Bokin'ny Eklesiastika

Toko faha-35

²⁴ mandra-pamaliny ny olona, araka ny asany, sy hamaliany ny asan'ny olona araka ny heviny;

²⁵ mandra-pandrainy eo an-tanany ny adin'ny vahoakany, sy hampifaliany azy amin'ny famindram-pony.

²⁶ Tsara tamin'ny fotoana nampahoriana an'Israely ny famindram-po, toy ny rahona mitondra orana, amin'ny fotoana main-tany.

Toko faha-36

¹ Mamindrà fo aminay, ry Tompo Andriamanitr'izao rehetra izao, ka jereo:

² ary arotsahy amin'ny firenena rehetra ny fampahatahoranao.

³ Atsangano hamely ny firenen-kafa ny tananao, ary aoka hotsaroan'ny ainy ny herinao.

⁴ Araka ny nanehoanao ny fahamasinanao teo anatrehan'izy ireo namay anay, no anehoy ny fahalehibeazanao eo imasonay, mamay ny mpampahory anay.

⁵ Ary aoka ho fantatr'izy ireo, tahaka ny nahafantaranay, fa tsy misy Andriamanitra hafa afa-tsy hianao, ry Tompo!

⁶ Avereno indray ny famantarana, ataovy indray ny fahagagana,

⁷ ankalazao ny tànanao sy ny sandrinao ankavanana.

⁸ Hetseho ny haviniranao, arotsaho ny hatezeranao,

⁹ aringano ny mpankahala, fongory ny fahavalo.

¹⁰ Hafaingano ny fotoana, ary tsarovy ny fianianana; ka aoka hankalazaina ny asanao lehibe!

¹¹ Aoka holevonin'ny afo mahamay izay sendra afa-mandotsitra, ary ho hitan'izay mampahory ny vahoakanao ny fahaverezana.

¹² Montsany ny lohan'ny lehiben'ny fahavalo, izay manao hoe: Tsy misy afa-tsy isika ihany!

¹³ Angony avokoa ny fokon'i Jakoba ka avereno aminy indray ny lova toy ny tamin'ny voalohany.

¹⁴ Tompo o, mamindra fo amin'ny vahoakanao, izay antsoina amin'ny anaranao, sy amin'Israely izay nataonao toy ny lahimatoa.

¹⁵ Iantrao ny tanana misy ny fitoeranao masina, dia Jerosalema fitoerana fitsaharanao.

¹⁶ Fenoy ny teny to avy aminao Siona ary ny voninahitrao, ny vahoakanao.

¹⁷ Mitsangana ho vavolombelona miaro an'ireo zava-boaharinao hatramin'ny voalohany ary tanteraho ny fampanantenana nataonao tamin'ny anaranao.

¹⁸ Valio soa ireto olona manantena anao, ary aoka ho hita fa to teny ny mpaminaninao. Henoy, Tompo o, ny vavak'izay mitalaho aminao,

¹⁹ araka ny tso-dranon'i Aarona tamin'ny vahoakanao, ary aoka ho fantatry ny mponina rehetra eto an-tany, fa hianao no Tompo Andriamanitra amin'ny taona rehetra.

²⁰ Mandray hanina isan-karazany ny vavony, nefa misy hanina tsaratsara kokoa noho ny hafa.

²¹ Fantatry ny lanilany amin'ny tsirony ny henan-java-dia; ary fantatry ny fo manan-tsaina toy izany koa ny teny mamitaka.

²² Mahatonga alahelo ny fo ratsy, nefa mitandrin-tena aminy ny olona mahalala zavatra.

²³ Raisin'ny vehivavy izao karazam-bady rehetra izao, nefa misy zazavavy tsaratsara kokoa noho ny hafa.

²⁴ Mahamiramiran'endrika ny hatsaran-tarehim-behivavy, ary mihoatra noho ny fanirian'ny lehilahy fatratra indrindra.

²⁵ Raha hita eo amin'ny lelany koa ny hatsaram-po aman-kalemem-panahy, dia tsy anisan'ny zanak'olombelona tsotra izao intsony ny vadiny.

²⁶ Efa nahazo ny fototry ny hareny ny olona mahazo vady, izay namana mitovy aminy sy andry hiankinany.

²⁷ Eo amin'izay tsy misy fefy, dia lasan-ko fandrobana ny tany: eo amin'izay tsy misy vehivavy, ny lehilahy dia misento mirenireny.

²⁸ Zovy moa no hatoky ny jiolahy mailaka izay mitety tanana ombieny ombieny? Toy izany ny lehilahy tsy manam-ponenana; fa izay aharivan'ny andro no andriany.

Toko faha-37

¹ Ny sakaiza rehetra samy milaza hoe: Izaho koa sakaizanao; nefa misy sakaiza amin'ny anarany fotsiny.

² Moa va tsy alahelo mila hahafaty, raha namana aman-tsakaiza no mivadika ho fahavalo?

³ Ry hevi-dratsy o, nivoaka avy aiza hianao, mba hanototra fitaka ny tany?

⁴ Ny mpinamana mifaly amin'ny fifalian'ny sakaizany; kanjo mivadika mamely azy izy amin'ny andro mahory.

⁵ Misy namana miombon'alahelo amin'ny sakaizany, mba hahavoky ny kibony. Kanjo ny ampingany no raisiny, nony manoloana ny ady.

⁶ Aza manadino ny sakaizanao ao am-ponao; ary aza manary ny fahatsiarovana azy, ao anatin'ny harem-be.

⁷ Samy manoro hevitra avokoa ny mpanoro hevitra; nefa misy manoro hevitra mikendry ny soa ho an'ny tenany.

⁸ Mitandrema tena amin'ny mpanoro hevitra, ary ataovy izay hahalalanao izay mety hahasoa azy aloha; - fa ny soa ho an'ny tenany no hanoroany hevitra. - Mba tsy hilokany ny aminao,

⁹ sy tsy hanaovany hoe: Tsara ny lalanao; dia hihataka manandrify anao izy hizaha izay hanjo anao.

¹⁰ Aza maka hevitra amin'ny olona manao jery vilana anao, ary afeno an'izay mialona anao ny fikasanao.

¹¹ Aza maka hevitra amin'ny vehivavy, ny amin'ny rafiny; amin'ny kanosa, ny amin'ny ady; amin'ny mpivarotra, ny amin'ny takalo; amin'ny mpividy, ny amin'ny varotra; amin'ny mpialona, ny amin'ny fankasitrahana; amin'ny olona tsy mangoraka, ny amin'ny asa fiantrana; amin'ny kamo, ny amin'ny asa hatao na inona na inona; amin'ny mpikarama ao an-trano, ny amin'ny famitan-javatra; amin'ny mpanompo kamo, ny amin'ny lahasa lehibe; aza miankina amin'ireo olona ireo, amin'ny hevitra iray akory.

¹² Fa aoka ho matetika hianao no ao amin'ny olona tia vavaka, izay fantatrao ho mpitandrina ny didy, manana fo araka ny fonao, ary hiarak'ory aminao, raha lavo hianao.

¹³ Manaraka izany dia aoka hifikitra amin'izay hevitry ny fonao hianao, fa tsy misy olona mahatoky toa azy, ho anao.

¹⁴ Fa indraindray ny fon'ny olombelona milaza zavatra betsaka mihoatra noho ny tily fito voapetraka hitily eo amin'ny havoana.

¹⁵ Ary amin'izany rehetra izany, mangataha amin'ny Avo Indrindra, mba hitari-dalana anao mazava tsara.

¹⁶ Mialoha ny asa rehetra ny teny: mialoha ny asa atao rehetra ny fandinihana.

¹⁷ Zavatra efatra no miseho ho mariky ny fiovaovan'ny fo:

¹⁸ ny tsara sy ny ratsy, ary ny fiainana sy ny fahafatesana; ka ny lela mandrakariva no tompon'ireny.

¹⁹ Misy olona malina sy mpampianatra ny maro, nefa tsy vanon-ko inona, raha ho an'ny tenany.