra, miolotra amin'ny haratsian'ny vehivavy: aoka ny anjaran'ny mpanota hianjera aminy.

¹⁹ Sahala amin'ny fiakarana be fasika, amin'ny tongotry ny anti-panahy, ny vehivavy basivava amin'ny vadiny bonaika.

²⁰ Aza mety ho sodokan'izay hatsaran-tarehim-behivavy, aoka tsy hisy vehivavy hamelom-paniriana anao.

²¹ Zava-mahatezitra, fahafaham-baraka aman-kenatra be vava raha vehivavy mamonona fivelomana ho an'ny lahy.

²² Hareraham-po, endrika malahelo, fahoriam-panahy; izany no vokatry ny vehivavy ratsy fanahy. Tanana osa, lohalika ketraka: izany no vokatra avy amin'ny vehivavy tsy manome hafaliana ny vadiny.

²³ Vehivavy iray no niandohan'ny fahotana: ka izy no anton'ny hahafatesantsika rehetra.

²⁴ Aza avela hanam-pivoahana ny rano, na hanam-pahefana akory ny vehivavy.

²⁵ Raha tsy mandeha arak'izay itarihan'ny tananao azy izy, esory ho afaka amin'ny vatanao.

Toko faha-26

¹ Sambatra ny vadin'ny vehivavy tsara fanahy, ary hampitomboina avo sasaka ny andro iainany.

² Ny vehivavy mahery fo, dia fifalian'ny vadiny, izay miadana amin'ny taona iainany.

³ Anjara soa ny vehivavy tsara fanahy, ary homena ho anjaran'izay matahotra ny Tompo izy.

⁴ Ravoravo ny fon'ny lahy, na manan-karena izy na malahelo, miramirana lava ny tarehiny na rahoviana na rahoviana.

⁵ Misy zavatra telo atahoran'ny foko, ary ny amin'ny fahefatra dia mivavaka eo anatrehan'ny Tompo aho: Ny resaka fanaratsiana ataon'ny tanana iray manontolo; ny fanozonan'ny be sy ny maro, ary ny fanendrikendrehana: halako noho ny fahafatesana, ireo zavatra rehetra ireo;

⁶ fa ny vehivavy mpialona ny vehivavy hafa, no dia fijaliam-po amam-pangirifiriana, sy ny fioky ny lela mamisavisa amin'ny olon-drehetra ny anton'ny alahelony.

⁷ Ny vady ratsy fanahy, dia toy ny omby miray jioga tsy mifanaraka, izay mitana azy io dia sahala amin'izay nahazo mambambohitra.

⁸ Zava-mahatezitra loatra, ny vehivavy manaram-po amin'ny divay, fa tsy hanarona ny fahamenarany akory aza izy.

⁹ Amin'ny fijeriny tsy valahara sy amin'ny fanaovany pi-maso no ahalalana ny hajangan'ny vehivavy.

¹⁰ Ataovy tsara fiambenana ny zazavavy maditra, fandrao mahita ny fitsirambinanao izy, ka hanaram-po amin'ny fahalotoana.

¹¹ Mitandrema mba tsy hanaraka ny maso tsy mahalala henatra, fa raha tsy izany, aza gaga raha voatariny amin'ny ota hianao.

¹² Toy ny mpivahiny mangetaheta manoka-bava, ka misotro izay rano rehetra sendra azy, ny vehivavy janga mipetraka eo anoloan'ny tsato-kazo rehetra sy manokatra ny fitoeran-jana-tsipikany amin'ny zana-tsipika.

¹³ Ny hasoan'ny vehivavy dia fifalian'ny vadiny, ary ny hazavan-tsainy mandrotsaka hery amin'ny taolany.