Bokin'i Jeremia
Toko faha-20
3 Ny ampitso dia nasain'i Fasora hotsoahana amin'ny boloky hazo Jeremia, ka hoy Jeremia taminy: Tsy Fasora intsony no iantsoan'ny Tompo anao, fa Magora-Misabiba. 4 Satria izao no lazain'ny Tompo: Indro atolotro ho amin'ny fangorohoroana, hianao sy ny sakaizanao. Izy ireo ho lavon'ny sabatry ny fahavalony, ary hianao hahita maso an'izany. Jodà rehetra koa hatolotro ho eo an-tànan'ny mpanjakan'i Babilona, ka hoentiny babo any Babilona izy ireo, ary hovonoiny amin'ny sabatra. 5 Hatolotro avokoa ny harena amin'ity tanàna ity, ny vokany rehetra aman-java-tsoany rehetra, ary ny rakitra rehetra an'ny mpanjakan'i Jodà, hatolotro ho eo an-tànan'ny fahavalony; ka hobaboiny, halainy, hoentiny mankany Babilona.6 Ary hianao, ry Fasora, mbamin'izay rehetra mitoetra ao an-tranonao, ho lasan-ko babo hianareo; ho any Babilona hianao; ka any no hahafatesanao; any no handevenana anao, dia hianao mbamin'ny sakaizanao rehetra, izay naminanianao lainga.
7 Ry Iaveh ô, notarihinao aho, ka voatarika. Nosamborinao aho, ka nahery hianao. Zavatra fihomehezana aho isan'andro; maneso ahy avokoa ny olona rehetra.
8 Fa isaky ny miteny aho, dia manao antso avo, manambara loza sy fandringanana, ka ny tenin'ny Tompo tonga fandatsana sy fihomehezana ahy isan'andro.
9 Hoy aho: Tsy hilaza ny aminy intsony aho, tsy hiteny amin'ny anarany intsony aho!... dia nisy toy ny afo nirehitra ato am-poko, voahidy ao anatin'ny taolako; nanao izay hihazonana azy aho nefa tsy nahatana azy.
10 Fa efa reko ny vava ratsin'ny olona betsaka manao hoe: Fangorohoroana avy hatraiza hatraiza! Torio izy, handeha hotorintsika izy! Ny olona rehetra tsara fihavanana amiko, manao andry maso ny diako: Raha mety ho voatarika izy dia hahombiazantsika, ka dia hamaly faty azy isika.
11 Iaveh anefa no momba ahy, toy ny lehilahy mahery; ka hitambotsitra ireo mpanenjika ahy, fa tsy haharesy. Ny tsy hahombiazany hahasafo-kenatra azy amin'ny fahafaham-baraka mandrakizay tsy hohadinoina.
12 Ry Iavehn'ny tafika, hianao izay mizaha toetra ny marina, izay mahita ny voa sy ny fo, hahita ny famalianao an'ireo aho, fa hianao no nanankinako ny adiko.
13 Mihirà ho an'ny Tompo, miderà an'ny Tompo, fa manafaka ny fanahin'ny ory, amin'ny tànan'ny ratsy fanahy izy.
14 Ho voaozona anie ny andro nahaterahako! Tsy hotahina anie ny andro niterahan'i neny ahy!
15 Ho voaozona anie ny olona nitondra teny tamin'ikaky, sy nanao hoe: Tera-dahy hianao! ka nahafeno hafaliana azy!
16 Aoka izany olona izany ho toy ny tanàna noravan'ny Tompo, ka tsy nanenenany! Aoka izy, ny maraina, handre ny fitarainan'ny olon-dresy, ary ny mitataovovonana, ny akoralavan'ny mpandresy!
17 noho izy tsy namono ahy hatrany am-bohoka, hahatonga an'i neny ho fasako, na ho voatana ao an-kibony mandrakizay aho!
18 Nahoana aho no nivoaka avy ao an-kibony, hahita fijaliana amam-pahoriana, sy handany ny androko amin'ny fahafaham-baraka!
Toko faha-21
1 Izao no teny avy amin'ny Tompo natao tamin'i Jeremia, raha nirahin'i Sedesiasa mpanjaka, ho any aminy, Fasora zanak'i Melkiasa sy Sofoniasa mpisorona, zanak'i Maasiasa, hanao aminy hoe:2 Masìna hianao, manontania an'ny Tompo ho anay; fa miady aminay Nabokodonozora mpanjakan'i Babilona; angamba Iaveh hanao indray ho anay ireo asany mahagaga lehibe rehetra, mba hialan'ilay io aminay. 3 Dia hoy ny navalin'i Jeremia azy ireo: Lazao amin'i Sedesiasa, ataovy hoe:
4 Izao no lazain'ny Tompo, Andriamanitr'Israely: Indro, ny fiadiana eny an-tànanareo, entinareo miady any ivelan'ny manda, amin'ny mpanjakan'i Babilona sy ny Kaldeana, izay manao fahirano anareo, dia hataoko miverina any aoriana sy hangoniko eo afovoan'ny tanàna; 5 ary izaho hiady aminareo amin'ny tànana ahinjitra sy sandry mahery amim-pahatezerana, fisafoahana sy fahavinirana mafy. 6 Hasiako avokoa ny mponina amin'ity tany ity, na olona na biby, ka ho fatin'ny pesta mafy. 7 Manaraka izany, - teny marin'ny Tompo, - hatolotro Sedesiasa mpanjakan'i Jodà, ny mpanompony, ny vahoaka, mbamin'izay rehetra sisa tsy matin'ny pesta sy ny sabatra ary ny mosary, amin'ity tanàna ity, ho eo an-tànan'i Nabokodonozora, mpanjakan'i Babilona, sy ho eo an-tànan'ny fahavalony amam-pitady ny ainy, ka hasiany amin'ny lelan-tsabatra, tsy hotsitsiny, tsy hananany antra na indrafo akory. 8 Dia lazao amin'io vahoaka io hoe: Izao no lazain'ny Tompo: Indro ataoko eo anoloanareo, ny làlan'ny fiainana sy ny làlan'ny fahafatesana.
9 Izay mbola hitoetra amin'ity tanàna ity dia ho fatin'ny sabatra na ny mosary na ny pesta; izay hivoaka hanatona ireo Kaldeana manao fahirano anareo kosa dia ho velona ary hanana ny ainy ho babony. 10 Satria hahatonga loza, fa tsy soa amin'ity tanàna ity, no nitodihan'ny tavako azy, - teny marin'ny Tompo, - dia hatolotro eo an-tànan'ny mpanjakan'ny Babilona izy, ka hodorany ho levona amin'ny afo. 11 Ary lazao amin'ny taranaky ny mpanjakan'i Jodà hoe: Mihainoa ny tenin'ny Tompo hianareo,
12 ry taranak'i Davida: Izao no lazain'ny Tompo: Manaova fitsarana marina, hatramin'ny maraina; afaho amin'ny tànan'ny mpampahory ny ampahorina, fandrao mipoaka hoatry ny afo ny fahatezerako, ka hirehitra tsy ho azon'olona vonoina, noho ny haratsian'ny ataonareo.
13 Ary izao kosa no momba anao, ry mponina ao an-dohasaha, ry vatolampin'ny tany lemaka, - teny marin'ny Tompo, hianao izay manao hoe: Zovy moa no hidina aty aminay, sy hiditra aty amin'ny fierenay?
14 Hanasazy anareo araka ny vokatry ny asanareo aho - teny marin'ny Tompo; handrehitra afo amin'ny alany aho, ka handevona ny manodidina azy rehetra izany.
Toko faha-22
1 Izao no lazain'ny Tompo: Midìna ho any an-tranon'ny mpanjakan'i Jodà,2 ka lazao eny izao teny izao, ataovy hoe: Henoy ny tenin'ny Tompo, ry mpanjakan'i Jodà, izay mipetraka eo amin'ny seza fiandrianan'i Davida, dia hianao sy ny mpanomponao mbamin'ny vahoakanao, izay miditra amin'ireto vavahady ireto. 3 Izao no lazain'ny Tompo: Manaova fitsarana sy fahamarinana hianareo; afaho amin'ny tànan'ny mpampahory ny ampahorina: ny vahiny, ny kamboty, amam-pitondratena; dia aza ratsy fitondra azy na manao an-keriny aminy, na mandatsa-dra tsy manan-tsiny amin'ity tany ity hianareo.
4 Raha tanterahinareo tsara izao teny izao: ny mpanjaka mipetraka eo amin'ny seza fiandrianan'i Davida, hiditra amin'ny vavahadin'ity trano ity, mitaingina kalesa aman-tsoavaly dia izy, ny mpanompony amam-bahoakany.
5 Fa raha tsy mihaino izany teny izany kosa hianareo, dia mianiana amin'ny tenako aho, - teny marin'ny Tompo, fa ho rava no halehan'ity lapa ity.
6 Satria izao no lazain'ny Tompo, ny amin'ny taranaky ny mpanjakan'i Jodà: Tahaka an'i Galaada hianao amiko, tahaka ny tampon'i Libàna, nefa indro hampanjariko efitra, tanàna tsy honenana, hianao.
7 Efa manomana mpandrava hamely anao aho, ka samy mitondra ny fiasany avy izy ireo; hokapainy ny sederanao voafantina, dia hatsipiny amin'ny afo.
8 Firenena maro no handalo amin'ity tanàna ity, ka hifampilaza hoe: Nahoana no dia nataon'ny Tompo tahaka izao ity tanàna lehibe ity?
9 Ary hataon'ny olona hoe: Satria nahafoy ny faneken'ny Tompo Andriamaniny izy ireo, ka niankohoka teo anatrehan'ny andriamani-kafa sy nanompo ireny.
10 Aza itomaniana ilay maty ary aza igogogogoana izy io; fa ilay lasana no itomanio dia itomanio, fa tsy hiverina intsony izy, tsy hahita intsony ny tany nahaterahany!
11 Fa izao no lazain'ny Tompo: Ny amin'i Seloma, zanak'i Josiasa, mpanjakan'i Jodà, izay nanjaka nisolo toerana an'i Josiasa rainy, sy efa niala tamin'ity fitoerana ity: Tsy hiverina aty intsony izy,
12 fa ho faty any amin'ny tany nitondrana azy ho babo, ka tsy hahita ity tany ity intsony.
13 Loza ho an'izay manorina ny tranony tsy amin'ny rariny, sy ny rihany tsy amin'ny hitsiny; izay mampiasa maina ny namany, tsy mandoa ny karamany,
14 sady manao hoe: Hanao trano lehibe ho ahy aho, sy efi-trano malalaka; dia asiany varavarankely betsaka, ataony tafo sedera, ary hosorany loko mena mivaivay.
15 Noho hianao adalan-tsedra va no maha-mpanjaka anao? Moa tsy nisotro sy nihinana va ny rainao: Nanao ny hitsiny sy ny rariny izy, ary tamin'izany dia tsara ny zavatra rehetra taminy;
16 nitsara ny adin'ny ory sy ny mahantra izy, ka amin'izany tsara ny zavatra rehetra. Moa tsy izany va no fahalalana ahy, - teny marin'ny Tompo?
17 Fa ny masonao amam-ponao tsy mihevitra afa-tsy ny tenanao, mbamin'ny ra tsy manan-tsiny, handatsahana azy sy ny fampahoriana ary fanaovana an-keriny, hanatanterahana izany.
18 Noho izany, izao no lazain'ny Tompo, ny amin'i Joakima, zanak'i Josiasa, mpanjakan'i Jodà: Tsy hitomaniana izy hatao hoe: Indrisy, ry rahalahy, indrisy, ry anabavy. Tsy hitomaniana izy hatao hoe: Indrisy, Tompoko! Indrisy, ry mpanjaka!
19 Halevina toy ny fandevina ampondra izy; hotaritarihana sy hariana any ivelan'ny vavahadin'i Jerosalema.
20 Miakara any Libàna, dia miantsoa mafy; manandrata feo any Basana! Miantsoa mafy any an-tampon'i Abarima, fa torotoro avokoa ireo lehilahinao.