Bokin'ny Eklesiastika

Toko faha-33

³¹ Raha ratsy fitondra azy hianao, ka mitsoaka mandositra izy, aiza no lalan-kalehanao hitady azy?

Toko faha-34

¹ Fanantenam-poana sy mamitaka no andrandrain'ny adala; ary ny nofy mampisidina ny kentrina.

² Toy ny mitady hisambotra aloka sy hahataka-drivotra, ny mandraiki-tsaina amin'ny nofy.

³ Zavatra iray araka ny iray hafa, no hitan'ny olona amin'ny nofy; toy ny sarin'ny tavan'olona anankiray, eo anoloan'ny tavany.

⁴ Inona no madio, mety hipoitra avy amin'ny fahalotoana? Inona no marina mety hipoitra avy amin'ny lainga?

⁵ Zava-poana ny fanandroana sy ny fambara ary ny nofy, tahaka ny anjoanjom-pieritreretana ao am-pon'ny vehivavy bevohoka.

⁶ Aza avela hiraikitra amin'izany ny fonao, afa-tsy raha nirahin'ny Avo Indrindra, amin'ny famangiana.

⁷ Fa efa namily lalana olona maro ny nofy, ary lavo izay nanankina ny fanantenany taminy.

⁸ Ny lalana no tanteraka tsy misy fitaka, toy ny ahatanterahan'ny teny misy fahendrena, aloaky ny vava mahatoky.

⁹ Mahay zavatra betsaka ny olona nahita fianarana; ary miteny amim-pahendrena ny olona ela nikarohana.

¹⁰ Izay tsy nozahan-toetra, kely zava-pantatra; ary izay efa nandeha nivahiny, be fahamalinana.

¹¹ Nahita zavatra betsaka aho tany am-pivahiniako, ka be noho ny teniko ny fahaizako.

¹² Matetika no efa saika maty aho, fa voavonjy noho izany fikarohana izany.

¹³ Ho velona ny fanahin'izay matahotra ny Tompo; fa amin'ny mpamonjy azy ny fanantenany.

¹⁴ Izay matahotra ny Tompo, tsy matahotra na inona na inona, tsy mangovitra izy fa Andriamanitra no fanantenany.

¹⁵ Sambatra ny fanahin'izay matahotra ny Tompo! Iza no iankinany, ary iza no manohana azy?

¹⁶ Ny mason'ny Tompo dia eo amin'izay tia azy; mpiharo mahery izy, ary fiankinana mafy, fialofana amin'ny rivotra avy atsinanana, fialofana amin'ny hainandro mirehitra avy atsimo, fiambenana amin'ny fanafintohinana, vonjy amin'ny fahalavoana;

¹⁷ manandratra ny fanahy, manazava ny maso, manome fahasalamana, fiainana amam-pitahiana izy.

¹⁸ Fanatitra vazivazy ratsy, ny harena azo tsy an-drariny atao sorona; ary ny vazivazin'ny mpanota, tsy ankasitrahan'Andriamanitra.

¹⁹ Tsy ankasitrahan'ny Avo Indrindra ny fanatitry ny mpankahala fivavahana, ary tsy ny hamaroan'ny zavatra atao sorona no amelany ny heloka.

²⁰ Mamono zanaka eo imason-drainy, izay manatitra sorona nalaina tamin'ny fananan'ny mahantra.

²¹ Ny mofon'ny malahelo no ain'ny mahantra; fa izay manala izany aminy, dia mpamono olona.

²² Mamono mahafaty namana, izay maka ny fivelomany; mandatsa-dra izay mitana ny tambin'ny mpikarama.

²³ Ny iray manorina, ny hafa kosa mandrava; inona no azon'ireo afa-tsy ny fisahiranana ihany?

²⁴ Ny iray mivavaka, ny iray kosa manozona: ny feon'iza amin'izy roa tonta ireo no hohenoin'ny Tompo?

²⁵ Izay misasa, avy nikasika ny maty, mikasika azy indray, inona no azony tamin'ny nisasany?

²⁶ Toy izany ny olona mifady hanina noho ny fahotany, raha miverina manota indray izy: iza no hihaino ny fivavahany, ary hampaninona azy ny fietreny?

Toko faha-35

¹ Ny mitandrina ny lalàna, dia manao fanatitra maro

² ary ny miraikitra amin'ny didy, dia manolotra sorom-pihavanana.

³ Ny misaotra dia manao fanatitra lafarina tsara indrindra;

⁴ ary ny manao famindram-po, dia manatitra sorona fiderana.

⁵ Ny ankasitrahan'ny Tompo, dia ny manalavitra ny ratsy; ny mahazo famelan-keloka aminy, dia ny mandositra ny tsy marina.

⁶ Kanefa aza miseho foan-tànana eo anatrehan'ny Tompo hianao,

⁷ fa noho ny didy no tsy maintsy hanaovana ireny fanatitra ireny.

⁸ Manatavy ny otely ny fanatitra marina; ary miakatra eo anatrehan'ny Tompo ny fofony manitra.

⁹ Mahafinaritra ny soron'ny olo-marina; ary tsy ho very tadidy ny fahatsiarovana an'izany.

¹⁰ Manomeza voninahitra ny Tompo, amin'ny fo mahafoy be; ary aza anesorana akory ny voaloham-bokatry ny tananao.

¹¹ Amin'ny fanatitra rehetra, aoka ho mirana endrika hianao, ary atokany amim-piravoravoana ny fahafolon-karenao.

¹² Manomeza voninahitra ny Avo Indrindra araka izay nomeny anao, amin'ny fo mahafoy be, araka izay azon'ny tananao.

¹³ Fa manome valy ny Tompo, ka hamerina impito hoatry ny nataonao.

¹⁴ Aza mitady hanangoly azy amin'ny fanatitra, fa tsy horaisiny akory izany,

¹⁵ ary aza miantehitra amin'izay fanatitra tsy marina; fa mpitsara ny Tompo, ary tsy mijery izay filaharam-piambonian'ny olona akory izy.

¹⁶ Tsy mizaha tavan'olona hamono antoka ny mahantra izy, ary mihaino ny vavak'izay ampahoriana.

¹⁷ Tsy mba ataony tsy ho zavatra ny kamboty mitalaho, na ny mpitondratena mamboraka ny fitarainany aminy.

¹⁸ Tsy mirotsaka eo amin'ny takolany va ny ranomason'ny mpitondratena,

¹⁹ ary moa tsy mipoaka ny fidradradradrany mamely an'izay mampitomany azy?

²⁰ Horaisina tsara izay manaja an'Andriamanitra araka ny fomba ankasitrahany, ary tafasondrotra hatrany amin'ny rahona ny fivavahany.

²¹ Maninteraka ny rahona ny vavaky ny manetry tena, fa tsy hionona izy, raha tsy tonga amin'Andriamanitra izany; tsy hitsahatra izy, raha tsy efa nojeren'ny Avo Indrindra; dia hitsara araka ny rariny ny Tompo, ka hamoaka fitsarana.

²² Tsy hampiandry akory ny Tompo, tsy handefitra intsony izy, amin'ny mpampahory; mandra-panorotorony ny valahan'ireo olona tsy miantra ireo,

²³ sy hanaovany famaliana ny firenena; mandra-pandringany ny ankamaroan'ireo mpiteny ratsy an'Andriamanitra, sy hanapatapahany ny tehim-panjakan'ny mpankahala fivavahana;