Bokin'ny Eklesiastika

Toko faha-32

⁴ Fa raha mihaino ny mozika ny olona, aza mandraraka teny maro, ary aza manampatra ny fahendrenao, tsy amin'ny fotoana.

⁵ Toy ny fitomboka vatosoa voapetaka amin'ny volamena, ny konsertra mireondreona eo amin'ny fanasana.

⁶ Toy ny fitomboka vatosoa maitso amin'ny firavaka volamena, ny kalokalo malefaka miaraka amin'ny divay tsara.

⁷ Mitenena, ry zatovo, raha misy soa ho anao amin'izany, indroa saiky be, raha anontaniana hianao.

⁸ Afohezo ny teninao, zava-be amin'ny teny vitsy; aoka ho toy ny olona manam-pahaizana, fa mahay mangina.

⁹ Raha eo amin'ny lehibe, aza manao ny tenanao ho sahala aminy; ary amin'ny fitoerana misy anti-panahy, mba vitsy teny.

¹⁰ Tselatra mamirapiratra no mialoha ny kotro-baratra; toetra mahafinaritra kosa no mialoha lalana ny zatovo maotina.

¹¹ Rahefa tonga ny fotoana, mitsangana ary mihinana fa aza milasilasy, modia faingana any an-tranonao, fa aza tsy miraidraika.

¹² Any milalaova, manarana fo amin'izay angotingoty tianao, kanefa aza manota amin'ny teny anavonavona.

¹³ Ary noho izany rehetra izany, misaora an'Ilay Nahary izay manetsaka anao amin'ny zava-tsoa avy aminy.

¹⁴ Izay matahotra ny Tompo mandray ny fampianarana, ary izay mazoto mitady azy, hahazo sitraka aminy.

¹⁵ Izay mitady ny lalana, hahazo fahafaham-po aminy, fa ho an'ny mpihatsaravelatsihy izy no antony hahalavo azy.

¹⁶ Izay matahotra ny Tompo no hahita ny fitsarana marina; ka hampamirapiratra ny teny fitsarana marina, hoatra ny fanilo.

¹⁷ Manda famaizana ny mpanota; ary mahita fialan-tsiny araka izay tiany izy.

¹⁸ Ny olona manan-tsaina, tsy mba maneso anatra na inona na inona, fa ny olon-kafa sy ny mpiavonavona, tsy mba voasakan-tahotra na inona na inona; ary nony efa avy nanao izy, dia tsy manam-pieritreretana akory, (ka amin'izany dia miharihary ny fahadalany).

¹⁹ Aza manao na inona na inona tsy amim-piheverana, dia tsy hanan-kanenenana hianao, aorian'ny asa.

²⁰ Aza mandeha amin'ny lalana efa simba, dia tsy ho tafintohina amin'ny vato hianao.

²¹ Aza matoky ny lalana mitovy tantana; ary mitandrema tena hianao amin'ny zanakao.

²² Ny fanahinao no itokio, amin'izay rehetra ataonao; fa fanarahana ny didy koa izany.

²³ Izay mitoky amin'ny lalana, dia mihaino tsara ny didiny, ary izay matoky ny Tompo, dia tsy mba hiharam-patiantoka.

Toko faha-33

¹ Izay matahotra ny Tompo, tsy mba tongan'ny loza, nefa raha raha zahan-toetra izy, dia vonjen'ny Tompo.

² Ny olona hendry, tsy mba mankahala ny lalana, fa izay manao fihatsaram-belatsihy aminy, dia toy ny sambo anatin'ny tafio-drivotra.

³ Ny olona manan-tsaina, mitoky amin'ny lalana, ary ho azy ny lalana dia mendrika hitokiana toy ny filazan'ny Orima.

⁴ Omany ny teninao, dia hohenoina hianao, angony ny fahalalanao, vao mamaly hianao.

⁵ Sahala amin'ny kodiaran-tsarety ny fon'ny adala; ary sahala amin'ny lahin-tangerina mihodina ny sainy.

⁶ Ohatra amin'ny sakaiza mifaniratsira, ny lahintsoavaly: izay mitaingina azy rehetra, anenoany avokoa.

⁷ Nahoana ny andro iray no mihoatra noho ny andro iray hafa, nefa masoandro iray ihany no ihavian'ny hazavan'ny andro rehetra amin'ny taona?

⁸ Ny fahendren'ny Tompo no nanisy avakavaka amin'izy ireo; izy no nanendry fotoana samihafa sy fety.

⁹ Ka ny andro dia misy nasandrany sy nohamasininy, ary misy nataony ho anisan'ny andro andavanandro.

¹⁰ Toy izany ny olombelona dia avy amin'ny tany avokoa; dia ny tany nanaovana an'i Adama.

¹¹ Nefa navakavahan'ny Tompo tamim-pahendrena lehibe izy ireo; ary nampandehaniny amin'ny lalana samihafa.

¹² Ny sasany, nambininy sy nasandrany; ny sasany nohamasininy sy nampanakekeziny azy, ny hafa kosa nozoniny sy naetriny, ary naongany hiala amin'ny fitoerana nipetrahany.

¹³ Toy ny tanimanga eo an-tanan'ny mpanefy, ka ataony araka izay itiavany azy; toy izany ny olombelona eo an-tanan'Ilay nanao azy, ka homeny araka izay heviny avy izy ireo.

¹⁴ Eo anatrehan'ny ratsy ny tsara; eo anatrehan'ny fahafatesana ny fiainana; toy izany koa ny mpanota dia eo anatrehan'ny marina.

¹⁵ Diniho torak'izany avokoa ny asan'ny Avo Indrindra: mifanindrana tsiroaroa izy, ka ny iray mifanohitra amin'ny iray hafa.

¹⁶ Izaho izay tonga farany, dia nanokana ny fiaretan-toriko ho an'ny fahendrena; tahaka an'izay mitsimpona voaloboka aorian'ny fiotazana azy, fa noho ny fitahian'ny Tompo nandroso any aloha aho ka nameno ny famiazana, hoatry ny mpioty voaloboka.

¹⁷ Mieke fa tsy miasa ho an'ny tenako samy irery aho, fa ho an'izay rehetra mitady ny fahendrena koa.

¹⁸ Koa mihainoa ahy, hianareo lehiben'ny vahoaka; mampandria sofina amiko hianareo mpitondra fiangonana.

¹⁹ Na zanaka, na vady, na rahalahy, na sakaiza, dia aza misy omenao fahefana aminao, raha mbola velona koa hianao. Ka aza afoy ho an'ny hafa ny harenao, fandrao hianao indray no voatery tsy satry hiambezo aminy.

²⁰ Raha mbola velona sy manam-pofon'aina koa hianao, aza ivarotanao tena, na iza na iza nofo.

²¹ Satria aleo ny zanakao no mangataka aminao, toy izay hianao no hangata-maso amin'ny tanan'ny zanakao.

²² Amin'izay rehetra ataonao mahareta ho tompony, ary aza asiana takaitrany iray akory ny lazanao.

²³ Rahefa tonga ny fara andro iainanao, sy ny fotoana hahafatesanao, vao zarao amin'ny mpandova ny anananao.

²⁴ Ny vilona sy ny tsorakazo ary ny entana no an'ny ampondra, ny hanina sy ny famaizana ary ny asa kosa, an'ny mpanompo.

²⁵ Ampiasao ny mpanomponao, dia hanam-pitsaharana hianao, fa raha avelanao hanao izay tiany izy, dia hitady fahafahana.

²⁶ Ny jioga aman-koditra no mampilefaka ny hatoka; ny fampijaliana amam-pangirifiriana no an'ny mpanompo ratsy fanahy.

²⁷ Iraho izy hiasa, mba tsy hipetraka midonana-poana; fa mampiana-dratsy maro ny fidonanaham-poana.

²⁸ Asaovy manomboka miasa izy, fa izany no tandrifin'azy; ary raha tsy manaiky izy, tereo ny parapaingony. Nefa aza mihoatra ny fetra, na amin'iza na amin'iza; ary aza manao zavatra mifanohitra amin'ny rariny.

²⁹ Raha manam-panompo hianao, dia aoka ho toy ny tenanao izy, fa tamin'ny ra no nahazoanao azy.

³⁰ Raha manam-panompo hianao, ataovy toy ny tenanao no fitondra azy, fa izany no hanintonanao azy, hiraikitra amin'ny fanahinao.