Evanjely Masin'i Jesoa-kristy Nosoratan'i Md. Marka

Toko faha-14

³⁷ Dia nankeo amin'ny mpianany izy, ka nahita azy natory, ary nilaza tamin'i Piera hoe: Ry Simona, matory va hianao? Tsy nahari-tory ora iray akory va hianao? ³⁸ Miambena hianareo, ary mivavaha, mba tsy ho latsaka amin'ny fakam-panahy. Marisika ihany ny fanahy, fa ny nofo no osa. ³⁹ Dia lasa indray izy nivavaka, ka ilay teny teo ihany no nataony. ⁴⁰ Nony niverina indray izy, dia nahita azy natory fa efa nilondolondo ny masony, ka tsy hitan'izy ireo izay havaly azy. ⁴¹ Ary niverina fanintelony izy, ka nanao taminy hoe: Matoria amin'izao hianareo, ary mialà sasatra. - Aoka izay; tonga ny fotoana: indro hatolotra eo an-tànan'ny mpanota ny Zanak'olona. ⁴² Mitsangàna hianareo, andeha isika: indro efa akaiky ilay hamadika ahy. ⁴³ Niaraka tamin'izay raha mbola niteny izy, dia tamy Jodasy Iskariota isan'izy roa ambin'ny folo lahy, mbamin'ny vahoaka be nitondra sabatra sy langilangy, nirahin'ny lohandohan'ny mpisorona sy ny mpanora-dalàna ary ny loholona.

⁴⁴ Izy ireo dia efa nomen'ilay mpamadika azy famantarana toy izao: Izay horohako no izy, ka sambory, ary ento tsy amim-pisalasalana. ⁴⁵ Vantany vao tonga izy dia nanatona an'i Jesoa ka nanao heo: Arahaba, Raby, dia nanoroka azy izy. ⁴⁶ Ary nosamborin'ireo izy, dia nohazoniny. ⁴⁷ Fa ny anankiray amin'izay teo aminy nanatsoaka sabatra, dia namely ny mpanompon'ny lehiben'ny mpisorona, ka nahafaka ny sofiny an'ila. ⁴⁸ Ary niteny Jesoa ka nanao tamin'izy ireo hoe: Mova tsy ny hisambotra jiolahy no fihavinareo nitondra sabatra sy langilangy hisambotra ahy! ⁴⁹ Teo aminareo isan'andro aho, nampianatra teo amin'ny tempoly, kanefa tsy nosamborinareo, fa izany no ahatanterahan'ny Soratra Masina. ⁵⁰ Dia nandao azy ny mpianany rehetra fa lasa nandositra. ⁵¹ Ary nisy tovolahy anankiray nanaraka azy, lamba fotsiny no teny an-kodiny, nosamborin'ireo koa; ⁵² dia nariany ny lambany, ka lasa nandositra niboridana izy. ⁵³ Ary Jesoa nentin'izy ireo ho any amin'ny lehiben'ny mpisorona izay nivorian'ny lohandohan'ny mpisorona rehetra sy ny mpanora-dalàna ary ny loholona.

⁵⁴ Piera kosa nanaraka azy teny lavidavitra eny hatrany an-tokotanin'ny lehiben'ny mpisorona, dia niara-nipetraka tamin'ny mpanompo teo anilan'ny afo, sy namindro. ⁵⁵ Tamin'izay ny lohandohan'ny mpisorona sy ny mpisaina rehetra dia nitady izay hiampangana an'i Jesoa hamonoany azy, nefa tsy nahita; ⁵⁶ fa maro no niampanga lainga azy, nefa tsy nifanaraka ny fiampangany. ⁵⁷ Nony inona dia nisy nitsangana niampanga lainga azy nanao hoe: ⁵⁸ Renay izy io nanao hoe: Horavako ity tempoly nataon-tànana ity, dia hanangana hafa tsy nataon-tànana indray aho amin'ny hateloana; ⁵⁹ fa tsy nifanaraka ny fiampangany na dia tamin'izany aza. ⁶⁰ Dia nitsangana teo afovoan'izy rehetra ny lehiben'ny mpisorona, ka nanontany an'i Jesoa hoe: Nahoana no tsy valianao izany fiampangan'ireo anao izany? ⁶¹ Fa tsy niteny izy, na namaly akory. Dia nanontany azy indray ny lehiben'ny mpisorona nanao hoe: Hianao va no Kristy Zanak'Ilay isaorana? ⁶² ka novalin'i Jesoa hoe: Izaho no izy; ary ho hitanareo ny Zanak'olona mipetraka eo an-kavanan'ilay mahefa ny zavatra rehetra sy avy eo ambonin'ny rahon'ny lanitra. ⁶³ Dia notriarin'ny lehiben'ny mpisorona ny fitafiany, ka hoy izy hoe: Inona indray no ilantsika vavolombelona? ⁶⁴ Efa renareo teo ny nitenenany ratsy an'Andriamanitra, ka ahoana no hevitrareo? Dia nataon'izy rehetra fa mendrika ho faty izy, ⁶⁵ ka ny sasany nandrora azy, dia nanarona ny tavany, sy namely totohondry azy ary nanao hoe: Vinanio; ny mpanompo avy no namely tehamaina azy. ⁶⁶ Ary raha mbola teo ambany amin'ny tokotany Piera, dia nankeo aminy ny anankiray tamin'ny ankizivavin'ny lehiben'ny mpisorona.

⁶⁷ Nony nahita an'i Piera namindro izy, dia nijery azy, ka nanao taminy hoe: Hianao koa naman'i Jesoa Nazareana. ⁶⁸ Fa nolaviny hoe: Tsy fantatro, ary tsy azoko akory izay lazainao. Dia nivoaka nankany alatrano izy ary naneno ny akoho. ⁶⁹ Fa nahita azy indray ilay ankizivavy, ka nilaza tamin'izay teo hoe: Naman'ireny koa io lehilahy io; ⁷⁰ fa nandà indray izy. Nony afaka kelikely, dia hoy indray ny olona teo tamin'i Piera: Naman'ireny tokoa hianao, fa Galileana koa. ⁷¹ Tamin'izay sady niozona izy no nianiana hoe: Tsy fantatro akory izany lehilahy antsoinareo izany. ⁷² Niaraka tamin'izay dia naneno fanindroany ny akoho. Ary tsaroan'i Piera ilay teny nolazain'i Jesoa taminy hoe: Tsy mbola haneno fanindroany akory ny akoho, dia handà ahy intelo hianao; ka dia nitomany izy.

Toko faha-15

¹ Raha vao maraina koa ny andro, ny lohandohan'ny mpisorona dia niara-nihevitra tamin'ny loholona sy ny mpanora-dalàna ary ny mpisaina rehetra, ka namatotra an'i Jesoa, dia nitondra azy sy nanolotra azy tamin'i Pilaty.

² Ary Pilaty nanontany azy hoe: Hianao va no mpanjakan'ny Jody? Dia namaly izy ka nanao taminy hoe: Voalazanao. ³ Ary maro ny zavatra niampangan'ny lohandohan'ny mpisorona azy, ⁴ ka nanontany azy indray Pilaty nanao hoe: Tsy mamaly akory va hianao? He izato hamaroan'ny zavatra iampangany anao! ⁵ Fa tsy namaly intsony Jesoa na dia kely aza, ka gaga Pilaty. ⁶ Ary isaky ny fetin'ny Paka dia fanaony ny mandefa mpifatotra iray, izay angatahin'ny vahoaka ;

⁷ ka nisy kosa lehilahy iray atao hoe Barabasy niara-nifatotra tamin'ny mpikomy namany, satria nahafaty olona tamin'ny fikomiana. ⁸ Dia niakatra ny vahoaka ka nangataka azy mba hanao araka izay fanaony aminy; ⁹ fa namaly Pilaty nanao hoe: Tianareo va raha ny mpanjakan'ny Jody no alefako ho anareo? ¹⁰ satria fantany fa fialonana no nanoloran'ny lohandohan'ny mpisorona azy taminy. ¹¹ Kanjo ny mpisorona namoky ny vahoaka fa aleo Barabasy no halefany ho azy. ¹² Ka hoy indray Pilaty taminy: Inona àry no tianareo hataoko amin'ilay antsoinareo hoe mpanjakan'ny Jody? ¹³ Dia niantso indray izy ireo nanao hoe: Fantsiho amin'ny hazo fijaliana izy. ¹⁴ Fa inona àry no ratsy nataony? hoy Pilaty taminy. Dia vao mainka niantso mafimafy kokoa izy ireo nanao hoe: Fantsiho amin'ny hazo fijaliana izy.