Bokin'ny Eklesiastika

Toko faha-37

²⁰ Maharikoriko ny olona mihambohambo ho hendry amin'ny teniny: tsy hanan-kohanina no hiafarany.

²¹ Fa tsy momba azy ny fankasitrahan'ny Tompo, satria tsy manam-pahendrena akory izy.

²² Misy hendry izay hendry ho an'ny tenany; ary ny vokatry ny fahalalany dia azo antoka eo amin'ny molotra.

²³ Ny olona hendry dia mampianatra ny fireneny, ary azo antoka ny vokatry ny fahalalàny.

²⁴ Feno fanambinina ny olona hendry, ary mitory azy ho sambatra izay rehetra mahita azy.

²⁵ Voafetra ihany ny isan'ny andro iainan'ny olombelona; fa ny andron'Israely tsy hita isa.

²⁶ Ny hendry dia tonga mahatoky eo amin'ny vahoakany, ary ny anarany ho velona mandrakizay.

²⁷ Anaka, ny fanahinao no ilao hevitra amin'izay fomba fiainanao, fantaro izay manimba azy, ka aza omena azy izany.

²⁸ Fa ny zavatra rehetra na inona na inona tsy mahasoa ny olona rehetra na iza na iza ary tsy dia samy mahita fiadanana amin'ny zavatra rehetra avy.

²⁹ Aza dia tsy mety afa-diana eo anoloan'izay hanim-py, ary aza dia mianjera ihany amin-kalianana, amin'ny nahandro,

³⁰ fa ny fihinanan-doatra mitarazo faharisarisana; ary ny tsy fahalalana onony mitarika amin'ny areti-mandalo aza.

³¹ Nahafaty olona maro ny tsy fahalalana onony, fa izay mifady no manalava ny andro iainany.

Toko faha-38

¹ Omeo ny dokotera ny haja tandrify azy, noho ny filanao azy; fa izy ihany koa dia noharin'ny Tompo.

² Fa ny Avo Indrindra no ihavian'ny fahasitranana; ary na ny mpanjaka aza andraisany fanatitra.

³ Manandratra ny lohany ny fahaizan'ny dokotera, ka igagana izy, eo anatrehan'ny lehibe.

⁴ Ny Tompo mampahavokatra ny tany ny fanafody avy amin'ny tany, ary ny olona manan-tsaina tsy mba manao izany tsy ho zavatra.

⁵ Moa tsy dia ny hazo anankiray va no nahamamy ny rano mangidy, mba ho fantatry ny olona rehetra ny hasiny?

⁶ Nomeny fahaizana ny olona hahazoany voninahitra amin'ny fanomezany mahagaga.

⁷ Amin'izany fanomezana izany no ampahazoan'ny olona ny fahasitranana sy hanafahany ny fanaintainana.

⁸ Izany no anaovan'ny mpanao fanafody zavatra miharoharo, ka vantany vao vita ny asany, dia miely eto ambonin'ny tany ny fahasalamana avy aminy.

⁹ Anaka, raha marary hianao, aza manao ny torohevitro ho tsinontsinona, fa mangataha amin'ny Tompo, dia hositraniny hianao.

¹⁰ Fadio ny fandikan-dalana, ahitsio ny tananao, ary diovy ny fonao amin'ny ota rehetra.

¹¹ Atero ny emboka amam-panatitra lafarina; ary mamonoa sorona matavy, tahaka ny efa raikitra fa ho faty hianao.

¹² Rahefa izany ampandrosoy ny dokotera, fa izy koa dia noharin'ny Tompo, ary aoka tsy hanalavitra anao izy, fa mila azy hianao.

¹³ Misy ihany izay ahombiazan'ny tànany,

¹⁴ fa hangataka amin'ny Tompo koa izy ireny, mba ho ekeny ny hampahazoany ny fitsaharana, amam-pahasitranana hahalava andro fiainana ny marary.

¹⁵ Aoka izay manota eo imason'ny Mpahary azy, no ho latsaka eo an-tanan'ny dokotera!

¹⁶ Anaka, itomanio ny maty, ary aoka ho rafitra migogogogo hianao toy ny olona mijaly mafy. Manaraka izany, ataovy amin'ny vatany izay fikarakarana tandrify azy, ary aza atao tsirambina ny fandevenana azy.

¹⁷ Mamorona ranomaso mangidy, mandefasa sento mafy, ary manaova fisaonana, araka ny sahaza azy, indray andro na indroa andro, mba tsy hisian'ny vava ratsy.

¹⁸ Rahefa izany, mionona hianao, mba hampisava ny alahelo, fa mety ihavian'ny fahafatesana ny alahelo, ary mandreraka ny hery rehetra ny alahelon'ny fo.

¹⁹ Rahefa entina ny maty, tokony hiara-dasa aminy koa ny alahelo; tahaka ny fiainan'ny mahantra, mifanohitra amin'ny fony.

²⁰ Aza avela hianjadian'ny alahelo ny fonao, roahy izy, tsarovy ny hiafaranao.

²¹ Aza manadino izao: tsy misy fiverenana intsony; ny maty tsy hosoavinao; ary ny tenanao asianao ratsy.

²² Tsarovy fa toy ny didy nahatra taminy izay hahatra aminao, ny ahy omaly; ny anao anio.

²³ Rahefa mitsahatra ny maty, avelao hitsahatra koa ny fahatsiarovana azy; ary mionona hianao ny aminy, amin'ny fahalasanan'ny fanahiny.

²⁴ Ny fahendren'ny mpanoratra dia azo noho ny fananana andro malalaka, ary izay tsy manan-draharaha himasoana, dia tonga hendry.

²⁵ Ahoana no hahatonga hendry ny mitondra ny angadin'omby, izay maniry ny hampiasa ny fanindronana ho solon'ny lefona, mampandroso ny ombiny, sy tafaharo asa amin'ireny, ary tsy mahay miresaka afa-tsy amin'ny zanak'ombalahy.

²⁶ Ny hanoritra asa no ilofosany amin'ny fony rehetra, ny hampahazo vilona ny vantotr'ombivaviny no karakarainy fatratra.

²⁷ Manao toy izany koa rahefa mety ho mpandrafitra sy mpanorina trano, izay manohy ny raharahany andro aman'alina; mbamin'ny mpisokitra marika amin'ny fitomboka: ny hahasamihafa ny endri-javatra no ikelezany aina; ny hahavita ny sary marina tsara no ilofosany tokoa, ary hahatomombana ny asany no karakarainy fatratra.

²⁸ Torak'izany ny mpanefy mipetraka eo akaikin'ny riandriany, sy mibanjina ny vy mbola akorany; ny fofon'afo mampitsonika ny nofony; nefa miaritra izy tsy mihontsina amin'ny hafanan'ny fatam-panefeny; ny fikatrokatroky ny tantanana mankarenina ny sofina; ary ny masony mifantoka amin'ny modelin'ny fanaka; ny hahalavorary ny asany no ilofosany amin'ny fony tokoa, ny hahalambolambo azy lavorary tsara no karakarainy fatratra.

²⁹ Torak'izany koa ny mpanao tanimanga, mipetraka eo amin'ny asany, sy manodina ny kodiarana amin'ny tongony: ny asany ihany no ahiny lalandava ary ny havitany izay siny voafetra no ikelezany aina mafy.

³⁰ Ny tanany no mamolavola ny tanimanga, ary eo anoloan'ny tongony no hanalemeny azy; izay hahatsara ny varinesiny no ilofosany amin'ny fony tokoa, izay hahadio ny lafaorony no karakarainy fatratra.

³¹ Ny tanana no ampoizin'ireo olona ireo hahavitana ny zavatra rehetra; ary samy manam-pahaizana ny amin'ny asany avy izy ireo.

³² Raha tsy misy azy ireo ny olona dia tsy hahorina tanana iray akory, tsy hankany amin'ny tany hafa, na handeha hivahiny.

³³ Kanefa izy ireo tsy mba ilaina eo amin'ny fivoriana fakan-kevitry ny vahoaka ny hahazo laza eo amin'ny fivoriana; tsy mba hanam-pahaizana ny fanekena momba ny rariny, t sy mba hahazo toerana eo amin'ny sezan'ny mpitsara; tsy hivaofy ny rariny sy ny hitsiny; ary tsy mba ho hita mamoaka oha-teny.

³⁴ Izy ireo anefa no fototry ny zavatra ilaina momba izao fiainana izao, ary ny asa momba ny raharahany no anaovany fivavahana.

Toko faha-39

¹ Hafa noho izany izay mampiasa ny sainy, sy mandinika ny lalan'ny Avo Indrindra. Mikatsaka ny fahendren'ny taloha rehetra izy, ary ny androny malalaka dia atokany isainana ny faminaniana.

² Mitahiry ao an-tsainy ny filazan'ny olo-malaza izy, ary mahatakatra ny oha-teny miolakolaka.

³ Mikaroka ny hevi-miafina amin'ny ohabolana izy, ary mihevitra ny oha-teny misy ankamantatra.

⁴ Manao raharaha eo amin'ny lehibe izy; ary miseho eo anatrehan'ny mpanapaka. Mivahiny any an-tanin'ny firenen-kafa izy, fa te-hahalala ny soa sy ny ratsy eny amin'ny olona eny.