Bokin'i Baroka

Toko faha-6

²⁰ Ny tavany, nanjary maintin'ny setroka mipololotra avy ao an-trano. ²¹ Ny tenany aman-dohany, anidintsidinan'ny vorondolo aman-tsidintsidina, mbamin'ny voron-kafa; hatramin'ny saka avy no mikarenjy toy izany eo. ²² Ho fantatrareo amin'izany fa tsy andriamanitra akory ireny, ka aza matahotra azy. ²³ Ny volamena apetaky ny olona handravahana azy, raha tsy misy manesotra ny harafesina aminy, tsy hainy ampamirapiratina akory, satria tsy mandre na inona na inona aza izy, tamin'ny nandrendrehana azy.

²⁴ Novidin-dafo loatra ireo sampy ireo, nefa tsy misy fofon'aina kely akory. ²⁵ Tsy manan-tongotra izy ireo, fa olona no milanja azy an-tsoroka, ka maneho amin'ny olona izy amin'izany ny tsy fahefany mahamenatra. Aoka hiara-menatra aminy koa izay manompo azy. ²⁶ Raha potraka amin'ny tany izy, tsy afa-miarina ho azy; ary raha hatsangan'olona izy, tsy afa-mijoro ho azy. Toy ny atao eo anatrehan'ny maty ny fanatitra atao eo anatrehany. ²⁷ Amidin'ny mpisorona ny sorona aterin'ny olona aminy, ka entiny manasoa ny tenany; ny vadin'ireo no manao omby sira amin'izany, sady tsy mba misy omeny na ny mahantra na ny kilemaina. ²⁸ Na ny vehivavy vao avy niteraka, na izay mbola amin'ny toetra maloto, samy mikasika ny sorony. Koa rahefa fantatrareo amin'izany fa tsy andriamanitra ireny, dia aza atahoranareo. ²⁹ Ary ahoana ary no hiantsoana an'ireny hoe andriamanitra? Fa vehivavy no tonga manolotra ny fanatiny amin'ireo andriamanitra volafotsy, na volamena, na hazo ireo. ³⁰ Ny mpisorona, ao an-tempolin'izy ireo, dia mipetraka, ny ankanjony rovitra, ny lohany aman-tavany voaharatra; ary ny lohany tsy misatroka. ³¹ Minaonaona mikiakiaka eo anatrehan'ny andriamaniny izy ireo, mova tsy ny any amin'ny fihinanam-be raha misy maty. ³² Esorin'ny mpisorony ny fitafian'izy ireny, dia atafiny ny vadiny aman-janany. ³³ Na asian-dratsy na asian-tsoa, samy tsy hisy voavaliny izany; tsy mahay manangana mpanjaka izy, na manongana azy. ³⁴ Tsy mahay manome harena koa izy, na dia variraiventy aza. Raha misy nanao voady taminy, ka tsy manefa izany, dia tsy mitaraina izy. ³⁵ Tsy hanafaka olona iray akory amin'ny fahafatesana izy, na hanatsoaka ny osa eo an-tanan'ny manam-pahefana. ³⁶ Tsy hampihiratra jamba izy, na hahafaka olona amin'ny fahoriana manjo azy. ³⁷ Tsy hamindra fo ny mpitondratena izy, na hanisy soa ny kamboty. ³⁸ Manahaka ny vatolampy miendaka avy amin'ny tendrombohitra ireny sampy hazo voapetaka volamena sy volafotsy ireny; ka izay manompo azy no hahazo henatra. ³⁹ Ahoana ary no hinoana na hilazana fa andriamanitra ireny? ⁴⁰ Ny Kaldeana aza, manala baraka azy ireny; fa nony mahita olona tsy mahateny izy ireo, dia manolotra azy an'i Bela, sady mangataka mba ho afa-miteny ilay moana, mova tsy ny mahare zavatra iny ilay andriamanitra. ⁴¹ Ary na dia fantany aza izany, dia tsy mety mahafoy ny sampiny izy; satria tsy manam-pandrenesana ireny. ⁴² Ny vehivavy mietra tady, mandeha hipetraka eny an-dàlam-be any, mandoro lafarina ratsiratsy foana; ⁴³ nony misy mpandalo mitarika ny iray amin'izy ireo, ka nandry taminy, dia maneso ny namany eo akaikiny izy, fa tsy mba noheverina ho mendrika izany haja izany; ka tsy mba nahita ny randran-jozorony tapaka. ⁴⁴ Fitaka avokoa izay rehetra atao momba ny sampy; ka ahoana no hinoana na hilazana fa andriamanitra izy? ⁴⁵ Ny mpanao taozavatra amam-panefy volamena no nanao azy ireny; tsy mety ho hafa toetra afa-tsy arak'izay itiavan'ny mpanao azy izy.

⁴⁶ Ary ireo mpiasa namorona azy tsy manana andro lava hiainana; ka aiza indray no haharetan'izay asa nataony? ⁴⁷ Fitaka sy latsa no hany sisa navelany ho an'ny taranany. ⁴⁸ Nony injay misy ady, na loza hafa, dia miara-midinika ny mpisorona, hahitany izay hieren'izy sy ireo andriamaniny. ⁴⁹ Ahoana ange no tsy hahalalan'ny olona fa tsy andriamanitra ireo izay tsy maharo tena amin'ny ady, na ny loza hafa? ⁵⁰ Ho hita any aoriana any fa fitaka fotsiny ireo sampy hazo voapetaka volamena sy volafotsy ireo; hiharihary amin'ny firenena rehetra sy ny mpanjaka rehetra fa tsy andriamanitra izy ireo, fa asan-tanan'olombelona ihany; ary tsy misy ao aminy izay asan'Andriamanitra akory. ⁵¹ Amin'iza indray ary no mbola tsy hazava ihany fa tsy andriamanitra ireo? ⁵² Izy ireo tsy hahatsangana mpanjaka amin'ny tany na oviana na oviana, na hahalatsaka orana amin'ny olombelona.

⁵³ Tsy hahay hitsara ny raharaha momba ny tenany, na haharo amin'ny tsy rariny; satria tsy mahefa na inona na inona, hoatra ny voronkahaka mihevaheva anelanelan'ny lanitra sy ny tany izy. ⁵⁴ Ary raha avy izay hianjeran'ny afo amin'ny tranon'ireo andriamanitra hazo, voapetaka volamena sy volafotsy ireo, ny mpisorony ho vaky mandositra sy ho voavonjy; fa izy kosa ho levona toy ny sakamandimby ao fovoan'ny afo. ⁵⁵ Tsy hahatohitra mpanjaka iray na tafika iray akory izy; ka ahoana no anekena sy iheverana azy ho andriamanitra? ⁵⁶ Tsy afa-mandositra ny mpangalatra aman-jiolahy ireo andriamanitra hazo, voapetaka volafotsy amam-bolamena ireo.

⁵⁷ Halain'ny olona mahefa noho izy ireo ny volafotsy amam-bolamena, dia hitsoaka izy mitondra ny fitafiana sarobidy natafin'ny olona an'ireo; ireo andriamanitra ireo kosa tsy hahavonjy tena! ⁵⁸ Koa aleo ho mpanjaka maneho ny heriny, na vilany nahasoa ao an-trano, ampiasain'ny tompony, toy izay ho izany andriamanitra sandoka izany. ⁵⁹ Ny masoandro amam-pahazavana mbamin'ny kintana izay mamirapiratra sy alefa hahasoa ny olombelona, dia manaiky an'Andriamanitra. ⁶⁰ Torak'izany koa, ny helatra raha miseho, maha-te-hijery; ny rivotra koa, mifofofofo amin'ny tany rehetra; ⁶¹ ary ny rahona koa, rahefa didian'Andriamanitra hitety ny tany rehetra, manatanteraka izay nandidiana azy. ⁶² Torak'izany koa ny afo, raha irahina avy any ambony handevona ny tendrombohitra mbamin'ny ala, manefa izay nandidiana azy. Fa ny sampy kosa, tsy mba azo ampitahaina amin'ireo zavatra rehetra ireo akory, na amin'ny hatsaran-tarehy, na amin'ny hery. ⁶³ Koa tsy mety ny mihevitra na milaza an'ireo ho andriamanitra, satria tsy mahay manavaka izay rariny izy, na afa-manisy soa ny olombelona. ⁶⁴ Koa rahefa fantatrareo àry fa tsy andriamanitra ireny, dia aza matahotra azy. ⁶⁵ Tsy mahay manozona na mitso-drano ny mpanjaka ireny;

⁶⁶ tsy maneho famantarana any an-danitra amin'ny firenena, na mamirapiratra hoatra ny masoandro; na mahazava hoatra ny volana. ⁶⁷ Aleo ny biby, toy izay ireny; satria ny biby mahay mandositra ka hahita fialofana dia hanasoa ny tenany ahay. ⁶⁸ Koa amin'izany, na avadika atsy na avadika aroa, dia tsy mazava amintsika ny maha-andriamanitra an'ireny; koa aza matahotra azy. ⁶⁹ Toy ny kiady anaty saham-boatango, tsy maharo na amin'inona na amin'inona, torak'izany koa ny andriamanitra hazon'izy ireo, voasarona volamena amam-bolafotsy.