Bokin'i Ezekiela
Toko faha-13
4 Toy ny fosa an-tanàna haolo dia toy izany ny mpaminaninao, ry Israely ô !5 Tsy niakatra ho eo amin'ny banga hianareo, na nanangana manda manodidina ny taranak'Israely, mba hifaharany amin'ny ady, amin'ny andron'ny Tompo.
6 Fahitana tsy misy fotony ny azy, ary faminaniana mamitaka no an'ireo manao hoe: Teny marin'ny Tompo; nefa izy ireo tsy nirahin'ny Tompo, ary tsy mahazo manantena ny hahatanteraka ny teniny.
7 Tsy fahitana foana va no hitanareo, tsy faminaniana lainga va no lazainareo, raha hoy hianareo: Teny marin'ny Tompo! nefa aho tsy nilaza tsinona!
8 Koa izao no lazain'ny Tompo Iaveh: Noho hianareo milaza zava-poana, sady fahitana lainga, ny anareo, dia indro aho ho tonga aty aminareo - Teny marin'ny Tompo.
9 Ny tànako hamely an'ireo mpaminany mahazo fahitana tsy misy fotony, sy faminaniana lainga: tsy ho eo amin'ny mpanolo-tsaina ny vahoakako izy; na ho voasoratra amin'ny bokin'ny taranak'Israely; ary tsy hiditra ao amin'ny tanin'Israely; - dia ho fantatrareo fa Iaveh Tompo aho, -
10 noho izy ireo nandrebireby ny vahoakako, nanao hoe: Fiadanana! nefa tsy nisy fiadanana tsinona. Manao manda ny vahoakako, dia indreny izy mandalotra sokay an'izany!
11 Dia lazao amin'izay mandalotra sokay fa hirodana ny manda. Ho avy ny ora-mahery! Milatsaha, ry havandra vato! Mifofofofoa, ry tafio-drivotra!
12 Indro, nirodana ny manda! Tsy hilazan'ny olona va hianareo, hataony hoe: Aiza ity sokay nandaloranareo azy?
13 Koa izao no lazain'ny Tompo Iaveh: Izaho hampifofofofo tafio-drivotra noho ny fahavinirako; hahatonga ora-mahery, noho ny hatezerako; sy havandra vato handringana, noho ny fahavinirako.
14 Harodako ny manda nolalorinareo sokay; hazerako amin'ny tany izy; ka hihanjahanja eo ny fanambaniny; hirodana izy, ary hianareo ho faty eo amin'ny antontany; dia ho fantatrareo fa Iaveh aho.
15 Hanala fo ny hatezerako amin'ny manda aho, sy amin'izay nandalotra sokay azy, ary hilaza aminareo hoe: Tsy misy intsony ny manda! Tsy misy intsony ireo olona nandalotra sokay azy,
16 dia ireo mpaminanin'Israely, izay naminany ny amin'i Jerosalema, sy nahita fahitana hoe ho fiadanana ho azy; nefa tsy nisy fiadanana tsinona; - Teny marin'ny Tompo Tompo.
17 Ary hianao, ry zanak'olona, atodiho ny tavanao, hanandrina ireo zanakavavin'ny firenenao, izay maminany araka ny sitrapony; ka maminania famelezana azy hoe:
18 Izao no lazain'ny Tompo Iaveh: Loza ho an'ireo vehivavy manjaitra ondana, ho an'ny famavanin-tànana rehetra; sy manao ondana ho an'ny loha samihafa habe rehetra; mba hihaza fanahy amin'ny fandrika. Ny fanahin'ny oloko ve, hosamborinareo amin'ny fandrika, ary ny fanahinareo kosa ho velona!
19 Efa nanala voninahitra ahy teo amin'ny oloko hianareo, hahazoanareo ny eran-tanan'ila, ary hahazoanareo sombi-mofo, ka dia mamono ny fanahy tsy tokony ho faty; sy mamelona ny fanahy tsy tokony ho velomina; dia mamitaka amin'izany ny oloko izay mihaino ny lainga.
20 Koa izao no lazain'ny Tompo Iaveh: Indro halako ny ondanareo, izay nataonareo fandrika hihazana fanahy, ka hataoko lasa manidina ireny; hotriariko ireo ondana ireo, hiala eo amin'ny sandrinareo, ary hanafaka ny fanahy nohazainareo tamin'ny fandrika aho, mba ho afa-manidina ireny.
21 Hotriariko ny ondanareo; ary hotsoahiko eo amin'ny tànanareo ny vahoakako; ka tsy ho haza eny an-tànanareo intsony izy; dia ho fantatrareo fa Iaveh aho.
22 Noho hianareo mampahory ny fon'ny marina amin'ny lainga, nefa izaho kosa tsy nampahory azy; sy noho hianareo nankahery ny ratsy fanahy, mba tsy hiverenany avy amin'ny lalan-dratsiny, hahavelona azy;
23 noho izany, tsy hahazo fahitana foana intsony hianareo, na hahazo hitsak'andro intsony; hotsoahiko eo amin'ny tànanareo ny vahoakako, dia ho fantatrareo fa Iaveh aho.
Toko faha-14
1 Tonga tao amiko ny loholona sasany amin'Israely, ka nipetraka teo anoloako.2 Dia tonga tamiko ny tenin'ny Tompo, nanao hoe: 3 Ry zanak'olona, ireo olona ireo dia efa nanangana ny sampin-dozany, ao am-pony, ary ny fanafintohinana mampanota azy, ataony eo anoloan'ny tavany: ka hety hanontanian'ireo va aho?
4 Noho izany, mitenena aminy hianao, ka lazao aminy hoe: Izao no lazain'ny Tompo Iaveh: Na zovy na zovy, amin'ny taranak'Israely manangana ny sampin-dozany ao am-pony, sy manao eo anoloan'ny tavany ny fanafintohinana mampanota azy, raha sendra manatona ny mpaminany izy io, dia tenako izaho Iaveh no hamaly azy, araka ny tandrifin'ny sampiny maro, 5 mba hahavoazako ny taranak'Israely amin'ny fony; satria efa nivily niala tamiko izy mbamin'ny sampin-dozany rehetra. 6 Ka lazao amin'ny taranak'Israely hoe: Izao no lazain'ny Tompo Iaveh: Miverena hianareo; mialà amin'ny sampin-dozanareo; ary mihambohoa tsy hanatri-tava ny fahavetavetanareo rehetra.
7 Fa na zovy na zovy amin'ny taranak'Israely, na amin'ny vahiny mitoetra eo amn'Israely misaraka amiko, manangana ny sampin-dozany ao am-pony, ary manao eo anatrehan'ny tavany ny fanafintohinana mampanota azy, raha tonga manatona ny mpaminany izy io mba hanontaniany amiko ho azy, dia ny tenako izaho Iaveh, no hamaly azy. 8 Ka ny tavako, hanandrina izany olona izany; izy holevoniko hataoko famantarana aman'ohabolana, hofongorako eo amin'ny vahoakako; dia ho fantatrareo fa Iaveh aho. 9 Ary raha mety ho voasodoka ny mpaminany, ka manonona teny sasantsasany, dia izaho Iaveh no ho nanodoka an'izany mpaminany izany; ary haninjitra ny tànako aminy aho, ary hofongorako eo amin'ny vahoakako Israely izy.
10 Dia hitondra ny valin'ny haratsiany izy, - arakaraka ny haratsian'izay manontany no haratsian'ny mpaminany koa, -
11 mba tsy hivilian'ny taranak'Israely hanalavitra ahy intsony, sy tsy handotoany tena amin'ny fahadiasoany rehetra. Amin'izay, izy ireo dia ho vahoakako, ary izaho dia ho Andriamaniny, - teny marin'ny Tompo Iaveh. 12 Tonga tamiko ny tenin'ny Tompo nanao hoe:
13 Ry zanak'olona, Raha misy firenena manota miodina amiko ka ahinjitro aminy ny tànako, dia tapahako ny tehina mofo ho azy, sy alefako hamely azy ny mosary, dia haringako ny olona sy ny biby,
14 ary eo amin'izany tany izany dia misy ireto olona telo ireto: Noe, Daniely sy Joba... dia hahavonjy ny fanahiny, amin'ny fahamarinany izy ireo; - teny marin'ny Tompo Iaveh.
15 Raha manefa biby masiaka amin'ny tany aho, ka ilaozan'ny mponina sy zary efitra tsy halehan'ny olona na iza na iza azon'izany biby izany,
16 ary raha ao amin'izany tany izany izy telo lahy ireo, velona aho - teny marin'ny Tompo Iaveh, tsy hahavonjy ny zanany lahy na ny zanany vavy izy; ny tenan'izy ireo ihany no ho voavonjy, fa ny tany ho lao.
17 Na raha mandefa sabatra hamely izany tany izany aho, ary manao hoe: Aoka hijinja ny tany ny sabatra... sady mandringana ny olona sy ny biby;
18 ka eo afovoan'io tany io koa izy telo lahy ireo; velona aho - teny marin'ny Tompo Iaveh: dia tsy hahavonjy ny zanany lahy na ny zanany vavy izy ireo; ny tenany ihany no ho voavonjy.
19 Na raha mandefa pesta ho amin'izany tany izany aho, ary manidina ny hatezerako aminy, amin'ny fandatsahan-dra, sady mandringana ny olona sy ny biby,
20 ka eo afovoan'io tany io koa Noe sy Daniely ary Joba, velona aho - teny marin'ny Tompo Iaveh: tsy hahavonjy ny zanany lahy na ny zanany vavy izy ireo, fa ny tenany ihany no hahavonjy ny fanahiny, noho ny fahamarinany.
21 Satria izao no lazain'ny Tompo Iaveh: Na dia rahefa nalefako hamely an'i Jerosalema aza ny fikapohana efatra mandoza: ny sabatra, ny mosary, ny biby masiaka, ary ny pesta, ka nandringana ny olona sy ny biby,
22 dia hisy sisa ihany, ho afa-mandositra, ka hivoaka ny tanàna, dia zanakalahy, sy zanakavavy. Ho avy eo aminareo izy, dia hahita ny fitondran-tenany aman'asany hianareo, ka dia hionona hianareo ny amin'ny loza nalefako hamely an'i Jerosalema, dia ny amin'izay rehetra nataoko nihatra taminy.
23 Hampionona anareo izy ireo, rahefa mahita ny fitondran-tenany aman'asany hianareo, ka ho fantatrareo fa tsy hoe tsy misy antony ny nanaovako izay rehetra nataoko taminy, - teny marin'ny Tompo Iaveh.
Toko faha-15
1 Tonga tamiko ny tenin'ny Tompo nanao hoe:2 Ry zanak'olona, Inona no ihoaran'ny tahom-boaloboka, noho ny tahon'ny hazo hafa rehetra, noho ny rantsan-kazo izay isan'ireo hazo any an'ala?
3 Moa mba fangalan-kazo, hanaovan-javatra va izy? Na mba fangalana hombo hanantonan-javatra akory?
4 Atao ao anaty afo izy, holevoniny, dia levon'ny afo ny laniny roa; may koa ny tenantenany; ka azo atao inona indray izy?
5 Fony mbola tsy nahafahana aza izy, tsy azo nanaovana na inona na inona; ka mainka rahefa kila sy main'ny afo, ho azo atao inona intsony?
6 Ka izao no lazain'ny Tompo Iaveh: toy ny tahom-boaloboka any amin'ny hazo an'ala, izay hazo atolotro holevon'ny afo, no hanolorako ny mponina ao Jerosalema.
7 Hitodika hanandrina azy ny tavako; afa-nandositra ny afo izy, nefa ho levon'ny afo ihany indray; dia ho fantatrareo fa Iaveh aho, rahefa atodiko hanandrina azy ireo ny tavako.