Bokin'i Ezekiela

Toko faha-3

¹⁰ Hoy koa izy tamiko: Ry zanak'olona, alatsaho am-po avokoa ny teny holazaiko aminao, ary henoy amin'ny sofinao, izy.

¹¹ Mandehana hianao mankany amin'ireo lasan-ko babo, dia any amin'ireo zanaky ny firenenao, ka mitenena aminy; lazao aminy hoe: Izao no lazain'ny Tompo Tompo, na hihaino izy ireo na tsy hihaino. ¹² Dia nofaohin'ny Fanahy aho, ka injay nisy feo nikotrokotroka mafy reko tao ivohoko, nanao hoe: Hankalazaina anie ny voninahitry ny Tompo ao amin'ny fitoerana fonenany.

¹³ Reko ny fikopakopaky ny elatr'ireo zava-manan'aina, nifandona, sy ny firohondrohon'ny kodiarana teo anilany, ary nisy feon-javatra nikotrokotroka mafy. ¹⁴ Nofaohin'ny Fanahy sy entiny aho, ka lasa; fangidiana amam-pisafoahana no tao amin'ny fanahiko; ary ny tànan'ny Tompo nihazona ahy mafy. ¹⁵ Dia tonga tany Tel-Abida aho, tany amin'ireo babo, nonina teo amoron'ny ony Kobara, sy tany amin'ny tany nonenany; ka nandritra ny hafitoana aho, dia ankona foana teo afovoan'izy ireo. ¹⁶ Nony afaka hafitoana, tonga tamiko ny tenin'ny Tompo nanao hoe:

¹⁷ Ry zanak'olona, tendreko ho mpitily eo amin'ny taranak'Israely hianao, hihaino ny teny haloaky ny vavako hianao; ary hananatra azy ireo amin'ny anarako. ¹⁸ Raha izaho milaza amin'ny ratsy fanahy hoe: Ho faty tokoa hianao; nefa hianao kosa tsy mananatra azy, tsy miteny mananatra azy amin'ny làlan-dratsiny, mba hahavelona azy, dia ho faty amin'ny helony ilay ratsy fanahy; nefa hadiniko amin'ny tànanao ny rany. ¹⁹ Fa rahefa nananatra an'ilay ratsy ihany kosa hianao, fa izy no tsy nety niala amin'ny haratsiany aman-dàlan-dratsiny; dia izy ihany no ho faty amin'ny helony; fa hianao kosa dia efa namonjy ny fanahinao. ²⁰ Raha misy olo-marina miala amin'ny fahamarinany sy manao heloka, ka mametraka fandrika eo anoloany aho, dia ho faty izy; noho hianao tsy nananatra azy dia ho faty amin'ny fahotany izy; ny asa fahamarinana nataony tsy ho tsarovana intsony; ary ny rany kosa hadiniko amin'ny tànanao. ²¹ Fa tsy nanota tokoa, dia ho velona tokoa izy, satria nahazo anatra; ary hianao koa, ho efa namonjy ny fanahinao. ²² Teo amiko ny tànan'ny Tompo, ary hoy izy tamiko: Mitsangàna hianao, mankanesa any an-tany lemaka, fa any no hitenenako aminao.

²³ Nitsangana aho nankany an-tany lemaka, dia indro teo ny voninahitry ny Tompo, tahaka ilay voninahitra efa hitako tany amin'ny ony Kobara; ka lavo niankohoka terý aho. ²⁴ Niditra tato anatiko ny Fanahy, ka nataony mijoro amin'ny tongotro aho; ary niteny tamiko Iaveh nanao hoe: Mandehana mirindrin-trano ao aminao. ²⁵ Fa indro hianao, ry zanak'olona, hasiana tady hafatotra, ary tsy ho afa-mivoaka ho any amin'izy ireo. ²⁶ Haraikitro amin'ny lanilaninao ny lelanao, ka ho moana hianao, dia tsy ho mpaniny azy ireo, satria taranaka miodina izy. ²⁷ Rahefa hiteny aminao aho, dia hosokafako ny vavanao, ka hilaza amin'izy ireo hianao hanao hoe: Izao no lazain'ny Tompo Tompo: Izay mety hihaino, aoka hihaino; ary izay tsy mety aoka tsy hihaino; fa taranaka miodina izy ireo.

Toko faha-4

¹ Ary hianao, ry zanak'olona, makà biriky anankiray, apetraho eo anoloanao, ka manorata sarin-tanàna anankiray eo, dia ny sarin'i Jerosalema.

² Ataovy fahirano izy; manaova tilikambo hamelezana azy; manandràta tovon-tany hikatrohana aminy; manorena toby manodidina azy. ³ Ary hianao makà lapoaly vy; atoavy toy ny manda vy eo anelanelanao sy ny tanàna io, ka atodiho hanandrina azy ny tavanao; dia hatao fahirano izy; ka hataonao fahirano izy. Aoka ho famantarana ho an'ny taranak'Israely izany. ⁴ Ary ataovy ambany mandry ny ilanao havia; ka ataovy eo ny heloky ny taranak'Israely; ary ny andro handrianao toy izany, dia hitondranao ny helok'izy ireo.

⁵ Ary araka ny isan'ny andro no nanisako ny taonan'ny helok'izy ireo ho anao; ka dia sivifolo sy telon-jato andro no hitondranao ny heloky ny taranak'Israely. ⁶ Rahefa tapitra ireo andro ireo, dia ny ilanao havanana indray no hataonao ambany mandry, ka hitondra ny heloky ny taranak'i Jodà kosa hianao, efapolo andro; fa nisaiko ho taona iray ny andro iray ho anao. ⁷ Dia hitodika hanandrina an'i Jerosalema atao fahirano, ny tavanao aman-tsandrinao mihanjaka, ka haminany hamely azy hianao. ⁸ Ary indro, efa nopetahako tady hianao, mba tsy ho afa-mivadi-mandry, mandra-pahatapitrao ny andron'ny fahiranonao. ⁹ Makà fromenta, orja, kalamaka, voanemba, ampemba ary epaotra; ataovy am-bilany iray ireo, ka anaovy mofo ho anao, araka ny isan'ny andro handrinao amin'ny ilanao, sivifolo sy telon-jato andro no hihinananao azy. ¹⁰ Roapolo sikla no lanjan'ny haninkohaninao amin'ny indray andro, asio elanelany ny fihinanana azy. ¹¹ Rano kely ihany no hosotroinao, dia ampahenin'ny hina, asio elanelany ny fisotro azy. ¹² Toy ny mofo orja no ihinano azy; ary diky no anendaso azy, eo imason'izy ireo.

¹³ Dia hoy Iaveh tamiko: Toy izany no hihinanan'ny zanak'Israely ny mofony voaloto, any amin'ny firenena handroahako azy. ¹⁴ Ka hoy aho: Indrisy! Iaveh, Tompo ô, tsy mba voaloto na oviana na oviana ny fanahiko; tsy mba nihinana biby maty, na voaviravira aho, hatramin'ny fahatanorako ka mandrak'ankehitriny; ary tsy mbola niditra ny vavako akory izay hena maloto. ¹⁵ Dia hoy izy tamiko: Jereo fa ekeko hosoloina taim-biby ihany ny diky, ka dia eo ambonin'izany no hanendasanao ny mofonao. ¹⁶ Ary hoy izy tamiko: Ry zanak'olona, indro hotapahako ny tehana mofo any Jerosalema, ka an-danjany sady am-panahiana no hihinanan'izy ireo mofo; ary am-patrany sady amin-kovitra no hisotroany rano. ¹⁷ Satria, ny hanina amam-pisotro tsy ho ampy; ny tenany, samy hihareraka sy hihalevona avy izy ireo, noho ny haratsiany.

Toko faha-5

¹ Ary hianao, ry zanak'olona, makà lelan-java-maranitra, raiso izy ho harezan'ny mpanala volombava, dia ento mitety ny lohanao sy saokanao izy; rahefa izany, makà mizàna fandanjana, ka zarao izay voatapakao.

² Ny ampahatelony, dory amin'ny afo, eo afovoan'ny tanàna, rahefa tapitra ny andron'ny fahirano; ny ampahatelony, alao ka asio ny sabatra manodidina ny tanàna; ny ampahatelony aelezo ho amin'ny rivotra, fa hanatsoaka sabatra avy ao aoriany aho. ³ Ary hakao vitsivitsy izy, fonosy amin'ny sisin-dambanao; ⁴ ka io sisa io indray, analao, ka hatsipinao ao anaty afo, ka hodoranao amin'ny afo. Avy eo no hivoahan'ny afo ho amin'ny taranak'Israely rehetra. ⁵ Izao no lazain'ny Tompo, Tompo: Iny ilay Jerosalema nataoko eo afovoan'ny firenena, ary faritany malalaka no manodidina azy.

⁶ Noho ny haratsiany anefa, nanohitra ny didiko mihoatra noho ny firenena izy, sy ny lalàko mihoatra noho ny tany manodidina azy; satria nanary ny didiko izy, ary tsy nandeha araka ny lalàko. ⁷ Koa izao no lazain'ny Tompo Tompo: Satria hianareo niodina mihoatra noho ny firenena manodidina anareo, tsy nandeha araka ny lalàko, tsy nanaraka ny didiko, ary tsy nanao araka ny fomba fanaon'ireo firenena manodidina anareo; ⁸ noho izany, izao no lazain'ny Tompo Tompo: Indro kosa aho izao tamy hamely anao, izaho no hanatanteraka eo afovoanao ny teny voatapaka eo imason'ireo firenena; ⁹ ary noho ny fahavetavetanao rehetra, dia zavatra tsy mbola nataoko, sady tsy hataoko intsony koa, no hataoko aminao; ¹⁰ noho izany, dia hisy ray hihinana ny zanany eo aminao; ary hisy zanaka hihinana ny rainy. Hampihatra fitsarana aminao aho, ary haeliko any amin'ny vazan-tany rehetra, izay sisa eo aminao. ¹¹ Koa amin'izany, velona aho - teny marin'ny Tompo Tompo; - noho hianao nandoto ny fitoerako masina tamin'ny zava-mahamenatra amam-pahavetavetana rehetra nataonao; izaho koa hanorotoro, ka tsy hanana antra ny masoko, ary tsy hamindra fo aho.

¹² Ny ampahatelon'ny zanakao, ho fatin'ny pesta na ho levon'ny mosary eo aminao; ny ampahatelony, ho lavon'ny sabatra eny manodidina anao rehetra eny; ary ny ampahatelony haeliko any amin'ny vazan-tany rehetra; sady hanatsoahako sabatra avy ato aoriana. ¹³ Dia hiala fo ny fahatezerako, ary haraniko mamely azy ireo ny fahavinirako, dia ho afa-po aho, ary izy kosa hahalala, rahefa nampanaraniko mamely azy ireo ny fahatezerako, fa tamin'ny fahasarota-piaroko no efa nitenenako izaho Iaveh. ¹⁴ Hatolotro halàm-baraka sy hampahorina any amin'ny firenena manodidina anao hianao, eo imason'ny mpandalo rehetra. ¹⁵ Rahefa avy izay hanatanterahako fitsarana aminao amim-pahatezerana amam-pahavinirana, sy amim-pamaizan'ny fahavinirako, hianao dia ho latsa sy henatra ary ho fananarana amam-pampitahorana ho an'ny firenena manodidina anao;