Bokin'i Ezekiela

Toko faha-21

²³ Tonga tamiko ny tenin'ny Tompo, nanao hoe:

²⁴ Manorita hianao, làlan-droa halehan'ny sabatry ny mpanjakan'i Babilona, ry zanak'olona; ataovy avy amin'ny tany iray ihany izy roa ireo; ary manoritra famantarana, ka eo an-dohan'ny làlan'ny tanàna anankiray no sorito izany.

²⁵ Manorita làlana halehan'ny sabatra ho any Rabata, renivohitry ny taranak'i Amona, na ho any amin'i Jodà, hamely an'i Jerosalema, tanàna mimanda. ²⁶ Fa ny mpanjakan'i Babilona, nijanona teo an-tsampanan-dàlana, eo an-dohan'ny làlan-droa, mba hanao sikidy: ka manetsiketsika ny zana-tsipìka, manontany amin'ny terafima, mizaha amin'ny atikena. ²⁷ Eo an-tànany ankavanana ny sikidy Jerosalema, hanangana lohondry vy hamely ny manda, handoaka fidirana amin'ny banga, hanandra-peo amin'ny akoran'ady, hanangana lohondry vy hamelezana ny vavahady, hanandratra tovon-tany, hanorina manda. ²⁸ Faminaniana lainga ihany izany, eo imason'izy ireo; manana ny faminaniana masina indrindra hiaro azy izy ireo; nefa hampahatsiaroviny azy ny helony taloha, rahefa voasambotra izy. ²⁹ Koa izao no lazain'ny Tompo Iaveh: Noho hianareo nampahatsiaro ny helokareo, tamin'ny nampihariharianareo ny hadisoanareo sy nanehoanareo ny fahotanareo tamin'izay rehetra nataonareo, ka nanao izay hahatsiarovana anareo, dia nosamborin-tànana hianareo.

³⁰ Ary hianao, ry ilay afa-pahamasinana, mpanjaka ratsy fanahin'Israely, efa tonga ny andronao, amin'izao ipahan'ny fotoanan'ny faharatsiana; ³¹ ka izao no lazain'ny Tompo Iaveh: Ny hamama halàna; ny satro-boninahitra, hesorina; hakorontana izao rehetra izao; ny iva, hasandratra, ny avo, haetry. ³² Hataoko rava dia rava dia rava izany; tsy ho eo intsony izany, mandra-pihavin'ilay Tompon'ny fitsarana, izay hametrahako sy homeko an'izany. ³³ Ary hianao, ry zanak'olona, maminania, ka ataovy hoe: Izao no lazain'ny Tompo Iaveh mamely ny taranak'i Amona, sy ny amin'ny faniratsirany. Lazao hoe: Ny sabatra, ny sabatra efa voatsoaka handringana: voafotsy izy handevona sy handefa tselatra, ³⁴ - dia ny mbola ahitana zava-poana hianao, sy fambara mamitaka, hampiraisana toerana anao amin'ny fatin'ny ratsy fanahy voatolotra ho an'ny sabatra, fa efa tonga ny androny amin'izao ipahan'ny fotoanan'ny faharatsiana.

³⁵ Ampidiro amin'ny tranony ny sabatrao; fa eo amin'ny toerana nahariana anao, eo amin'ny tany nahaterahanao, no hitsarako anao.

³⁶ Hampidiniko aminao ny havinirako; hotsofiko aminao ny afom-pahatezerako; ary hatolotro eo an-tànan'ny olona adala hianao, sy amin'ny mpanao fandringanana.

³⁷ Hohanin'ny afo hianao, ny rànao dia ho eo afovoan'ny tany, ary hianao tsy hotsarovan'ny olona; fa izaho Iaveh no niteny.

Toko faha-22

¹ Tonga tamiko ny tenin'ny Tompo, nanao hoe:

² Ary hianao, ry zanak'olona, moa hitsara va hianao, moa hitsara ny tànana mpandatsa-dra va hianao? Ampahafantaro azy avokoa ny fahavetavetany; ³ ka ataovy hoe: Izao no lazain'ny Tompo Iaveh: Ry tanàna mpandatsa-dra ao anatiny, hahatonga ny fotoanany sy mivongika sampy vetaveta hahaloto azy. ⁴ Tonga meloka hianao, tamin'ny ra nalatsakao; nandoto tena, tamin'ny sampy vetaveta nataonao; ary nanafaingana ny andronao tamin'izany ka tonga amin'ny fara taonanao; izany no nanaovako anao ho fandatsan'ny firenena amma-pihomehezan'ny tany rehetra. ⁵ Na ny akaiky, na ny lavitra, samy hanebaka anao, voaloto anarana sy be tabataba. ⁶ Indreto ny lehiben'Israely, eo aminao, fa samy mikezaka ny handatsa-dra, araka ny heriny avy.

⁷ Ao aminao, ny ray aman-dreny, tsiratsiraina; ao anatinao, ny vahiny, levilevena; ao aminao ny kamboty amam-pitondra-tena, ampahoriana. ⁸ Ny fitoerako masina, hamavoinao; ny sabatako, tevatevainao. ⁹ Ao aminao, misy olona manendrikendrika, mba handatsa-dra; ao aminao, misy mihinana eny an-tendrombohitra; ao anatinao, misy manao heloka be vava. ¹⁰ Ao aminao, misy manokatra ny fitanjahan-drainy; ao aminao, misy manao an-keriny amin'ny mararin'ny fadimbolany. ¹¹ Ny iray, manao fahavetavetana amin'ny vadin'ny namany; ny iray hafa, mifototra mandoto ny vinantovaviny ao aminao; ary misy koa mametaveta ny anabaviny zanakavavin-drainy. ¹² Ao aminao, misy mandray kolikoly handatsa-dra; manao zana-bola be loatra hianao, sady maka zana-bola, sy miharaka ny haren'ny namanao; ary izaho hadinonao, - teny marin'ny Tompo Iaveh. ¹³ Indro aho miteha-tànana, noho ny tombony azonao tsy an-drariny, sy noho ny ra izay eo aminao.

¹⁴ Moa hahazaka va ny fonao ary hahatoha ihany va ny tànanao, amin'ny andro hiasako hamely anao? Izaho Iaveh no nilaza ka hanatanteraka. ¹⁵ Haeliko any amin'ny firenena hianao, sy hahahako any amin'ny tany samihafa, ary hesoriko ho afaka aminao ny lotonao rehetra; ¹⁶ ka eo aminao hianao ho voaloto eto imason'ny firenena, dia ho fantatrao fa Iaveh aho. ¹⁷ Tonga tamiko ny tenin'ny Tompo, nanao hoe:

¹⁸ Ry zanak'olona, amiko ny taranak'Israely, dia efa niova ho tain-drendrika; izy rehetra dia varahana, fira-potsy, vy, ary fira-mainty ao anatin'ny memy; zary taim-bolafotsy izy. ¹⁹ Koa izao no lazain'ny Tompo Iaveh: Noho hianareo rehetra tonga taim-bolafotsy, noho izany, dia indro, hangoniko eo afovoan'i Jerosalema, hianareo. ²⁰ Toy ny fanangon'ny olona volafotsy, varahana, vy, fira-mainty, fira-potsy, ao afovoan'ny memy sy hofoforina harendrika, no hanangonako anareo, amin'ny fahatezerako amam-pahavinirako; hataoko ao hianareo ary hataoko rendrika. ²¹ Hanangona sy hifofotra anareo amin'ny afon'ny fahatezerako aho, ka ho voarendrika ao afovoan'i Jerosalema hianareo. ²² Toy ny fandrendrehana volafotsy ao anaty memy no hahavoarendrika anareo ao afovoany, dia ho fantatrareo fa izaho Iaveh, nampidina ny fahatezerako taminareo. ²³ Tonga tamiko ny tenin'ny Tompo, nanao hoe:

²⁴ Ry zanak'olona, lazao aminy hoe: Tany tsy voadio hianao, tsy voasasan'ny ranonorana, tamin'ny andron'ny fahatezerana.

²⁵ Misy firaisan-tetiky ny mpaminaniny eo afovoany. Toy ny liona mierona mamiravira ny hazany, dia mihinana ny fahany izy ireo; mifaoka ny fananana sy ny rakitra, mampitombo isa ny mpitondratenany eo afovoany. ²⁶ Ny mpisorony, nandika ny lalàko, nandoto ny fitoerako masina; tsy manavaka ny masina sy ny tsy masina; tsy mampianatra ny maha-samihafa ny maloto sy ny madio, mamily maso tsy hijery ny sabatako; ary tsiratsiraina aho, eo afovoan'izy ireo. ²⁷ Ny lehibeny, eo afovoany, toy ny amboadia mamiravira haza, dia mandatsa-dra, mahavery fanahy hahazoana tombony. ²⁸ Ny mpaminaniny manarontsarona izany heloka rehetra izany, mahita fahitana zava-poana amam-paminaniana lainga, milaza ahoe: Izao no lazain'ny Tompo Iaveh, nefa Iaveh tsy niteny tsinona. ²⁹ Ny vahoaka amin'ny tany manao an-keriny, mandroba lava, manitsakitsaka ny ory sy ny mahantra, ary mampahory tsy an-drariny ny vahiny. ³⁰ Nitady aho, raha misy olona eo aminy, manao manda sy mitsangana eo amin'ny banga, eo anatrehako, hiaro ny tany mba tsy handravako azy, nefa tsy nahita aho. ³¹ Ka dia naidiko teo aminy, ny fahatezerako; nolevoniko tamin'ny afon'ny hatezerako izy; natsingeriko teo an-dohany, izay nataony, - teny marin'ny Tompo Iaveh.

Toko faha-23

¹ Tonga tamiko ny tenin'ny Tompo nanao hoe:

² Ry zanak'olona, nisy vehivavy anankiroa, zanaky ny reny anankiray.

³ Izy ireo dia nijangajanga tany Ejipta, nijangajanga tamin'ny andro fahatanorany; tany no namihinana ny nonony, tany no nanindriana ny tratran'ny fahavirijiniany.

⁴ Izao no anaran'izy ireo: Oollà, ny zokiny, ary Oolibà, ny rahavaviny. Ahy izy ireo teo aloha, ary niteraka zazalahy aman-jazavavy. Ny amin'ny anarany dia izao: Samaria, no Oollà; Jerosalema, no Oolibà.