Bokin'i Jeremia

Toko faha-7

⁶ raha tsy ampahorinareo ny vahiny, sy ny kamboty amam-pitondratena; ary tsy mandatsa-dra marina amin'ity tany ity hianareo, na manaraka andriamani-kafa, hampidi-doza aminareo,

⁷ dia hamponeniko amin'ity tany ity hianareo; amin'ity tany efa nomeko ny razanareo hatramin'ny andro taloha ka hatramin'ny mandrakizay.

⁸ Kanefa ny itokianareo dia teny lainga, tsy mahasoa anareo velively akory!

⁹ Aiza ka dia avy mandainga, mamono olona, maka vadin'olona, mianian-tsy to, manemboka an'i Baala, ary manaraka andriamani-kafa tsy fantatrareo hianareo!

¹⁰ dia tonga, dia miseho eto anatrehako indray, eto amin'ity trano iantsoana ny anarako ity, ka manao hoe: Ho afaka isika! Ary ny mba hanao izany fahavetavetana rehetra izany no anton'izany.

¹¹ Moa zohy fieren'ny mpangalatra eo imasonareo va, ity trano iantsoana ny anarako ity? Izaho koa mba nahita izany, - teny marin'ny Tompo.

¹² Mandehana mankany amin'ilay nitoerako any Silao, izay namponenako ny anarako fahiny, ka zahao ny nanaovako azy, noho ny haratsian'Israely vahoakako.

¹³ Ary ankehitriny rahefa nanatanteraka izany rehetra izany hianareo, - teny marin'ny Tompo, - ary rahefa niteny taminareo aho, fa niteny taminareo hatry ny vao maraina aho, nefa tsy nohenoinareo, ary niantso anareo aho, nefa tsy novalianareo,

¹⁴ dia ataoko amin'ity trano ity izay niantsoana ny anarako, izay ametrahanareo ny fitokianareo, dia ity fitoerana ity izay efa nomeko anareo sy ny razanareo, izay nataoko tamin'i Silao;

¹⁵ Ary ka hoesoriko eo anatrehako hianareo, toy ny nanesorako ny rahalahinareo rehetra, dia ny taranak'i Efraima rehetra.

¹⁶ Ary hianao aza mifona ho an'ity vahoaka ity; aza manandratra fitarainana na fivavahana ho azy, ary aza miambezo amiko, fa tsy hihaino anao aho.

¹⁷ Tsy hitanao va ny ataon'izy ireo, eny an-tananan'i Jodà, sy eny an-dàlamben'i Jerosalema?

¹⁸ Ny zanaka manangon-kitay; ny ray mandrehitra afo; ny vehivavy mametafeta koba, hanaovana mofo ho an'ny mpanjakavavin'ny lanitra, sy hanidina fanatitra araraka ho an'andriamani-kafa, mba haniratsirana ahy.

¹⁹ Moa izaho va no tsiratsirainy, - teny marin'ny Tompo, fa tsy ny tenany ihany, ka tsy maintsy hangaihay tava izy amin'izany?

²⁰ Koa izao no lazain'ny Tompo Tompo: Indro haidina amin'ity tany ity, ny hatezerako amam-pahavinirako, dia amin'ny olona sy ny biby, amin'ny hazo eny an-tsaha sy ny vokatry ny tany; ary hirehitra izany, ka tsy ho faty.

²¹ Izao no lazain'ny Tompon'ny tafika, Andriamanitr'Israely: Anampio ny soronareo ny sorona doranareo ka hano ny henan'izany;

²² fa tsy misy nolazaiko tamin'ny razanareo, na nandidiako azy ireo, tamin'ny andro nitondrako azy nivoaka avy any amin'ny tany Ejipta ny amin'ny sorona dorana sy ny sorona.

²³ Fa ny amin'ny didy nomeko azy ireo, dia izao no nolazaiko taminy: Mihainoa ny feoko; ary izaho ho Andriamanitrareo, ary hianareo ho vahoakako; mizora amin'ny làlana rehetra handidiako anareo, mba ho sambatra hianareo.

²⁴ Kanefa izy ireo tsy nihaino na nanongilan-tsofina, fa nandeha araka ny saim-pantany, nanaraka ny hamafin'ny fo ratsiny; nihemotra izy fa tsy nandroso.

²⁵ Hatramin'ny andro nivoahan'ny razanareo tany Ejipta, ka mandrak'androany, dia naniraka ny mpaminany mpanompoko rehetra ho any aminareo aho, naniraka azy vao maraina isan'andro aho;

²⁶ kanefa izy ireo tsy nihaino ahy, tsy nanongilan-tsofina; fa nanamafy ny hatony, nanao ratsy mihoatra noho ny razany aza.

²⁷ Holazainao aminy izany rehetra izany, nefa tsy hihaino anao izy; hiantsoantso azy ireo hianao, nefa tsy hamaly anao izy.

²⁸ Ka dia izao no holazainao azy ireo: Ity no firenena tsy nihaino ny feon'ny Tompo Andriamaniny, sady tsy nety nino anatra; very ny fahamarinana, fa tsy eo am-bavany intsony.

²⁹ Harato ny volonao, dia ario; ka miventesa hira fisaonana eny amin'ny havoana, satria nakifik'Iaveh sy nolaviny, ny taranaka mahatezitra azy.

³⁰ Fa nanao izay ratsy eo imasoko ny taranak'i Jodà, - teny marin'ny Tompo: nametraka ny fahavetavetany ao amin'ny trano niantsoana ny anarako mba handotoany azy;

³¹ ary nanorina ireo fitoerana avo any Tofeta, amin'ny lohasahan'ny zanak'i Hinnoma, handoroany amin'ny afo ny zanany lahy aman-janany vavy; nefa zavatra tsy mba nodidiako izany, na mba noheverin'ny saiko akory.

³² Noho izany, indro tamy ny andro, - teny marin'ny Tompo, izay tsy hanaovana hoe Tofeta na lohasahan'ny zanak'i Hinnoma intsony, fa hoe "Lohasaha famonoana" kosa, ary any Tofeta aza no handevenana, noho ny hateren'ny tany!

³³ Ka ny fatin'ity firenena ity dia hohanin'ny voromadinina sy ny bibin'ny tany, ary tsy hisy handroaka ireny akory.

³⁴ Hataoko mitsahatra eo an-tanànan'i Jodà, sy eny an-dàlamben'i Jerosalema ny feo fifaliana sy ny feo firavoravoana, ny hiran'ny mpampakatra sy ny ampakarina; fa hanjary efitra ny tany.

Toko faha-8

¹ Amin'izany andro izany, - teny marin'ny Tompo, hofongarina avy ao am-pasany, ny taolan'ny mpanjakan'i Jodà, ny taolan'ny mpanapaka ao aminy, ny taolan'ny mpisorona, ny taolan'ny mpaminany, ary ny taolan'ny mponina ao Jerosalema.

² Fa hahahy eo anatrehan'ny masoandro amam-bolana, mbamin'ny tafiky ny lanitra rehetra, izay efa tiany, notompoiny, narahiny, nilany hevitra ary niankohofany teo anatrehany; ka tsy hangonina na halevina ireo taolana ireo, fa hanjary zezika eo ambonin'ny tany. Ary ny ho faty fa tsy ho velona, no ho aleon'

³ izay sisa tavela rehetra amin'ity taranaka ratsy ity, any amin'ny tany handroahako azy any, - teny marin'ny Tompon'ny tafika.

⁴ Lazao azy ireo hoe: Izao no lazain'ny Tompo: Moa ny lavo, tsy miarina va? ary moa ny diso làlana, tsy miverina va?

⁵ Ka nahoana ary ity vahoaka eto Jerosalema no efa diso làlana, ka no dia mbola mizotra amin'ny hadisoana ihany? Fa mifikitra mafy amin'ny fitaka izy ireo, ka tsy mety miverina akory.

⁶ Nitandrina tsara aho ary nihaino: Tsy miteny araka ny mety izy ireo; tsy misy manenina amin'ny haratsiany, na manao hoe: Inona re ity nataoko e? Fa dia samy rafitra mihazakazaka indray avokoa, hoatra ny soavaly miezaka ho amin'ny ady!

⁷ Ny vano eny amin'ny amin'ny habakabaka aza mahalala ny fotoan'androny, ny domohina aman-tsidintsidina mbamin'ny vanobe, samy mitandrina ny fotoam-piverenany koa; fa ny vahoakako kosa, tsy mahalala ny lalan'ny Tompo.

⁸ Ahoana no ahalazanareo hoe: Hendry izahay, ary mbý ato aminay ny làlan'ny Tompo? Indro fa ny fandaharan-dainga nataon'ny mpampiana-dalàna mahatonga izany ho lainga!

⁹ Ny hendry dia efa mahazo henatra, miraviravy tànana, ary voasambotra, indro fa nanary ny tenin'ny Tompo izy ireo! Ka inona intsony no ho fahendreny eo...?

¹⁰ Noho izany, dia homeko ny hafa ny vadiny, ary ny sahany homeko ny tompo hafa; satria hatramin'ny kely indrindra ka hatramin'ny lehibe indrindra, samy manao filàna tsy marina avokoa; ary hatramin'ny mpaminany ka hatramin'ny mpisorona, samy mpamitaka avokoa.

¹¹ Ataotaony foana ny fitsaboana ny ferin'ny zanakavavin'ny vahoakako, lazainy hoe: Fiadanana! Fiadanana! Nefa tsy misy fiadanana tsinona.

¹² Homenarina izy, fa nanao fahavetavetana, nefa tsy mba mahalala menatra intsony izy, ary tsy mba valahara! koa dia hiara-davo amin'izay lavo izy ireo; ary hiretaka amin'ny andro hamangiako azy izy, hoy Iaveh.

¹³ Indro horaofiko izy ireo, dia hongoahako, - teny marin'ny Tompo. Ny voaloboka tsy misy voam-boaloboka intsony; ny aviavy tsy misy voan'aviavy intsony, ary ny raviny aza malazo! Ary izy ireo, nanendreko olona hanafika ny taniny.

¹⁴ Nahoana isika no mitomoe-poana? Mivoria hianareo, andeha isika ho ao an-tànana mimanda, dia aoka ho faty ao; satria Iaveh Andriamanitsika mandevona antsika, sy mampisotro antsika rano misy poizina, noho ny nanotantsika tamin'ny Tompo!...

¹⁵ Nanantena fiadanana isika, nefa tsy mahita soa kely akory, sy andro fanaretana, kanjo fampitahorana no mitranga!

¹⁶ Re hatrany Dana ny fiefonefon'ny soavaliny. Raha mahare ny fanenon'ny soavaliny dia mihorohoro avokoa ny tany. Tonga izy, dia levoniny ny tany mbamin'izay ao aminy, ny tanàna mbamin'ny mponina ao aminy.

¹⁷ Fa indro alefako hamely anareo ny bibilava sy ny aspika, izay tsy leon'ny ody fankatoavana; dia hanaikitra anareo ireny, - teny marin'ny Tompo.

¹⁸ Indrisy, ry fampiononana ahy amin'ny fahoriako ô! Reraka ny foko ato anatiko!

¹⁹ Injany tonga amiko avy any an-tany lavitra, ny fitarainan'ny zanakavavin'ny oloko manao hoe: Tsy ao Siona intsony va Iaveh? Tsy ao afovoany intsony va ny mpanjakany? Nahoana izy ireo no nampahatezitra ahy tamin'ny sampiny, sy tamin'ny zava-poana avy any amin'ny firenen-kafa?

²⁰ Lasa ny fararano, tapitra ny fampakaram-bokatra nefa isika ity tsy mbola voavonjy!

²¹ Mangana aho amin'ny hamanganan'ny zanakavavin'ny oloko; misaona aho ary raiki-tahotra aho.